Lukö 12

Zozii lä ɔɔ' 'kʋgënyɔ 'nä ‑guu ‑lä nyɩkpɔ

(Matie 10.26‑33)

1‑Lɔɔ' 'tänyɩɛ 'mnö nä, nyɩkpa ‑bhutukpä ‑yi 'nɩ wa 'mɩmɩä bhä Zozii 'kʋ. ‑Mä sä wa ‑zu bhlä kpänyɩ nä, wa 'nyɔtɔ nyɔtɔ bhä 'kʋ. 'Nɩ Zozii yi ɔɔ' 'kʋgënyʋa soo, ɔ lä a fä Falizɩɛnyʋa 'flɔɔ 'bhabha‑gwäzöö plɛ! Kä wa nʋ 'kʋ wloowloogbɩ nä, a fɩɩ ‑kä plɛ! 2'Klüü 'fɩɩn ‑ɩ ‑zizio lä 'kʋ nä, ɩ yi 'kʋ ghlä. 'Nɩ ‑lɩɩ 'fɩɩn ‑ɩ nʋɔ lä 'mükü ‑müküü' nä, ɩ yi yibhënöɔ. 3Ɩmɩɩ‑ kä lä 'ŋnö 'nɩ a kä lä wälɩ 'saboo ‑nʋ 'nɩ ɩ ghlä lä ‑zëlügä. Wälɩɩ' lɩɩ a 'ŋuŋuë lä ‑mɔɔ ‑bhutuu' nyɩkpɔ 'nyukwlii nä, nyɩkpa yii 'clɩkpää 'dö 'kʋ 'ŋʋʋ.

4Anyɩ 'naa 'nagwɩa, kä n sonö'anyɩ lä nynä nyɩkpaa' ‑lʋa ‑wa yi lä 'yɛkɛɛ 'bhlälɩ mii, 'nɩ ‑waa ‑lä lä bʋkʋ 'yigädalʋʋ nʋlɩ mii nä, aa' ‑guunʋwa ‑lä! 5A yi lä ‑guu nä, n 'kanyɩmɔ paa. A guu Laagɔ! Ʋ ‑kä 'päwä ‑yä ʋ 'kä nyɩkpɔ 'bhlä, 'nɩ ʋ ‑kä 'sɩɩ 'päwä ‑yä ʋ 'kä nyɩkpɔɔ' 'wugɔ 'Dëvloo' ‑kosu‑düdëa 'mnö 'pä. 6'Nɩ ‑mayuëë' ‑wʋ 'kpä ‑kä. ‑Adäbhlä 'kʋ nä, waa' lʋä ‑ngbü lü ‑pikiniyi 'sɔ. ‑Mä sɔɔ wa ‑kʋ 'nɩ wa kään Laagɔ gbʋ ‑nä. 7Nä, aa' ‑guu ‑lä ‑mä, anyɩa 'wluu nyɩɩ 'titi kä Laagɔ ‑zɛnɩ. 'Nɩ a kään gbʋ 'nɩ a ‑zi ‑mayuëë' bhutukpä.

8Nyɩkpɔ kä nyɩkpa 'klʋ 'naa ‑dläfʋɛ lü nä, n sonö'anyɩ nynä ‑mɔɔ Laagɔ yëku nä, ‑Laagɔzizii 'fɩɩn 'klʋ, Nyɩkpɔɔ ‑Yowli yi 'sɩɩ ‑lɔɔ' nyɩkpɔɔ' ‑za ‑dläfʋɛ lü nynä ɔ ‑glö ɔɔ' nyɔ. 9'Ɩzä ‑ɔ gä'ä nyɩkpa 'yikʋ cɛnö nä, ‑mɔɔ Laagɔ yëku nä, ‑Laagɔzizii' 'klʋ, n yio 'sɩɩ cɛɛ. 10Nyɩkpɔ kä Nyɩkpɔɔ ‑Yowlii' wälɩ ‑nyenyi cii‑ nä, Laagɔ yi mii 'nɩ ʋ yio cie. ‑Mä nyɩkpɔ kä Kplɔɔkplɔɔ‑wugɔɔ 'bhɩsɛ‑ nä, ‑lɔɔ' nyɩkpɔɔ Laagɔ 'nöɔ ‑lä 'kɔɔn 'nɩ 'kɔɔn cie.

11Wa yi'anyɩ Laagɔ‑bhitii 'mnö tʋ kuu, 'nɩ wa yi'anyɩ 'zuzunyʋa dëlü tʋ ‑kuu, 'nɩ wa yi'anyɩ ‑gɔmnä dëlü tʋ kuu. ‑Mä 'tänyɩɩ wa ka'anyɩ lä sɔɔ klä nä, plɛɛ' belio'anyɩ ‑lä 'mʋ 'nɩ, a 'kä ci nynä ‑mä 'nɩ 'klë ‑sä ‑a yi kä bhä ci 'nɩ ‑a yi bhä ‑a yëku 'kʋ bhlää! 12'Klüü a 'kä lä ci nä, Kplɔɔkplɔɔ‑wugɔɔ yi'anyɩmɩ nëë' 'pä 'kpobhuu ‑bhlo 'kʋ.

A 'nä 'mäkä ‑lä 'ylʋzɔɔ' kääkäälɩɩ 'kʋ

13'Nɩ ‑lɔɔ ‑jlëë', nyɩkpɔ ‑bhlo yi 'kʋ bha 'nɩ ɔ yi Zozii soo, ɔ lä Cɩanyɔ‑, soo n bheli ‑yä jaa 'kɔgwlɛnyɔɔ ‑të lä nä, ɔ dënöa ‑yä ɔ 'nyɛ yɩ 'naa ‑laa! 14Zozii lä ‑amʋʋ‑ dö anyɩa' jaa' wälɩɩ ‑a? ‑Ɔ ŋʋʋ'ʋ bhä anyɩa' jaa' dëëlɩ nëkʋʋ? 15'Nɩ ɔ yi nyɩkpaa soo, ɔ lä a kä ‑nʋ nä, a luë! A 'nä 'mäkä ‑lä lɛkäälɩɩ' ‑wawʋʋ 'kʋ! ‑Mä nyɩkpɔ nä, sä ɔ yi lɩ kämɔ ‑kämɔ ‑kaaa nä, ɔɔ' kääkäälɩɩ' 'nyɩɔ ‑wʋ 'pʋpʋɛ. 16Ɔ cii‑ lä sɔɔ nä, 'nɩ ɔ yiwa ‑nyädlä soo, ɔ lä lɛkäänyɔ ‑bhlo ‑kʋ bhä ‑lɔɔ 'nɩ, ɔ ‑kä bhä 'kälö. 'Nɩ ɔɔ' 'kälöö ‑tlʋ bhä kpänyɩ. 17Ɩ ‑kä 'ŋnö nä, ɔ ci bhä 'nɩ, ɔ soo bhä ɔ yëku ɔ lä kä 'naa 'kälöö ‑tlʋ kpänyɩ nä, nn' ‑lä lülülɩɩ' 'ŋʋdä 'ni! Nä, sä n yi bhä ‑zi nʋ 'naa? 18‑Ɛɛɛ, sä n 'kä lä nʋ nä, n yä sɔɔ 'ni! 'Naa wëlii 'fɩɩn ‑kä n 'kɩ lä wlä, ‑yä n 'kɩ 'ghlümë, ɩyä n 'kä ‑mɔɔ 'naa lülülɩɩ 'ŋʋ. 19Ɩyä n 'kä yɩ 'naa kätö ‑zuzuu soo nynä 'naa kätö ‑zuzu, ‑n wɔtɔ yɩ 'kʋ! ‑N yä lülülɩɩ 'ni 'ylʋbɔ ‑bhutukpää' ‑za nä, ‑n lü ‑yä 'mnä ɩyä ‑n gäma!

20‑Mä ɔ ci lä sɔɔ nä, kä Laagɔ ‑sonöɔ, ʋ lä dëbënyɔ‑! 'Sabonö ‑bhlobhlo, n yi ‑naa kätö ‑zuzuu 'kʋ 'bhlü! Nä, ‑naa kääkäälɩɩ 'fɩɩn ‑n 'jijie‑ ylä nä, ‑ɔnö lɩɩ bhää? 21‑Ɔ guguë lä leylü ɔ yëku ‑bhloo' ‑za nä, ɔɔ' ‑wʋ lɛkäänyɔ plöö‑ Laagɔɔ' ‑za.

Kä Laagɔ wloo ʋʋ' 'yuë 'kʋ

(Matie 6.25‑34)

22'Nɩ Zozii yi bʋkʋ ɔɔ' 'kʋgënyʋa soo, ɔ lä ɩɩ' ‑zä n sonö'anyɩ lä nynä aa' bhʋtʋ ‑lä a yëkuu' zëkpëë' ‑za. Aa' bhʋtʋ ‑lä 'nɩ a 'kä ci nynä ‑mä, 'nɩ dä ‑a yi bhä lülülʋʋ 'nii 'nɩ ‑a yi bhä lüü? Aa' bhʋtʋ ‑lä 'sɩɩ anyɩa' 'yɛkɛɛ ‑za 'nɩ a 'kä ci nynä ‑mä, 'nɩ dä ‑a yi bhä 'kotu ‑sä 'nɩ ‑a yi bhä plää? 23‑Mä zëkpë nä, a kään gbʋ 'nɩ a ‑zi lülülɩɩ. 'Nɩ nyɩkpɔɔ' 'yɛkɛ kään gbʋ 'nɩ ɛ ‑zi 'kotu.

24A wloo yɩɔ ‑kɔmamöö ‑nä! Ɩɩ' goo ‑wʋ, ɩɩ' ‑wʋ ‑tätä ‑kä 'nɩ ɩɩ' ‑wʋ wolu ‑kä ‑mä, sɔɔ ɩ ‑kʋ 'nɩ Laagɔ nyɩɩ 'nɩ ɩ lü. Nä anyɩ, aa' bhä gbʋ kään 'nɩ a 'kä nümnü ‑zi ‑a? 25Anyɩa' lɔɔ ‑sä yi bhä ɔɔ' bhʋtʋlɩɩ 'mnö ɔ yëkuu' zëkpëë' 'tänyɩ 'kʋ pään? 26'Nɩ aa' ‑lä ylä ‑nɩnɩ mii nä, ‑ɔnözä 'nɩ a bhʋtʋ bhä ‑mɔɔ ‑lɩɩ' ‑zaa?

27A wloo ‑wʋ saa ‑pitii' 'jaa ‑nä! ‑Pitii' 'kplä ‑wʋ 'kwëti, 'nɩ ɩɩ' ‑wʋ 'sɩɩ bhläsä ‑yi. ‑Mä, n sonö'anyɩ nynä 'loyo Salomɔɔ 'titii' 'klʋagba 'fɩɩn ɔ ‑kʋ bhlä 'mnö nä, ɔɔ' 'mʋ pläplä‑kotuu' ‑wʋ 'kɔɔkɔ ‑pitii' 'jaa nanɔɔ' ‑ŋëë. 28A ni ‑piti nä, Laagɔ plɩɩ ‑zɩkä nänɔ‑kwëtii', ‑bhlɛ sɔɔ ɩ ‑kʋ 'nɩ ‑zëkü, nyɩkpa yii ‑kosuu' 'pä. Nä, sɩ ‑kʋ bhä 'nɩ anyɩ, anyɩ‑ Laagɔ 'kä bhä sɔɔ tëë? Ka anyɩa pɔlötɛtɛɛ' ‑wʋ lä 'ghlü! 29Nä sa 'kä lä lü ‑yä a 'kä lä 'mnä nä, aa' tään ‑lä sɔɔ ‑yä a 'nä bhʋtʋ ‑lä 'sɩɩ 'sɔɔ ‑za! 30‑Ɔnöza bhää? ‑Nɩnɩ 'fɩɩn nä, ‑waa ‑wʋ lä Laagɔ ‑yi nä, wamää‑ tänɩ lä. ‑Mä anyɩ nä, lʋʋ ‑ʋnö gbʋʋ‑ bhla'anyɩ lä nä, a 'Bä Laagɔ ‑yiu. 31Nä, Laagɔɔ' 'Leyiduu yëkuu' wälɩɩ 'mɩ a la tään 'fɩa! ‑Mä ‑lɩɩ 'fɩɩn ‑ɩnö gbʋʋ bhla'anyɩ lä nä, Laagɔ yii anyɩa' ‑za nʋ.

A klää Laagɔ yëku 'nää

(Matie 6.19‑21)

32'Nɩ Zozii yi bʋkʋ ci, ɔ lä aa' ‑guu ‑lä! A ‑glö Laagɔɔ' mnäkpälɛɛ. Aa' ‑wʋ ‑zu ‑mä, anyɩ‑ a 'Bä Laagɔ ‑waa lä nynä ɔ 'kä 'Leyiduu 'nyɛ! 33Anyɩa' kääkäälɩɩ a 'ŋʋɩ 'kpä ‑yä a dëë ɩɩ' monie ŋäzönyʋa ɩyä 'bhɔklɔɔ' ‑lʋʋ ‑ʋʋ nyimo ‑wʋ lä nä, a nʋʋ a yëku ‑gä! Ɩyä ‑mɔɔ Laagɔduu' leylüü‑ bhɩä ‑wʋ lä 'kʋ nä, ɩmɩ a laa kään! ‑Mɔɔ Laagɔduu' nä, 'ghüghünyɔɔ' ‑wʋ ‑mɔɔ ‑kʋ ‑yä ɔ 'kɩ ghlü. 'Nɩ ‑mɛmɩää' ‑wʋ ‑mɔɔ ‑kʋ ‑yä wa 'kɩ mɛɛ. 34‑Mä dä ‑naa gbʋ‑käälʋʋ ‑kʋ lä nä, ‑lɔɔ ‑naa plɛɛ 'kä lä 'sɩɩ kʋ.

‑Gänʋnyɔɔ ‑ɔ ‑gblɩ lä nä

(Matie 24.42‑51; Makö 13.33‑37)

35A plä lebhenʋsä 'mʋ ‑yä a ‑ghlɩlɩ, ɩyä anyɩa' 'näpöö doo 'yii 'kɔɔkɔ! 36A kʋ nynä nyɩkpaa' lʋä‑ ‑bɛɛ lä waa' käänyɔɔ nä! 'Gbë 'bä kä wlunö‑gämʋʋ' ‑za lowluu' ‑mʋ nä, 'tänyɩ ‑kʋ lɔɔ 'nɩ ɔ 'ylɩbhɔ. Ɔ kä ‑yi nä, sɔ bhütë lä 'gää nä, kä ɔɔ' ‑gänʋnyʋa känöɔ 'gbë 'nɩ ɔ plä. 37Nä, ‑gänʋnyʋaa ‑wa yi lä ‑bɛɛ lä ‑kaaa, 'nɩ ‑waa ‑lä lä ŋɔɔ‑ 'nɩ waa' käänyɔ yi lä ‑lɔɔ ŋëë nä, wa yä 'pʋ! ‑Nʋawlɛɛ, n sonö'anyɩ nynä ‑mä, waa' käänyɔɔ ‑yi lä nä, ɔ yi yloo 'nɩ ɔ yiwa lüdä laa nynä wa yi. 'Nɩ ɔmɔ 'titi yi 'kʋ bha 'nɩ ɔ yiwa ŋënü dëë. 38Dodoogää' käänyɔ 'nä ‑yii ‑o, zözädä ɔ 'nä ‑yi o, ɔ ‑ŋënʋwa ‑lɔɔ 'nɩ, wa ‑bɛnöɔ lä nä, wa yä 'pʋ!

39A yibhë wälɩklënä 'nägäsä! 'Gliyee 'mnö 'ghüghünyɔ 'kä lä 'sabo ghlü ‑kää yi nä, 'gbë 'bä kɛ bhä ‑yi nä, ɔ yi bhä gblɩmä, ‑yä 'ghüghünyɔɔ' kä ‑kä ɔɔ' ‑bhutuu 'wäta. 40Nä, anyɩ ‑mä 'sɩɩ, a ‑ghlɩlɩ ‑mä, 'tänyɩɩ aa' ‑wʋ lä 'kwläkwlä 'sää ‑gblɩ nä, ‑lɔɔ Nyɩkpɔɔ ‑Yowli 'kä lä yi.

41Zozii cii‑ lä sɔɔ nä, kä Pɩɛlö ylɔɔ‑, ɔ lä Kwlienyɔ‑, ‑dɔɔ ‑n paa‑ lä nä, ‑anyɩ ‑n 'pänʋ‑ bhä ‑a? ‑mä nyɩkpaa 'fɩɩn ‑n soo bhä ‑a? 42'Nɩ Zozii yio soo, ɔ lä gbëë' 'kʋ wloonyɔɔ' lɔɔ ‑ɔ nää‑ lä nä, 'nɩ ‑ɔ ‑gblɩ lä 'sɩɩ nä, säsä wa yibhënöɔ bhää? Gbëë' 'kʋ wloonyɔ ‑bhlo 'mɔ ɔɔ' käänyɔ ‑soo lä, ɔ lä kä n mʋ lä lowluu' ‑mä, ‑n ni lebhe. 'Tänyɩ kä ‑ŋëë nä, ‑n 'nyɛ ‑lää gbëë' ‑lebhenʋnyʋa lülülɩɩ ‑yä wa 'kä lü!

43‑Gänʋnyɔ kä lebhee nʋdä ‑kʋ, 'nɩ ɔɔ' käänyɔ 'kɔ ‑lɔɔ ŋëë nä, ɔ yä 'pʋ! 44N sonö'anyɩ ‑nʋawlɛɛ 'mnö nynä ‑gänʋnyɔyɩ, ɔɔ' käänyɔ yio ɔɔ' kääkäälɩɩ 'fɩɩn 'kʋ wloodä 'nyɛ.

45‑Mä, ‑gänʋnyɔnɔ kä ɔ yëku ‑soo nynä ‑mä, 'tänyɩɛ yä 'mʋ tlʋmä, 'nɩ 'naa käänyɔɔ' yi ‑wʋ, 'nɩ ɔ kä ɔɔ' käänyɔɔ' lebhe‑nʋnyʋa ‑yä lebhe‑nʋŋwnɩa 'sɔ ‑bhütë, 'nɩ ɔ kä ‑lü, 'nɩ ɔ kä mnää‑, 'nɩ nʋ kɔ yɩ 'bhlä nä, 46ylʋʋ 'kʋ ɔɔ' ‑wʋ lä ‑gblɩ nä, 'nɩ 'gliyee ɔɔ' ‑wʋ lä ‑yi nä, ɛmɛ 'mnö, 'gbëa' käänyɔ yio ‑zɔɔ 'vu, 'nɩ ɔ yi yi. Ɔ kä yɩ ‑yi nä, ɔ yio ‑jämɩɩ 'kädɩɩ' 'ŋʋ. Sä wa klä lä tootoonyʋä nä, ɔ yio sɔɔ klä. 47‑Gänʋnyɔ nä, sä ɔɔ' käänyɔ 'ylänöɔ lä nä, ɔ kä sɔɔ ‑yi 'nɩ ɔ 'nö gblɩmä nä, 'nɩ sä ɔɔ' wa 'ylänöɔ‑ lä nä, ɔ 'nö sɔɔ nʋ nä, wa yio bhütë 'sää 'titi.

48‑Mä ‑gänʋnyɔ 'nö sä ɔɔ' käänyɔ 'ylänöɔ lä nä ‑yi nä, 'nɩ ɩmɩɩ‑ gä 'ŋnö ‑kä 'nɩ, ɔ kä nyenyisä nää‑ nä, ‑lɔɔ' ‑gänʋnyɔɔ wa yio bhütë oo, ‑mä ɔɔ' bhütëlɩɩ yi 'kʋ tëtë.

A ni yi ‑a! Nyɩkpɔɔ' lɔɔ wa nyɛɛ‑ lä kpänyɩ nä, kwa 'ylänöɔ kpänyɩ. Wa kä nyɩkpɔ ‑lɛɛ bhutukpä 'kʋ wloodä nyɛɛ‑ nä, kä wa 'ylänöɔ ‑lɛɛ bhutukpä.

Zozii' ‑za nyɩkpa yi 'mʋ doo

(Matie 10.34‑36)

49'Nɩ Zozii yi ci, ɔ lä kä n ‑yi lä ‑yä n 'kä ‑mää ‑dʋdʋkʋ ‑kosu jɛɛ. 'Nɩ 'naa plɛ nynä ʋ doo wɛzä 'yi! 50‑Mä n yi 'fɩa gbɩɩ' ylalɩ 'kädɩ 'mnö blüë. 'Nɩ 'naa plɛ ylä 'sɩɩ nynä ‑mä ‑lɔɔ' 'tänyɩɛ ŋëë yɩ ‑yä ɛ 'kä 'plö! 51Kä a bhobho nynä ‑mä kä n ‑yi ‑yä n 'kä 'ylʋzɔɔ 'kʋ wɔtɔlɩ 'ŋʋ ‑a? Yio! Kä n ‑yi lä ‑yä n 'kä 'ylʋzɔɔ 'mʋ doolɩ 'ŋʋ! 52‑A 'bhää ylä ‑lää 'kʋ nä, nyɩkpa ‑ngbü yi 'gbë ‑bhloo' kʋ, 'nɩ wa yi 'mʋ doo. Lʋä taa yi lʋä 'sɔ zɔgblö fä. 'Nɩ lʋä 'sɔ yi lʋä taa zɔgblö fä. 53'Bä yi ɔ ‑yowli zɔgblö fä, 'nɩ ɔ ‑yowli ‑mä 'sɩɩ, ɔ yio zɔgblö fä. 'Nɔ yi ɔ ‑yɔŋnɔ zɔgblö fä, 'nɩ ɔ ‑yɔŋnɔ ‑mä 'sɩɩ, ɔ yio zɔgblö fä. 'Wʋtɔŋnɔ ‑yi ɔ ‑yowli 'ŋnɔ zɔgblö fä, 'nɩ ɔ ‑yowli 'ŋnɔ ‑mä 'sɩɩ, ɔ yio zɔgblö fä.#12.53 Zɛɛ 'sɩɩ Misee 7.6.

A bɩä 'tänyɩnɛ

54'Nɩ Zozii yi bʋkʋ ‑jlëa soo, ɔ lä a kä 'nyukpɔɔ ŋɔkʋ 'yi 'ni 'nɩ, ʋ kä jie yëku ‑gbäsɩ ghlää nä, ka ci nynä ‑mä 'nyuu‑ 'gä lä bhlä! 'Nɩ ʋ bhlä 'zaazɩ. 55'Nɩ a kä 'sɩɩ 'popi‑vʋvɔlʋ ‑sloo 'yi 'ni nä, ka ci nynä ‑mä 'ylʋʋ‑ 'gä lä 'pʋ! 'Nɩ 'ylʋ pʋ 'zaazɩ. 56A wloo ŋɔkʋʋ' kʋkʋsaa, 'nɩ a wloo ‑dʋdʋkʋʋ' kʋkʋsaa, 'nɩ a nu zëkpeä 'mʋ. 'Nɩ 'tänyɩnɛ ‑a ‑kʋ lä 'mnö nä, sɩ ‑kʋ bhä 'nɩ aa' nu bhä ɛɛ' kʋkʋsaa 'mʋʋ? 'Kʋ wloo wloogbɩɩ' nʋnyʋä!

‑N ‑yä ‑naa tʋ ‑kuunyɔ 'sɔ 'nunu 'mʋ

(Matie 5.25‑26)

57Nʋnʋgbɩɩ 'fɩɩn ‑ɩ gëë‑ lä 'yi, Laagɔ dëlü nä, sɩ ‑kʋ bhä 'nɩ a 'nɩɩ bhä ‑yii? 58Nyɩkpɔ kä‑ä 'zuzu dëlüü tʋ ‑kuu nä, 'tänyɩɩ ɔ ‑yä ‑mɔsɔ ‑kʋ lä ‑mɔɔ mʋdä nä, ‑n tään nynä ‑n ‑yɔsɔ 'kä 'mʋ 'nunu ‑yä ɔɔ' kä‑ä ‑kä 'zuzu dëlü fä, ɩyä 'zuzuo ‑mä 'sɩɩ ɔɔ' kä‑ä ‑kä ‑jɩɩgbëë' 'sʋjaa kuu nynä wa 'ŋʋ‑ʋ ‑jɩɩ'. 59N sonö‑ö nynä ‑mä, ‑n 'nö sɔɔ ‑nʋ 'nɩ, kwa kä‑ä ‑jɩɩ' paa‑ nä, ‑n yi ‑lɔɔ' dluu plʋʋdä kʋ ‑aaa, 'nɩ ‑pikinii' ‑lä ‑mɔɔ too.

Currently Selected:

Lukö 12: god

Highlight

Copy