Zään 16

1Kä n sonö'anyɩ lä sää ‑yä aa' kä ‑kä pɔlötɛtɛɛ' ‑blɔɔ 'kʋ ‑bha. 2Wa yi'anyɩ Laagɔ‑bhitii 'mnö 'tlü. 'Nɩ 'tänyɩ yi ŋëë, 'nɩ nyɩkpɔɔ' lɔɔ ‑ɔ gä anyɩa nëëdë nyɩkpɔ bhlää‑ nä, ɔ yi bhobho nynä Laagɔ‑ ɔ ‑bʋbɔ. 3Waa' ‑wʋ 'Bäɔ ‑yi 'nɩ wa nö'ö ‑wʋ 'sɩɩ ‑yi nä, ɩɩ' ‑zä wa 'kanyɩ lä sɔɔ klä. 4Kä n ‑sonö'anyɩ lä wälɩnɩ 'fɩɩn ‑yä, ɩɩ' 'tänyɩɛ kä ‑ŋëë nä, a 'kä luë nynä n ‑sonö'anyɩ bhä. Ciedää nä, n ‑yä anyɩ 'sɔ ‑kʋ bhlä ‑lätee 'kʋ nä, n nö'anyɩmɩ ‑wʋ ‑soo.

Laagɔɔ' Wugɔɔ yi yi

5‑Pɛpɛɛ nä, ‑lɔɔ ‑ɔ ‑lobho'o lä nä, kä n mʋɔ ylä yëku. 'Nɩ anyɩa 'kʋʋ nyɩkpɔɔ' ylä'ä yɩɔ nynä ‑mä, dä ‑n mʋ bhää? 6‑Mä sä n cii‑ lä nä, ɩɩ' ‑za, plɛ ya'anyɩ sää 'titi 'kpɔsɔ. 7A ni ‑nʋawlɛɛ n sonö'anyɩ lä. Anyɩa' ‑za nä, ɩ ‑ŋwa 'kʋ nynä n mʋ. N 'nö ‑mʋ nä, plɛɛ' Bhlüënyɔɔ' nö'anyɩ ‑lä yëku yi. ‑Mä n kä ‑mʋ nä, n yio lobho. 8Ɔ kä ‑yi nä, ɔ yi ‑mää 'ylʋzɔɔ' nyɩkpaa paa nynä wa yä mnɔɔ. Kwa mnɔɔ‑ nyenyii' 'pɛlʋʋ 'mnö, 'nɩ wa mnɔɔ‑ Laagɔɔ' 'kʋgëlɩɩ' 'pɛlʋʋ 'mnö, 'nɩ wa mnɔɔ‑ 'sɩɩ Laagɔɔ' 'titee' 'pɛlʋʋ 'mnö.#16.8 Zɛɛ 'sɩɩ Nʋnʋ 24.25. 9Wa mnɔɔ‑ nyenyii' 'pɛlʋʋ 'mnö, sä waa' ‑wʋ lä 'naa pɔlötɛtɛ ‑kä nä.#16.9 Zɛɛ 'sɩɩ 8.21‑24; 9.41; 15.22‑24. 10Wa mnɔɔ‑ Laagɔɔ' 'kʋgëlɩɩ' 'pɛlʋʋ 'mnö, sä kä n mʋ ylä 'Bäɔ yëku, 'nɩ a nö'ö ‑läyɩɔ 'ni nä. 11Wa mnɔɔ‑ 'sɩɩ Laagɔɔ' 'titee' 'pɛlʋʋ 'mnö, sä 'Dëvlo ‑ʋ pɩä lä 'kɔɔnʋ 'kʋ nä, ʋʋ' 'titee yä wɛzä plɔɔ nä.

12N ‑kä bhä wälɩ ‑bhutukpä ‑yä n 'kanyɩ soo, ‑mä a 'nɩɩ ‑lä ‑pɛpɛɛ 'nyukwli poolɩ mii. 13‑Mä ‑ɔ plöö‑ lä ‑Nʋawlɛɛ' 'Wugɔɔ nä, ʋ kä ‑yi nä, ʋ yi'anyɩ ‑nʋawlɛɛ 'fɩɩn 'mnö 'tie. Ʋʋ' ‑lä ʋʋ' 'wluu ‑sä 'nɩ ʋ 'kä ci, ‑mä sä ʋ nuu‑ lä nä, sɔɔ ʋ 'kä lä ci. Ɩyä wälɩɩ ‑ɩ 'gä lä ‑zee yi nä, ʋ 'kanyɩmɩ soo. 14Sä n 'kä lä ‑Nʋawlɛɛ' 'Wugɔɔ paa nä, sɔɔ ʋ 'kanyɩ lä soo. Nä, ‑amʋ ʋ 'kä lä 'ŋnu fään. 15‑Lɩɩ 'fɩɩn 'Bäɔ ‑kä lä nä, ɩ ‑glö 'naa lɩɩ. 'Ɩzä n cii‑ lä nynä sä n 'kä lä 'Wugɔɔ paa nä, sɔɔ ʋ 'kanyɩ lä soo.

Zozii yi 'Bäɔ yëku mʋ 'nɩ ɔ yi bʋkʋ yi

16‑Ɔ ‑too yɩ 'pɛpɛ 'nɩ a nö'ö ‑läyɩɔ 'ni. 'Nɩ ɩ yi bʋkʋ 'pɛpɛlɩä nʋ, 'nɩ a yi'i 'ni. Kä n mʋ ylä 'Bäɔ yëku nä, ɩɩ' ‑zä n sonö'anyɩ lä sɔɔ. 17Ɔ cii‑ bhɛ lä sɔɔ nä, ɔɔ' 'kʋgënyʋaa' bhloobhlolʋä ylä bhä wa yëku nynä wälɩ‑ ‑sä ɔ ylä bhä nynä ɔ 'kä bhä cii? Ɔ cii‑ nynä ‑mä ‑ɔ ‑too yɩ 'pɛpɛ, 'nɩ ‑a nöɔ ‑läyɩɔ 'ni. 'Nɩ ɩ yi 'pɛpɛlɩä nʋ, 'nɩ a yi'i bʋkʋ 'ni. 'Nɩ ɔ cii‑ bʋkʋ nynä ‑mä, kä n mʋ ylä 'Bäɔ yëku nä, ɩɩ' ‑za. 18Säsä ɔ ylä bhä 'titi nynä ɔ 'kä bhä cii? Ɔ ci lä nynä ‑mä, ‑ɔ ‑too yɩ 'pɛpɛ nä, sɩ sä bhä ‑zɔɔ? Wälɩɩ ɔ ylä lä nynä ɔ 'kä ci nä, ‑aa 'nu ‑wʋ ɩɩ' ‑zɔɔ.

19Zozii ‑yi bhlä sɔɔ nynä kä wa 'kɔ lä 'ylää kää yi nä, kɔ ‑sonʋwa, ɔ lä n cii‑ lä nynä ‑ɔ ‑too yɩ 'pɛpɛ ‑yä a nö'ö ‑läyɩɔ 'ni. 'Nɩ ɩ yi 'pɛpɛlɩä nʋ 'nɩ a yi'i bʋkʋ 'ni nä, ɩɩ' ‑zä a ylä lä a yëku ‑a? 20‑Nʋawlɛɛ 'mnö, n sonö'anyɩ nynä a yi 'tu 'nɩ a yi bhʋtʋ. ‑Mä 'tänyɩɛ 'mnö a 'kä lä 'tu ‑yä a 'kä lä bhʋtʋ nä, ‑lɔɔ 'ylʋzɔkʋnyʋä 'kä lä ‑pʋpɛ nʋ. Plɛ yi'anyɩ 'kpɔsɔ, ‑mä anyɩa' plɛɛ' 'kpɔsɔlɩɩ yi anyɩa' ‑jäkää' jɩjlä. 21A ni, 'ŋnɔ kä cii ɔ 'kä gään nä, kä plɛ belio 'mʋ, sä ɔɔ' 'gliyee yä lä ŋëë nä. ‑Mä ɔ kä yɩ ‑gään nä, nyäkälɩɩ 'fɩɩn ɔ nii‑ lä nä, kɔ bii 'kʋ. Sä ɔ yä lä nyɩkpɔ zëkpë 'kʋ ‑lä nä, kä 'mnö mɛnöɔ yɩ. 22Anyɩ ‑mä 'sɩɩ, ‑pɛpɛɛ nä, plɛɛ‑ belio'anyɩ ylä 'mʋ. ‑Mä n yi'anyɩ bʋkʋ yëku yi, 'nɩ ‑pʋpɛ yi'anyɩ 'bhlä. ‑Lɔɔ' ‑pʋpɛɛ, nyɩkpɔ nö'anyɩmɛ ‑lä 'kɔɔkɔ ‑sä.

23‑Lɔɔ' ylʋʋ 'kʋ nä, a nö'ö ‑läyɩɔ wälɩklë ‑bhlo 'coo ‑za 'ylä. ‑Nʋawlɛɛ 'mnö, n sonö'anyɩ nynä ‑mä, lʋʋ' lʋʋ a yi lä 'Bäɔ 'ylää 'naa 'ŋnöö 'mnö nä, ɔ yi'anyɩmʋ 'nyɛ. 24'Nɩ dä ‑a 'nö bhlä 'kʋ kʋʋ nä, 'naa 'ŋnöö 'mnö, aa' ‑lätee lʋʋ ‑zla. ‑Pɛpɛɛ nä, a zla yɩ 'Bäɔ ‑mä ɔ yi'anyɩ 'nyɛ, ɩyä anyɩa' ‑pʋpɛɛ 'kä nëë' slää.

Kä Zozii ‑sɩä ‑dʋdʋkʋʋ' 'päwaa

25'Naa ciciwälɩɩ 'mnö nä, ‑nyädlöö' n ‑sonönö'anyɩ lä. ‑Mä 'tänyɩ yi ŋëë, 'nɩ nn' ‑läyɩɔ ‑nyädlöö' cii. Kä n 'kanyɩ yɩ 'Bäɔ yëkuu' wälɩɩ soo 'kpätaa. 26'Nɩ ‑lɔɔ' ylʋʋyɩ 'kʋ nä, nn' ‑wʋ cii‑ nynä n 'kä anyɩa 'wlu 'Bäɔ bhibhie, anyɩ 'titii‑ ‑lä 'gɔ lɩɩ 'ylää 'naa 'ŋnöö 'mnö. 27Kä 'Bäɔ 'titi ‑waa'anyɩ. A ‑wamänö'ö 'nɩ a ‑kä lä 'naa pɔlötɛtɛɛ nynä 'zaazɩ Laagɔ yëku‑ n bha nä, kä 'Bäɔ 'titi ‑waa'anyɩ. 28'Bäɔ yëku‑ n bha 'nɩ n ‑yi lä ‑mää 'ylʋzɔɔ. ‑Pɛpɛɛ' nä, kä n bha ylä 'ylʋzɔɔ, 'nɩ n mʋ ylä 'Bäɔ yëku.

29Ɔ cii‑ ylä wälɩnɩ nä, ɔɔ' 'kʋgënyʋa lä ‑n ni, ‑pɛpɛɛ ‑n sonö‑anyɩ ylä wɩa, ‑mä nn' cii yɩɔ ‑nyädlöö'! 30‑Pɛpɛɛ nä, ‑a ‑yi yɩ sɔɔ nynä ‑mɔɔ, ‑nn tään ‑wʋ 'fɩa nynä wa 'ylä‑ä. Wälɩɩ 'fɩɩn ‑ɩ ‑kʋ lä nyɩkpɔ pleyii nä, kä ‑n ‑yii. 'Ɩzä ‑a ‑kä lä ‑naa pɔlötɛtɛ nynä Laagɔ yëku‑ ‑n bha. 31Wa cii‑ lä sɔɔ nä, Zozii lä, nä ‑pɛpɛɛ a ‑kä ylä 'naa pɔlötɛtɛ ‑a? 32A ni 'yi ‑a! 'Tänyɩɛ yi ŋëë. 'Nɩ ɛ yä wɛzä 'sɩɩ ŋëë 'nɩ a yi dloo. Nyɩkpɔ nyɩkpɔ yi ɔɔ' ‑gbäsɩ 'klä klää, 'nɩ a yi'i ‑lɔɔ të ‑amʋ ‑bhlo. ‑Mä nn' ‑wʋ ‑bhlo ‑bhlü. 'Bäɔ ‑kʋ'ʋ yëku. 33Kä n ‑sonö'anyɩ lä wälɩnɩ 'fɩɩn ‑yä, a ‑yä ‑amʋ 'sɔ kä 'jɛnyɩ‑ nä, a 'kä 'kʋ wɔtɔlɩ 'mnö kʋ. A yi ‑mää 'ylʋzɔɔ nyäkälɩ 'nii. ‑Mä, n yä ‑dʋdʋnʋ kʋʋ' 'päwaa sɩä. Nä, a kään yɩ 'tɛtɩ!

Currently Selected:

Zään 16: god

Highlight

Copy