Zään 4

Zozii ‑yä Samalii' 'ŋnɔ 'sɔ sää 'mʋ

1'Tänyɩ ‑kʋ ‑lɔɔ 'nɩ Falizɩɛnyʋa nuu‑ nynä Zozii ‑kä bhä 'kʋgënyʋä ‑bhutukpä, 'nɩ ɔ ŋʋ bhä 'sɩɩ nyɩkpa 'nyu 'wlu 'nɩ ɔ ‑zi bhä Zään. Nä, wälɩnɩ 'mɩɩ‑ ‑bhlü lä Zozii 'nyukwli. 2Sɩ ‑kʋ bhlä naa, Zozii 'titii‑ 'ŋʋ bhɔɔ nyɩkpaa 'nyu 'wlu ‑mä ɔɔ' 'kʋgënyʋa 'mää‑ ŋʋwa bhlä 'nyu 'wlu. 3Zozii ‑yibhë bhɛ lä sɔɔ nä, kɔ ‑bha yɩ Zudee‑bhlɩɛɛ' ‑yä ɔ 'kä Galilee' 'ylɩbhɔ. 4‑Blɔɔ ɔ 'kä bhlä bhlü nä, Samalii‑bhlɩɛ 'mnö ʋ ghlää bhlä. 5Ɔ ‑kʋ lä mʋdä nä, ɔ ‑ŋëë Samalii‑bhlɩɛɛ' 'duu wa laa lä Sisaa nä yëku. Zakɔpʋʋ' 'klaa ɔ nyɛɛ‑ bhlä ɔ ‑yowli Zozɛfʋ nä, amä yëku, ‑lɔɔ Sisaa‑duu ‑kʋ bhlä.#4.5 Zɛɛ 'sɩɩ Ciedä 33.19; Zozue 24.32. 6‑Lɔɔ Zakɔpʋʋ' 'nyusɔkwaa ‑kʋ bhlä 'sɩɩ. 'Ylʋ yä bhɛ lä yiosä ‑tiin 'kʋ ŋëë, 'nɩ Zozii ‑sɩä bhɛ lä 'nämʋʋ' nä, kɔ 'plöö‑ 'nyusɔkwaa' ‑kpʋkpʋʋ 'kʋ 'nɩ ɔ yi sä kʋ.

7Samaliibhlɩ 'kʋʋ 'ŋnɔ ‑bhlo ‑yi ‑lɔɔ 'nyusɔkwä 'kʋ 'nyu 'plü kää. 'Nɩ Zozii yio soo, ɔ lä ‑n nyɛɛ'ɛ 'nyu ‑yä n 'kä 'mnä. 8‑Lɔɔ' 'tänyɩɛɛ' nä, Zozii' 'kʋgënyʋa ‑mʋ bhä ‑mɔɔ 'duu 'mnö ‑yä wa 'kä lülülɩɩ zɔɔ. 9'Nɩ 'ŋnɔɔ yio soo, ɔ lä sɩ ‑kʋ bhä 'nɩ ‑mɔɔ 'Zufʋyuo, ‑amʋ Samalii‑ŋnɔɔ, ‑n zlä'ä bhä 'nyuu? Sɩ ‑kʋ bhlä naa, 'Zufʋnyʋä ‑yä Samaliinyʋä 'sɔ kwa ‑zɔzɔɔ bhä nä, waa' känöö bhɔɔ lʋʋ 'kʋ.#4.9 Zɛɛ 'sɩɩ Lukö 9.52‑53. 10'Nɩ Zozii yio soo, ɔ lä ‑n gä bhä Laagɔɔ' 'nyɛnyɛlʋʋ ‑yi nä, 'nɩ ‑lɔɔ ‑ɔ sonö‑ö lä nynä ‑mä ‑n 'nyɩɔ 'nyu ɔ 'kä 'mnä nä, ‑n gɔ bhä 'sɩɩ ‑yi nä, ‑mɔɔ 'titii‑ ‑lä 'gɔ bhlä 'nyuu zlaa. Ɩyä 'nyuu' lʋʋ ‑ʋʋ mnä ‑wʋ lä nä, ɔ 'kä‑ä mʋ bhä 'nyɛ. 11'Ŋnɔɔ lä Cɩanyɔ‑, ‑nn ‑kä 'mö 'plüü lʋʋ ‑kä, 'nɩ 'nyusɔkwaa ‑tlʋʋ ylä 'mʋ nä, dä ‑sä ‑n 'gä bhä ‑lɔɔ' 'nyuu ‑sää? 12‑A tötɔ Zakɔpʋ, ‑mɔɔ ‑zio 'kʋ ‑a? Ɔmɔɔ‑ ‑të‑anyɩ lä 'nyusɔkwänä, 'nɩ ɔ 'mnämʋ‑ 'sɩɩ aa 'mnö 'nyuu. 'Nɩ ɔɔ' 'yuë ‑yä ɔɔ' kääkää‑mnaa 'mnämʋ‑ 'sɩɩ aa 'mnö 'nyuu. 13'Nɩ Zozii yio soo, ɔ lä nyɩkpɔɔ' lɔɔ ‑ɔ gä 'nyunʋ mnää‑ nä, 'mnätʋ yio ‑lätee 'bhlä. 14‑Mä, ‑amʋ, 'naa 'nyuu n 'kɔ lä 'nyɛ nä, ʋ yi gbä 'nɩ 'mnätʋ 'nöɔ ‑läyɩ 'kɔɔn 'bhlä. Ʋ yi ɔɔ' pleyii 'nyiee' glu bhäändä 'plöö, 'nɩ ʋ yio pleyii zelio ‑yä ʋ 'kɔ 'pʋpʋɛ 'nyɛ 'kɔɔkɔɔ ‑za.#4.14 Zɛɛ 'sɩɩ Eza 12.3; Zele 2.13; 17.13. 15'Ŋnɔɔ lä Cɩanyɔ‑, ‑n nyɛɛ'ɛ ‑lɔɔ' 'nyuyɩ, ɩyä 'mnätʋʋ' kä'ä yɩ 'kɔɔn 'bhlä, ɩyä nn' kä yɩ bʋkʋ ‑lää 'nyu 'plü kää yi.

16Zozii lä ‑n mʋ ‑yä ‑n laa ‑wʋ saa ‑n ‑nyoto, ɩyä ‑n yi bʋkʋ ‑lää. 17'Ŋnɔɔ lä nn' ‑wʋ 'wli ‑kä. Zozii lä ‑n gä cii‑ nynä ‑nn ‑wʋ 'wli ‑kä nä, ‑naa wälɩ mɛɛ‑. 18‑N yä wɛzä 'wlie ‑ngbü nöö, 'nɩ ‑lɔɔ ‑n ‑kʋ lä yëku ‑pɛpɛɛ nä, ɔɔ' ‑wʋ ‑naa 'wli plöö‑. ‑N gä sɔɔ cii‑ nä, n cii‑ nyaasäsä. 19'Ŋnɔɔ lä Cɩanyɔ‑, n ni 'yi nynä ‑mä ‑n ‑glö 'plɔfɛtɩ! 20Nä, ‑n ni, ‑a 'bäsɩ 'kükënä 'wluu wa bʋbɔ bhä, 'nɩ anyɩ 'Zufʋnyʋä, a ci nynä ‑mä Zolizalɛmʋduu', ‑mɔɔ‑ plöö‑ Laagɔɔ' bʋbɔdä. 21Zozii lä wälɩnɩ n sonö‑ö lä nä, 'ŋnɔɔ‑, ‑n känɩɩ plɛkʋ, ‑mä 'tänyɩ yi ŋëë, 'nɩ waa' ‑läyɩɔ ‑a 'Bä Laagɔ 'kükënä 'wlu bʋbɔ, 'nɩ waa' 'nöɔ ‑läyɩɔ 'sɩɩ Zolizalɛmʋduu' bʋbɔɔ. 22Anyɩ Samaliinyʋä nä, Laagɔɔ a bʋbɔ lä nä, a 'nʋ ‑wʋ ‑yi. ‑Mä ‑anyɩ 'Zufʋnyʋä Laagɔɔ ‑a bʋbɔ lä nä, kä ‑a ‑yiu. 'Zufʋnyʋä nä, wamä 'kʋ Laagɔ ‑ghlää 'nɩ ʋ 'kä lä 'ylʋzɔkʋnyʋä ‑lɔɔ nëë' ‑sä.#4.22 Zɛɛ 'sɩɩ Eza 2.3; Wlɔmʋ 9.3. 23'Tänyɩ yi ŋëë, 'nɩ ɛ yä wɛzä 'sɩɩ ŋëë, ‑yä nyɩkpaa ‑wa bʋbɔ lä ‑a 'Bä Laagɔ nyaasäsä nä, wa 'kɔ waa' 'wugɔɔ 'mnö bʋbɔ, ‑yä wa 'kɔ 'sɩɩ ‑nʋawlɛɛ 'mnö bʋbɔ. Laagɔ‑bʋbɔnyʋaa' 'cëyɩ nä, wamä 'Bäɔ tään lä. 24Laagɔ ‑glö 'Wugɔ nä, ɩ ‑ŋwa 'kʋ nynä ‑mä ‑wa bʋbɔnʋ lä nä, wa bʋbɔnʋ 'wugɔɔ' ‑yä ‑nʋawlɛɛ'. 25'Ŋnɔɔ lä n ‑yi sɔɔ nynä Mesio, wa laa lä 'sɩɩ Klisöɔ nä, ɔ yi yi. Ɔ kä ‑yi nä, ɔ yi‑anyɩ wälɩɩ 'fɩɩn 'mʋ ‑säsä. 26Zozii lä ‑amʋ, ‑lɔɔ ‑ɔ ‑yä ‑mɔɔ 'sɔ sää lä 'mʋ nä, ‑amʋʋ‑ plöɔ lä.

27‑Lɔɔ' 'tänyɩɛ ‑bhlobhlo 'mnö, 'nɩ ɔɔ' 'kʋgënyʋa yi yi. ‑Mä sä ɔ ‑yä 'ŋnɔ 'sɔ sää bhlä 'mʋ nä, kä plɛkʋ 'niniwa‑. Ɩ ‑kʋ sɔɔ 'nɩ waa' pää' nyɩkpɔ 'nöɔ ‑wʋ ylää‑ nynä wälɩ‑ ‑sä ‑n 'ylänöɔ bhää? 'Nɩ wälɩ‑ ‑sä ‑n ‑yɔsɔ ci bhää?

28‑Mä 'ŋnɔɔ ‑të ‑lɔɔ ɔɔ' 'nyukwëdëa, 'nɩ ɔ yi 'ylɩbhɔ, 'nɩ ɔ yi ‑mɔɔ duu' nyɩkpaa soo ‑kää mʋ. 29Ɔ lä a yi a 'kä wloo ‑mä nyɩkpɔ! Ɔ ‑sonö'ö 'naa yëkuu' wälɩɩ 'fɩɩn nä, Klisöɔ 'mɔɔ‑ bhä ‑lɔɔ ‑kʋ ‑a? 30'Ŋnɔɔ cii‑ lä sɔɔ nä, kä nyɩkpaa ‑bha ‑mɔɔ duu' 'nɩ wa yi Zozii yëku yi.

31‑Lɔɔ' 'tänyɩɛ ‑bhlobhlo 'mnö, ɔɔ' 'kʋgënyʋa sonöɔ bhɛ nynä Cɩanyɔ‑, ‑n 'gä yɩ lʋʋ në koo ‑nä! 32Zozii lä 'naa lülülɩɩ n 'kä lä lü nä, a 'nɩɩ ‑wʋ ‑yi. 33Ɔ cii‑ lä sɔɔ nä, wa ylä bhɛ wa yëku nynä ‑mä, kä nyɩkpɔ ‑lɔɔ bhä lülülɩɩ ‑a? 34'Nɩ Zozii yiwa soo, ɔ lä 'naa lülülɩɩ, ɩmɩɩ‑ plöö‑ lä nynä ‑mä, ‑lɔɔ ‑ɔ ‑lobho'o lä nä, n nʋ ɔɔ' pɔlösaa, ɩyä ɔɔ' lebhee, n 'kɛ ‑zɔɔ bhɩä. 35Aa' cimʋ ‑wʋ nynä ‑mä, ‑ɔ ‑too ‑mɔɔ 'cɩ ‑mɔɔnä ‑yä ‑nyʋʋ‑döödä 'kä ŋëë ‑a? ‑Mä, ‑amʋ, kä n sonö'anyɩ yɩ nynä a bhɛlɩä 'wlu 'kʋ ‑yä a wloo ‑mä 'kälöö yä wɛzä zään, nä ‑döö‑tänyɩɛ yä ŋëë. 36Nyɩkpɔ kä ‑nyʋʋklää' bɩbɛ ‑kää mʋ nä, kä wa nyɛ ɔɔ' dä, 'nɩ ɔ klä 'nää 'kɔɔkɔɔ zëkpëa 'mnö ‑za. 'Nɩ nyɩkpɔɔ ‑ɔ ‑goo bhlä ‑lɩɩ nä, ɩyä ‑lɔɔ ‑ɔ ‑mʋ bhlä bɩbɩä ‑kää nä, wamä 'sɔ ‑pʋpɛ 'bhlänʋwa däbhloo'. 37'Nünëa wa pä lä nynä ‑mä, ‑n ‑goo ‑naa 'klä 'nɩ 'yigädalɔɔ yia 'mnö bɩbɩä ‑kää nä, a ‑glö ‑nʋawlɛ. 38Dä aa ‑wʋ lä ‑gomʋ nä, ‑lɔɔ n ‑sonö'anyɩ lä nynä a mʋ ‑yä a 'kä bɩbɩä. Dä 'kwlɩ ‑kplɔ lä a ‑liesɩ nä, ‑lɔɔ a 'nii‑ lä ‑bʋzʋɛ.

39Sä 'ŋnɔɔ cii‑ bhlä Zozii' ‑za nynä ‑mä, ɔ ‑sonö'ö 'naa yëkuu' wälɩɩ 'fɩɩn nä, ɩ ‑gbä 'nɩ 'duu 'mnö Samaliinyʋä ‑bhutukpä ‑kä bhɛ Zozii' pɔlötɛtɛ. 40Ɩ ‑kä 'ŋnö nä, kä Samaliinyʋä ‑yio yëku 'nɩ wa yio soo nynä ɔɔ' 'plö ‑lä ‑mä ɔ goo. Zozii ‑gonʋwa yëku ylɩɩ 'sɔ. 41Nyɩkpaa ‑wa ‑kä bhɛ lä Zozii' pɔlötɛtɛ nä, wa ‑zumë bʋkʋ kpänyɩ ɔɔ' ciciwälɩɩ' ‑za. 42'Nɩ wa yi 'ŋnɔɔ ‑soo, wlä sä ‑n ‑sonö‑anyɩ lä nä, ɩmɩ ‑bhloo gbä yɩɔ 'nɩ ‑a 'gä ɔɔ' pɔlötɛtɛ ‑kä ‑mä, ‑anyɩ 'titi, ‑a ‑puo 'nyukwli, 'nɩ ‑a yi sɔɔ nynä ‑mä kɔ ‑yi ‑yä ɔ 'kä 'zaazɩ 'ylʋzɔkʋnyʋä ‑lɔɔ nëë' ‑sä.

Zozii ‑ŋëë Galilee' 'nɩ ‑mɔɔ' nyɩkpaa ‑gbonöɔ 'kʋ

(Matie 8.5‑13; Lukö 7.1‑10)

43Ylɩɩ 'sɔ plöö‑ ylä nä, kä Zozii ‑bha yɩ ‑lɔɔ, 'nɩ ɔ yi Galilee' mʋ. 44Ɔ cii‑ bhɛ 'flɛ nynä 'plɔfɛtɩ kä ɔ 'bhlɩ ‑yi nä, ɔ 'bhunyʋää' 'mänyɩnöɔ ‑wʋ. 45‑Mä, sä ɔ ‑plä lä 'gää Galilee‑bhlɩɛ 'mnö nä, kä ‑mɔɔ' nyɩkpaa ‑yio 'kʋ gboo ‑kää. ‑Ɔnöza bhää? Wälɩɩ 'fɩɩn Zozii ‑nʋ lä ‑mɔɔ Zolizalɛmʋduu' ‑glɩsɩɩsɩɛ 'kʋ nä, wa nii‑ 'yi.

46'Nɩ ɔ yi bʋkʋ Galilee' 'duu wa laa lä Kanaa nä 'mnö yi. ‑Mɔɔ Kanaa', ‑mɔɔ Zozii ‑gbä 'nɩ 'nyuu ‑jɩjlää bhlä divaa'.

Zozii ‑yamä 'loyoo' lebhenʋnyɔɔ' 'yu

‑Maa, 'duu wa laa lä Kapɛnayumö nä 'mnö, nyɩkpɔ ‑bhlo plöö‑ bhä ‑mɔɔ 'loyoo' 'kʋnʋʋnyɔ 'nɩ ɔɔ' 'yuŋwadii' bhɔɔ ‑yä. 47Nyɩkpɔnɔ nuu‑ lä nynä Zozii yä Zudee‑bhlɩɛɛ' ‑bha ‑mä ɔ yä Galilee' yi nä, kɔ ‑yi 'nɩ ɔ yio 'wlu slä nynä ɔ ‑yowli ‑kʋ 'kwiee numnu 'kʋ nä, Zozii mʋ Kapɛnayumöö' ‑yä ɔ 'kɔ yamä. 48'Nɩ Zozii yio soo, ɔ lä anyɩ, a 'nö 'fɩɔ 'yiziziogbɩ ‑yä ‑daminë 'sɔ 'yi nii‑ nä, aa' kään ‑wʋ pɔlötɛtɛ. 49'Nɩ nyɩkpɔɔ yi Zozii soo, ɔ lä bheeje Kwlienyɔ‑, ‑n yi ‑mä, dä 'naa 'yulɩɔɔ' ‑lätee kuu‑ nä! 50'Nɩ Zozii yio soo, ɔ lä ‑n mʋ ‑mä ‑n ‑yowli yä 'kwiee nëë' ‑bha. Nyɩkpɔɔ laa‑ Zozii' ciciwälɩɩ nyaasäsä 'nɩ ɔ yi 'ylɩbhɔ.

51Ɔ ‑kʋ bhɛ lä 'ylɩbhɔdä nä, ɔɔ' ‑gänʋnyʋa ‑yio ‑blɔ 'kʋ, 'nɩ wa yio soo, wlä Käänyɔ‑, ‑n ‑yowli yä yamä! 52'Nɩ ɔ yiwa 'ylä nynä ‑mä, 'gliye‑ ‑sa 'mnö 'yuoo' lɩɩ ‑gbe bhä mʋʋ? Wlä ‑zeküü' ‑kugbë, 'gliye ‑bhloo' tänyɩɩ', ‑lɔɔ wätlɩɩ doo‑ lä 'kʋ. 53Wa cii‑ lä sɔɔ nä, kä 'yuo ɔ 'bää plɛ ‑bhlüü ‑lɔɔ nynä ‑lɔɔ' 'tänyɩɛ ‑bhlobhlo 'mnö Zozii ‑sonöɔ bhlä nynä, ‑n mʋ ‑mä ‑n ‑yowli ‑yä 'kwie nëë' ‑bha. ‑Nɩnɩ ‑gbä bhɛ nä, kä nyɩkpɔɔ ‑yä ɔɔ' 'gbëa 'mnö nyɩkpaa 'fɩɩn ‑kä bhɛ Zozii' pɔlötɛtɛ.

54Zozii ‑bha lä Zudee‑bhlɩɛɛ' 'nɩ ɔ ‑yi lä Galilee‑bhlɩɛɛ' nä, ɩɩ' 'yiziziogbɩɩ ɔ ‑nʋʋ lä ‑mɔɔ 'sɔnadä nä, ɩmɩɩ‑ ‑kʋ lä ‑lɔɔ.

Currently Selected:

Zään 4: god

Highlight

Copy