Záan 21
21
Zozíi flʋ ɔ́ kʋjɩ̀nyʋ̀àà yɩ́ Tibelíádɩ a nyíé gɔ̀
(Matíe 28.16; Lúkɩ 5.1‑11)
1Tányɩ plɩ́ a, Zozíi flʋ sɔ́kʋ́ ɔ́ kʋjɩ̀nyʋ̀àà yɩ́ Tibelíádɩ a jie gɔ̀.#21.1 Tibelíádɩ a jie, Galilée a jié a sɔ́ ŋnɩ kʋ̀ʋ. Cémʋ́ ɔ́ flʋlaa yɩ́ a, ɩ́mɩ́ ŋwɔ́ɔ mà, 2tányɩ a múó, Simɔ́ Pɩ́ɛ́lɩ lé Tomáa á wlele Dáblɩ̀yʋ̀ɔ̀ a, lé Natanayɛ́lɩ, Galilée a dúó á wlele Kanáa a, mɔ̀ɔ a nyɔɔ́ ɔ́ ŋwɔ́ɔ, lé Zebedée a yúó, lé Zozíi a kʋjɩ̀nyʋ̀àà àna a sɔ́, á lɔ̀fɩ́ɛ́ ŋnɩlɔ dáamúó wlú. 3Lé Simɔ́ Pɩ́ɛ́lɩ srʋ á mà: «Ná mnɛ fɩa ka.» A sɛ́fʋɔ́ á anɩ́: «À yà mɔ̀ɔ sɔ́ à yi mʋ!» Lé á pla gɔ́lʋ́ lé á mʋ. Mà bhʋ́ a dɩ́bɩ̀ɛ̀, á fɩa mà a nɩ́ zrɩ bhlá. 4Zrɩ̀ɩ yie la yɩ́ zɩ ka, Zozíi kʋ nyíé gɔ̀, mà ɔ́ kʋjɩ̀nyʋ̀àà nɩ́ saá yì mà ɔ́mɔ́ kʋ̀ʋ. 5Lé ɔ́ yrá á mà: «Ná yúó yɩ, a ya lelilɛ yɛ́ a ká lii?» Á anɩ́: «Ʋ́ʋ̀n!» 6Bhʋ́ ɔ́ srʋ á mà: «A páa píloó gɔ́lʋ́ a lilie kʋ́ a pɩ́ʋ́ a mnɩ́, mà a yi lɛ́ yɛ́!» Mà á pá píloó a, a nɩ́ míi a ká á jri, zrìi á bhlá a, ɩ nɩ́ bɛ́. 7Lé Zozíi a kʋjɩ̀nyɔ̀ɔ̀ ɔ́ wà lɛ́ kpanyɩ a, srʋ Pɩ́ɛ́lɩ ɔ́ anɩ́: «Kanyɔɔ̀ kʋ̀ʋ!» Mà Simɔ́ Pɩ́ɛ́lɩ nú mà Kanyɔ kʋ̀ʋ a, kótuó ɔ́ sa la mʋ́ lé ɔ́ fɩa la a, ɔ́ plʋʋ mʋ́ lé ɔ́ bhli nyíé. 8Kʋjɩ̀nyʋ̀àà ànàà, ámá à jri píloó zrìè yíe kʋ́ a, nyie a mnɩ́ sá àààn lé á la gɔ́lʋ́ɔ́ lé á pɛ́, cémʋ́ a nɩ́ la dʋdʋ̀ gɔ̀ dá trʋ̀ a, wlʋ́ dɛ́ɛ́ á páa píloó lé kà pɛ́ a, ɩ́ yi mɛ́trɩ a gwlɩ̀ gbɩ́ nɩ.
9Tányɩɛ́ mʋ́ á wlʋ́ gɔ́lʋ́ɔ́ a mnɩ́ lé á kwlíi dʋdʋ̀ kʋ́ a, á yɛ́ kosu, kosuó jɩ̀ kʋ zrìi lé flɔ́ɔ. 10Lé Zozíi srʋ á mà: «A bhá zrìyuo zrìè a bhlá a mnɩ́ lé a laà.» 11Lé Simɔ́ Pɩ́ɛ́lɩ pla gɔ́lʋ́ a mnɩ́, lé ɔ́ jri píloó zrìkádɩ̀ɛ̀ yie kʋ́ a kíké wlú, mà píloó nɩ́ yrɔɔ̀. Zrìè kʋ̀ píloó a mnɩ́ a, ɩ́ bhli zrì kádɩ a gwlɩ̀ gbàásɔ́ lé kʋ́gbá ta. 12Lé Zozíi srʋ á, ɔ́ anɩ́: «A yi a ká li.» Mà kʋjɩ̀nyʋ̀àà á nyièdɩ a nyɔ a múó nɩ́ fɩ́ yɛ́ lé ɔ kɔ́ɔ́ yrá mà: «Mɔ̀ nyɔ gbá kʋ̀ʋ a?» Á yì saá mà Kanyɔɔ́ ɔ́mɔ́ kʋ̀ʋ. 13Lé Zozíi ŋnɩ á gɔ̀ lé ɔ́ bhá flɔ́ɔbhuo lé ɔ́ nyɛ́ á lé ɔ́ nyɛ́ á sáà zrìi. 14Zozíi wlʋ́ lɛ́ kú yra á, taàda lɛ̀ lé ɔ́ flʋlɛ lɛ́ ɔ́ kʋjɩ̀nyʋ̀àà yɩ́.
Zozíi yà Pɩ́ɛ́lɩ sɔ́ cí
15Á bhɩa lilie zɔ̀ a, Zozíi srʋ Simɔ́ Pɩ́ɛ́lɩ mà: «Simɔ́ɔ̀! Záan a yʋ́ʋ̀, ɩ̀ wà mɔ́ɔ lé ɩ̀ zi nyʋaá fɩ́ɛ́ lɩ̀à kʋ́ ʋ?» Pɩ́ɛ́lɩ anɩ́: «Aan, Kanyɔɔ̀! Ɩ̀ yì saá mà ɩ́ wà mɔ̀ a.» Zozíi anɩ́: «Lɔ́bhʋ ná bhlábhlɩ́ɛ́ kʋ́.» 16Lé Zozíi yrɔ́ɔ́ sɔ́kʋ́ mà: «Simɔ́ɔ̀! Záan a yʋ́ʋ̀, ɩ̀ wà mɔ́ɔ?» Pɩ́ɛ́lɩ anɩ́: «Aan, Kanyɔɔ̀! Ɩ̀ yì saá mà ɩ́ wà mɔ̀ a.» Zozíi anɩ́: «Plɩ́ ná bhlábhlɩ́ɛ́ a kanyɔ.» 17Lé Zozíi yrá sɔ́kʋ́ Pɩ́ɛ́lɩ taàda mà: «Simɔ́ɔ̀! Záan a yʋ́ʋ̀, ɩ̀ wà mɔ́ɔ?» Mà tányɩɛ́ mʋ́ Zozíi yrɔ́ɔ́ taàdàà mà: «Ɩ̀ wà mɔ́ɔ à?» Wɔlíɛ́ kla Pɩ́ɛ́lɩ ɩ́ nɩ lé ɔ́ srʋ ɔ́ mà: «Kanyɔɔ̀, ɩ̀ yì wɔlɩ́ɛ́ fɩ́ɛ́, lé ɩ̀ yì saá mà ɩ́ wà mɔ̀.» Zozíi anɩ́: «Lɔ́bhʋ ná bhlábhlɩ́ɛ́ kʋ́!» 18Cɩ́cása a mnɩ́, náa srʋɛ mɔ̀ mà, tányɩɛ́ mʋ́ ɩ̀ ŋwɔ́ɔ wá zɔ̀kpɩ́yʋ a, mɔ̀ mɔ̀glʋ̀ gʋa wá nà kótu a bɛ́tʋ, lé ɩ̀ mnɛ wá dɛ́ ɩ̀ wà a, mà nɩ̀ plɩ́ kɛ́zɔ̀ zubònyɔ a, nà ka yɩ́ nà glɔ̀gbɩ́ tʋà lé nyɔ ànɔ nà kà kɛ́zɔ̀ yi lé ɔ̀ kà nà kótu a bɛ́tʋ gʋà lé dɛ́ɛ́ kɛ̀ mʋ tʋ ʋ̀ nɩ́ yrá a, ɔ ká ʋ́ mɔ̀ fa. 19Zozíi cí saá, lé cémʋ́ Pɩ́ɛ́lɩ a kwɩ́ɛ́ a wɔlɩ́ na ká plɩ́ɩ lé ɛ ká Lagɔ ŋnú fa a ɔ ká a mɩ́ pápa à. Ɔ́ bhɩa zɔ̀ a, ɔ́ srʋ ɔ́ mà: «Pɩ́ɛ́lɩɩ̀, jɩ́ mɔ́ɔ kʋ́.»
Zozíi lé ɔ kʋjɩ̀nyɔ̀ɔ̀ ɔ́ wà lɛ́ kpanyɩ a
20Mà tányɩɛ́ mʋ́ Pɩ́ɛ́lɩ yrɩ́bha wlú a, ɔ yɩ́ bhli Zozíi a kʋjɩ̀nyɔ̀ɔ̀ ɔ́ wà lɛ́ kpanyɩ a jɩ̀, ɔ gbíó wá wlúó gɔ̀ tányɩɛ́ mʋ́ á lie wá a, lé ɔ̀ yrɔ́ɔ́ wá mà: «Kanyɔɔ̀, nyɔ gbá nà kà mɔ̀ sa áa?» 21Pɩ́ɛ́lɩ yɛ́ ɔ́ a, ɔ́ yrá Zozíi mà: «Bhè ɔ̀lɩa, Kanyɔɔ̀, wɔlɩ́ gbá nà kɔ̀ɔ ŋnɩ a?» 22Zozíi anɩ́: «Bhè nɩ yrá lé ɔ ká kɔ́ kʋ àààn lé ná yiyitanyɩ ká kɛ́zɔ̀ ŋnɩ a, nàa wɔlɩ́ɩ? Mɔ̀, jɩ́ mɔ́ɔ kʋ́!» 23Wɔlíɛ́ Zozíi srʋ Pɩ́ɛ́lɩ a, ɩ́ mʋ lé ɩ́ pla a níayúó ànàà nyúkwlí, ɩ́mɩ́ ŋwɔ́ɔ mà, Zozíi anɩ́ bhʋ́anɩ kʋjɩ̀nyɔ̀ɔ̀ nɩ́ ka kú. Bhè sɩ́tɛ̀ mʋ́ Zozíi nɩ́ cí. Zozíi anɩ́: «Nɩ yrá lé ɔ ká kɔ́ kʋ àààn lé náa yiyitanyɩ ká kɛ́zɔ̀ ŋnɩ a, nà wɔlɩ́ɩ?»
Ɩ́ bhliìda
24Ɔ́mɔ́ wàwàkʋ̀jɩ̀nyɔ̀ɔ̀ ɔ̀ yɛ́ wɔlɩ́ɛ́ a dá lé ɔ̀ kɩ̀ɩ̀ cɩ́cása a, ɔ́mɔ́ mɔ̀glʋ̀ jɩ́jrɩ̀ɩ bɔ́gʋ̀ɔ̀ lɩ̀à a mnɩ́, lé àmɔ̀ mɔ̀glʋ̀ à yì sáà saá mà wɔlɩ́ɛ́ ɔ́ cí a, ɩ́ ŋwɔ́ɔ cɩ́cása à.
25Zozíi nɩ sɔ́kʋ́ wɔlɩkɔ́kɔ́mnɩ́ ànɩ, mà nyʋa ká la ɩ́ lɔ̀fɩ́ɛ́ bɔ́gʋ jɩ̀ ŋwʋ́ a, ɩ́ yì saá mà bɔ́gwɩ̀ɛ̀ nɩ́ ka la ŋwʋ́da yɛ́ dɛ́ zɩkpa zɔ̀.
Currently Selected:
Záan 21: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
