Matíe 19
19
Ŋwnɔ́ yà ɔ́ nyɩtʋ sɔ́ nɩ́ ka lé a ká yɩ́wʋ́wlʋʋ̀
(Málɩ́kɩ 10.1‑12; Matíe 5.31‑32)
1Zozíi bhɩa cɩ́acʋ́ zɔ̀ a, ɔ́ɔ wlʋ́ Galilée lé ɔ́ mʋ Zudée mɔ̀ a nyíéé á wlele Zrʋdɛ́ɛ a bɩ́. 2Nyʋa kɔ́kɔ́mnɩ́ jɩ́ ɔ́ mɔ̀ɔmɔ̀ kʋ́, lé ɔ́ yalɩma a nyièdɩ a gupuonyʋa. 3Mà Falizɩ́ɛnyʋa á zùò yio zɔ̀ sa ka a, á yrɔ́ɔ́ mà: «Cɩ́anyɔ, nyɔ a ŋwnɔ́ nɩ nɩ wɔlɩ́ a, ɩ́ yi saàna kʋʋ, ɩ́ yi ŋnɩ́ ka lé ɔ́ yio glù sa a?» 4Bhʋ́ Zozíi srʋ á mà: «A nɩ́ à zà Lagɔ̀bɔ̀gʋ a mnɩ́ zɛɛ, lé a ká nú mà: Zɩkpa a bháàda a, Lagɔ nɩ yʋwlɩ lé ɔ́ nɩ ŋwnɔ́.#19.4 A zɛlɩɩ sáà Bháàda 1.27; 5.2. 5Lé ɔ́ anɩ́: Ɩ́mɩ́ kà ŋnɩ́ a zà, Nyɔ yi ɔ Tʋ́ yà ɔ Nɛ́ sɔ́ gɔ̀ wlʋ́, lé ɔ yà ɔ ŋwnɔ́ sɔ́ yi jányɩ, lé á yi lɛ́ a múó plɩ́.#19.5 A zɛlɩɩ sáà Bháàda 2.24. 6A nɩ́ ka yɩ́ sɔ́ bhli, á ŋwɔ́ɔ yɩ́ lɛ́ a múó. Lɛ́ɛ́ Lagɔ ya jányɩ a, nyɔ ná sɩsa yɩ́ mɛ́ yɩ́!»
7Lé á srʋ ɔ́ mà: «Bhè ɛ̀kʋ̀ʋ̀ bhè Moyízɩ a Jràmáá nie mà, nyɔ nɩ nɩ́ yɩ́ ŋwnɔ́ yrá, lé ɔ nɩ cí mà ɔ kɔ́ɔ́ glù sa a, ɔ gbɛlɔɔ́ bɔ́gʋ jɩ̀, bɔ́gʋ̀ɔ̀ ʋ̀ cíé mà ɔ nɩ́ yrá yɩ́ ŋwnɔ́ɔ́ a, fɩ́ɛ́ lé ɔ kɔ́ɔ́ glù sa a?#19.7 A zɛlɩɩ sáà Detro 24.1‑4.»
8Bhʋ́ Zozíi srʋ á mà: «A nyúkwlí tɛmɛ kà ŋnɩ́ a zà Moyízɩ ŋwnʋ́ʋ mà a sa a ŋwná glù, mà kɔ́ wlʋ́ a, sɩ́tɛ̀ mʋ́ ɩ nɩ́ wá kʋ. 9Mà ná srʋɛ sáà yɩ́ lɛ́ amɔ mà, ŋwnɔ́ nɩ nɩ́ bheyi li lé ɔ nyɩtʋ nɩ sɔɔ́ glù lé ɔ nɩ bhá ŋwnɔ́ ànɔ a, bhʋ́anɩ nyɔɔ́ ya ŋnɩ́gbʋ yɛ́.»
10Ɔ́ cí sɩ́tɛ̀ a, bhʋ́ ɔ́ kʋjɩ̀nyʋ̀àà srʋ ɔ́ mà: «À mà sɩ́tɛ̀ mʋ́ ɩ ká kʋ a, Kanyɔɔ̀, nyɔ nɩ́ ka bhlɛ́ síi.» 11Bhʋ́ ɔ́ srʋ á mà: «Nyʋa fɩ́ɛ́ má nɩ́ɩ ŋwnʋ́ bhʋ́anɩ wɔlɩ́ɛ́ lɩ̀à kʋ́, mà nyʋa àna Lagɔ nie lé à míle ɩ́ gbɩdɩ̀ɛ̀ a, ámá à ŋwnʋ́lɩɩ́ kʋ́. 12Wɔlɩ́ kɔ́kɔ́mnɩ́ kalɛ ŋnɩ́ lé nyʋa àna nɩ́ míi sísíé, nyʋa àna bhɩ́ɩ́ mnɩ́, lé nyʋa àna kʋ ʋ́ lé aliyrukanyʋa ŋwʋ́ɛ́ à mɩ́ mʋ́, á nie lé a nɩ́ yuwle ŋwɔ́ɔ, àna kʋ ʋ́ lé a nɩ́ yrá sísíé Lagɔ a Léyibhlɩɛ́ a zà. Ɔ̀ nɩ̀ yi míi lé ɔ̀ yi bhʋ́anɩ wɔlɩ́ɛ́ kʋ́ ŋwnʋ́ a, ɔ ŋwnʋ́lɩɩ́ kʋ́.»
Zozíi gbo yúó kʋ́
(Málɩ́kɩ 10.13‑16; Lúkɩ 18.15‑17)
13Tányɩ a múó nyʋa fa Zozíi yúó gɔ̀, ɩ́mɩ́ ŋwɔ́ɔ mà ɔ gbɛ laa gblɔ̀gbɩ́ jɩ̀ ɔ́ ká a wlú bhibhie. Mà nyʋaá à fa yúóó a, Zozíi a kʋjɩ̀nyʋ̀àà lɩ́kpɩ laa kʋ́. 14Bhʋ́ Zozíi srʋ á mà: «A cíe yúó sá a ká mɔ́ɔ gɔ̀ yi, a ná yɩa á kwlɩ́, mà Lagɔ a Léyibhlɩɛ́ nyɔɔ́ nà kà wlʋ́ mànɩ́ yʋ́ a, ɔ́mɔ́ kɛ̀ɛ̀.» 15Lé Zozíi gbɛ yúóó glɔ̀gbɩ́ jɩ̀ lé ɔ́ mʋ.
Léyizɔ̀kpɩyʋ
(Málɩ́kɩ 10.17‑31; Lúkɩ 18.18‑30)
16Nyɔ a múó ŋnɩ Zozíi gɔ̀ lé ɔ́ yrɔ́ɔ́ mà: «Kanyɔɔ̀, náma wɔlɩpɩʋ gbá mʋ́ ɩ́ yi nɩ, bhè ɩ́ yi kɔ́ɔ́ ʋ̀ nɩ́ bhɩàda ka a, yɛ́ a?» 17Zozíi srʋ ɔ́ mà: «Ɛ̀kʋ̀ʋ̀ lé ɩ̀ yra lɛ mɔ́ɔ námɛ a niníé a wɔlɩ́ kʋ́ à? Lagɔ a múó coco naa. Nɩ̀ yrá lé kà kɔ́ɔ́ ʋ̀ nɩ́ bhɩàda ka a, yɛ́ a, ŋwʋ́ Lagɔ a Jràmáá kpá.» 18Nyɔɔ́ anɩ́: «Jràmá àna gbá a?» Zozíi anɩ́: «Nàa bhlá nyɔ, nàa bháʋ́ ɩ̀ liyʋ a ŋwnɔ́, nàa ghlíì, nàa nɩ kpɔkpláŋwɔ̀nɩ̀srɩ̀lɛ, 19ŋwʋ́ ʋ́ ɩ̀ tʋ́ lé ɩ̀ nɛ́, ɩ́zà cémʋ́ ɩ̀ wà ɩ̀ nyoku a, wà sɩ́tɛ̀ ɩ̀ liyʋ.#19.18‑19 A zɛlɩɩ sáà Námɛɛ́ 20.12‑16; Detro 5.16‑20; Levíi 19.18.»
20Zɔ̀kpɩ́yʋɔ́ anɩ́: «Másɛɛ̀, jràmáá fɩ́ɛ́ lɩ̀à, ɩ́ ŋwʋ́ɛ́ a lɔ̀fɩ́ɛ́ kpá lé ɩ́ bhɩa mɔ̀ɔ, dré gbá tuo yɩ́ sɔ́kʋ́ mɔ̀ a?» 21Bhʋ́ Zozíi srʋ ɔ́ mà: «Nɩ̀ yrá lé nà nɩnɩgbɩ ká Lagɔ a drɩ̀ sá srí a, ŋwʋ́ nà kakalɩɛ́ fɩ́ɛ́ pɛ́lʋ́, lé bhábha moníe ŋazɩ̀nyʋa mà ɩ̀ yi Lagɔ̀duú mɔ̀ léyri li, lé yi lé kà mɔ́ɔ kʋ́ jɩ́!» 22Mà tányɩɛ́ mʋ́ zɔ̀kpɩ́yʋɔ́ nú wɔlɩ́ɛ́ Zozíi cí a, kpɩkpɩ wɔtɔmalɔɔ́ gɔ̀, ɔ nɩ́ né sa lé ɔ́ mʋ ɔ léyri a zumole a zà. 23Lé Zozíi srʋ ɔ́ kʋjɩ̀nyʋ̀àà mà: «Cɩ́cása lé náa srʋɛ amɔ mà lóo ká Lagɔ a Léyibhlɩɛ́ a mnɩ́ pla a, ɩ́ ka kpanyɩ gbʋ́! 24Náa srʋɛ sɔ́kʋ́ amɔ mà, lóo ká Lagɔ a Léyibhlɩɛ́ a mnɩ́ pla a, ɩ́ ka gbʋ́ lé ɩ́ zi mnagwlì ká kwʋɛ́ a fleé a mnɩ́ blée a kʋ́.» 25Mà kʋjɩ̀nyʋ̀àà nú wɔlɩ́ɛ́ Zozíi cí a, neé mnaá, bhʋ́ á yrá a nyoku mà: «Nyɔ gbá yi míi lé ɔ̀ yi ʋ́ neé wlʋ́ a?» 26Lé Zozíi dʋdʋ̀ a, lé ɔ́ srʋ á mà: «Wɔlɩ́ɛ́ nyɔ nɩ́ ka míi a, Lagɔ yi míi, wɔlɩ́ nɩ́ kɔ́ kʋ lé ɩ ká Lagɔ sɩa.» 27Bhʋ́ Pɩ́ɛ́lɩ yrɔ́ɔ́ mà: «Kanyɔɔ̀, bhè àmɔ̀ɔ wlʋ́ à lɩ́ɛ́ fɩ́ɛ́ gɔ̀ lé à jɩ́ mɔ̀ kʋ́ a, cégbá mʋ́ à nɩ kɔ́ɔ́ na ká kʋ á?» 28Zozíi anɩ́: «Cɩ́cása, ná srʋɛ amɔ mà, tányɩɛ́ mʋ́ Nyɔɔ́ a Yuwliyʋɔ́ na ká ɔ léyikpoó jɩ̀ bɔ́ɔ kɔ́ yalʋɔ́ ɔ̀ yie a tányɩɛ́ a, bhʋ́ amɔɔ́ jɩ́ mɔ́ kʋ́ a, a sɛ́fʋɔ́ a na ká sáà léyikpi a kʋ́gbá sɔ́ jɩ̀ bɔ́ɔ̀ ɔ́mɔ́ bhísakʋ́, lé a ká Izrayɛ́lɩ a lɔ́lɔ́kpɩɛ́ kʋ́gbá sɔ́ɔ́ plɔɔ. 29Nyɔɔ́ nà kà ná ŋnɩ́ mʋ́ ɔ ghlɩ tɩ, ɔ nɩ́ayúó tɩ, ɛ́ yi náa ɔ tʋ́ ò, ɔ nɛ́ ò, ɔ yúó ò, ɔ lágbɩ ò, bhʋ́anɩ nyɔɔ́, lɩ́ɛ́ fɩ́ɛ́ ɔ́ wlʋ́ lɛ́ sɩ́tɛ̀ gɔ̀ a, ɔ́ yi ɩ cí a gwlɩ̀ gbɩ́ yɛ́, fɩ́ɛ́ lé kɔ́ɔ́ ʋ̀ nɩ́ bhɩàda ka a, ɔ́ yi ʋ́ yɛ́. 30A lɛ́bhɛɛ, nyʋa fɩ́ɛ́ kʋ̀ lɛ́ drɩ̀ a, kɔ́kɔ́mnɩ́ kʋ ʋ́ lé á yi bɩ́ plɩ́ɩ̀, lé nyʋa kʋ bɩ́ a, kɔ́kɔ́mnɩ́ yi drɩ̀ plɩ́ɩ̀.»
Currently Selected:
Matíe 19: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
