Záan 20

Zozíi ya galɔ̀

(Matíe 28.1‑8; Málɩ́kɩ 16.1‑8; Lúkɩ 24.1‑12)

1Sɔ́lɩɛ́ a zizìèda, cúcú kʋ àyɩ dʋdʋ̀ kʋ́, lé Malí Madɩlɛ́nɩ soglù lé ɔ́ mʋ lésuó jɩ̀, mà ɔ́ dʋdʋ̀ a, cɔ́kʋɔ́ á bhá lé a bhle lésuó a né a, ʋ́ ya ʋ́ wlʋ́. 2Bhʋ́ ɔ́ fa sóo lé ɔ́ mʋ Simɔ́ Pɩ́ɛ́lɩ yà Zozíi a kʋjɩ̀nyɔ̀ɔ̀ ɔ́ wà wá lɛ́ kpanyɩ a sɔ́ gɔ̀. Ɔ́ mʋ a, ɔ́ srʋ á mà: «Nyʋa ya Kanyɔ lésuó a mnɩ́ bhá, lé dɛ́ɛ́ á ŋwʋ́ ɔ́ a, à nɩ́ ʋ́ yì!» 3Lé Pɩ́ɛ́lɩ yà kʋjɩ̀nyɔ̀ànɔ̀ɔ̀ sɔ́, ámá à mʋ lésuó jɩ̀. 4Áa sɔ́ɔ́ bháʋ́ sóo, mà ɔ́mɔ́ kʋjɩ̀nyɔ̀ànɔ̀ɔ̀ fío lé ɔ́ zi Pɩ́ɛ́lɩ kʋ́, ɔ́mɔ́ tɛ̀tɛ̀ ŋnɩ lésuó jɩ̀. 5Ɔ́ bhlí sá, lé ɔ́ púo yɩ́ sá a, ɔ́ yɛ́ lɔkwɩɛ́ ɛ́ pʋ́ ʋ́, mà ɔ nɩ́ lésuó a mnɩ́ pla. 6Simɔ́ Pɩ́ɛ́lɩɛ́ ɔ̀ gbɛlɔɔ́ la jɩ̀ a, ɔ́ yi a, ɔ́ɔ pla lésuó a mnɩ́, ɔ́ dʋdʋ̀ a, ɔ́ yɛ́ lokupɩɛ́, ɩ́ kʋ mɔ̀ɔ, 7mà lɔkwɩɛ́ á bhá lé á pɩpɩa Zozíi a wlú a, ɔ́ yɛ́ɛ́ ɛ́ pɩpɩɔ, ɛ́ pʋ́ ɛ nɩ dá, ɛ yà lokupɩɛ́ sɔ́ nɩ́ dáamúó kʋʋ̀. 8Lé Zozíi a kʋjɩ̀nyɔ̀ɔ̀ tɛ̀tɛ̀ ŋnɩ la lésuó jɩ̀ a, ɔ́ pla sáà lésuó a mnɩ́, mà tányɩɛ́ mʋ́ ɔ́ yɛ́ wɔlɩ́ɛ́ fɩ́ɛ́ lɩ̀à, ɔ́ ka yɩ́ ɩ cɩ́cása. 9Mà bháa wá jɩ̀ lé kà zɩmnɛ́ ŋnɩ a, ɩ́ wɔlɩdrèè á jɩ́jrà wá Lagɔ̀bɔ̀gʋ̀ɔ̀ mnɩ́ lé à ŋwɔ́ɔ wá mà, Zozíi yi galɔ̀ a, a nɩ́a zà a mnɩ́ nú. 10Kʋjɩ̀nyʋ̀àà sɔ́ɔ́ à yi la lésuó jɩ̀ a, á yrɩ́bha yɩ́.

Zozíi flʋ Malí Madɩlɛ́nɩ yɩ́

(Matíe 28.9‑10; Málɩ́kɩ 16.9‑11)

11Bhè Malíi nynʋ́vʋ̀ jrùkʋ́ lésuó gɔ̀ ɔ́ ŋwíé. Ɔ́ kʋ ŋwíida lé ɔ́ gbí sá lé ɔ́ púo lésuó a mnɩ́ yɩ́ sá, 12ɔ́ dʋdʋ̀ a, Kplɔkplɔzìzi a sɔ́ pla bànɩ pápɩ́ mʋ́, ɩ́ bɔ́ɔ lésuó a mnɩ́. Dɛ́ɛ́ á púo la Zozíi a gàzɛ̀ɛ̀ a, bhʋ́ ɩ́ kʋ, múó kʋ wlú kʋ́, lé sɔ́anʋɔ́ kʋ bhɩɩ́ zɔ̀. 13Lé Kplɔkplɔzìzìè yrɔ́ɔ́ mà: «Ɛ̀kʋ̀ʋ̀ lé ɩ̀ ŋwíé a, máayʋ́ʋ̀?» Malíi anɩ́: «Nyʋaá ya ná Kanyɔɔ́ lésuó a mnɩ́ bhá lé nɩ́ dɛɛ́ á ŋwʋ́ ɔ́ a yì!» 14Mà Malíi kʋ mɔ̀ɔ saà da lé ɔ́ yrɩ́bha wlú lé ɔ́ dʋdʋ̀ a, Zozíi lɛ̀ɛ̀, ɔ́ nynʋ́vʋ̀ ɔ drɩ̀, mà Malíi nɩ́ ɔ́ yɩbhlɩ. 15Bhʋ́ Zozíi yrɔ́ɔ́ mà: «Ɛ̀kʋ̀ʋ̀ bhè ɩ̀ ŋwíé á máayʋ́ʋ̀? Nyɔ gbá ɩ̀ mʋ́mɔ a?» Mà Malíi a dùòkʋ́ zalɩdɛgbòò a kanyɔ ɔ yrɔ́ɔ́, bhʋ́ ɔ́ sané, ɔ́ anɩ́: «Ɩ́bhìè! Mɔ̀ nɩ̀ fɔɔ́ a, pápa mɔ́ɔ dɛɛ́ ɩ̀ ŋwʋ́ ɔ́ a, bhè ká ʋ́ mɔ́ bhá!» 16Lé Zozíi wleó: «Malíi!» Lé ɔ́ yrɩ́bha lé ɔ́ gàlɔ̀ɔ̀ klʋ́, lé ɔ́ bhá Ebléewɔlɩ lé ɔ́ ŋwnʋ́ kʋ́: «Labunii!» Ɩ́ gba ŋwɔ́ɔ «Másɛɛ̀!» 17Zozíi anɩ́: «Cíe mɔ́ɔ sá mà, nɩ́ àyɩ ɩ Tʋ́ gɔ̀ gblà. Mà mʋ lé srʋ ɩ níayúó mà ɩ Tʋ́ bhè ná Lagɔ, ɔ́ ŋwɔ́ɔ sáà a Tʋ́ lé a Lagɔ a, mà náa gblá yɩ́, ɩ́ mnɛ yɩ́ mɔ́ gɔ̀.» 18Ɔ cí lɛ́ sɩ́tɛ̀ a, Malí Madɩlɛ́nɩ ɔ́ɔ mʋ yɩ́, lé ɔ́ srʋ Zozíi a kʋjɩ̀nyʋ̀àà mà: «Ɩ́ yɛ́ Kanyɔ, mà wɔlɩ́ɛ́ Kanyɔ srʋ mɔ́ɔ a, ɩ́mɩ́ lɛ̀ɛ̀.» Lé ɔ́ srʋ á mɩ́.

Kʋjɩ̀nyʋ̀àà kʋ wlʋɔ́ a mnɩ́ lé Zozíi flʋlaá yɩ́

(Matíe 28.16‑20; Málɩ́kɩ 16.14‑18; Lúkɩ 24.36‑49)

19Bhʋ́ a sɔ́lɩɛ́ bhlɔ̀bhlɔ̀ a kosúgbòsa, Zozíi a kʋjɩ̀nyʋ̀àà ŋnɩlɔ̀ wlʋ a múó mnɩ́ wlú. Mà cémʋ́ á gúle Zúfʋnyʋa a cífɩnyʋaá kʋ́ a, ɩ́ ka ŋnɩ́ lé á bhle wlʋɔ́. Wlʋɔ́ bhli mà sɩ́tɛ̀ ɩ́ kʋ bhè Zozíi pla sré, lé ɔ́ plɩ́ɩ á nyièdɩ lé ɔ́ nynʋ́vʋ̀ lé ɔ́ srʋ á, ɔ́ anɩ́: «Pʋ́pʋ́ɛ́ ŋnɩ amɔ kʋ́!» 20Ɔ́ cí sɩ́tɛ̀ a, ɔ́ tʋalaá ɔ glɔ̀gbɩ́ɛ́ yà ɔ gbakɩɛ́ sɔ́. Mà tányɩɛ́ mʋ́ á yɛ́ Kanyɔɔ́ a, lɔlɔɔ́ ʋ̀ bhlá á, ʋ́ plɩ́ á gɔ̀. 21Lé Zozíi srʋ á sɔ́kʋ́ mà: «Pʋ́pʋ́ɛ́ ŋnɩ amɔ kʋ́! Cémʋ́ Tʋ́ɔ́ cíe lɛ́ mɔ́ɔ a, sɩ́tɛ̀ mʋ́ ɩ́ cíe sáà amɔ.» 22Ɔ́ cí kɔ́ɔ̀kʋ́ sɩ́tɛ̀ a, ɔ́ pá nyobhuo kʋ́ lé ɔ́ srʋ á mà: «Blɔ̀blɔ̀zùzùò kwlíi amɔ jɩ̀! 23A nɩ cie kɛ́zɔ̀ nyʋa a nyumoé a, ɛ́ yi á cieloò, ɩ́zà a nɩ nɩ́ kɛ́zɔ̀ nyʋa cie a, á nyumoé nɩ́ ka á cieloò.»

Zozíi flʋ sáà Tomáa yɩ́

24Mà, kʋjɩ̀nyʋ̀àà kʋ́gbá sɔ́ɔ́ a nyièdɩ a nyɔɔ́ á wlele Tomáa bhè á ŋwʋ́ Dáblɩ̀yʋ̀ɔ̀ ŋnɩ́ a, tányɩɛ́ mʋ́ Zozíi yi a, ɔ nɩ́ la nyʋa ànàà nyièdɩ kʋ. 25Ɔ li kʋjɩ̀nyʋ̀àà ànàà ámá srʋ ɔ́ mà: «À yɛ́ Kanyɔ!» Bhʋ́ Tomáa anɩ́: «Mɔ́ɔ mɔ̀glʋ̀, nɩ nɩ́ ɔ glɔ̀gbɩ́ɛ́ a mnɩ́ a leteyi a jíé yɛ́ lé nɩ nɩ́ fɩ́ɛ́ ɩ́mɩ́ jíé a mnɩ́ ná wlie kʋ, lé ɔ́ gbakɩɛ́ a mnɩ́ á srí lɛ́ jrɛ̀ɛ̀ a, nɩ nɩ́ fɩ́ɛ́ mɛ́ gbɔ́ a, wɔlɩ́ɛ́ fɩ́ɛ́ a cíe lɛ́ a, nɩ́ kɩɩ́ cɩ́cása kʋ́ bhá.»

26Lé sɔ́lɩ a lɛblɩ̀ plɩ́ lé kʋjɩ̀nyʋ̀àà ŋnɩlɔ̀ sɔ́kʋ́ wlʋ a múó a mnɩ́ wlú, Tomáa kʋ yɩ́ la cɩɩ ámá nyièdɩ. Wlʋɔ́ a kplié fɩ́ɛ́ bhli lé á kʋ mɔ̀ɔ. Lé Zozíi yi, lé ɔ́ nynʋ́vʋ̀ á nyièdɩ lé ɔ́ srʋ á mà: «Pʋ́pʋ́ɛ́ ŋnɩ amɔ kʋ́!» 27Lé ɔ́ srʋ Tomáa mà: «Tomáà! Yi, la nà wlié lé dʋdʋ̀ ná glɔ̀gbɩ́ a mnɩ́, lé la sáà nà glɔ̀gbáá lé fa ná gbakɩ a mnɩ́ wlɩ. Lé nɩ̀ nɩ sáà a, nà bhlalɛ ná zumò, mà ka fádùò!» 28Tomáa ŋwnʋ́ kʋ́, ɔ́ anɩ́: «Ná Kanyɔɔ̀ lé ná Lagɔɔ̀!» 29Bhʋ́ Zozíi srʋ ɔ́ ɔ́ anɩ́: «Yà yɩ́ lɛ́ mɔ́ɔ yɛ́ a, ɩ́zà ɩ̀ kà yɩ́ lɛ́ ná cɩ́cása. Nyʋaá à nɩ́ yɛ́ wɔlɩ́ bhè à kɩ̀ɩ cɩ́cása a, a pʋ́ a gwlɛɛ̀!»

A lɛ́bhɛ bɔ́gʋ̀ɔ̀ lɩ̀à a gba

30Zozíi nɩ sɔ́kʋ́ ɔ́ kʋjɩ̀nyʋ̀àà a klʋ́ jɩ̀ lɛ̀wɔ̀lɩ kɔ́kɔ́mnɩ́ ànɩ, lé ɩ nɩ́ bɔ́gʋ̀ɔ̀ lɩ̀à a mnɩ́ jɩ́jrɔ̀. 31Mà ànɩ̀ɛ̀ lɩ̀à, ɩ́ɩ jɩ́jrɔ̀ lé a ká saá yɩbhlɩ cémʋ́ Zozíi ŋwɔ́ɔ Kláyɩ́sɩ lé ɔ́ ŋwɔ́ɔ Lagɔ a Yuwliyʋ a. Lé a ká ɩ fádùò ka bhè a ká ɔ ŋnɩ́ɛ́ mʋ́ kɔ́ɔ́ ʋ̀ nɩ́ bhɩada ka a yɛ́.

Currently Selected:

Záan 20: NEY

Highlight

Copy