Matie 17

Zozii 'kʋtakpaa ‑jɩjlä 'nɩ a lie

(Makö 9.2‑10; Lukö 9.28‑36)

1Ylɩɩ ‑ngboplo plöö‑ ylä nä, kä Zozii bhlüü‑ Pɩɛlö ‑yä Zakö ɩyä Zakö ɔ bheli Zään 'sɔ 'kʋ, 'nɩ ɔ ‑yʋwa 'sɔ yi gwë ‑sä. Ɔ ‑yʋwa 'sɔ ‑mʋ 'sää 'kükü 'kädä 'wlu. 2‑Mä wa ‑kʋ ‑mɔɔ 'nɩ Zozii 'klʋtakpa yiwa 'yikʋ jɩjlää. A lie bhä 'sää nynä 'ylʋkwädlaa' zëlü. 'Nɩ ɔɔ' 'kwëtii lie bhä 'sää plätätä. 3'Nɩ ‑vaaa! Moyizö ‑yä Elii 'sɔ yiwa 'yi ghlä. Wa ‑yä Zozii 'sɔ ŋʋ bhä 'dö. 4'Nɩ Pɩɛlö yi Zozii soo, ɔ lä Kwlienyɔ‑, ɩ nää‑ nynä ‑mä ‑a kʋ ‑lää! ‑N gä ‑waa nä, n 'kä ‑lää ‑papö taa 'slä. ‑Naa laa, Moyizöö' laa, 'nɩ Elii' laa. 5‑Mä Pɩɛlö ‑kʋ cidä, 'nɩ 'nyukpɔɔ' lʋʋ ‑ʋ lie bhlä 'sää nä, ʋ ‑yi 'nɩ ʋ yiwa 'kʋ zizie. 'Nɩ nuwälɩ yi ‑mɔɔ 'nyukpɔɔ 'mnö ghlää, ɩ lä ‑nɔnɔ, ɔmɔɔ‑ plöö‑ lä 'naa ‑Wawayuo! Ɔɔ' plɛkʋ mɛnö'ö kpänyɩ nä, a puo 'nyukwli! 6‑Mä 'kʋgënyʋa nuu‑ lä nuwälɩnɩ nä, kä ‑ŋänö ‑plʋwa sää 'titi nä, wa gbie‑ bhɛ 'klʋ sä. 7‑Mä Zozii 'jluwa‑ yëku 'nɩ ɔ yiwa 'taa, ɔ lä a ‑bha 'kʋ ‑mä aa' ‑guu ‑lä! 8'Nɩ wa yi 'wlu 'kʋ bhɛlɩä, wa lä wa wloo bhɛ nä, Zozii ‑bhlo 'coo ‑kʋ bhɛ ‑lɔɔ.

9'Tänyɩɩ' wa bha bhɛ lä ‑mɔɔ 'kükëa 'wlu, 'nɩ wa kwli bhɛ lä nä, Zozii ‑sonʋwa, ɔ lä wälɩɩ 'fɩɩn‑ ‑ghla'anyɩ lä 'yii nä, aa' sonɩ ‑lä nyɩkpɔ! Aa' sonɩ ‑lä nyɩkpɔ ‑aaa ‑yä Nyɩkpɔɔ ‑Yowli 'kä 'fɩa 'kuëë glɔɔ.

Elii' yëkuu' wälɩ

10'Nɩ 'kʋgënyʋa yio 'ylä, wlä Cɩanyɔ‑, sɩ ‑kʋ bhä 'nɩ ‑Jlämöcɩanyʋa cɩa bhä nynä ‑mä, 'fɩa ‑yä ‑lɔɔ' 'tänyɩɛ 'kä ŋëë nä, ɩ ‑ŋwa 'kʋ nynä ‑mä Elii yi ‑mää zëkpë 'kʋʋ?#17.10 Zɛɛ 'sɩɩ Mala 3.22‑23. 11'Nɩ Zozii yiwa soo, ɔ lä ‑ɛɛɛ, ɩ ‑kʋ 'zaazɩ sɔɔ nynä Elii yi yi, 'nɩ ɔ yi nʋnʋgbɩɩ 'fɩɩn 'kʋ gögä. 12'Nɩ kä n mʋ'anyɩ yɩ 'sɩɩ soo ‑kää nynä ‑mä Elii yä wɛzä yi. ‑Mä 'ylʋzɔkʋnyʋä 'nöɔ ‑wʋ lä ‑yibhë 'nɩ ‑wa ‑klɔɔ sä wa ‑waa lä nä. Nyɩkpɔɔ ‑Yowli ‑mä 'sɩɩ, wa yio sɔɔ' nyäkälɩɩ' 'ŋʋ. 13Ɔ cii‑ lä sɔɔ nä, kä 'kʋgënyʋa ‑yibhë sɔɔ nynä ‑mä Zään Badisö 'mɔ ɔ sä bhlä.

‑Zɔɔ bhlü bhlü guu' 'bhlänyɔ ‑yamä

(Makö 9.14‑29; Lukö 9.37‑43)

14Wa ‑ŋëë ylä ‑jlëa yëku nä, nyɩkpɔ ‑bhlo ‑yi 'nɩ ɔ paa‑ Zozii dëlüü' ‑kokoowli glu 15'nɩ ɔ yio soo, ɔ lä Kwlienyɔ‑, 'naa 'yuŋwadio, ‑n yibhënöɔ ŋäzö! Ɔ ‑glö 'yuu lɔɔ ‑zɔɔ bhlü bhlügu bhlä lä nä, ʋ nyɩɔ kpänyɩ nyäkälɩ. 'Tänyɩ ‑kʋ ‑lɔɔ 'nɩ ɔ bhlüü ‑kosuu', 'nɩ 'tänyɩ ‑kʋ lɔɔ 'nɩ ɔ bhlüü 'nyuu. 16N ‑lɔɔ ‑naa 'kʋgënyʋa ‑mä waa' ‑wʋ ɔɔ' yamälɩ mii‑. 17Nyɩkpɔɔ cii‑ lä sɔɔ nä, Zozii lä anyɩ nä, a ‑glö sää 'titiclö nyɩkpaa' lʋä‑ ‑wʋ lä Laagɔɔ' pɔlötɛtɛ ‑kä nä! 'Nɩ anyɩa nʋnʋgbɩ ‑nyu 'sää kpänyɩ! A bhobho nynä 'tänyɩ zio n yi'anyɩ bhä ‑lätee nëëdë ‑sää? Ka bhobho nynä ‑mä n yi 'kɔɔkɔ sɔɔ plɛkʋ 'tɛmä, 'nɩ n yi'anyɩ nëëdë kʋ ‑a? A ‑lä'ä ‑mää 'yuo! 18Wa ‑lä lä 'yuo nä, kä Zozii 'ŋʋʋ‑ ‑zuzunyënyuu 'yizlɛ 'kʋ 'nɩ ʋ yi 'yuo kätää' ‑bha 'nɩ 'kpobhuu ‑bhlo 'kʋ ɔ yi yamä.

19‑Mä 'kʋgënyʋa 'jloo‑ Zozii yëku, 'nɩ wa yio gbäkö 'kʋ 'ylää, wlä Cɩanyɔ‑, ‑ɔnözä 'nɩ ‑aa bhä ‑zuzunyënyuu 'yuo kätää' ‑sälɩ mii? 20Zozii lä anyɩa' pɔlötɛtɛɛ' ‑wʋ 'ghlü nä, ɩɩ' ‑za lä. ‑Nʋawlɛɛ' n sonö'anyɩ nynä ‑mä, anyɩa' pɔlötɛtɛ kä ‑kʋ nynä suyʋye 'tɩkɩɩlɩɔ wa laa lä mutadö nä, a yi mii 'nɩ a yi bhä 'kükënä soo nynä ‑mä, ‑weeyia, 'kükëë‑, ‑n ‑bha ‑lää ‑yä ‑n 'plöö ‑mɔyɩ! 'Nɩ 'zaazɩ 'kükëa yi a sɔɔ nʋ. Wälɩklëë' ‑lä bhɔɔ kʋ 'nɩ a 'kanyɩ nʋlɩɩ' sɩä. [21‑Mä kä n mʋ'anyɩ yɩ 'sɩɩ soo ‑kää nynä ‑zizinyenyii' cënänä, bhibhielɩ, ‑yä ‑gbugbe ‑goolɩ 'mnö, nyɩkpɔ mii lä 'nɩ ɔ tlii lä.]

Zozii' ci ɔɔ' 'kwie ‑yä ɔɔ' 'kuëë glɔɔlɩɩ' wälɩ

(Makö 9.30‑32; Lukö 9.43‑45)

22Ylʋʋ ‑kʋ ‑lɔɔ 'nɩ Zozii ‑yä ɔɔ' 'kʋgënyʋa 'sɔ ‑kʋ bhä Galilee' 'nɩ ɔ ‑sonʋwa, ɔ lä Nyɩkpɔɔ ‑Yowli wa yio nyɩkpa wlɩɩ' pënö 'nɩ wa yio 'bhlä. 23‑Mä ɔ kä kuu‑ nä, taanaylʋʋ 'kʋ ɔ yi 'kuëë glɔɔ. Ɔ cii‑ lä sɔɔ nä, ɔɔ' 'kʋgënyʋa kä ‑bhlɔlɩ 'kɔtʋa‑.

Zozii 'pɛɛ‑ Laagɔ‑bhutuu' 'kädʋʋ' lapoo

24Zozii ‑yä ɔɔ' 'kʋgënyʋa 'sɔ ‑ŋëë lä Kapɛnayumö‑duu nä, Laagɔ‑bhutu 'kädʋʋ' lapoo‑ylänyʋa, kä wa ‑yi Pɩɛlö yëku 'nɩ wa yio 'ylä, wlä anyɩa' käänyɔ, ɔ 'pɛɛmʋ Laagɔ‑bhutu 'kädʋʋ' lapoo ‑a? 25Pɩɛlö lä ‑ɛɛɛ! ɔ 'pɛɛnʋ. 'Nɩ Pɩɛlö yi ‑bhutuu' plä. Ɔ ‑plä lä gään nä, kä Zozii 'tɔnöɔ 'yikʋ 'nɩ ɔ ‑sonöɔ, ɔ lä Simɔɔ‑, sä ‑n bhobhui bhää? ‑Mää 'ylʋzɔɔ' 'loyuaa' lapoo nyɩkpa ‑sä 'pɛnʋ bhää? Dunyʋa 'mää‑ 'pɛnʋ ‑a? ‑Mä lowie‑ 'pɛnʋ ‑a? 26Pɩɛlö lä lowie 'pɛnʋ lä. Zozii lä ‑aaa! Nä, dunyɔɔ' ‑lä lapoo 'pɛɛ nä! 27‑Mä lapoo‑ylänyʋa nä, wa 'nɩɩ ‑lä sɔɔ 'mʋ 'nu. Ɩ ‑kʋ ylä sää nä, ‑n mʋ ‑mɔɔ 'nyiee ‑yä ‑n 'pä ‑gwɛ! ‑N gä ‑gwɛɛ 'nyiee paa‑ nä, zliiyee ‑n 'gä lä tɛɛ klä nä, ‑n wloo ɛɛ' nëë' ‑mä, ‑flëëgie ‑kʋ ‑mɔɔ. Ɛ yi ‑anyɩ 'sɔ ‑anyɩa lapoo 'pɛɛ! ‑N 'bhlü moniinɛ 'kʋ ‑yä ‑n yi ‑yä ‑n 'pɛɛ ‑anyɩ 'sɔ ‑anyɩa lapoo!

Currently Selected:

Matie 17: god

Highlight

Copy