Matie 16

Falizɩɛnyʋa ‑ya Sadisɩɛnyʋa tää 'yiziziogbɩ

(Makö 8.11‑21; Matie 12.38‑42)

1'Tänyɩ ‑kʋ ‑lɔɔ 'nɩ Falizɩɛnyʋa ‑yä Sadisɩɛnyʋa 'sɔ yi Zozii yëku, ‑yä wa 'kɔ ‑zɔɔ ‑sä. Wa sonöɔ bhä nynä ɔ nʋ 'yiziziogbɩɩ' lɩɩ ‑ɩ pana lä nynä ‑mä Laagɔ yëku ɔɔ' 'päwaa bha nä. 2'Nɩ ɔ yiwa soo, ɔ lä ['Ylʋkwädlaa' sëpu‑tänyɩɩ' kä ‑ŋëë, 'nɩ ŋɔkʋ kä ‑zamä nä, ka ci nynä ‑mä ŋɔkʋ ‑zamä yɩ nä 'tänyɩɛ yi namä, 'nɩ ɛ namä 'zaazɩ.] 3'Nɩ zëplüü, ŋɔkʋ kä ‑tuun ‑kʋ nä, a ci nynä ‑mä ‑zɩkä 'nyu yi bhlä, 'nɩ 'zaazɩ ʋ bhlä. A wloo ŋɔkʋʋ' kʋkʋsaa 'nɩ a sä 'tänyɩɛ ‑zɔɔ, ‑mä Laagɔɔ' 'tänyɩɛ aa' mii ‑wʋ 'nɩ a 'kɛ ‑zɔɔ ‑sä! 4'Bhlɛsʋnʋ 'mnö nyɩkpaa nä, wa ‑nyu 'nɩ waa' 'mänyɩ ‑wʋ Laagɔ 'nɩ wamää‑ tään 'yiziziogbɩɩ' panalɩ. 'Nɩ ‑ɔnö yɩ 'plɔfɛtɩ Zonasöö' 'tänyɩɛ 'yiziziogbɩɩ‑ nä, waa' ‑lä 'yiziziogbɩ ‑bhlo 'coo 'yi 'ni. Zozii cii‑ lä sɔɔ nä, kɔ ‑bhʋwa yëku 'nɩ ɔ yi mʋ.

Falizɩɛnyʋa ‑yä Sadisɩɛnyʋa sɔɔ' cɩalɩɩ

(Makö 8.14‑21)

5‑Mä dä wa tɔɔ bhɛ lä 'nyiee 'nɩ wa mʋ bhlä ɛɛ' ‑mɔɔ' ‑kpʋkpʋʋ 'kʋ nä, 'kʋgënyʋa ‑bë 'nɩ waa' bhɔɔ 'flɔɔ bhɛɛ‑. 6'Nɩ Zozii yiwa soo, ɔ lä a kä ‑mʋ nä, Falizɩɛnyʋa ‑yä Sadisɩɛnyʋaa' 'flɔɔ 'bhabha‑gwäzöö, a fɩɩ plɛ! 7Ɔ cii‑ lä sɔɔ nä, 'kʋgënyʋa ci bhɛ wamä ‑bhlobhlo pää', wlä ‑aa ‑wʋ lä 'flɔɔ bhɛɛ‑ nä, 'ɩzä ɔ ci lä sɔɔ. 8‑Mä Zozii' ‑yibhë lä sä wa ci bhlä nä, kɔ ylʋwa‑, ɔ lä ‑ɔnözä 'nɩ a ci bhä nynä ‑mä aa' ‑wʋ 'flɔɔ bhɛ nä, 'ɩzä n ci sɔɔ? Anyɩa' pɔlötɛtɛɛ' ‑wʋ 'kwläkwlä 'sää 'ghlü! 9Anyɩa' 'wluu ‑lätee 'klünö 'kʋ bhlüü‑ ‑a? 'Flɔɔbhü ‑ngbü, nyɩkpaa' ‑bhɛgö ‑ngbü (5.000) ‑lii 'nɩ 'flɔɔ ‑ji bhä 'kʋ 'nɩ a ‑fämʋ ʋʋ' ‑takwüü nä, aa' luë ‑wʋ ‑a?#16.9 Zɛɛ 'sɩɩ 14.15‑21. 10'Flɔɔbhüü ‑ngbɔɔsɔ bʋkʋ, nyɩkpaa' ‑bhɛgö ‑mɔɔnä (4.000) ‑lii 'nɩ 'flɔɔ ‑ji 'kʋ, 'nɩ a ‑fämʋ ʋʋ' ‑takwüü nä, aa' luë ‑wʋ gbɩɩnɩ 'fɩɩn ‑zaa?#16.10 Zɛɛ 'sɩɩ 15.32‑38. 11N ‑sonö'anyɩ lä nynä ‑mä Falizɩɛnyʋa ‑yä Sadisɩɛnyʋaa' 'flɔɔ 'bhabha‑gwäzöö, a fɩɩ plɛkʋ nä, sɩ ‑kʋ bhä 'nɩ aa' bhä sɔɔ ‑yi nynä ‑mä 'flɔɔ wälɩ‑ nn' ci ‑wʋʋ? 12Ɔ cii‑ ylä sɔɔ nä, kä 'kʋgënyʋa nuo‑ 'mʋ. Wa ‑yibhë sɔɔ nynä 'flɔɔ' wälɩ ɔɔ' ci bhɔɔ ‑mä Falizɩɛnyʋa ‑yä Sadisɩɛnyʋaa' cɩalɩɩ 'mɩ ɔ sä bhlä.

Pɩɛlö cii‑ nynä Zozii ‑glö Laagɔ ‑Yowli ‑yä Puënyɔɔ

(Makö 8.27‑30; Lukö 9.18‑21)

13'Nɩ 'lëkpëa wa laa lä Filipʋʋ' Sezalee nä, Zozii ‑yä ɔɔ' 'kʋgënyʋa 'sɔ yi ‑mɔɔ ŋëë. ‑Mä wa ‑ŋëë lä nä, kä Zozii ylää‑ ɔɔ' 'kʋgënyʋa, ɔ lä nyɩkpa kä Nyɩkpɔɔ ‑Yowlii' yekuu' wälɩ ci nä, wlä lɔɔ' ‑sä ɔ plöö‑ bhä 'titii? 14'Kʋgënyʋa lä 'a! ‑Nänʋä ci nynä ‑mɔɔ plöö‑ Zään Badisö, 'nɩ ‑nänʋä ci nynä ‑mɔɔ plöö‑ 'plɔfɛtɩ Elii. 'Nɩ ‑nänʋä ci 'sɩɩ nynä ‑mɔɔ plöö‑ 'plɔfɛtɩ Zelemii. 'Nɩ ‑nänʋä ci nynä ‑mä ‑n ‑glö ‑gɔgɔbhlää' 'plɔfɛtɩnyʋaa' lɔɔ ‑bhlo. 15Zozii lä 'nɩ anyɩ 'titi, a lä n plöö‑ bhää? 16Simɔɔ Pɩɛlö lä ‑mɔɔ plöö‑ lä Klisöɔ! ‑Yäyä Laagɔɔ ‑Yowli, ‑mɔɔ plöɔ‑ lä. 17Pɩɛlö cii‑ lä sɔɔ nä, Zozii lä Simɔɔ‑, Zonasö ‑yowli‑, ‑n ‑yä pʋ! Wälɩɩ ‑n cii‑ lä nä, ‑mɔɔ 'titi 'nɩ ‑wʋ cii‑, ‑mä n 'Bäɔ ‑ɔ ‑kʋ lä ‑mɔɔ Laagɔɔ nä, ɔmɔɔ‑ ŋʋ‑ʋ mɩɩ lä nëë'. 18‑Amʋ, kä n sonö‑ö yɩ nynä ‑mɔɔ plöö‑ lä Pɩɛlö (kɩ sä lä ‑zɔɔ nynä cɛkʋ). 'Nɩ cɛkʋnʋ 'klʋ nä, ‑lɔɔ n 'kä lä 'naa 'Cɔcɩɛɛ 'slää. 'Nɩ n kɛ slää‑ nä, 'kwiee 'nɩɛ ‑lä 'kɔɔn mii. 19N yi‑i Laagɔɔ' 'Leyiduu' 'sɛfɛɛ 'nyɛ. Lʋʋ ‑n gä ‑mää 'ylʋzɔɔ ‑gʋä nä, ʋ yi ‑mɔɔ Laagɔduu' gʋɔ. 'Ɩzä kä ‑n gä ‑mää 'ylʋzɔɔ lʋʋ ‑blisie nä, ʋ yi ‑mɔɔ Laagɔduu' blisio. 20Zozii cii‑ lä sɔɔ nä, 'nɩ ɔ yi ɔɔ' 'kʋgënyʋa 'fɩɩn ‑kɔkwɩ bhoo nynä waa' soo ‑lä nyɩkpɔ nynä ɔmɔɔ‑ plöö‑ Klisöɔ.

Zozii ci ɔɔ' 'kwiee yëkuu wälɩ

(Makö 8.31‑33; Lukö 9.22)

21‑Mä 'bhää bhɛ ‑lɔɔ' tänyɩɛ 'kʋ nä, kä Zozii soo bhɛ ɔɔ' 'kʋgënyʋa 'kpäta, ɔ lä ɩ ‑ŋwa 'kʋ nynä n mʋ Zolizalɛmʋ‑duu'. N kä ‑mɔɔ ‑mʋ nä, ‑Dɔɔpänyʋa ‑yä 'Cibhisänyʋaa' 'cifinyʋa ɩyä ‑Jlämöcɩanyʋa 'kwlɩ yi'i wamä wlɩɩ' bhɩä kpänyɩ. Wa yi'i 'bhlä, 'nɩ n yi 'ku. ‑Mä n kä kuu‑ nä, taanaylʋʋ 'kʋ n yi 'kuëë glɔɔ. 22Ɔ cii‑ lä sɔɔ nä, kä Pɩɛlö lanöɔ‑ gbäkö 'kʋ 'nɩ ɔ yio ‑kɔkwɩ ‑bhoo, ɔ lä Kwlienyɔ‑, Laagɔɔ' ‑za, ‑lɔɔ ‑lɩyɩ ‑n ci lä nä, ɩ 'nö‑ö ‑lä ŋëë! 23‑Mä Pɩɛlö cii‑ lä sɔɔ nä, kä Zozii 'ylɩbhɔ‑ 'nɩ ɔ yio soo, ɔ lä ‑n ‑sä'ä gwë, 'Dëvlo‑! ‑N ‑kʋ'ʋ ‑blɔkʋ, 'nɩ ‑n 'lilie'e 'yikʋ. Nyɩkpaa 'bhisäkʋ ‑n bhobho lä, ‑mä ‑nn bhobho ‑wʋ Laagɔ 'bhisäkʋ.

Sä nyɩkpɔ 'kä lä Zozii 'kʋ 'gë nä

24'Nɩ Zozii yi 'kʋgënyʋa 'fɩɩn soo, ɔ lä nyɩkpɔ kä cii‑ nynä ‑mä ɔ yi'i 'kʋ 'gë nä, ɔ ‑bha ɔ yëkuu' gbʋʋ' ‑yä ɔ bhɛɛ ɔɔ' 'kusuu ‑yä ɔ gë'ë 'kʋ. 25‑Mä ‑ɔ gä tään nynä ɔ 'kä ɔ yëkuu' zëkpë ‑lɔɔ nëë' ‑sä nä, ɔ yia të. 'Ɩzä ‑ɔ gä cii‑ nynä ‑mä, ɔ yi ɔɔ' zëkpë të 'naa ‑za nä, ɔ yia 'ni. 26Nyɩkpɔ kä 'ylʋzɔɔ' leylüü 'fɩɩn nii‑, 'nɩ ɔɔ' 'wugaa kä ‑too nä, ‑bʋzʋɛ ‑sä 'titi ɔ nii‑ bhää? 'Nɩ lʋʋ ‑sä 'titi nyɩkpɔ yi bhä ɔɔ' 'wugä 'mʋ dögbää? 27A ni, Nyɩkpɔɔ ‑Yowli, 'tänyɩ yi ‑lɔɔ kʋ 'nɩ, ɔ ‑yä ɔɔ' ‑Laagɔzizii 'sɔ yi ɔ 'Bää 'klʋagba 'mnö yii. ‑Mä ɔ kä ‑yi nä, nyɩkpɔ nyɩkpɔɔ' 'klüü ɔ ‑nʋ lä ‑mää 'ylʋzɔɔ nä, ɔ yio ɩɩ' ‑bʋzʋɛɛ 'nyɛ. 28Kä n sonö'anyɩ yɩ ‑nʋawlɛɛ' nynä ‑mä, nyɩkpa ‑kʋ'anyɩ ‑lää nëëdë 'nɩ waa' ‑lätee kuu, 'nɩ 'tänyɩɩ Nyɩkpɔɔ ‑Yowli 'kä lä yii nynä 'loyo nä, wa yio 'yi 'ni.

Currently Selected:

Matie 16: god

Highlight

Copy