Zään 3

Nikodɛmʋ ‑yi Zozii yëku 'saboo

(Matie 18.3; Zään 1.12‑13; 1 Pɩɛ 1.3,23)

1Nyɩkpɔ ‑bhlo, ɔmɔ wa laa bhä Nikodɛmʋ. Ɔ ‑glö bhä Falizɩɛnyʋaa' ‑jɛnyɩɛ 'mnö nyɩkpɔ. 'Nɩ ɔ plöö‑ bhä 'sɩɩ 'Zufʋnyʋaa' 'cifinyʋa nëëdëë' lɔɔ ‑bhlo. 2Ylʋʋ ‑bhloo' 'saboo, ɔ ‑yi Zozii yëku 'nɩ ɔ yio soo, ɔ lä Cɩanyɔ‑, ‑a ‑yi sɔɔ nynä ‑mä kä Laagɔ lobho‑o ‑yä ‑n 'ga‑anyɩ cɩa. 'Yiziziogbɩɩ ‑n nʋ lä nä, Laagɔ 'nö nyɩkpɔ yëku ‑kʋ nä, ɔɔ' ‑lä mii 'nɩ ɔ 'kɩ nʋ.

3'Nɩ Zozii yio soo, ɔ lä ‑nʋawlɛɛ 'mnö, n sonö‑ö nynä ‑mä nyɩkpɔ 'nö 'ci 'sɔɔ ‑gänöɔ nä, ɔɔ' ‑lä mii 'nɩ ɔ 'kä Laagɔɔ' 'Leyiduu 'yi 'ni. 4'Nɩ Nikodɛmʋ yio 'ylä, ɔ lä ‑mä, Cɩanyɔ‑, säsä nyɩkpɔɔ' 'kɔgwlɛlɔɔ yi bhä bʋkʋ gänöɔ? Kɔ 'kä bhä ɔ 'nɔ 'mnö plä ‑yä ɔ 'kä bʋkʋ gänöɔ ‑a? 5'Nɩ Zozii yio soo, ɔ lä ‑nʋawlɛɛ 'mnö, n sonö‑ö nynä nyɩkpɔ nä, 'nyuu ‑yä Laagɔɔ' 'Wugɔɔ 'mnö ɔ 'nö ‑ghlää, 'nɩ ɔ 'nö ‑gänöɔ nä, Laagɔɔ' 'Leyiduu, ɔɔ' ‑lä mii 'nɩ ɔ 'kʋ 'mnö plä. 6Nyɩkpɔɔ' lɔɔ nyɩkpɔ ‑gään lä nä, ɔ ‑glö 'yɛkɛ. 'Nɩ nyɩkpɔɔ' lɔɔ Laagɔɔ' 'Wugɔɔ ‑gään lä nä, ɔ ‑glö yɩ 'wugɔ. 7N ‑sonö‑ö lä nynä ‑mä, ɩ ‑ŋwa 'kʋ nynä a gänöɔ 'ci 'sɔɔ nä, ɩɩ' 'ninie‑e ‑lä plɛkʋ! 8‑Vʋvɔlʋ kä yi nä, ‑gbäsɩɩ ʋ ‑waa lä nä, ‑mɔɔ ʋ mʋʋ. Dä ʋ bha, 'nɩ ‑gbasɩɩ ʋ mʋ lä nä, ‑nn ‑wʋ ‑mɔɔ dä ‑yi. ‑Bhlɛ sɔɔ ɩ ‑kʋ 'nɩ ‑n nu ʋʋ' kplü. Laagɔ‑Wugɔɔ kä nyɩkpɔ gään nä, sɔɔ ɩ plö lä 'kʋ.

9Nikodɛmʋ lä Cɩanyɔ‑, nä, säsä ɩ nʋmɔ nʋmɔ bhää? 10Zozii lä ‑mänɩ ‑n ‑glö 'Yizlɛ‑bhlɩnɛ 'mnö cɩanyɔɔ' ‑lɛ 'kädɔ. 'Nɩ sɩ ‑kʋ bhä 'nɩ ‑nɩnɩ ‑n 'nɩɩ bhä ‑yii? 11‑Nʋawlɛɛ' 'mnö, n sonö‑ö ‑nynä wälɩɩ lɩɩ ‑a ‑yi lä nä, ɩmɩ ‑a ci. Wälɩɩ ‑ɩnö dä ‑a 'nii‑ lä nä, ɩɩ' ‑dläfʋɛ ‑a lü. ‑Mä anyɩ nä, aa laa ‑wʋ ‑anyɩa ciciwälɩɩ nyaasäsä. 12N ka'anyɩ ‑mää 'ylʋzɔɔ' wälɩ soo 'nɩ a 'nɩɩ nyaasäsä laa nä, säsä n ka'anyɩ bhä Laagɔ yëkuu' wälɩ ‑soo 'nɩ a yii bhä nyaasäsä laa? 13Nyɩkpɔɔ' ‑läzä ‑gblää 'nɩ ɔ 'kä Laagɔ yëku mʋ, ‑mä Nyɩkpɔɔ ‑Yowli, ɔmɔ ‑bhlogbe 'coo‑ ‑bha lä ‑mɔɔ 'nɩ ‑ɔ kwlii‑ lä. 14Sä Moyizö bhoo‑ bhlä dlɛɛ‑leeboluu ‑mɔɔ 'popie 'mnö suu 'yii nä,#3.14 Zɛɛ 'sɩɩ 'Nɔblʋ 21.9. Nyɩkpɔɔ ‑Yowli, ɩ ‑ŋwa kʋ nynä ‑mä wa bhuo 'sɩɩ sɔɔ su 'yii. 15Ɩyä nyɩkpɔɔ' lɔɔ ‑ɔ gɔ plɛkʋ 'tɛɛ nä, ɔ 'kä 'pʋpʋɛɛ‑ ‑kʋ lä 'kɔɔkɔɔ ‑za nä 'ni.

16Kä Laagɔ ‑waa kpänyɩ 'ylʋzɔkʋnyʋä nä, ɩ ‑kä 'ŋnö 'nɩ ʋ ‑sä ʋ ‑Yowlio ‑bhlo 'coo ʋ ‑kä lä nä, ‑yä nyɩkpɔɔ' lɔɔ‑ yi lä ɔɔ' pɔlötɛtɛ ‑kään nä, ɔɔ' kä ‑kä 'ku ‑yä 'pʋpʋɛɛ ‑kʋ lä 'kɔɔkɔɔ ‑za nä, ɔ 'kɛ 'ni. 17Laagɔ nä, ʋʋ ‑wʋ ʋ ‑Yowli ‑lä nynä ɔ 'kä 'ylʋzɔkʋnyʋä gbʋ klaa, ‑mä ɔ 'kwa ‑lɔɔ nëë' ‑sä. 18‑Ɔ gä Laagɔ ‑Yowli plɛkʋ 'tɛɛ nä, wa 'nöɔ ‑lä gbʋ klaa. ‑Mä, ‑ɔ 'nö Laagɔ ‑Yowlio ‑bhlo 'coo plɛkʋ 'tɛɛ nä, ‑lɔɔ' nyɩkpɔɔ' ‑wʋ lä ɔɔ' wälɩɩ nyaasäsä laa‑ nä, gbʋ yɔ wɛzä klä. 19Gbëgëa ‑a ‑kä lä 'ŋnö 'nɩ gbʋʋ 'kɔ lä klä nä, a ni amä. Kɩ plöö‑ lä nynä ‑mä zëlüü ‑yi 'ylʋzɔɔ ‑mä, 'ylʋzɔkʋnyʋää' nʋnʋgbɩɩ ‑nyuu bhlä nä, 'cucuu 'mʋ wa ‑wamä 'nɩ wa ‑zi zëlüü. 20Nyɩkpɔɔ' lɔɔ ‑ɔ ‑kʋ lä gbenyenyi 'mnö nä, kɔ ‑zɔɔ zëlü. Ɔ lä waa' kä ‑kä ɔɔ' gbenyenyii 'yi 'ni nä, ɔɔ' ghlä ‑wʋ zëkpë 'kʋ. 21‑Mä nyɩkpɔɔ' lɔɔ ‑ɔ nämnö lä ‑nʋawlɛɛ 'mnö nä, kɔ ghlä zëkpë 'kʋ 'nɩ wa ni ɔɔ' nʋnʋgbɩɩ 'yi. ‑Lɔɔ wa yibhë sɔɔ nynä ‑mä, sä Laagɔ ylä lä nä, sɔɔ ɔ nää.

Zään Badisö ‑lü bʋkʋ Zozii' ‑dläfʋɛ

22‑Nɩnɩ 'fɩɩn plöö‑ ylä nä, kä Zozii ‑yä ɔɔ' 'kʋgënyʋa 'sɔ ‑mʋ Zudee‑bhlɩɛ 'mnö. Ɔ ‑yʋwa 'sɔ ‑kʋ ‑mɔɔ ylɩɩ zio, 'nɩ ɔ ŋʋ bhä nyɩkpa 'nyu 'wlu. 23Zään ‑mä, ɔ ‑kʋ bhä Enɔɔ‑bhlɩɛɛ' 'duu wa laa lä Salimö nä yëku, 'nɩ ɔ ŋʋ bhä 'sɩɩ nyɩkpa 'nyu 'wlu. 'Nyuu ‑zu bhä kpänyɩ ‑lɔɔ nä, nyɩkpaa yi bhä 'nɩ ɔ 'ŋʋnʋwa bhä ‑lɔɔ 'nyu 'wlu. 24‑Lɔɔ' 'tänyɩɛ 'mnö nä, waa' ‑lä bhä tee Zään ‑jɩɩ' ŋʋʋ‑.#3.24 Zɛɛ 'sɩɩ Matie 14.3; Makö 6.17; Lukö 3.19‑20.

25‑Mä 'tänyɩ ‑kʋ ‑lɔɔ 'nɩ, Zään' 'kʋgënyʋä ‑yä 'Zufʋyu ‑bhlo 'sɔ bhlää bhä 'kʋ. 'Zufʋnyʋaa' budolɩɩ ‑ɩ gbä lä 'nɩ wa kplɔɔ lä Laagɔ dëlü nä, ɩɩ' ‑za, wa bhlää bhä 'kʋ. 26'Nɩ wa yi Zään yëku yi, 'nɩ wa yio 'ylä nynä Cɩanyɔ‑, nyɩkpɔɔ ‑ɔ ‑yä ‑mɔɔ 'sɔ ‑kʋ bhlä ‑mɔɔ Zludɛɛ‑nyie klë, 'nɩ ‑ɔnö ‑dläfʋɛɛ ‑n ‑lü bhlä nä, ‑n wloo, ɔ ŋʋ yɩ nyɩkpaa 'nyu 'wlu nä, ɔmɔ nyɩkpaa' ‑lefɩɩn mʋʋ ylä. 27Zään lä sä Laagɔ nyɛɛ‑ lä nyɩkpɔ nä, sɔɔ ɔ kään. 28Anyɩ 'titi a yi'i ylä ŋomää! Kä n ‑sonö'anyɩ bhlä nynä Klisöɔ, ‑amʋʋ‑ 'nöɔ ‑wʋ plöö‑ ‑mä kä Laagɔ lobho'o nynä n 'plö ‑bhlɛ. 29‑Ɔ nöö lä 'ŋnɔɔ nä, ɔmɔ plöö‑ lä 'wlio. 'Nɩ 'wlio nä, ɔ 'nagɔ kʋɔ yëku sä, 'nɩ ɔ puo 'nyukwli. Ɔ 'nagɔɔ' 'mʋ sää‑wälɩ, sä ɔ nui lä nä, sɔɔ ‑pʋpɛ 'bhlänöɔ pleyii. ‑Amʋ ‑mä 'sɩɩ, ‑pʋpɛɛ‑ 'bhlänö'ö ylä pleyii nä, ɛɛ' ‑wʋ 'kʋ mʋsä ‑kä! 30Ɩ ‑ŋwa 'kʋ nynä ɔɔ' 'ŋnö mʋ ‑yä ‑amʋ, 'naa ‑lɩɩ tëtë 'kʋ.

Nyɩkpɔɔ ‑ɔ bha lä Laagɔɔ nä

31Nyɩkpɔɔ' ‑lɔɔ ‑ɔ bha lä Laagɔ yëku nä, ɔmɔɔ‑ zi lä ‑lɩɩ 'fɩɩn 'kʋ. 'Ɩzä, nyɩkpɔɔ' lɔɔ ‑ɔ ‑kʋ lä ‑mää ‑dʋdʋkʋ nä, ɔ ‑glö ‑dʋdʋkʋʋ lɔɔ nä, ‑dʋdʋkʋʋ wälɩ ɔ ci. Nä, ‑ɔ bha lä Laagɔ yëku nä, kɔ ‑zi lɩɩ 'fɩɩn 'kʋ. 32Wälɩɩ ɔ nuu‑ lä nä, 'nɩ ‑ɩnö dä ɔ 'nii‑ lä nä, ɩɩ' ‑dläfʋɛ ɔ lü, ‑bhlɛ sɔɔ ɩ ‑kʋ 'nɩ waa' laa ‑wʋ ɔɔ' ciciwälɩɩ nyaasäsä. 33‑Ɔ gä ylä ɔɔ' ciciwälɩɩ nyaasäsä laa‑ nä, kɔ ci lä nynä Laagɔ ci 'zaazɩ ‑nʋawlɛ. 34Nyɩkpɔɔ' lɔɔ Laagɔ ‑lobho lä nä, Laagɔɔ' nüdö ɔ sää. Laagɔɔ' nyäka ‑wʋ ‑mä, kʋ nyɩɔ Kplɔɔkplɔɔ‑wugɔɔ 'bhë 'kʋ. 35Kä 'Bäɔ ‑waa ɔ ‑Yowli nä, kɔ nyɩɔ‑ ‑lɩɩ 'fɩɩn 'kämädä. 36Nyɩkpɔ kä Laagɔ ‑Yowli plɛkʋ ‑kään nä, 'pʋpʋɛɛ‑ ‑kʋ lä 'kɔɔkɔɔ ‑za nä, ɔ ‑kɛɛ. 'Ɩzä nyɩkpɔ 'nö Laagɔ ‑Yowli plɛkʋ ‑kään nä, ɔɔ' ‑lä 'pʋpʋɛ 'ni, 'nɩ Laagɔɔ' gbʋgblɛɛ 'nöɔ ‑lä 'kɔɔn gwë ‑sä.

Currently Selected:

Zään 3: god

Highlight

Copy