Zään 5

Zozii ‑yamä nyɩkpɔ ‑mɔɔ Betɛdaa' 'nyibhlëa yëku

(Zään 7.19‑24; 9.1‑17)

1‑Nɩnɩ 'fɩɩn plöö‑ ylä nä, Zozii ‑mʋ bhä Zolizalɛmʋduu' 'Zufʋnyʋaa' ‑glɩsɩɩsɩ ‑bhlo 'kʋ. 2‑Mä ‑mɔɔ Zolizalɛmʋ‑duu' ‑gbugbëa yëku, dä 'bhabhlöö ghlää bhlä nä, 'nyibhlë ‑kʋ bhä ‑lɔɔ. Eblëë‑wälɩɩ' amä wa laa bhä Betɛdaa. A yëku nä, ‑gwlɛdö ‑ngbü ‑kʋ bhä ‑lɔɔ. 3'Nɩ ‑gwlɛɛdönö ‑zɔɔ nä, gupanyʋä ‑bhutukpä puu‑ bhä ‑mɔɔ. 'Yikpüü' kʋnyʋä, bhɩ ‑bhlünyʋä ‑yä 'kpläkplänyʋä ‑kʋ bhä ‑mɔɔ. [Wa ‑bɛɛ bhä 'nyuu ‑yä ʋ 'kä bhä 'mʋ 'dɩdɔ. 4Kä ‑Laagɔzuzu kwli bhä 'nyibhlëa 'mnö doo doo, 'nɩ ʋ 'dɩda bhä 'nyie 'mʋ. Nä, 'tänyɩɛ 'mnö 'nyibhlëa 'dödöɔ lä 'mʋ nä, gupanyʋa nëëdëë' lɔɔ ‑ɔ gä tɛɛ ‑mɔɔ ‑bhlüü nä, sä ɔɔ' guu 'nä ‑kʋmɔɔ ‑kʋmɔɔ bhä ‑kaaa nä, kɔ yamä.]

5Nä, nyɩkpɔ ‑bhlo ‑kʋ bhä ‑lɔɔ 'nɩ ɔɔ' bhɔɔ ‑yä. Ɩ nʋ bhɛ 'ylʋbɔɔ' glʋ 'nɩ 'kʋgbä ‑ngbaatä 'nɩ ɔɔ' bhɔɔ lä ‑yä. 6Zozii nio‑ lä 'yi 'nɩ ɔ ‑yibhë lä sɔɔ nynä nyɩkpɔɔ yä bhä ‑lɔɔ 'nyibhlëa yëku gwlɛɛ nä, kɔ ylɔɔ‑, ɔ lä ‑n ‑waa bhä nynä ‑n 'gä yamä ‑a? 7Nyɩkpɔɔ lä nn' ‑wʋ ‑okäyinɔ ‑kä! 'Nyibhlëa kä 'mʋ 'dödɔdä ‑kʋ nä, ‑ɔ gä'ä lä 'nyiee 'mnö pää nä, n 'nöɔ ‑wʋ ‑kä. N ‑kʋ ‑mɔɔ mʋdä 'nɩ 'yigädalɔɔ 'tɔnö'ö 'yikʋ, 'nɩ ɔ slo ‑mɔɔ. 8'Nɩ Zozii yi nyɩkpɔɔ soo, ɔ lä ‑n ‑bha 'kʋ! ‑N 'bhlü ‑naa ‑gbëtëa 'kʋ ‑yä ‑n nää! 9'Kpobhuu ‑bhlo 'kʋ 'nɩ nyɩkpɔɔ yi yamä. Ɔ bhlüü‑ ɔɔ' ‑gbëtëa 'kʋ 'nɩ ɔ yi näälɩ 'kʋ cie.

‑Lɔɔ' 'ylʋʋ ‑glö bhä Sabaa‑gwlɛylʋʋ. 10Ɩɩ' 'ŋnöö 'mnö nä, 'Zufʋnyʋaa' 'cifinyʋa ‑yi nyɩkpɔɔ yëku 'nɩ wa yio soo, wlä Sabaa‑gwlɛylʋʋ 'kʋ lä ‑zɩkä nä, ɩɩ' ‑wʋ 'kʋ ‑ŋwa nynä ‑n bhɛɛ ‑naa ‑gbëtëa.#5.10 Zɛɛ 'sɩɩ Zele 17.21; Neye 13.19. 11'Nɩ nyɩkpɔɔ yiwa soo, ɔ lä nyɩkpɔɔ ‑ɔ ‑gbä 'nɩ n ‑yamä lä nä, ɔmɔɔ‑ ‑sonö'ö nynä n 'bhlü 'naa ‑gbëtëa 'kʋ ‑yä n nää. 12Wlä ‑ɔ ‑sonö‑ö bhä nynä ‑n 'bhlü ‑naa ‑gbëtëa 'kʋ ‑yä ‑n nää? 13‑Mä nyɩkpɔɔ' ‑lɔyɩ 'titi ‑ɔ ‑yamänöɔ bhlä nä, ɔɔ' bhɔɔ ɔɔ' 'ŋnö ‑yi. Zozii, ‑ɔ ‑yamänöɔ bhlä nä, kɔ 'mʋmnɔ‑ bhä ‑lɔɔ ‑jlëa 'mnö.

14‑Nɩnɩ 'fɩɩn plöö‑ bhɛ lä nä, Zozii ‑yä nyɩkpɔɔ 'sɔ sloo‑ ‑mɔɔ Laagɔ‑bhutu 'kädʋʋ 'mnö 'nɩ ɔ yio soo, ɔ lä ‑n ni 'yi ‑a! ‑N yä yɩ yamä nä, ‑n ‑taa yɩ gbenyenyii 'yi ‑mä gbʋʋ' wälɩɩ' kä‑ä ‑kä ŋëë! 15Nyɩkpɔɔ ‑mʋ ylä nä, kɔ ‑soo 'Zufʋnyʋaa' 'cifinyʋa nynä Zozii 'mɔɔ‑ ‑yamänöɔ. 16‑Maa, sä Sabaa‑gwlɛylʋʋ 'kʋ Zozii ‑nʋ bhlä sɔɔ nä, kä 'Zufʋnyʋaa' 'cifinyʋa ‑ŋënöɔ cice.

17'Nɩ Zozii yiwa soo, ɔ lä dä ‑a gbää lä ‑lää 'kʋ nä, n 'Bä nʋ 'kɔɔkɔ lebhe. Nä, ‑amʋ ‑mä kä n nʋ lä 'sɩɩ lebhe. 18Ɔ cii‑ lä sɔɔ nä, kä 'Zufʋnyʋaa' 'cifinyʋa tään bhɛ 'titi nynä wa 'kɔ 'bhlä. Ɔ ‑sä bhlä Sabaa‑gwlɛylʋʋ 'gbä nä, ‑ɔɔ bhɛ 'ɩza ‑bhlogbee‑ ‑mä, ɔ ci bhlä 'sɩɩ nynä ɔ 'Bää‑ plöö‑ Laagɔ, 'nɩ ɔ nyäkanʋ bhlä ɔ yëku 'kʋ nä, 'ɩzä wlä wa 'kɔ bhlä 'bhlä.

Laagɔ nyɛɛ‑ ʋ ‑Yowli ‑tëbhu

19'Nɩ Zozii yiwa bʋkʋ soo, ɔ lä ‑nʋawlɛɛ 'mnö, n sonö'anyɩ nynä Laagɔ ‑Yowlii' ‑lä mii 'nɩ ɔ 'kä ɔɔ' 'wludää' lʋʋ nʋ. Sä 'Bäɔ nʋ lä 'nɩ ɔ nii‑ lä 'yi nä, sɔɔ ɔ nʋ. 'Nɩ wälɩɩ 'fɩɩn 'Bäɔ nʋ lä nä, ɔ ‑Yowli ‑mä 'sɩɩ, kɔ nʋɩ. 20'Bäɔ nä, kɔ ‑waa ɔ ‑Yowli, 'nɩ ‑lɩɩ 'fɩɩn ɔ ‑Yowli nʋ lä nä, kɔ panöɔ 'nyɩ. Nʋnʋgbɩɩ' lɩɩ ‑ɩ 'ghlü lä 'nɩ, ‑ɩ ‑zi lä ‑nɩnɩ 'fɩɩn 'kʋ nä, ɔ yionyɩ bʋkʋ paa 'nɩ plɛkʋ yi'anyɩ 'ninio. 21Sä 'Bäɔ gbä lä 'nɩ 'kudukuë ‑glɔɔ lä 'kuëë 'nɩ ɔ nyɩwa lä 'pʋpʋɛ nä, nyɩkpɔɔ' ‑lɔɔ Nyɩkpɔɔ ‑Yowli ‑waa lä nä, sɔɔ ‑säkä ‑säkä ɔ nyɩɔ lä 'pʋpʋɛ. 22'Nɩ 'Bäɔɔ ‑lä 'sɩɩ bʋkʋ nyɩkpɔ gbʋ klaa, ‑mä 'titee 'fɩɩn ‑ɛ gä lä plɔɔ nä, ɔ ‑Yowli 'mɔ ɔ nyɛɛ‑ lä ɛɛ' ‑tëbhuu. 23Ɩyä nyɩkpaa 'fɩɩn, sä wa ŋʋ lä 'Bäɔ 'klʋkpää nä, wa 'kä 'sɩɩ sɔɔ ɔ ‑Yowli 'klʋkpää 'ŋʋ. Nyɩkpɔɔ' lɔɔ ‑ɔɔ 'ŋʋ ‑wʋ lä Laagɔ Yowli 'klʋkpää' nä, 'Bäɔ ‑ɔ ‑lobhuo lä nä, ɔmɔ ‑lɔɔ' nyɩkpɔɔ' 'ŋʋ ‑wʋ lä 'sɩɩ 'klʋkpää'.

24‑Nʋawlɛɛ 'mnö n sonö'anyɩ nynä ‑ɔ gä 'naa ciciwälɩɩ 'nyukwli ‑poo nä, 'nɩ ‑ɔ gä ‑lɔɔ ‑ɔ ‑lobho'o lä nä plɛkʋ 'tɛɛ nä, ɔmɔ ‑lɔɔ' nyɩkpɔɔ, ɔ yi 'pʋpʋɛɛ‑ ‑kʋ lä 'kɔɔkɔɔ ‑za nä 'ni, 'nɩ ɔɔ' ‑lä 'tite ŋʋɔ. 'Kuëë ɔ ‑glɔɔ, 'nɩ ɔ nii‑ lä 'pʋpʋɛ. 25‑Nʋawlɛɛ 'mnö n sonö'anyɩ nynä 'tänyɩ yi ŋëë, 'nɩ ɛ yä 'sɩɩ ŋëë ‑yä, 'kudukua 'kä yɩ Laagɔ ‑Yowlii' nuwälɩɩ 'nu, ɩyä ‑wa 'gɩ lä 'nu nä, wa 'kä 'pʋpʋɛ 'ni. 26Sä 'Bäɔ 'mnö ‑mɔɔ 'pʋpʋɛ ‑kʋ lä nä, kɔ ‑gbä 'nɩ ɔ ‑Yowli ‑mä 'sɩɩ 'pʋpʋɛ ‑kʋɔ 'mnö. 27Ɔmɔɔ‑ plöö‑ lä 'sɩɩ Nyɩkpɔɔ ‑Yowli nä, 'ɩzä 'Bäɔ nyɩɔ‑ lä ‑tëbhu nynä ɔ 'ŋʋ 'ylʋzɔkʋnyʋä 'tite. 28Nä, plɛkʋ 'ninio'anyɩ ‑lä ‑mä 'tänyɩ yi ŋëë 'nɩ 'kudukua 'fɩɩn ‑wa ‑kʋ lä glu nä, wa yi Nyɩkpɔɔ ‑Yowlii' nuwälɩɩ 'nu. 29‑Wa ‑nʋ lä 'nää nä, wa yi 'kuëë glɔɔ 'nɩ wa yi 'pʋpʋɛ 'ni. 'Ɩzä ‑wa ‑nʋ lä gbenyenyii nä, wa yi 'kuëë glɔɔ 'nɩ wa yi 'tite 'ŋʋɔ 'nɩ gbʋ yiwa klä.#5.29 Zɛɛ 'sɩɩ Danɩɛ 12.2. 30‑Amʋ nä, nn' ‑lä mii 'nɩ n 'kä 'naa 'wludää' lʋʋ nʋ. Sä n nuu‑ lä nä, sɔɔ n plä 'naa 'tite. 'Nɩ nn' tään ‑wʋ 'sɩɩ ‑amʋ 'titi 'naa pɔlösää' nʋlɩ ‑mä, ‑ɔ ‑lobho'o lä nä, ɔɔ' pɔlösaa 'mä n nʋ. N kä yɩ wälɩɩ döö‑ nä, sä ‑n cii‑ lä nä, sɔɔ ɩ ‑kʋ.

Zozii lä wa lü ɔɔ' ‑dläfʋɛ

31‑Amʋ 'titi kä n yëkuu' ‑dläfʋɛ lü nä, kä 'naa ‑dläfʋɛɛ' ‑wʋ lä gbaa ‑kä. 32'Yigäda‑nyɩkpɔ‑ lü lä 'naa ‑dläfʋɛ. 'Nɩ n ‑yi sɔɔ nynä ‑mä ‑dläfʋɛɛ ɔ lü lä nä, ɛ ‑glö ‑nʋawlɛ. 33A ‑lobho lä nyɩkpaa Zään#5.33 Zään: Zään Badisö wa ‑sä lä. Zɛɛ 'sɩɩ 1.19‑27; 3.22‑30. yëku nä, kɔ ‑lü ‑nʋawlɛɛ' yëkuu' ‑dläfʋɛ. 34‑Amʋ, nn' tään ‑wʋ nyɩkpɔɔ' ‑dläfʋɛ, ‑mä kä n ci lä 'sää ‑yä a 'kä ‑lɔɔ nëë' ‑bha. 35Zään nä, kɔ ‑kʋ bhä nynä 'näpɛɛ' ‑lɛɛ wa döö‑ lä 'yi, 'nɩ ‑ɛ ŋänɩä lä wɩa nä. A ‑wamä ɛɛ' zëlüü 'nɩ ‑pʋpɛ bhla'anyɩ 'gliye ‑bhloo' ‑za. 36‑Mä ‑amʋ nä, kä 'naa ‑dläfʋɛɛ 'ŋɔɔ 'kʋ 'nɩ ɛ zi Zään' ‑lɛɛ. Lebhee 'Bäɔ ‑sonö'ö lä nynä n nʋ 'nɩ n nʋ lä nä, ɛmɛɛ‑ pana lä nynä ‑mä kä 'Bäɔ ‑lobho'o. 37'Nɩ 'Bäɔ ‑ɔ ‑lobho'o lä nä, ɔ ‑lü 'sɩɩ 'naa ‑dläfʋɛ. ‑Mä aa ‑läzä ɔɔ' nuwälɩ 'nu, 'nɩ a 'nöɔ ‑läzä 'sɩɩ 'yi 'ni. 38‑Ɔ ‑lobho'o lä nä, a 'nöɔ ‑wʋ lä plɛkʋ ‑kään nä, 'ɩzä aa ‑wʋ lä ɔɔ' wälɩɩ pleyii bhɛnö‑. 39Anyɩ ka bhobho lä nynä ‑mä 'pʋpʋɛɛ‑ ‑kʋ lä 'kɔɔkɔɔ ‑za nä, Laagɔ‑bɔɔgʋʋ 'mnö ‑mɔɔ a 'kɛ 'nii. 'Ɩzä a cɩä lä Laagɔ‑bɔɔgʋʋ 'nɩä 'nɩä. ‑Mänɩ Laagɔ‑bɔɔgʋʋ nä, 'naa yëkuu' wälɩ‑ ʋ ci! 40'Nɩ ɩ ‑kʋ sɔɔ, ‑bhlɛ aa' ‑wʋ ‑waa nynä a kä'ä yii ‑yä a 'kä 'pʋpʋɛɛ 'ni.

41Nn' tään ‑wʋ nyɩkpaa' 'ŋnu fäälɩ. 42N ‑yi'anyɩ, 'nɩ n ‑yi sɔɔ nynä ‑mä aa ‑wʋ Laagɔɔ' ‑wawʋ ‑kä. 43N 'Bä ‑lobho'o 'nɩ aa' 'mänyɩnö'ö ‑wʋ. 'Yigäda‑nyɩkpɔ gä bhlä ɔ yëkuu' 'ŋnöö 'mnö ‑yii nä, ka 'kɔ bhlä 'kʋ gboo. 44Nyɩkpaa' 'ŋnu fäälɩ‑ a tään ‑mä aa' tään ‑wʋ Laagɔ ‑bhloo' 'ŋnu fäälɩ nä, sa yi bhä 'naa ciciwälɩɩ nyaasäsä laa? 45Aa' bhobho ‑lä nynä ‑mä ‑mɔɔ 'Bäɔ dëlüü nä, ‑amʋʋ‑ gä'anyɩ gbʋ klaa.#5.45 Zɛɛ 'sɩɩ Detlo 31.26‑27. Moyizö 'titi a 'tɛɛ lä dë nä, ɔmɔɔ‑ gä'anyɩ lä gbʋ klaa. 46A kä bhä Moyizöö' pɔlötɛtɛ ‑kä nä, sä 'naa yëkuu' wälɩ‑ Moyizö cii‑ lä nä, a yi bhä 'sɩɩ 'naa pɔlötɛtɛ ‑kään.#5.46 Zɛɛ 'sɩɩ Detlo 18.15. 47Wälɩɩ ɔ ‑jɩjlä lä nä, aa lɩɩ ‑wʋ lä nyaasäsä nä, säsä a yi bhä 'naa ciciwälɩɩ nyaasäsä laa?

Currently Selected:

Zään 5: god

Highlight

Copy