Lukö 13

A ‑taa gbenyenyii 'yi

1‑Lɔɔ' 'tänyɩɛ 'mnö nä, Galileenyʋä ‑kʋ bhä ‑mɔɔ Zolizalɛmʋduu' Laagɔɔ' 'cibhisädää' bʋbɔdaa 'nɩ ‑gɔmnä Pilatö bhlʋwa‑. ‑Lɔɔ' 'döö 'mɩ nyɩkpa zio ‑yi 'nɩ wa yi Zozii ‑sää. 2‑Mä Zozii ‑sonʋwa, ɔ lä ka bhobho bhä nynä ‑mä Galileenyʋa Pilatö bhlää‑ lä nä, waa' nyenyii 'mɩɩ‑ ‑zu 'nɩ ɩ zi bhä Galilee' nyɩkpaa 'fɩɩn nyenyii 'kʋ nä, 'ɩzä ɔ bhlʋwa‑ ‑a? 3Yio! Kä n mʋ'anyɩ yɩ soo ‑kää nynä ‑mä, a 'nö anyɩa' gbenyenyii 'yi taa nä, sä nyɩkpanä kuu‑ lä nä, a yi 'sɩɩ sɔɔ 'kumʋ. 4Nyɩkpaa 'kʋgbä ‑ngbaatä, Siloweeduu' ‑bhutu 'kädʋʋ ‑bhlüü bhlä 'wlu 'nɩ ‑wa kuu‑ lä nä, ka bhobho nynä ‑mä waa' nyenyii 'mɩɩ‑ ‑zu bhɛ 'nɩ ɩ ‑zi Zolizalɛmʋʋ' nyɩkpaa 'fɩɩn nyenyii 'kʋ ‑a? 5Yio! Kä n sonö'anyɩ yɩ nynä ‑mä, a 'nö anyɩa' gbenyenyii 'yi taa nä, anyɩ ‑mä 'sɩɩ, sä nyɩkpanä kuu‑ lä nä a yi sɔɔ 'kumʋ!

'Figesuu ‑ʋʋ tlʋ ‑wʋ lä nä

6'Nɩ Zozii yiwa 'sɩɩ ‑nyädlä soo, ɔ lä nyɩkpɔ ‑bhlo, ɔ ‑goo ɔɔ' divaa‑gälöklä 'mnö suu waa' laa lä 'fige nä. ‑Mä suu yä bhɛ lä tlʋdä ŋëë nä, 'tänyɩ ‑kʋ ‑lɔɔ 'nɩ ɔ ‑yiu 'yii wloo ‑kää, ʋ kä bhä ‑tlʋ nä. ‑Mä ɔ ‑yi lä nä, ɔ 'nʋʋ ‑wʋ 'bhë 'yii ‑ŋëë. 7Ɩ ‑kä 'ŋnö 'nɩ ɔ ‑soo ɔɔ' 'klaa lebhenʋnyɔɔ, ɔ lä ɩ nʋ yɩ 'ylʋbɔ taa 'nɩ n yi lä suunʋ 'yii wloo ‑kää. ‑Mä n 'nʋʋ ‑läzä 'bhë 'yi ŋëë. Nä, ‑n ‑dʋʋ 'kʋ! ‑Ɔnözä 'nɩ ʋ ‑kʋ bhä 'flɛ ‑lää 'nɩ ʋ gbii‑ bhä ‑dʋdʋʋ 'wlu? 8'Klaa käänyɔ cii‑ lä sɔɔ nä, kä ɔɔ' lebhenʋnyɔɔ ‑sonöɔ, ɔ lä Käänyɔ‑, ‑n ‑tanʋ ‑wʋ saa bʋkʋ 'yi, 'ylʋbänä ‑bhloo' ‑za! N kä ‑nʋ nä, n 'kä ʋʋ yëkuu' ‑dʋdʋʋ koto n 'kʋʋ 'kʋ bii, ɩyä n 'kʋʋ gwäzö nʋ. 9'Yikʋʋ' 'ylʋbaa 'mnö, ‑mɔɔ ‑yi ‑mɔɔ nynä ‑mä ʋ yi tlʋ! Ʋ 'nö ‑kɛ ‑tlʋ nä ‑n 'gʋʋ 'kʋ ‑döö.

Sabaa‑gwlɛylʋʋ 'kʋ Zozii ‑yamää 'bhlʋlɛ‑kääŋnɔ

10'Tänyɩ ‑bhloo', Sabaa‑gwlɛylʋʋ 'kʋ, Zozii ‑kʋ bhä Laagɔ‑bhutuu 'mnö 'nɩ ɔ cɩa bhä nyɩkpa. 11‑Mä 'ŋnɔ ‑bhlo ‑kʋ a ‑mɔɔ 'nɩ 'bhlʋlɛ ‑slɔɔ 'nɩ ɔ 'gbuu‑ bhä 'mʋ. Ɩ nʋ bhɛ 'ylʋbɔ 'kʋgbä ‑ngbaatä 'nɩ ‑zuzunyënyu ‑gbä 'nɩ ɔ 'gbuu‑ bhlä sɔɔ 'mʋ. Ɔɔ' mii‑ bhɔɔ 'kwläkwlä 'sää ‑yä ɔ 'kä 'mʋ gbɔɔ. 12Zozii nio‑ lä 'yi nä, kɔ ‑sonöɔ, ɔ lä 'ŋnɔɔ‑, ‑naa 'bhlʋlɛ yä ‑zɩkä bhɩä! 13Ɔ cii‑ lä sɔɔ nä, 'nɩ ɔ yio ‑klɔgbö 'kʋ gbɛɛ. 'Kpobhuu ‑bhlo 'kʋ, 'nɩ 'ŋnɔɔ yi 'mʋ gbɔɔ. 'Nɩ ɔ yi Laagɔ 'ŋnu fäälɩ 'kʋ cie.

14‑Mä Laagɔ‑bhutuu' 'kämänyɔɔ, sä Sabaa‑gwlɛylʋʋ 'kʋ Zozii ‑yamää bhlä 'ŋnɔɔ nä, kä wälɩɩ ‑sio plɛkʋ. 'Nɩ ɔ yi ‑jlëa soo, ɔ lä nyɩkpɔ ‑kä ylɩɩ ‑ngboplo ‑yä ɔ 'kä lebhe nʋ. Nä, a kä yamälɩ tää nä, ɩmɩ 'mnö a la yii, ‑mä aa' yi ‑lä Sabaa‑gwlɛylʋʋ 'kʋ! 15Ɔ cii‑ lä sɔɔ nä, kä Kwlienyɔ Zozii cii‑, ɔ lä nyɩkpaa' 'nyigënyʋänyɩ‑! 'Nɩ Sabaa‑gwlɛylʋʋ 'kʋ nä, anyɩa' nëëdëë' nyɩkpɔ nyɩkpɔ blisie ɔɔ' ‑dodobhli ‑yä ɔɔ' jakasö 'nɩ ɔ sɩɩ lüdä 'nɩ ɔ fɩɩ 'mnä kää! Yio ‑a? 16'Nɩ 'ŋnɔnɔ plöö‑ ‑a tötɔ Ablaamʋʋ' 'yu 'nɩ 'Dëvlo ŋʋɔ‑ lä ‑jämɩɩ'. Ɩ nʋ yɩ 'ylʋbɔ 'kʋgbä ‑ngbaatä 'nɩ ɔ ‑kʋɩ ‑lä 'mnö! Nä, Sabaa‑gwlɛylʋ 'kʋ, ɩɩ' bhɛ 'kʋ ‑ŋwa nynä ‑mä, wa ‑döɔ 'kpɔ ‑a?

17‑Mä Zozii ci bhlä sɔɔ nä, nyɩkpaa 'fɩɩn ‑waa bhɔɔ lä ɔɔ' wälɩ 'kʋ mɛɛ nä, kä zoo bhlʋwa‑. ‑Bhlɛ sɔɔ ɩ ‑kʋ 'nɩ 'nägä‑wälɩnɩ 'fɩɩn ɔ nʋ bhlä nä, ɩ ‑kä 'ŋnö 'nɩ ‑jlëa 'mnö nyɩkpaa nʋ bhä ‑pʋpɛ.

Suyʋyee wa laa lä mutadö nä ɛɛ' ‑nyädlaa

(Matie 13.31‑32; Makö 4.30‑32)

18'Nɩ Zozii yi bʋkʋ ci, ɔ lä Laagɔɔ' 'Leyiduu 'wlʋʋ‑ bhä ‑zi 'nɩ n yiu bhä 'kʋ nyäka 'naa? 19Ɔ lä Laagɔɔ' 'Leyiduu nä, kʋ ‑kʋ lä nynä suyʋyi 'tɩkɩɩlɩɔ wa laa lä mutadö nä. Ɛmɛ nyɩkpɔ ‑goo lä ɔɔ' ‑gboo'. ‑Mä 'yʋyenɛ wlʋʋ, 'nɩ ɛ bhʋä 'nɩ ɛ 'plöö‑ suu'. 'Nɩ ŋɔkʋʋ' nümnüü yi 'nɩ, ɩ 'slää‑ ‑lɔɔ' suu' 'läbhɩɩ 'mnö ‑nünü.

'Flɔɔ' 'bhabha‑gwäzöö' ‑nyädlaa

(Matie 13.33)

20'Nɩ Zozii yi bʋkʋ ci, ɔ lä n 'kä bhä ‑zi Laagɔɔ' 'Leyiduu 'kʋ nyäka 'naa? 21Ɔ lä Laagɔɔ' 'Leyiduu, kʋ ‑kʋ lä 'sɩɩ nynä 'flɔɔ 'bhabha‑gwäzö 'mɩ 'ŋnɔ ŋʋʋ‑ 'flɔɔ tɩtɛ ‑bhutukpä 'mnö. 'Nɩ gwäzöö kʋ ‑mɔɔ tɩtɛɛ 'mnö 'nɩ ɩ gbä ɛɛ' ‑lefɩɩn bhaa.

A nʋ saa 'fɩɩn ‑yä a 'kä Laagɔɔ' 'Leyiduu 'mnö plä

(Matie 7.13‑14,21‑23; 8.11‑12)

22Zozii ‑kʋ bhlä Zolizalɛmʋ mʋdä nä, ɔ bhlü bhä 'di 'kädɩɩ ‑yä 'klää ‑bhlüdü 'nɩ ɔ cɩa bhä ‑mɔɔ' nyɩkpa. 23'Nɩ nyɩkpɔ ‑bhlo yio soo, ɔ lä Kwlienyɔ‑, nyɩkpaa 'gä lä ‑lɔɔ nëë' ‑bha nä, waa' ‑lä zumë nä, yio ‑a? 'Nɩ Zozii yi waa' ‑lefɩɩn soo, ɔ lä 24a bhlää 'kʋ ‑yä a 'kä ‑glënë 'tɩkɩɩlɩɔ nëë' blüë! N sonö'anyɩ nynä ‑mä bhutukpä yi tään nynä wa 'kä plä, ‑mä waa' ‑lä plälɩ mii.

25A ni, 'tänyɩ yi ŋëë 'nɩ 'gbëa käänyɔ yi 'kʋ ‑bha 'nɩ ɔ yi kpluu tʋ. ‑Bhlɛ anyɩ, a ‑kʋ ‑mɔɔ jlukʋ nä, 'tänyɩɛ 'mnö a 'kä lä 'gbëa bhütë ‑yä a 'kä lä ci nynä ‑mä, Käänyɔ‑, bheeje ‑n känö‑anyɩ 'gbë nä, kɔ 'kanyɩ lä soo nynä ‑mä, anyɩ nä, ‑gbäsɩɩ a bha lä nä, nn' ‑wʋ ‑mɔɔ dä ‑yi! 26‑Lɔɔ a 'kä ylä ci nynä ‑mä, ‑anyɩ nä, ‑a ‑yä ‑mɔɔ 'sɔ ‑lüü 'kʋ 'nɩ ‑a 'mnää 'kʋ! 'Nɩ ‑n ‑bhlü 'sɩɩ 'clɩkpɔɔ 'nɩ ‑n cɩa‑ ‑mɔɔ Laagɔwälɩ. 27‑Mä käänyɔ yi'anyɩ soo nynä ‑mä, ‑gbäsɩɩ a bha lä nä, nn' ‑wʋ ‑mɔɔ dä ‑yi! Anyɩmɔ 'fɩɩn‑ nʋ lä gbenyenyii nä, a ‑sä'ä gwë!

28 Ablaamʋ, Yizakö, ‑yä Zakɔpʋ, ɩyä 'plɔfɛtɩnyʋa 'fɩɩn, 'tänyɩɛ 'mnö a 'kwa lä 'yi 'ni ‑yä, wa 'kä lä Laagɔɔ' 'Leyiduu 'mnö plä nä, ɩyä anyɩ, wa 'kanyɩ lä jlukʋ 'pä nä, ‑lɔɔ a 'kä ylä 'tu ‑yä a 'kä lä gläwli mnü. 29Nyɩkpa yi dää 'fɩɩn ‑bha 'nɩ wa yi ‑mɔɔ Laagɔɔ' 'Leyiduu 'mnö yi. ‑Nänʋä yi 'ylʋʋ ghlää ‑gbäsɩ ‑bha. ‑Nänʋä yi 'ylʋʋ säpu ‑gbäsɩ ‑bha. ‑Nänʋä yi jiee' 'wlukʋ ‑bha. ‑Nänʋä yi 'sɩɩ jiee' ‑zɔɔ ‑bha 'nɩ wa yi yi. 'Nɩ waa' ‑lefɩɩn yi ‑mɔɔ Laagɔɔ' 'Leyiduu 'mnö ‑lɛɛlüda 'wlu 'wlää. 30‑Mä nyɩkpaa' ‑lʋa ‑kʋ lä klë nä, wa yi 'yikʋ 'plöö, 'nɩ ‑wa ‑kʋ lä 'yikʋ nä, wa yi klë 'plöö.

Zozii bhʋtʋ Zolizalɛmʋ‑dunyʋää' ‑za

(Matie 23.34‑39)

31Zozii ‑kʋ cidä 'nɩ Falizɩɛnyʋä zio yio yëku 'jloo, 'nɩ wa yio soo, wlä ‑n ‑bha 'bhlɩnɛ 'mnö ‑mä 'loyo Elodö tänö‑ö ‑yä ɔ 'kä‑ä 'bhlä! 32‑Mä Zozii ‑sonʋwa, ɔ lä Elodö, ‑ɔ 'nyigë lä nynä gbogwliza‑kɔkwɛɛ nä, a mʋ ‑yä a sonöɔ! A sonöɔ nynä ‑mä n tlü ‑zizinyenyi, 'nɩ n yamä 'sɩɩ gupänyʋa ‑zɩkä ɩyä zëkü, ‑mä taanaylʋʋ 'kʋ, n yi ‑zɔɔ bhɩä. 33Nä, ɩ ‑ŋwa 'kʋ nynä ‑mä n 'plömʋ ‑zɩkä, ɩyä ‑zëkü, ɩyä zëkü ‑bhlo. ‑Mä Laagɔɔ' 'plɔfɛtɩ nä, ɩɩ' ‑wʋ 'kʋ ‑ŋwa nynä ‑mä ɔ 'kuu ‑gblüklë. Zolizalɛmʋduu', ‑mɔɔ ɔ ŋwa lä 'kʋ nynä ɔ 'kuu.

34Ɔ cii‑ lä sɔɔ nä, 'nɩ ɔ yi bhʋtʋlɩ 'kʋ cie, ɔ lä 'wee! Zolizalɛmʋ‑! Zolizalɛmʋ‑! ‑Mɔɔ bhlä lä Laagɔɔ' 'plɔfɛtɩnyʋa! Nyɩkpaa Laagɔ lobho‑o lä yëku nä, kä n pʋwa këkpü! Sä ‑kɔkɔɔgä 'wlää lä aa yuë 'wlu 'nɩ a gbiwa lä 'kʋ nä, n ‑tään bhɛ 'flɛ nynä ‑mä n 'kä sɔɔ ‑naa 'yua 'wlu 'wlää ‑mä, anyɩ Zolizalɛmʋ‑dunyʋä, aa' yɩɔ ŋoo‑! 35'A! Sɔɔ ɩ kä yɩ ‑kʋ nä, anyɩa 'gbëa, n ya'anyɩma të o! ‑Mä kä n sonö'anyɩ yɩ nynä ‑mä, a nö'ö ‑läyɩɔ 'ni. A nö'ö ‑lä 'ni ‑aaa, 'nɩ ɩ yi 'tänyɩ nʋ! 'Tänyɩɩ a kä'ä ylä bʋkʋ 'ni nä, ‑lɔɔ a 'kä ylä ci nynä ‑mä ‑mɔɔ mɔɔ‑ yii lä Kwlienyɔ Laagɔɔ' 'ŋnöö 'mnö nä, 'nyupälɩ ŋënö‑ö 'kʋ!

Currently Selected:

Lukö 13: god

Highlight

Copy