Matíe 16
16
Falizɩ́ɛnyʋa yà Sadisɩɛ́nyʋa sɔ́ yrálɛ Zozíi lɛ̀wɔ̀lɩ mʋ́
(Málɩ́kɩ 8.11‑13; Lúkɩ 12.54‑56)
1Tányɩ a múó Falizɩ́ɛnyʋa yà Sadisɩɛ́nyʋa sɔ́ yi Zozíi zɔ̀ sa ka, á yi a, á srʋ ɔ́ mà ɔ nɩ lɛ̀wɔ̀lɩ lé a kɩ́ɩ́ yɛ́ bhʋ́ á yi saá yɩbhlɩ mà Lagɔ cíeó. 2Bhʋ́ ɔ́ srʋ á mà: «Tányɩɛ́ mʋ́ yrʋ́ mnɛ bhè lagɔ̀yɩ̀ɛ̀ zalɩma a, a nie mà kɔ́ na ká námà. 3Lé geglìàmíí lagɔ̀yɩ nɩ tríma a, a nie mà, nyú na ká zɩmnɛ́ bhla a. A dʋdʋɛ lagɔ̀yɩ lé a yɩbhlɩɛ wɔlɩ́ɛ́ ɩ̀ nà kà ŋnɩ a, mà a nɩ́ míi lé a ká wɔlɩ́ɛ́ ɩ̀ ŋnɩɛ dɛ́ dʋ̀dʋ kʋ́ a mʋ́ sɩsa a! 4Zɩmnɛ́ a nyʋaá à nyù lé à nɩ́ mányɩ lagɔ̀wɔ̀lɩ a, amɔ à yrálɛ mɔ́ɔ lɛ̀wɔ̀lɩ mʋ́, ɛ̀ nɩ̀ nɩ́ ka Lagɔ a nékʋ́cinyɔ Zonásɩ a tányɩɛ́ a lɛ̀wɔ̀lɩ̀ɛ̀ ŋwɔ́ɔ a, a nɩ́ ka yɩ́ lɛ̀wɔ̀lɩ ànɩ yɛ́.» Zozíi cí lɛ́ sɩ́tɛ̀ a, ɔ́ɔ wlʋ́ á gɔ̀ lé ɔ́ mʋ.
Cémʋ́ Falizɩ́ɛnyʋa yà Sadisɩɛ́nyʋa sɔ́ cɩ́alɛ a
(Málɩ́kɩ 8.14‑21)
5Zozíi a kʋjɩ̀nyʋ̀àà drʋ lé a nɩ́ flɔ́ɔ fa lé á dí nyɩ́é a pɩ́ʋ́ ànʋ̀ɔ̀ a mnɩ́. 6Bhʋ́ Zozíi srʋ á mà: «A mányɩ Falizɩ́ɛnyʋa yà Sadisɩɛ́nyʋa sɔ́ a flɔ́ɔ pʋ́ a bháabháagɔ̀zɩ̀ɛ̀ kʋ́!» 7Ɔ́ cí sɩ́tɛ̀ a, ɔ́ kʋjɩ̀nyʋ̀àà srʋ a nyoku mà: «À nɩ́ flɔ́ɔ la a, ɩ́zà ɔ́ cíí.» 8Zozíi yɩbhlɩ wɔlɩ́ɛ́ á bhobho a, bhʋ́ ɔ́ srʋ á mà: «Ɛ̀kʋ̀ʋ̀ lé a bhobhoé kʋ sɩ́tɛ̀ a? A fádùò nɩ́ kɔ́ɔ̀kʋ́ zù! Ànɩ̀ gbá ŋwɔ́ɔ mà: À nɩ́ flɔ́ɔ ka a, ɩ́zà a? 9A nɩ́ àyɩ núu? A nɩ́ luo flɔ́ɔbhié gbɩ́ɛ́ a wɔlɩ́ɛ́ kʋ́ʋ? Nyʋa a dí sɔ́ lé gwlɩ̀ kʋ́gbá li lé flɔ́ɔ ji kʋ́ lé a fa ʋ pápɩ́, a nɩ́ luoo?#16.9 A zɛlɩɩ sáà Matíe 14.15‑21. 10Lé flɔ́ɔbhié gbàásɔ́ɔ́, nyʋa a dí sɔ́ li lé flɔ́ɔ ji kʋ́ lé a fa ʋ pápɩ́ a, a nɩ́ luoo wɔlɩ́ɛ́ fɩ́ɛ́ lɩ̀à kʋ́ʋ́?#16.10 A zɛlɩɩ sáà Matíe 15.32‑38. 11Ɩ́ srʋ amɔ mà a mányɩ Falizɩ́ɛnyʋa yà Sadisɩɛ́nyʋa sɔ́ a flɔ́ɔ pʋ́ a bháabháagɔ̀zɩ̀ɛ̀ kʋ́, a nɩ́ saá yì mà, flɔ́ɔ a wɔlɩ́ ɩ́mɩ́ nɩ́ cí la amɔ gɔ̀ɔ̀?» 12Bhʋ́ ɔ́ kʋjɩ̀nyʋ̀àà yɩbhlɩ yɩ́ saá mà bháabháagɔ̀zɩ̀ɛ̀ a wɔlɩ́ ɔ nɩ́ cí la, mà a ká la Falizɩ́ɛnyʋa yà Sadisɩɛ́nyʋa sɔ́ a cémʋ́ á cɩ́alɛ a kʋ́ mányɩ.
Pɩ́ɛ́lɩ anɩ́ Zozíi ŋwɔ́ɔ pʋ́anyɔ
(Málɩ́kɩ 8.27‑30; Lúkɩ 9.18‑21)
13Zozíi mʋ Sezalée, gɔ̀mnàà á wlele Filípʋ a, ɔ bhlé. Ɔ́ ŋnɩ mɔ̀ɔ a, ɔ́ yrá ɔ́ kʋjɩ̀nyʋ̀àà mà: «Bhè nyʋaá lɩ̀à, cégbá mʋ́ á bhobhole mɔ́ɔ ɔ̀ ŋwɔ́ɔ Nyɔɔ́ a Yuwliyʋɔ́ a zà a?» 14Á srʋ ɔ́ mà: «Nyʋa àna nie mà mɔ̀ ŋwɔ́ɔ Zán Batísɩ, àna anɩ́ mɔ̀ ŋwɔ́ɔ Elíi lé àna nie sɔ́kʋ́ mà mɔ̀ ŋwɔ́ɔ Zelemíi, ɩ́zà àna anɩ́, Lagɔ a nékʋ́cinyʋa àna a nyièdɩ a nyɔ ɩ̀ ŋwɔ́ɔ.» 15Bhʋ́ Zozíi yrá á mà: «Bhè amɔ mɔ̀glʋ̀ a zà, nyɔ gbá ɩ́ ŋwɔ́ɔ a?» 16Simɔ́ Pɩ́ɛ́lɩ anɩ́: «Mɔ̀ ŋwɔ́ɔ Kláyɩ́sɩ, Lagɔ a mʋ́gbàzɩ̀yʋ̀ɔ̀, Ŋwnúmʋlàgɔ a Yuwliyʋɔ́.» 17Zozíi bháʋ́ niwɔlɩ a, ɔ́ anɩ́: «Simɔ́ɔ̀, Zonásɩ a yʋ́ʋ̀, jɔ̀lʋ pla mɔ̀! Mà wɔlɩ́ɛ́ ɩ̀ cí lɛ́ a, nyɔ ɔ̀ nɩ́ mɔ̀ ɩ́mɩ́ ne ŋwʋ́, ɩ Tʋ́ɔ́ ɔ̀ kʋ̀ lagɔɔ́ a, ɔ́mɔ́ ŋwʋ́ mɔ̀ ɩ́mɩ́ neé. 18Mà mɔ́ɔ, náa srʋɛ yɩ́ lɛ́ sáà mɔ̀ mà mɔ̀ ŋwɔ́ɔ Pɩ́ɛ́lɩ#16.18 Pɩ́ɛ́lɩ: Pɩ́ɛ́lɩ ŋnɩɛ́ a gba ŋwɔ́ɔ cɔ́kʋ. cɔ́kʋɔ́ jɩ̀ na ká ná cɛ́cɩwlʋɔ́ pá a, lé nɩ pʋ́ʋ́ a, kwɩ́ a pɔ́wa nɩ́ kʋʋ́ neé bhɩa. 19Ɩ́ yi mɔ̀ Lagɔ a Léyibhlɩɛ́ a klóníyie nyɛ́, lé lɛ́ɛ́ nà kà dɛ́ Dʋ̀dʋkʋ́ gʋa a, ɛ́ yi ɔ̀ Lagɔɔ́ mɔ̀ɔ gʋalɔɔ̀, lɛ́ɛ́ nà kà dɛ́ Dʋ̀dʋkʋ́ vlulò a, ɛ́ yi ɔ̀ Lagɔɔ́ mɔ̀ɔ vlulò.» 20Lé ɔ́ nyɛ́ ɔ́ kʋjɩ̀nyʋ̀àà tába lé ɔ́ srʋ á mà: «A ná srʋ kɛ́ nyɔ mà mɔ́ɔ ŋwɔ́ɔ Kláyɩ́sɩ.»
Zozíi cí ɔ kwɩ́ a wɔlɩ́
(Málɩ́kɩ 8.31; 9.1; Lúkɩ 9.22‑27)
21Bhá yɩ́ lɛ́ ʋ́ jɩ̀ a, bhʋ́ Zozíi srʋ yɩ́ ɔ́ kʋjɩ̀nyʋ̀àà mà: «Ɩ́ ka lé ɩ mʋ Zelízalɛ́mʋ lé ɩ yɛ́ mɔ̀ɔ a dɔ̀panyʋa, mɔ̀ɔ a Lagɔ̀bʋ̀bɔ̀nyʋa káda, mɔ̀ɔ a lɔ̀ a másɛnyʋa a wlɩɩ́ kalɩmɛɛ́, lé a ká mɔ̀ɔmɔ̀ mɔ́ɔ bhlá, ká kú, lé tayruó kʋ́ ká galɔ̀.» 22Zozíi bhɩa kɔ́ɔ̀kʋ́ cícíé zɔ̀ a, Pɩ́ɛ́lɩ ɔ́ɔ wleloó gbanyɩkʋ́, lé ɔ́ sɔɔ́ wɔlɩ́ɛ́ ɔ́ cí a, neé lé ɔ́ srʋ ɔ́ mà: «Kanyɔɔ̀, wɔlɩ́ nɩ́ ka mɔ̀ ŋnɩ, Lagɔ yi ʋ́ mɔ̀ neé sa à!» 23Mà Zozíi yrɩ́bha lé ɔ́ gà Pɩ́ɛ́lɩ klʋ́ lé ɔ́ srʋ ɔ́ mà: «Wlʋ́ mɔ́ɔ gwá, Dɩ́blʋ̀ɔ̀! Nàa kɩkla mɔ́ɔ nyúzɔ yɩ́ kʋ́. Nyʋa bhísakʋ́ ɩ̀ bhobho, mà nɩɩ́ bhobho Lagɔ bhísakʋ́.»
Cégbá mʋ́ nyɔ yi Zozíi kʋ́ jɩ́ a?
24Zozíi srʋ ɔ́ kʋjɩ̀nyʋ̀àà mà: «Nyɔ nɩ yrá lé ɔ ká mɔ́ɔ kʋ́ jɩ́ a, ɔ wlʋ́ ɔ́ nyoku a gbʋ́, lé ɔ́ gbɩdɩ̀ ɔ kúsu lé ɔ́ jɩ́ mɔ́ɔ kʋ́. 25Nyɔɔ́ ɔ̀ nɩ̀ yrá lé ɔ̀ kà ʋ́ ɔ nyoku neé sa a, ɔ́ yi tuò, mà ɔ̀ nì yrá lé ɔ̀ kà ɔ nyoku tɩ ná zà a, ɔ́ yi ʋ́ neé wlʋ́. 26Nyɔ nɩ li dɛ́ zɩkpa zɔ̀ léyrie lé ɔ nɩ kú a, bʋ̀zɛ̀ gbá ɔ́ yɛ́ yɩ́ lɛ́ a? Lɛ́gbá kɛtɛkʋ́ nyɔ yi bhá lé ɔ́ yi ɔ́ zɩkpa mʋ́ gba áa? 27A lɛ́bhɛɛ, Nyɔɔ́ a Yuwliyʋɔ́ yà ɔ kplɔkplɔzìzi sɔ́ nà kà kɛ́zɔ̀ ɔ Tʋ́ a blɔ̀blɔ́ a mnɩ́ yii. Bhʋ́ ɔ́ na ká cémʋ́ ɩ̀ námnɩ Lagɔ drɩ̀ a, dʋdʋ̀ lé ɔ ká mɔ̀ dàzɩ̀. 28Ná srʋɛ amɔ cícása mà, nyʋa àna kʋ̀ dɛ́ àmɔ̀ nyièdɩ lé cémʋ́ Nyɔɔ́ a Yuwliyʋɔ́ na ká yi lóo bhísakʋ́ a, á yio fɩ́ɛ́ yɛ́, lé á yi kú.»
Currently Selected:
Matíe 16: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
