Lukö 14

Zozii ‑yamä 'ghlöghlö guu' 'bhlänyɔ

(Lukö 6.6‑11; 13.10‑17)

1 Sabaa‑gwlɛylʋ ‑bhlo 'kʋ, Falizɩɛnyʋaa' 'cifi laa‑ Zozii ɔɔ' ‑gbäsɩɩ nynä wa 'kä lü. ‑Mä nyɩkpaa‑ ‑kʋ bhlä ‑lɔɔ nä, wa bɩä bhä Zozii' nʋnʋgbɩɩ. 2Nyɩkpɔ ‑bhlo, 'ghlöghlö gu bhlɔɔ bhä 'nɩ ɔ ‑kʋ bhä ‑lɔɔ Zozii 'yikʋ. 3'Nɩ Zozii yi ‑Jlämöcɩanyʋa ‑yä Falizɩɛnyʋa 'ylä, ɔ lä ɩ ‑ŋwa bhä 'kʋ nynä ‑mä wa yamä nyɩkpɔ Sabaa‑gwlɛylʋʋ 'kʋ ‑a? 4Ɔ ylʋwa‑ lä sɔɔ nä, waa' 'kʋʋ nyɩkpɔɔ' ‑wʋ në ‑sä. 'Nɩ ɔ yi nyɩkpɔ wlɩ 'taa 'nɩ ɔ yio yamä. 'Nɩ ɔ yio soo nynä ɔ mʋ gbëë'. 5'Nɩ ɔ yiwa soo, ɔ lä anyɩa nëëdëë' nyɩkpɔɔ' 'yu ‑o, ɔɔ' ‑dodobhli ‑o, ɩ kä Sabaa‑gwlɛylʋʋ 'kʋ 'nyusɔkwää ‑bhlüü nä, ɔ 'nɩɩ ‑lä bhä ‑mɔɔ ‑sä 'kpobhuu ‑bhlobhlo 'kʋ ‑a? 6‑Mä Zozii ylʋwa‑ lä sɔɔ nä, waa' ‑wʋ mii‑ 'nɩ wa 'kɔ wälɩ 'ylɩbha‑.

Aa' tään ‑lä 'yikʋʋ' këkpüü' kʋlɩ

7‑Maa, nyɩkpaa wa ‑yi bhlä lüda nä, 'yikʋʋ' këkpüü 'mnö ‑mɔɔ wa tään bhä säkʋdä. Zozii ‑wloo ‑plɩɩ, 'nɩ ɔ yiwa ‑dɔɔ 'pää, 8ɔ lä wlunö‑glɩsɩɩsɩ kä dä ‑kʋ, 'nɩ wa kä‑ä laa‑ nä, ‑n gä ‑yi nä, ‑naa mʋ ‑lä 'nɩ ‑n 'gä 'yikʋʋ këkpüü 'mnö sä kʋ. ‑Ɔnöza bhää? Nyɩkpɔɔ' lɔɔ ‑ɔ ‑kʋ lä kpänyɩ 'klʋkpää' 'nɩ ‑ɔ zi‑i lä nä, wa kɔ bhä laamʋ‑ 'nɩ ɔ kä ‑yi nä, 9‑jlükäänyɔɔ yi‑i yëku yi, 'nɩ ɔ yi‑i soo nynä ‑mä, ‑mɔɔ, ‑n ‑bha 'kʋ ‑mä nyɩkpɔnɔ 'kä sä kʋ! Ɔ kä‑ä yɩ sɔɔ ‑soo nä, ‑naa zoo ‑lɔɔ, ‑mɔɔ klëë‑ ‑n 'gä ylä sä kʋ ‑kää mʋ. 10Nä wa kä‑ä ‑jlëë' laa 'nɩ ‑n gä ‑yi nä, ‑n kʋ ‑mɔɔ klë sä! ‑Jlükäänyɔɔ kä ‑yi, 'nɩ ‑jlëë' nyɩkpaa 'fɩɩn 'klʋ, ɔmɔɔ‑ gä‑ä yɩ ‑soo nynä ‑mä ‑aawli! ‑N plöö‑ ‑mää 'yikʋ nä, 'tänyɩɩ' ɔ 'kä‑ä lä sɔɔ soo nä, ɩ yi ‑naa 'klʋkpää nʋ. 11Kä n sonö'anyɩ nynä ‑mä, nyɩkpɔ kä ɔ yëku 'kʋ bhɛlɩä nä, Laagɔ yio ‑dʋdʋkʋ ‑lä. ‑Mä nyɩkpɔ kä ɔ yëku ‑dʋdʋkʋ ‑lä nä, Laagɔ yio 'kʋ bhɛlɩä.

‑N laa ŋäzönyʋä ‑yä wa 'kä lü

12'Nɩ Zozii yi nyɩkpɔɔ ‑ɔ lɔɔ‑ bhlä nä soo, ɔ lä ‑n gä nyɩkpa laa nynä wa 'kä lü nä, ‑naa 'nagwɩa, wamä ‑naa laa ‑lä! ‑Naa laa ‑lä ‑n bhelie ‑yä ‑n bhɛŋwnɩä! ‑Naa laa ‑lä ‑naa nyʋä! ‑Naa laa ‑lä 'sɩɩ ‑wa ‑yä ‑mɔɔ 'sɔ 'tënö 'nɩ ‑wa ‑kä lä lɩ nä! Wamä ‑n gä laa‑ nä, wamä ‑mä 'sɩɩ wa yi‑i ‑zee laa. Kɩ 'kä ylä kʋ nynä kwa ‑plʋnö‑ö. 13Nä, ‑n gä cii‑ ‑n 'gä nyɩkpa lüdä laa nä, ‑n laa ŋäzönyʋä, ɩyä 'bhlʋlɛ‑käänyʋä. ‑N laa 'sɩɩ bhɩ‑bhlünyʋä ‑yä 'yikpü‑käänyʋä. 14Nyɩkpa‑cënä 'mä ‑n gä laa‑ nä, sä waa' ‑wʋ ‑lä lʋʋ ‑kä ‑yä wa 'kä‑ä plʋʋ nä, ɩ yi ‑naa ‑jäkä nʋ. ‑Ɔnöza bhää? Nyɩkpaa ‑wa nämnö‑ lä Laagɔɔ' 'yigëë‑blɔɔ 'kʋ 'nɩ 'kwie ‑fämʋ lä nä, 'tänyɩɩ' wa 'kä lä 'kuëë ‑glɔɔ nä, Laagɔ yi‑i bɔɔ 'pä.

‑Lɛɛ ‑lüdaa' nyɩkpaa' ‑nyädlä

(Matie 22.1‑14)

15Zozii cii‑ lä sɔɔ nä, nyɩkpaa' ‑lʋa ‑wa ‑yɔsɔ lü bhlä nä, waa' lɔɔ ‑bhlo cii‑, ɔ lä Laagɔɔ' 'Leyiduu 'mnö lüdaa nyɩkpɔɔ' lɔɔ‑ gä ‑lɔɔ ‑kʋmʋ nä, ɔ yä 'pʋ! 16'Nɩ Zozii yio ‑nyädlä sonö, ɔ lä ‑n ni nyɩkpɔ ‑bhlo ‑kʋ bhä ‑lɔɔ 'nɩ ɔ ‑pi ŋënü ‑bhutukpä. Ɩ ‑kä 'ŋnö 'nɩ ɔ laa‑ nyɩkpaa ‑bhutukpä nynä wa yi ‑yä wa ‑yɔsɔ 'kä lü. 17Nä ‑lɩɩ ‑ylö ylä nä, ɔ ‑lobho ɔɔ' ‑gänʋnyɔɔ nynä ɔ mʋ ‑yä ɔ sonʋwa nynä lülülɩɩ ‑yä wɛzä ‑ghlɩlɩ nä, wa yi ‑yä ɩ 'kä yɩ lüo. 18‑Mä ‑gänʋnyɔɔ ‑mʋ ylä nyɩkpanä laa ‑kää nä, kä nyɩkpɔ nyɩkpɔ cii‑ nynä ɔ ‑kä wlɩɩ', ‑mä ɔɔ' ‑läyɩɔ yi. ‑Nɔnɔ ‑kʋ ‑lɔɔ 'nɩ ɔ cii‑, ɔ lä n zɔɔ‑ 'naa 'klä nä, ɩ ‑ŋwa 'kʋ nynä ‑mä, n mʋ ‑pɛpɛɛ ‑mɔɔ ‑yä n 'ka 'mnö wloo. Nä, kä ‑naa wälɩ mɛɛ‑, ‑mä nn' ‑läyɩɔ yi! 19'Nɩ 'yigädalɔɔ yi ci, ɔ lä n zɔɔ‑ 'naa ‑dodobhlü 'kʋgbä nä, ɩ ‑ŋwa 'kʋ nynä ‑mä n ‑nyɩ 'sɔ mʋ ‑pɛpɛɛ ‑mɔɔ 'klää ‑yä ɩ 'kä ‑dʋdʋʋ' 'klulɩ ylaa. Nä, kä ‑naa wälɩ mɛɛ‑ ‑mä, nn' ‑läyɩɔ yi! 20'Nɩ 'yigädalɔɔ yio bʋkʋ soo, ɔ lä ‑pɛpɛɛ n bha lä 'naa 'ŋnɔ flaadä nä, ɩ ‑kä 'ŋnö 'nɩ nn' ‑läyɩɔ mii‑ ‑yä n 'kä yi.

21Nyɩkpanä cii‑ ylä sɔɔ nä, kä ‑gänʋnyɔɔ 'ylɩbhɔ‑ 'nɩ ɔ yi ɔɔ' käänyɔ 'dö ‑lä. ‑Mä ɔ ‑sänöɔ lä 'dö nä, kä plɛkʋ ‑sio. 'Nɩ ɔ yi ɔɔ' gänʋnyɔɔ soo, ɔ lä ‑n mʋ 'fäfä ‑yä ‑n bhlü 'duu 'clɩkpɔɔ, ɩyä 'tlüü 'fɩɩn. ‑N laa ŋäzönyʋa ‑yä 'bhlʋlɛ‑käänyʋa ‑yä wa yi. ‑N laa 'sɩɩ 'yikpü‑käänyʋa ‑yä bhɩ‑bhlünyʋa ‑yä wa yi. 22‑Mä ‑gänʋnyɔɔ nä, sä ɔɔ' käänyɔ ‑sonöɔ bhlä nä, ɔ ‑nʋ sɔɔ. 'Nɩ ɔ yi ɔɔ' käänyɔɔ soo, ɔ lä Käänyɔ‑, lebhee ‑n nyɛɛ'ɛ lä nä, n yɛ ‑zɔɔ bhɩä, ‑mä säkʋdö ‑ji ‑lätee 'kʋ. 23Käänyɔɔ lä ‑n mʋ ‑yä ‑n bhlü ‑bɔlɩɩ! Dä ‑n gä ‑gboo' ‑gläglɩ 'yi 'nii‑ nä, ‑n plä ‑lɔɔ! Nyɩkpa 'fɩɩn ‑n 'gä lä 'ni nä, ‑n sonʋwa ɩyä nʋ sää 'fɩɩn ‑yä wa yi ‑mä 'naa 'gbëa 'kä yie. 24‑Mä ‑n ni, nyɩkpaa' ‑lʋa n laa‑ bhlä tɛɛ, 'nɩ ‑wa cii‑ lä nynä ‑waa yi yɩɔ nä, waa' 'kʋʋ nyɩkpɔɔ' ‑lä 'naa lülülɩɩ në koo.

'Sää nyɩkpɔ 'kä lä Zozii' 'kʋgënyɔ 'plö

(Matie 10.37‑38)

25'Tänyɩ ‑kʋ ‑lɔɔ 'nɩ Zozii ‑yä nyɩkpaa' 'kpä 'sɔ nää‑ bhä. ‑Mä ɔ 'ylɩbhɔ‑ 'nɩ ɔ yiwa 'klʋ tlaa. 'Nɩ ɔ yiwa soo, ɔ lä 26nyɩkpɔ kä cii‑ nynä ‑mä ɔ yi 'naa 'kʋgënyɔ 'plö nä, ɔ wamä 'naa wälɩ ‑yä ɔ zi ɔ 'nɔ, ɩyä ɔ 'bä, ɩyä 'ŋnɔ, ɩyä ɔɔ' 'yuë, ɩyä ɔ bhelie, ɩyä ɔ bhɛŋwnɩä. Ɩyä ɔ wamä 'naa wälɩ ‑yä ɔ zi ɔ yëkuu' zëkpë. ‑Ɔnö sɔɔ mii‑ nä, ɔɔ' ‑lä 'naa 'kʋgënyɔɔ' 'plölɩ mii. 27‑Ɔ gä cii‑ nynä ɔ yi'i 'kʋ 'gë 'nɩ ‑ɔnö ɔ yëkuu' 'kusu bhɛɛ‑ nä, ‑lɔɔ' nyɩkpɔɔ' ‑lä 'naa 'kʋgënyɔɔ' 'plölɩ mii.

28A ni 'yi ‑a! Anyɩa' nëëdëë' nyɩkpɔ kä ‑waa nynä ɔ 'kä ‑bhutu 'kädʋ 'slä nä, ɔ yi ɔ yëku soo nynä ‑mä, ‑bhutuu n 'kä lä 'slä nä, 'naa moniee‑ yi laa ʋʋ' yëkuu' lebhe 'fɩɩn ‑zɔɔ bhɩä? 29Kɔ nyäka lä sɔɔ ‑yä, ɔ kä ‑bhutuu glu pään nä, ʋʋ' kä ‑kä sɔɔ too. Ɩyä nyɩkpaa 'fɩɩn ‑wa 'gɔ lä ‑zee 'ni nä, waa' kɔ nii‑ waa' kɔ ‑kä nyɩä. 30Waa kä ci nynä ‑mä, nyɩkpɔnɔ cie‑ bhɛ 'flɛ ‑bhutuu 'kʋ ‑mä, ɔ yɩɔ mii‑ 'nɩ ɔ 'kʋ ‑zɔɔ ‑bhɩä!

31A ni, 'loyo kä cii‑ nynä ‑mä ɔ 'kä 'loyoo' 'yigädalɔɔ tʋ fä nä, kɔ ‑kʋ 'fɩa sä, 'nɩ ɔ bhobho. Ɔɔ' tëvënyʋa ‑bhlü lä ‑bhɛgö 'kʋgbä (10.000) nä, kɔ mnaa 'mʋ, 'nɩ ɔ ‑bhobho. Tëvënyʋaa' ‑bhɛgöö' glʋ (20.000) ‑mɔɔ' 'loyoo bhɛɛ‑ 'nɩ ɔ yi lä nä, kɩ kä ‑kʋ nynä ‑mä, ɔ yi mii 'nɩ ɔ ‑yʋwa 'sɔ yi vë nä, kɔ tänɩ. 32Kɩ kä ‑kʋ nynä ‑mä ɔɔ' ‑lä mii nä, kɔ sä 'kwälö 'nɩ, dä ‑mɔɔ' 'bhlɩɛɛ 'loyoo ‑yä ɔɔ' tëvënyʋa 'sɔ ‑kʋ lä ‑lätee ‑blëlë nä, wa mʋɔ 'wlu slää ‑kää ‑yä ‑dʋdʋkʋ 'kä 'kʋ wɔtɔ. 33Nä, n sonö'anyɩ nynä ‑mä nyɩkpɔɔ' lɔɔ ‑ɔ 'nö ɔɔ' kääkäälɩɩ 'fɩɩn yëku ‑bha, 'nɩ ɔ nö'ö ‑yii nä, ɔɔ' ‑lä 'naa 'kʋgënyɔɔ' 'plölɩ mii.

34A ni 'yi ‑a, glü nä ɩ ‑glö ‑lɛ 'nänʋ. ‑Mä ɩ kä yɩ nyɔnyɔɔ' ‑bhɩä nä, sä wa yi bhä nʋ 'nɩ ɩ yi bhä mɛmää? 35Ɩ kä yɩ nyɔnyɔɔ' ‑bhɩä nä, ɩɩ' yɩɔ 'sɩɩ ‑dʋdʋʋ 'mnö gwäzö 'kʋ nää. 'Nɩ ɩɩ' yɩɔ 'sɩɩ gogolɩɩ' ‑gwäzö 'kʋ nää. Ɩ kä sɔɔ ‑kʋ nä, kwa pɩɩ 'klä. Nä, ‑ɔ gä 'nyukwli ‑kä nynä ɔ 'kä 'nu nä, ɔ 'nu!

Currently Selected:

Lukö 14: god

Highlight

Copy