Zään 15

Zozii 'mɔɔ‑ plöö‑ divaa' ‑gälövaa 'titi

1Zozii cii‑ bʋkʋ, ɔ lä ‑amʋʋ‑ plöö‑ lä divaa‑gälövaa 'titi,#15.1 Zɛɛ 'sɩɩ Eza 5.1‑4. 'nɩ n 'Bä plöö‑ lä divaa‑gälöklaa' käänyɔ. 2'Läbhʋʋ' lʋʋ ‑ʋ ‑yä ‑amʋ 'sɔ kä 'jɛnyɩ‑, 'nɩ ‑ʋnö 'bhü tlʋ nä, kä n 'Bä dʋʋ 'kʋ. 'Nɩ 'läbhʋʋ‑ tlʋ lä 'bhü nä, ɔ sʋʋ 'yuë ‑yä ʋʋ' yëku 'kä kplɔɔ ʋ 'kä bʋkʋ kpänyɩ tlʋ. 3Anyɩ nä, wälɩnɩ n sonö'anyɩ lä nä, ɩ yä wɛzä gbä 'nɩ a yä kplɔɔ. 4Sä n ‑yä anyɩ 'sɔ 'jɛnyɩ‑ lä nä, a ‑yä ‑amʋ 'sɔ 'jɛnyɩ sɔɔ! 'Läbhʋʋ 'nö suvaa 'titi në gëë‑ nä, ʋʋ' tlʋ ‑wʋ 'bhü. Nä anyɩ ‑mä 'sɩɩ, a ‑yä ‑amʋ 'sɔ 'nö 'jɛnyɩ‑ nä, aa' ‑lä 'bhü tlʋ.

5‑Amʋʋ‑ plöö‑ lä divaa' ‑gälövaa, 'ɩzä anyɩ‑ plöö‑ lä aa' 'läbhɩɩ. Nyɩkpɔɔ' lɔɔ ‑ɔ ‑yä ‑amʋ 'sɔ kä 'jɛnyɩ‑ nä, ɔ yi 'bhü bhutukpä tlʋ. ‑Mä a nö'ö 'kʋ ‑kä nä, aa' ‑lä lʋʋ' nʋlɩ mii. 6Nyɩkpɔ ‑yä ‑amʋ 'sɔ 'nö 'jɛnyɩ‑ nä, kwa pɔɔ 'klä, 'nɩ ɔ yɛɛ nynä 'läbhʋʋ' lʋʋ wa döö‑ 'kʋ nä. 'Läbhɩɩ wa dö lä 'kʋ nä, ɩ kä ‑yɛɛ nä, kwa tëpii 'nɩ wa pɩɩ ‑kosuu' 'nɩ ɩ si. 7Nä, a ‑yä ‑amʋ 'sɔ kä 'jɛnyɩ‑, 'nɩ 'naa ciciwälɩɩ ka'anyɩ pleyii ‑kʋ nä, sää 'fɩɩn a ‑waa lä nä, a 'ylää sɔɔ 'Bäɔ, ‑mä a yi sɔɔ 'ni! 8A kä 'bhü bhutukpä tlʋ nä, 'nɩ a kä 'zaazɩ 'naa 'kʋgënyʋä plöö‑ nä, ɩmɩɩ‑ 'gä lä gbä ‑yä 'Bäɔɔ 'klʋagba 'kä 'yi 'nio.

9Zozii cii‑ bʋkʋ, ɔ lä sä n 'Bä ‑wää'ä lä nä, sɔɔ n ‑waa'anyɩ lä. Nä, a nämnö 'naa ‑wawʋʋ 'mnö! 10‑Amʋ, n ŋʋ n 'Bää ciciwälɩɩ 'klʋkpää', 'nɩ n nämnö ɔɔ' ‑wawʋʋ 'mnö. Nä, anyɩ ‑mä 'sɩɩ, a kä 'naa ciciwälɩɩ 'klʋkpää' 'ŋʋ nä, a yi 'naa ‑wawʋʋ 'mnö nämnö. 11Kä n cii‑ lä sää ‑yä 'naa ‑jäkaa 'kanyɩ pleyi kʋ, ɩyä anyɩa' ‑jäkaa 'kä nëë' slää.#15.11 Zɛɛ 'sɩɩ Eza 9.2; 35.10.

12A ni wälɩklëa n 'ylänö'anyɩ lä nä, amää‑ plöö‑ lä nynä ‑mä, sä n ‑wamänö'anyɩ lä nä, anyɩ ‑mä 'sɩɩ, a wamä ‑wamä sɔɔ! 13‑Wawʋʋ' ‑lʋʋ nyɩkpɔ yi lä ɔ ‑liee' ‑za kää, 'nɩ ‑ʋ yi lä 'ghlümë nä, ʋmʋʋ‑ plöö‑ lä, sä nyɩkpɔ nyɛ lä ɔɔ' zëkpëa ɔ 'nagwɩää' ‑za nä. 14Anyɩ nä, sä n 'ylänö'anyɩ lä nä, a kä sɔɔ nʋ nä, a ‑glö yɩ 'naa 'nagwɩä. 15‑Gänʋnyɔɔ' ‑wʋ sä ɔɔ' käänyɔ nʋ lä nä ‑yi. Wälɩɩ 'fɩɩn 'Bäɔ cɩä'ä lä nä, kä n ‑gbä 'nɩ a ‑yibhënɩ. Nä, nn' laa'anyɩ yɩɔ 'naa ‑gänʋnyʋä, ‑mä 'naa 'nagwɩä‑ n laa'anyɩ ylä. 16Anyɩ‑ nö'ö ‑wʋ laa‑, ‑mä ‑amʋʋ‑ laa'anyɩ, 'nɩ ‑ɔ nyɩ'anyɩ ‑tëbhu nynä a mʋ ‑yä a tlʋ 'bhü, ɩyä anyɩa 'bhüü nä, ɩ kʋ 'kɔɔkɔ ‑za. Ɩyä ‑lɩɩ 'fɩɩn a 'kä lä 'Bäɔ 'ylää 'naa 'ŋnöö 'mnö nä, ɔ 'kanyɩmɩ 'nyɛ. 17Nä, sä n 'ylänö'anyɩ lä nä, sɔɔ plöö‑ lä nynä ‑mä, a wamä ‑wamä.

Zozii 'kʋgënyʋä wa yiwa zɔbhlɛmä

18'Ylʋzɔkʋnyʋä ka'anyɩ ‑zɔɔ nä, a yibhë sɔɔ nynä ‑mä ‑amʋ wa ‑zɔbhlɛmä tɛɛ. 19A kä bhä 'ylʋnʋzɔɔ' nyɩkpa plöö‑ nä, sä a ‑glö bhlä ‑mɔɔ' lʋä nä, ɩɩ' ‑za, kä 'ylʋzɔkʋnyʋä 'kanyɩ bhä wamä. Kä n ‑sa'anyɩ 'ylʋzɔɔ' nyɩkpa nëëdë, 'nɩ n ‑gboguë'anyɩ. Ɩɩ' ‑zä 'ylʋzɔkʋnyʋä ‑zɔɔ'anyɩ lä. 20Wälɩɩ n ‑sonö'anyɩ lä nä, a fänɩ plɛ yëku! Kä n ‑sonö'anyɩ lä nynä ‑gänʋnyɔɔ' ‑wʋ 'ghlü 'nɩ ɔ 'kä ɔɔ' käänyɔ ‑zi.#15.20 Zɛɛ 'sɩɩ Matie 10.24; Lukö 6.40; Zään 13.16. Wa ‑lä'ä lä zɔgblö nä, wa yi'anyɩ 'sɩɩ zɔgblö fä. 'Nɩ ‑nänʋä bhɛnö‑ lä 'naa ciciwälɩɩ pleyi nä, wa yi 'sɩɩ anyɩa ciciwälɩɩ pleyi bhɛnö. 21‑Mä wa ka'anyɩ nyenyisä klä nä, 'naa ‑zä wa kla'anyɩ lä sɔɔ. ‑Ɔ ‑lobho'o lä nä, wa 'nöɔ ‑wʋ ‑yi nä, ɩɩ' ‑zä wa kla'anyɩ lä sɔɔ. 22N 'nö bhä ‑yi 'nɩ n 'nʋwa bhä ‑soo nä, waa' ‑lä bhɔɔ waa' nyenyii' dlu plʋʋ. ‑Mä n yʋwa ylä ‑pɛɛ soo nä, waa' nyenyii' ‑za, waa' yɩɔ cielɩ ‑kä. 23Nyɩkpɔɔ' lɔɔ ‑ɔ gä 'naa ‑zɔbhlɛzʋ ‑kä nä, ɔ kä 'sɩɩ n 'Bää ‑zɔbhlɛzʋ. 24N 'nö bhä ‑yi, 'nɩ nʋnʋgbɩɩ' ‑lɩɩ nyɩkpɔɔ' ‑lätee lä ‑nʋ nä, n 'nʋwanyɩ bhä nëëdë ‑nʋʋ nä, waa' ‑lä bhɔɔ nyenyii' dlu kää. ‑Mä n ‑nʋɩ, 'nɩ wa nii‑ 'yi. Sɔɔ ɩ ‑kʋ 'nɩ wa ‑zɔbhlɛmänö'ö, 'nɩ wa ‑zɔbhlɛmä n 'Bä. 25Kä ‑nɩnɩ 'fɩɩn ‑ŋënö'ö lä ‑yä, sɩ ‑jɩjlɔ bhlä nä, sɔɔ 'kä glää. Kɩ ‑jɩjlɔ lä nynä ‑mä Wa ‑zɔbhlɛmänö'ö 'flɛ.#15.25 Ɩ bha Lɔlɔ 35.19; 69.5.

26‑Mä plɛɛ' Bhlüënyɔɔ, ‑ɔ plöö‑ lä ‑Nʋawlɛɛ' 'Wugɔɔ nä, n ‑yio lobho. Ɔ yi 'Bäɔ yëku ‑bha, 'nɩ ɔ yi yi ‑yä, ɔ 'kä 'naa ‑dläfʋɛ lü. 27'Nɩ, sä ‑bhɔɔdä nä, kä ‑a ‑kʋʋ lä 'kʋ nä, anyɩ ‑mä 'sɩɩ, a yi 'naa ‑dläfʋɛ lü.

Currently Selected:

Zään 15: god

Highlight

Copy