Lukö 16

‑Gänʋnyɔɔ ‑ɔ ‑gblɩ lä nää' ‑nyädlaa

1'Nɩ Zozii yi ɔɔ' 'kʋgënyʋa soo, ɔ lä nyɛbhɛlʋ ‑bhlo ‑kʋ bhä ‑lɔɔ 'nɩ ɔ ‑kä bhä ‑gänʋnyɔɔ' lɔɔ‑ wloo bhlä ɔɔ' kääkäälɩɩ 'kʋ nä. ‑Mä ‑gänʋnyɔnɔ wa mʋɔ bhɛ lä bɩä ‑kää nä, ɔɔ' käänyɔɔ' ‑kääkäälɩɩ kɔ nyimi bhä. 'Nɩ nyɩkpa yi mʋ 'nɩ wa yi ɔɔ' käänyɔ ‑jlo plä. 2'Nɩ käänyɔɔ yio laa, 'nɩ ɔ yio soo, ɔ lä wälɩɩ n nu lä ‑naa ‑za nä, ɩ ‑nyu kpänyɩ! Nä, 'naa kääkäälɩɩ n nyɛɛ‑ɛ lä 'kʋ wloodä nä, ɩɩ' lebhee, dä ɛ ‑bhlü lä 'kʋ nä, ‑n gä'ä yɩ ‑lɔɔ paa ‑mä 'naa kääkäälɩɩ, ‑mɔɔ n 'nɩɩ ‑läyɩɔ 'kʋ wloodä 'nyɛ. 3‑Mä ɔ cii‑ lä sɔɔ nä, kä ‑gänʋnyɔɔ ‑soo yɩ ɔ yëku, ɔ lä 'nɩ sä n yi bhä nʋʋ? 'Naa käänyɔ yä'ä yɩ lebhee' 'tlü! Dä n ‑kʋ lä ‑lää nä, nn' ‑lä 'klää lebhe mii, nn' ‑wʋ ‑lɔɔ' 'tɛtɩɩ ‑kä! 'Nɩ, n 'kä 'sɩɩ ‑a ‑lie zlaa nä, ɩ yi'i sɩä! Kɩ ‑kä zoo 'kʋ! 4Nä, sä n 'kä lä nʋ ‑yä nyɩkpa kä'ä lä wlɩ tlaa, ɩyä n 'kä lä waa' dää plämʋ nä, n yä sɔɔ 'ni! 5Ɔ ‑bha lä 'kʋ nä, nyɩkpaa 'fɩɩn ‑wa ‑kä bhlä ɔɔ' käänyɔɔ' dlu nä, kɔ laa‑ waa' 'kʋʋ nyɩkpɔ nyɩkpɔ. 'Nɩ ɔ yi tɛɛtɛɛlɔɔ 'ylä, ɔ lä 'naa käänyɔɔ' dlu ‑sä n ‑kä bhɛ ‑zi 'naa? 6Nyɩkpɔɔ lä n ‑kä ɔɔ' 'kpüü nyidüü' gwlɩ ‑ngbüü' (100) dlu. Ɔ lä ‑aa! ‑Naa 'bɔɔgʋ‑pɛlʋʋ ‑a ‑jɩjlä bhlä dluu' ‑za nä, ‑n ni ʋmʋ! ‑N kʋ sä ‑yä ‑n 'cɩcɩ 'näbaa 'fäfä, ɩyä ‑n jɩjlä ‑mɔɔ nynä ɔɔ' 'kpüü nyüdüü' gwlɩ 'sɔ 'nɩ 'kʋgbää' dluu‑ ‑n ‑kä. 7'Nɩ ɔ yi 'yigädalɔɔ soo, ɔ lä 'naa käänyɔɔ' dlu ‑sä n ‑kä bhɛ ‑zi 'naa? Nyɩkpɔɔ lä n ‑kä bhä ɔɔ' ‑nyʋʋ' ‑bhɛgöö' gwlɩ ‑ngbüü' (100) dlu. ‑Gänʋnyɔɔ lä ‑aa! ‑Naa 'bɔɔgʋ‑pɛlʋʋ ‑a ‑jɩjlä bhlä dluu' ‑za nä, ‑n ni ʋmʋ! ‑N 'cɩcɩ 'näbaa, ɩyä ‑n jɩjlä ‑lɔɔ nynä ɔɔ' ‑nyʋʋ' ‑bhɛgöö' gwlɩ ‑mɔɔnää' dluu‑ ‑n ‑kä. 8‑Mä 'tänyɩɩ ‑gänʋnyɔ ‑nyonyonɔ ‑plä ylä ‑lää' ‑kpläkplaa, 'nɩ ɔɔ' käänyɔ nuu‑ lä wälɩɩ nä, kɔ ‑klɔɔ ‑kpacɛ, ɔ lä ‑zɩglägbäma, nyɩkpɔnɔ ‑glö nyɩkpɔɔ' lɔɔ ‑ɔ ‑gblɩ lä nä!

'Nɩ Zozii yi ci, ɔ lä a ni 'yi ‑a! 'Ylʋnʋ ‑zɔɔ' nyɩkpaa, waa' nʋnʋgbɩɩ wa fä lä wa ‑liesɩ yëku nä, wa ‑fɩɩ plɛkʋ. Wa ‑gblɩ 'nɩ wa ‑zi Laagɔɔ' zëlüü 'mnö nämnönyʋa 'kʋ.

9Nä, ‑amʋ, kä n sonö'anyɩ yɩ nynä ‑mä, ‑mää 'ylʋzɔɔ' leylüü ‑ɩ 'nyigë lä nä, a 'bhlii 'kʋ ‑yä a klä 'nagwɩä! Ɩyä 'tänyɩɛ 'mnö ‑lɔɔ' leylüü kä lä ‑zee 'kʋ ‑bhɩä nä, 'gbüü lɩɩ ‑ɩɩ ‑wʋ lä 'kʋ bhɩäsä ‑kä nä, wa 'kanyɩmɩ 'mnö kʋdä 'nyɛ 'kɔɔkɔɔ ‑za! 10Nyɩkpɔ, kä ‑lɛɛ 'tɩkɩlɛɛ 'kʋ wloosä ‑yi nä, kɔ mii 'nɩ ɔ wloo ‑lɛɛ 'kädʋ 'kʋ. 'Ɩzä kä nyɩkpɔ 'nö ‑lɛɛ 'tɩkɩɩlɛɛ 'kʋ wloosä ‑yi nä, ɔɔ' mii ‑wʋ ‑lɛɛ 'kädʋʋ' 'kʋ wloolɩ. 11Nä, ‑mää 'ylʋzɔɔ' 'nyigë 'nyigë‑leylüü, a 'nɩ 'nägäsää' kläsä ‑yi nä, leylüü' ‑lɩɩ ‑ɩ plöö‑ lä leylü 'titi nä, ‑ɔ yi'anyɩmɩ bhä 'kʋ wloodä 'nyɛɛ? 12Lʋʋ' lʋʋ wa gbla'anyɩ lä 'kʋ nä, a 'nʋ klä sä ‑yi nä, ‑lʋʋ ‑ʋ 'gä bhlä anyɩa' dä 'plö nä, ‑ɔ yi'anyɩmʋʋ bhä 'nyɛɛ?

13‑Gänʋnyɔ nä, ɔɔ' ‑lä mii 'nɩ ɔ 'kä käänyʋä 'sɔ kään. Ɔ yi ‑bhlo cɛɛ, 'nɩ ɔ yi ‑bhlo wamä. Ɔ ‑yä ‑bhlo 'sɔ yi 'jɛnyɩ 'nɩ ɔ yi ‑bhlo cɛɛ. Nä, anyɩ, aa ‑lä mii 'nɩ a 'kä Laagɔ ‑gä nʋ, 'nɩ a 'kä bʋkʋ Monii ‑zuzu ‑gä nʋ.

‑Jlämaa' 'tänyɩɛ ‑yä Laagɔɔ' 'Nägädöö' 'tänyɩɛ

14‑Mä 'tänyɩ Zozii ci bhlä sɔɔ nä, Falizɩɛnyʋa ‑wa ‑waa bhlä kpänyɩ monie nä, wa nyɩänöɔ bhä. 15'Nɩ ɔ yiwa soo, ɔ lä anyɩ, a tla 'flɛ a yëku a ‑liesɩ nynä 'yigëënyʋä, ‑mä Laagɔ ‑yi anyɩa' pleyii wälɩɩ 'fɩɩn! N sonö'anyɩ nynä nyɩkpɔɔ' lɔɔ wa ci lä nynä ‑mä ɔ plöö‑ nyɩkpa 'kädɔ ‑mää 'ylʋzɔɔ nä, Laagɔ dëlüü ‑lɔɔ' nyɩkpɔɔ ‑glö ‑lɛɛ nyonyo.

16Cie ‑bhäädä ‑aaa ‑yä ŋëë yɩ Zään Badisöö' 'tänyɩɛ 'mnö nä, Moyizöö' ‑Jlämaa, ɩyä 'plɔfɛtɩnyʋaciciwälɩɩ' 'tänyɩɛ 'mɛɛ‑ ‑kʋ lä ‑lɔɔ. ‑Mä 'bhää yɩ ‑lɔɔ 'kʋ nä, Laagɔɔ' 'Leyiduu' 'Nägädöö' bie‑tänyɩ ‑kʋ ylä. 'Nɩ Laagɔɔ' 'Leyiduu nä, ‑ɔ ‑yi ylä 'kʋ bhlääsä nä, ɔmɔɔ‑ 'gʋ ylä 'mnö plä. 17'Nyukpɔ ‑laagɔnʋ yi 'plö, 'nɩ ‑dʋdʋʋ yi 'plö, ‑mä Laagɔɔ' ‑Jlämaa nä, aa' ‑lä 'sää 'näböyi 'tɩkɩɩlɛɛ 'kʋ ‑sɔɔ.

18Nä, nyɩkpɔ kä ɔ 'ŋnɔ cɛɛ‑ 'nɩ ɔ kä 'yigädalɔɔ nöö‑ nä, ‑lɔɔ' nyɩkpɔɔ yä 'ŋnɔ 'ylä. 'Nɩ ŋnɔɔ' lɔɔ ɔ ‑nyoto tlüü‑ lä nä, nyɩkpɔ kɔ nöö‑ nä, ‑lɔɔ nyɩkpɔɔ ‑yä 'sɩɩ 'ŋnɔ 'ylä.

Ŋäzönyɔ Lazaa ‑yä lɛkäänyɔ 'sɔ ‑nyädlaa

(Lukö 12.15‑21; 6.20‑21,24‑25)

19A ni nyɩkpɔ ‑bhlo ‑kʋ bhä ‑lɔɔ 'nɩ ɔ plöö‑ bhä lɛkäänyɔ. Ɔ ‑waa bhä 'ŋnumʋ‑kwëtii' plälɩ. Ɔ ‑kʋ bhä 'nää, 'nɩ ɔ lü bhä 'nää ylɩɩ 'fɩɩn 'kʋ. 20‑Mä nyɩkpɔ ‑bhlo ‑kʋ bhä 'sɩɩ ‑lɔɔ 'nɩ ɔ plöö‑ bhä ŋäzönyɔ 'nɩ 'jü yio‑ bhä yëku. Ɔmɔ wa laa bhä Lazaa. Lɛkäänyɔɔ' 'gbëa ‑glënëa nëkʋ ‑lɔɔ ɔmɔ Lazaa pu bhä. 21Lɛkäänyɔɔ kä ‑lü nä, ɩɩ' ‑lɩɩ ‑ɩ bhlü lä ‑zɔɔ nä, Lazaa' plɛ ylä bhä nynä ‑mä wa 'nyɩɔnyɩ ‑yä ɔ 'kɩ lü, ‑mä waa' 'nyɩɔnyɩ bhɔɔ. ‑Lɔɔ ɔ ‑kʋ 'nɩ ɔ mnä bhä 'bë, 'nɩ goyuë yi 'nɩ wa mɛɛ bhä 'sɩɩ ɔɔ' 'jüü 'yii.

22‑Mä tänyɩ ‑kʋ ‑lɔɔ 'nɩ ŋäzönyɔɔ yi 'ku. Ɔ kuu‑ lä nä, kä ‑Laagɔzizi ‑yio ‑gʋʋ 'nɩ ɩ yio Ablaamʋ yëku fä. 'Tänyɩ ‑kʋ 'sɩɩ ‑lɔɔ, 'nɩ lɛkäänyɔɔ ‑mä ɔ yi 'ku 'nɩ wa yio zizie. 23‑Mä ‑mɔɔ 'kudukʋ nä, ‑gbäsɩɩ 'kwlɩkabhɩa ‑kʋ lä nä, ‑mɔɔ lɛkäänyɔɔ ‑kʋ bhlä. Ɔ ‑kʋ ‑mɔɔ fɛɛn, 'nɩ ɔɔ' 'yi ‑bhlü Ablaamʋ 'kʋ. Ɔ lɔ wloo 'sɩɩ nä, Lazaa ‑kʋ ‑mɔɔ Ablaamʋ yëku sä. 24'Nɩ ɔ yi 'mʋ ‑gaa, ɔ lä ‑a tötɔ Ablaamʋ‑, ‑n yibhënö'ö ŋäzö! Bheeje, ‑n lobho Lazaa ‑yä ɔ 'kä ɔɔ' wliiyee 'nyuu ŋwa ‑yä ɔ kä'ä mɩɔ 'kʋ too, ‑mä ‑kosu‑düdënä 'mnö n ‑kʋ lä nä, kä n si lä! 25'Nɩ Ablaamʋ yio soo, ɔ lä 'naa 'yunɔ, ‑n 'pä plɛ ‑yä ‑n luë. ‑N luë nynä ‑mä 'tänyɩɩ ‑n ‑kʋ bhlä ‑mɔɔ zëkpë 'kʋ nä, ‑naa 'nää 'fɩɩn kä ‑n nia. ‑Mä Lazaa nä, kɔ nii‑ nyäkälɩ ‑bhutukpä. Ɩmɩɩ‑ ‑kä 'ŋnö 'nɩ ɔ ni ylä 'kʋ wɔtɔlɩ, 'nɩ ‑mɔɔ ‑n ni ylä 'kwlɩkabhɩä. 26'Nɩ ‑anyɩ ‑yä anyɩ 'sɔ pää nä, ‑gbazlʋʋ 'kädʋ ‑kʋ lä 'sɩɩ ‑lɔɔ nä, ɩ ‑kä 'ŋnö 'nɩ ‑anyɩ nëëdë nyɩkpɔɔ' ‑lä ‑mɔɔ ‑bha 'nɩ ɔ 'kanyɩ yëku mʋ. 'Nɩ anyɩ nëëdë nyɩkpɔɔ' ‑lä 'sɩɩ ‑mɔɔ ‑bha 'nɩ ɔ 'ka‑anyɩ ‑mää yëku yi. 27'Nɩ lɛkäänyɔɔ yi Ablaamʋ soo, ɔ lä ‑a tötɔ Ablaamʋ‑, n slää‑ä 'wlu, bheeje, ‑n lobho Lazaa ‑mɔɔ 'ylʋzɔɔ, n 'bää 'gbëa 'mnö 28‑mä, n ‑kä bhelie ‑ngbü nä, ɔ 'kwa gblɩmä ‑yä ‑gbäsɩɩ n ‑kʋ lä ‑mää 'nɩ 'kwlɩɩ bhɩänö'ö nä, waa' kä ‑kä ‑mɔɔ yi! 29Ɔ cii‑ lä sɔɔ nä, kä Ablaamʋ ‑sonöɔ, ɔ lä ‑n bhelie nä, wa ‑kä Moyizöö' ‑Jlämaa ‑yä Laagɔɔ' 'plɔfɛtɩnyʋaa' ciciwälɩɩ nä, wa pui 'nyukwli! 30Nyɩkpɔɔ lä 'nn, ‑a tötɔ Ablaamʋ‑, nyɩkpɔ kä ‑mää 'kudukʋ ‑bha 'nɩ ɔ kwa 'dö ‑fä nä, ‑lɔɔ wa 'kä lä waa' gbenyenyii 'mnö ‑bha. 31'Nɩ Ablaamʋ yio soo, ɔ lä wa 'nö Moyizöö' ‑Jlämaa ɩyä Laagɔɔ' 'plɔfɛtɩnyʋaa' ciciwälɩɩ 'nyukwli ‑poo nä, nyɩkpɔ yi 'kuëë glɔɔ ‑aaa, wa 'nöɔ ‑lä 'mänyɩ.

Currently Selected:

Lukö 16: god

Highlight

Copy