Lukö 21

'Kuzëlü‑ŋnɔɔ nyɛɛ‑ 'nɩ ɔ ‑zi nyɩkpaa 'fɩɩn

(Makö 12.41‑44)

1Zozii bhɛlɩä‑ 'wlu 'kʋ 'nɩ ɔ wloo bhä lɛkäänyʋa 'nɩ, Laagɔ‑bhutuu' 'bhɔklɔɔ 'mnö, wa ŋʋ bhä ‑mɔɔ waa' kwänɩsɩɛ. 2‑Mä 'kuzëlüŋnɔ ‑bhlo ‑yi ‑lɔɔ, ɔɔ' lɔɔ ŋäzö bhlä bhlä nä, ɔ bhɛɛ‑ bhä ‑pikinilɩä 'sɔ, 'nɩ ɔ yiwa ‑mɔɔ pää. Zozii nio‑ lä 'yi nä, 3kɔ cii‑, ɔ lä ‑nʋawlɛɛ 'mnö, n sonö'anyɩ nynä ‑mä, 'kuzëlü‑ŋnɔnɔ ŋäzöö bhlä lä nä, ɔmɔɔ‑ nyɛɛ‑ kpänyɩ 'nɩ ‑ɔ ‑zi lä nyɩkpaa 'fɩɩn‑ ŋʋʋ‑ lä monie 'bhɔklɔɔ 'mnö nä 'kʋ! 4Wamä nä, moniee' ‑lɛɛ wa nyɛɛ‑ lä nä, ɛ 'nöwa ‑wʋ gbʋ kään. ‑Mä ɔmɔ nä, dä ɔ ‑kä bhlä ‑yä ɔ 'kä 'kudublɔ 'kʋ biebie nä, ‑lɔɔ ɔ nyɛɛ‑ lä.

Laagɔ‑bhutu 'kädʋʋ yi wlɔɔ zee

(Matie 24.1‑2; Makö 13.1‑2)

5Nyɩkpa ‑kʋ bhä ‑lɔɔ 'nɩ wa gbään bhä Laagɔ‑bhutu 'kädʋʋ nynä ‑mä, kʋ nää‑ 'nɩ wa 'slänʋ‑ 'sɩɩ 'nägä‑cɛkwɩ, wlä nyɩkpa ‑sä 'sɩɩ 'ŋnumʋlɩɩ 'nɩ wa 'slänɩ‑ Laagɔ‑bhutuu. Zozii nuu‑ lä sä wa ci bhlä nä, kɔ ‑sonʋwa, 6ɔ lä ‑bhutuu a wloo lä ‑lää nä, ylʋʋ yi ‑lɔɔ kʋ 'nɩ wa yiu wlä, 'nɩ ‑gɔgbää' ‑lä ‑gɔgbä 'kʋ too.

Zëkpëa' bhɩä‑tänyɩɛ ‑kʋ ‑mɔɔ 'yikʋ

(Matie 24.3‑8; Makö 13.3‑8)

7'Nɩ wa yi Zozii 'ylä, wlä Cɩanyɔ‑, 'tänyɩ ‑sa 'mnö wälɩyɩ 'kä bhä 'kʋ 'plöö? Panalɩ ‑sä yi bhä gbä 'nɩ ‑a yi bhä ‑lɔɔ' 'tänyɩɛ yibhëë? 8Zozii lä a kä ‑nʋ nä, a gblɩmä! Nyɩkpɔ 'nä 'nyigënö'anyɩ ‑lä! A ni, bhutukpä yi yi, 'nɩ wa yi 'naa 'ŋnöö bhɛɛ. 'Nɩ nyɩkpɔ nyɩkpɔ yi ci nynä ‑mä ɔmɔɔ‑ plöö‑ Klisöɔ ‑mä bhɩäylʋʋ yä ŋëë. ‑Lɔɔ' nyɩkpaa nä, a 'nä 'güwa ‑lä 'kʋ! 9A yi 'sɩɩ tʋʋ' wälɩ 'nu, 'nɩ a yi tʋʋ' kplü 'nu, ‑mä plɛɛ' belio'anyɩ ‑lä 'mʋ! Ɩ ‑ŋwa 'kʋ nynä ‑mä ‑nɩnɩ 'fɩɩn ŋëë! ‑Maa, zëkpëa' bhɩä‑tänyɩɛ 'mɛɛ‑ ‑wʋ ‑lɔɔ ‑kʋ.

10'Nɩ Zozii yiwa bʋkʋ soo, ɔ lä 'bhlɩ yi 'kʋ ‑bha 'nɩ ɛ yi ɛ lübhlɩ tʋ fä. 'Nɩ 'leyidu yi 'kʋ ‑bha 'nɩ ʋ yi ʋʋ' lü‑leyidu tʋ fä. 11‑Dʋdʋ yi kpänyɩ tɩtɛ, 'nɩ ‑gbugbe ‑yä 'bhläbhlägu yi dö ‑bhutukpä yi. 'Nɩ ‑ŋänö ‑bhläbhlägbɩ ‑yä 'yiziziogbɩ 'yi ‑laagɔɔ' ghlää.

Wa yi Zozii' 'kʋgënyʋa nyäkälɩɩ' 'ŋʋ

12‑Mä 'fɩa ‑yä ‑nɩnɩ 'fɩɩn 'kä ŋëë nä, anyɩ, wa yi'anyɩ klä 'nɩ wa yi'anyɩ nyäkälɩɩ' 'ŋʋ. 'Naa 'ŋnöö ‑za, nyɩkpa yi'anyɩ ‑mɔɔ Laagɔ‑bhitii 'mnö tʋ kuu. Wa yi'anyɩ 'sɩɩ ‑gɔmnänyʋä ‑yä 'loyuë 'sɔ dëlü tʋ kuu 'nɩ wa yi'anyɩ ‑jɩɩ' 'ŋʋ. 13‑Mä ‑lɔɔ' 'tänyɩɛ 'mnö nä, a yi mii‑ 'nɩ a yi 'naa ‑dläfʋɛ lü. 14A 'nä bhʋtʋ ‑lä nynä ‑mä sa ‑a yi bhä ci 'nɩ ‑a yi bhä ‑a yëku 'kʋ bhlää? 15‑Mä sa a 'kä lä ci nä, ‑amʋʋ‑ 'ganyɩ lä sɔɔ nëë' 'pä. Dɩgälɩɩ' lɩɩ anyɩa' ‑zɔbhlɛgbänyʋää' ‑lä lä kään nä, n yi'anyɩmɩ 'nyɛ ‑yä a 'kwa nëë' bhɩä. 16A ni, a 'bäsɩ ‑yä a 'nɔsɩ 'titi, wa yi'anyɩ pëë nynä wa bhla'anyɩ. A bhelie yi'anyɩ pëë, 'nɩ anyɩa nyʋä ‑yä a 'nagwɩä yi'anyɩ pëë nynä wa 'bhlä'anyɩ. Wa yi anyɩa nëëdëë' nyɩkpa 'bhlä 'nɩ wa yi 'ku. 17'Nɩ nyɩkpaa 'fɩɩn yi'anyɩ zɔbhlɛmä 'naa ‑za. 18‑Mä anyɩa 'wluu nyɩɩye ‑bhlo 'titii' ‑lä too. 19Nä, a 'tɛmä plɛkʋ! ‑Mä anyɩa' plɛkʋ 'tɛnɔɔ 'mnö, ‑mɔɔ anyɩa' zëkpëa' nëë' ‑bhalɩ 'kä lä kʋ!

Zolizalɛmʋ‑duu yi nuë

(Matie 24.15‑21; Makö 13.14‑19)

20'Tänyɩɛ 'mnö a 'kä lä Zolizalɛmʋ‑duu 'yi 'ni ‑yä ‑zɔbhlɛgbänyʋaa' 'sʋjaa 'kʋ lä 'klʋ glää nä, ‑lɔɔ' 'tänyɩɛ 'mnö a 'kä lä sɔɔ yibhë nynä ‑mä Zolizalɛmʋduu' nuë‑tänyɩɛ yä 'mɛmɛ. 21A kä yɩ wälɩnɩ 'fɩɩn 'yi 'ni nä, ‑wa gä bhɛ Zudee‑bhlɩɛ 'mnö kʋ nä, wa ‑guu ‑yä wa zizio 'küküü nëëdë! ‑Wa gä bhɛ Zolizalɛmʋ‑duu' ‑kʋ nä, wa ‑bha yɩ ‑mɔɔ! ‑Wa gä bhɛ 'klää lebhenʋdä ‑kʋ nä, waa' yii ‑läyɩ du‑gbäsɩ. 22‑Lɔɔ' ylɩɩ nä, ɩ ‑glö Laagɔɔ' kpäsäylɩɩ. Nʋnʋgbɩɩ 'fɩɩn ‑ɩ ‑jɩjlɔɔ lä Laagɔ‑bɔɔgʋʋ 'mnö nä, ɩɩ' glää‑tänyɩ lä. 23Gbadöŋwnɩa, ɩyä 'ŋwnɩaa' ‑lʋa ‑wa 'gä lä 'yüë nyɩa ‑lɔɔ' 'tänyɩyɩ 'mnö nä, wa yä mie! Laagɔ yi 'bhlɩnɛ 'mnö nyɩkpa ʋʋ' gbʋgblɛɛ 'kʋ ‑sää 'nɩ wa yi nyäkälɩ 'kädɩ 'ni. 24'Yigädabhlɩ 'kʋʋ nyɩkpaa yi yi, 'nɩ wa yi Zolizalɛmʋ‑duu bhusuë. Tʋ yi nyɩkpaa' ‑nänʋä 'bhlä. Wa yi ‑nänʋä klä 'nɩ wa yiwa 'yigädabhlɩ 'kʋ geyulɛ 'kʋ fä. Wa yi sɔɔ Zolizalɛmʋ‑duu klä ‑aaa 'nɩ waa' 'tänyɩɛ yi ‑glää.

Nyɩkpɔɔ ‑Yowli 'ylɩbhɔ‑tänyɩ

(Matie 24.29‑31; Makö 13.24‑27)

25'Tänyɩ yi 'sɩɩ ŋëë 'nɩ 'ylʋkwädlaa ‑yä 'cʋʋ ɩyä ‑laagɔzälöö 'mnö, nyɩkpa yi ‑mɔɔ plɛkʋ 'niniegbɩ 'yi 'nii. 'Nɩ ‑mää ‑dʋdʋkʋ nä, jiee' kplüü ‑yä ɛɛ' 'nakwɩɩ‑ 'gä lä bhlü nä, ɩ yi gbä 'nɩ 'ylʋzɔkʋnyʋä yi nënümä ‑ŋänöö' ‑za. 26'Nɩ ŋɔkʋʋ' 'tɛtɩɩ‑ ‑kään lä ‑lɩɩ 'fɩɩn sä nä, ɩ yi gbʋgbɔnöɔ. Plɛ yi nyɩkpa 'mnö ‑bha 'nɩ wa yi 'ku. 27‑Lɔɔ 'tänyɩyɩ 'mnö, ‑lɔɔ wa 'kä lä Nyɩkpɔɔ ‑Yowli 'yi 'ni. Ɔ yi 'nyukpɔɔ 'klʋ yii, ɔ ‑yä 'päwä 'kädaa ‑yä 'klʋagbaa 'sɔ. 28Nä wälɩnɩ 'fɩɩn kä yɩ 'kʋ 'plö nä, a bhɛlɩä 'wlu 'kʋ ‑yä a gögä 'kʋ 'nägäsä, ‑mä anyɩa ‑lɔɔ nëë' ‑bha ylʋʋ yä 'mɛmɛ!

Sii' dʋgbɔlʋgbɔɔ' tlʋ‑tänyɩɩ' ‑nyädlä

(Matie 24.32‑35; Makö 13.28‑31)

29'Nɩ Zozii yiwa ‑nyädlä soo, ɔ lä a wloo 'figesu ‑yä a wloo 'klaa 'mnö sii 'fɩɩn‑ ‑kʋ lä ‑mɔɔ nä! 30Ɩ kä yɩ dögbɔlʋgbɔ nʋ nä, a ‑yi sɔɔ nynä ‑mä ‑kɔkɔylʋ yä 'mɛmɛ. 31Nä, a kä ylä ‑nɩnɩ 'yi 'ni, 'nɩ ɩ kä ylä 'kʋ 'plö nä, a yibhë sɔɔ nynä ‑mä Laagɔɔ' 'Leyiduu' 'tänyɩɛ yä 'mɛmɛ. 32N sonö'anyɩ ‑nʋawlɛɛ 'mnö nynä ‑mä ‑pɛpɛɛ' nyɩkpaa' 'lɔlʋʋ ‑lä 'plö 'nɩ wälɩɩ 'fɩɩn n ci lä nä, ɩ yi glää. 33'Nyukpɔ ‑laagɔnʋ, ʋ ‑yä ‑dʋdʋ 'sɔ yi 'plö, ‑mä 'naa ciciwälɩɩ nä, ɩɩ' ‑lä 'kɔɔn 'plö.

Zozii 'kʋgënyʋa wa gblɩmä

34Nä, a gblɩmä! A 'nä cie ‑lä a yëku gämʋ ‑yä nʋmnälɩ! Ɩyä a 'nä bhʋtʋ ‑lä 'sɩɩ kpänyɩ anyɩa' zëkpëa' ‑za ‑mä, Kwlienyɔɔ' yiylʋʋ' ka'anyɩ ‑kä ‑zɔɔ 'vu. 35Ʋʋ' ka'anyɩ ‑kä 'wlu gbi nynä 'sokwli. Kwlienyɔɔ' ylʋʋ nä, kʋ yi lä 'ylʋzɔkʋnyʋa 'fɩɩn ‑za. 36Nä, ɩ ‑kʋ lä sɔɔ nä, a 'nä ŋɔɔ ‑lä, ‑mä a bhibhie 'tänyɩɩ 'fɩɩn 'mnö, ɩyä a 'kä 'tɛtɩ kää. Ɩyä 'kwlɩkabhɩa 'fɩɩn ‑a 'gä lä yi nä, a 'ka ‑kä nëë' ‑bha. ‑Lɔɔ a yi 'tɛtɩ 'ni 'nɩ a yi ‑kä 'tite pläylʋʋ 'kʋ Nyɩkpɔɔ ‑Yowli dëlü 'nynigolɩ mii.

37Zozii nä, ɔ cɩa bhä ‑mɔɔ Laagɔ‑bhutu 'kädʋʋ 'mnö ‑gägäzëlüü'. 'Ylʋ kä bhä ‑bhlü 'nɩ ɔ mʋ ‑mɔɔ Olivie‑kükëa 'wlu. 38'Nɩ zeli kä ‑ze nä, nyɩkpaa 'fɩɩn 'wlää bhä ‑mɔɔ Laagɔ‑bhutu 'kädʋʋ 'mnö 'wlu 'nɩ wa puo bhä 'nyukwli.

Currently Selected:

Lukö 21: god

Highlight

Copy