Matíe 17
17
Zozíi a klʋ́dàgblà cɩ́cɩ plátatata
(Málɩ́kɩ 9.2‑13; Lúkɩ 9.28‑36)
1Yri gbɩ́flɔ́ plɩ́ a, Zozíi bhá Pɩ́ɛ́lɩ, Zákɩ yà ɔ́ nɩ́ayʋ́ Záan sɔ́ lé ɔ yà sɔ́ wlʋ́ʋ dú gwá lé á gbʋ́gbʋ̀ kíkíkáda a múó wlú. 2Á kʋ Zozíi gɔ̀ lé ɔ klʋ́dàgblà cɩ́cɩ, lé á plɩ́ plátatata nànɩ́ cémʋ́ yrʋ́gàvlà lʋɛ a, lé ɔ kótié a sɛ́fʋ pɔ́lʋma nápɛ bhísakʋ́. 3Fɩɩn bhè vʋ̀à, bhlagɔ̀gɔ̀nyʋ̀àà à ŋwɔ́ɔ wá Lagɔ a nékʋ́cinyʋaá a, pla, Moyízɩ lé Elíi, a yà Zozíi sɔ́ cíé. 4Lé Pɩ́ɛ́lɩ srʋ Zozíi mà: «Kanyɔɔ̀, dɛ́ náa námasa lé à kà ʋ́ sí, nɩ̀ wà a, ká ʋ́ gbògbí a ta srí, nàa nʋ, Moyízɩ a nʋ, lé Elíi a nʋ.» 5Pɩ́ɛ́lɩ kʋ àyɩ cíida lé jrùu wlʋ́ lagɔɔ́ lé ʋ́ gbí á wlú, bhè niwɔlɩ laa jrù a mnɩ́: «Ɔ̀lɩa ná Wàwàyʋ kʋ̀ʋ! Ná yʋ́ɔ́ ná duo bhá mɔ̀ɔ a, ɔ́mɔ́ kʋ̀ʋ, a pʋɔ nyúkwlí!» 6Mà tányɩɛ́ mʋ́ kʋjɩ̀nyʋ̀àà nú cícíwɔlɩɛ́ a, ŋanɩmɛɛ́ yilaá kʋ́, ɛ́ nɩ á lé á sra sra wɛ́ sá. 7Lé Zozíi ŋnɩ á gɔ̀ lé ɔ́ gbɔ́gbɔ̀ a, lé ɔ́ srʋ á mà: «A soglù, ŋanɩmɛ ná bhlá amɔ.» 8Lé á bhá wɛ́ kʋ́, á dʋdʋ̀ a, Zozíi a múó coco srí ʋ́.
9Tányɩɛ́ mʋ́ á wlʋ́ kíkéé wlú a, Zozíi nyɛ́ á tába lé ɔ́ srʋ á mà: «A ná srʋ nyɔ wɔlɩ́ɛ́ fɩ́ɛ́ a yɛ́ lɛ́ a, bhè Nyɔɔ́ a Yuwliyʋɔ́ ká fɩ́ɛ́ galɔ̀.»
Elíi a wɔlɩ́
10Bhʋ́ kʋjɩ̀nyʋ̀àà yrɔ́ɔ́ mà: «Kanyɔɔ́, ɛ̀kʋ̀ʋ̀ bhè lɔ̀ a másɛnyʋaá nie mà Elíi#17.10 Elíi: Lagɔ cí wá mà ɔ́ yi Izrayɛ́lɩnyʋa a ʋ́ neésanyɔ mʋ́ gbázɩ̀ lé ɔ́ yio cíe, ɔ́mɔ́ nyɔɔ́ a nékʋ́cinyɔɔ́ mɔ́ ŋwɔ́ɔ Elíi. A zɛlɩɩ sáà Mala 3.22‑23. yi fɩ́ɛ́ yi lé bhʋ́anɩ yruó yi ŋnɩ a?» 11Bhʋ́ Zozíi srʋ á mà: «Elíi yi cícása yi lé ɔ́ yi nɩnɩgbɩ̀ɛ̀ fɩ́ɛ́ gɩglà. 12Mà náa srʋɛ amɔ mà Elíi ya wá yi mà zɩkpa zɔ̀ a nyʋa nɩ́ ɔ́ yɩbhlɩ lé á bhliloó cémʋ́ á wà a kʋ́. Sɩ́tɛ̀ mʋ́ á na ká sáà Nyɔɔ́ a Yuwliyʋɔ́ kalɩmɛ mʋ́ ŋwʋ́.» 13Wɔlɩ́ɛ́ Zozíi cí lɛ́ sɩ́tɛ̀ a, ɩ́mɩ́ kʋjɩ̀nyʋ̀àà nú, bhʋ́ á yɩbhlɩ saá mà Zán Batísɩ ɔ́ sa.
Zɔ̀ bhli gu a bhlányɔ yalɩma
(Málɩ́kɩ 9.14‑29; Lúkɩ 9.37‑43)
14Tányɩɛ́ mʋ́ Zozíi yà ɔ́ kʋjɩ̀nyʋ̀àà sɔ́ ŋnɩ nyʋaá kʋ̀ la ʋ́ a gɔ̀ a, nyɔ a múó yi lé ɔ́ sra ɔ́ drɩ̀ koti sá 15lé ɔ́ srʋ ɔ́ mà: «Kanyɔɔ̀, Ɩ́bhìè yɛ́ ná yʋ́ɔ́ lɩ̀à ŋazɩ kʋ́ àyé, mà zɔ̀ bhli gu bhlɔɔ́, pɛpɛkalɩmɛ ʋ nɩ́ yɛ́, ʋ́ pápalɔɔ́ kɔ́ɔ̀kɔ́ kosuú, ʋ́ pápalɔɔ́ sáà kɔ́ɔ̀kɔ́ nyɩ́é. 16Ɩ́ lɔɔ́ nà kʋjɩ̀nyʋ̀àà gɔ̀ mà a nɩ́ míi lé a kɔ́ɔ́ yalɩma.» 17Bhʋ́ Zozíi bhɩa wɔlɩ́: «Mɔ́nyùmònyʋa yɩ, a nɩ́ Lagɔ a fádùò ka, amɔ kamnɩ́nyʋa, a dùòkʋ́ tányɩ zùò ná ká amɔ gɔ̀ zi á? Lé ká kɔ́ɔ̀kɔ́ sɩ́tɛ̀ amɔ gbɩdɩ̀ a? A la mɔ́ɔ dɛ́ yʋ́ɔ́ gɔ̀.» 18Á la yʋ́ɔ́ a, Zozíi gáa nyumozùzùò kʋ́ lé ʋ́ wlʋ́ yʋ́ɔ́ jɩ̀, ɔ́ kʋ dáamúó lé ɔ́ yalɩma.
19Bhʋ́ kʋjɩ̀nyʋ̀àà ŋnɩ Zozíi gɔ̀ lé á yrálɔɔ́ gbanyɩ kʋ́: «Kanyɔɔ̀, ɛ̀kʋ̀ʋ̀ bhè àmɔ̀ à nɩ́ nyumozùzùò a jɩ́lɛ míi a?» 20Bhʋ́ Zozíi srʋ á mà: «A fádùò nɩ́ zù ɩ́ zà, mà cícása a mnɩ́, náa srʋɛ amɔ mà, a fádùò ná wlʋ́ mànɩ́ siyue tòtòyilɛ̀ɛ̀ ŋwɔ́ɔ mutádɩ̀yie a, a yila míi lé a yila kíkéé lɩ̀à srʋ mà a wlʋ́ bhlekʋ́ lé á yila bhlekʋ́ wlʋ́, lé wɔlɩpɩʋ niníé nɩ́ ká la amɔ sɩa. [21Lé bhʋ́anɩ nyumozìzi cèè lɩ̀à ká nyɔ jɩ̀ wlʋ́ a, nɩ̀ nɩ́ kleé pʋ́ʋ lé nɩ̀ nɩ́ bhibhie a, ɩ nɩ́ mʋ.#17.21 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]»
Zozíi cí ɔ kwɩ́ yà ɔ galɔ̀ wɔlɩ́ sɔ́
(Málɩ́kɩ 9.30‑32; Lúkɩ 9.43‑45)
22Yruú a múó kʋ́, Zozíi yà ɔ́ kʋjɩ̀nyʋ̀àà sɔ́ ŋnɩlɔ̀ Galilée wlú lé ɔ́ srʋ á mà: «Nyɔɔ́ a Yuwliyʋɔ́, á yio nyʋa wlɩ pɛ́lʋ́ ŋwʋ́ 23á yio bhlá, mà tayruó kʋ́ ɔ́ yi galɔ̀.» Ɔ́ cí sɩ́tɛ̀ a, kpɩkpɩ wɔtɔma ɔ́ kʋjɩ̀nyʋ̀àà gɔ̀.
Zozíi pɛ́ɛ lapóo
24Tányɩɛ́ mʋ́ Zozíi yà ɔ́ kʋjɩ̀nyʋ̀àà sɔ́ ŋnɩ Kapɛnayʋ́mʋ a, nyʋaá à bhlie Lagɔ̀wlʋ̀ a lapóo kʋ́ a, á yi Pɩ́ɛ́lɩ yrá ka mà: «A kanyɔɔ́, ɔ́ pɛ́lɛ Lagɔ̀wlʋ̀ a lapóo?» 25Pɩ́ɛ́lɩ anɩ́: «Aan ɔ́ pɛ́lɛ.» Pɩ́ɛ́lɩ pla kɔ́ɔ̀kʋ́ sré a, Zozíi tɛ̀tɛ̀ bháʋ́ niwɔlɩ lé ɔ̀ yrɔ́ɔ́ mà: «Simɔ́ɔ̀, cégbá mʋ́ ɩ̀ bhobho a? Nyɩ́kpɔcegbá à pɛ́lɛ zɩkpa zɔ̀ a léyuo gɔ̀ á lapóo a? Bhlɩ́ a mnɩ́ a nyʋa a pɛ́laá, mà lówùdùnyʋa pɛ́laá?» 26Pɩ́ɛ́lɩ ŋwnʋ́ kʋ́, ɔ́ anɩ́: «Lówùdùnyʋa pɛ́laá.» Zozíi anɩ́: «Àà naa sɩ́tɛ̀ mʋ́ ɩ nɩ kʋ a, bhlɩ́ a mnɩ́ a nyʋaá áa flíi! 27Mà ɩ nɩ ka nyʋaá dɩ kʋ́ ka a, mʋ jie gɔ̀ lé páa pelie, tagà zrɩ̀ɛ̀ nà kà kʋ́ bhli a, ka ɛ néé klʋ́ dʋdʋ̀ mɔ̀ɔ mà ɩ yi mɔ̀ɔ flèejìè ŋnɩɩ̀. Bhɛ́ɛ́ mɔ̀ɔ lé pɛ́ɛ ààà sɔ́ à wlú a lapóo!»
Currently Selected:
Matíe 17: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
