ZEKHARIAH 13
13
1Khi ni ah cun David tefa hna le Jerusalem khuami hna cu an sualnak le an thurnak vialte tlenghnak caah cerhti pakhat a put lai.
2Khi ni ah cun ram chung khan siasal min kha ka hloh hna lai i an ruat ti hna lai lo, tiah Bawipa nih a ti; profet hna le thlarau thianglo zong kha ram chung cun ka hloh hna lai. 3Cun profet kha an chuah ṭhan ahcun, an nu le an pa hrimhrim hna nih khan an thawh hna lai i, “Bawipa min in ahmaan lomi bia nan chim caah nan nung ti lai lo,” an ti hna lai. Anmah nih bia kha an chim peng ko ahcun, an nu le an pa hrimhrim nih khan, tleng lakin an chunh hna lai. 4Khi ni ah cun profet nih bia an chim tikah langhnak an hmuhmi kha an i zahpi cang lai, cuhleiah mi hlennak ah sahmul hrat angki fual kha an i hruk ti lai lo. 5Annih nih an i thawh lai i, “Kannih cu profet kan si lo, lothlo kan si ko, kan ngakchiat tein atu tiang kan pawcawmnak cu vawlei hin a si,” an ti lai. 6Sihmanhsehlaw pakhatkhat nih, “Na ṭang i a ummi hma hna kha tah zeidah an si kun?” tiah a hal hna lai i cu tikah anih nih, “Mah hihi cu ka hawikom hna inn ah ka hmuhmi hna an si,” tiah a ti lai.
7Mah hihi ralkapbu Bawipa bia
hrimhrim a si:
“Maw vainam, ka tuukhal le
keimah he rian a ṭuan ṭimi
doh awkah i hlau tuah.
Tuukhal kha tu law tuu cu i ṭhek
hna seh, an fale kha ka kut
ka lekhnawh hna lai,” a ti. #Mat 26.31; Mar 14.27
8Mah zong hi Bawipa bia hrimhrim
a si ṭhan:
“Ram chungah hitihin thil a um lai,
Mi kha cheu thum cheu hnih tuk an si
lai i an thi lai,
Cun cheu thum cheu khat cu cuka ah
cun nganh an si lai.
9Cun hi cheu thum cheu khat cu mei
chungah ka kalter hna lai i
ngun an thianh bantukin
ka thianh hna lai i
sui an hneksak bantukin
ka hneksak hna lai.
Khi tikah ka min in thla an cam lai i
keimah hrimhrim nih ka leh
hna lai.
Kei nih, “Annih cu ka mi an si,”
ka ti hna lai i annih nih,
“Bawipa cu kan Pathian a si,”
an ka ti lai.
Currently Selected:
ZEKHARIAH 13: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006