ZEKHARIAH 12
12
Jerusalem Cu Miphun Kip Caah Biaknak Hmun Laifang A Si Lai
1Chimmi bia: Mah hihi Israel kongah Bawipa nih a chimmi bia cu a si, Bawipa cu van kha a samh i vawlei kha a ser i minung chungah thlarau a sertu kha a si. 2Zohhmanh, Jerusalem cu a pawngkam miphun hna caah ritnak hrai ah ka ser, Judah zong kha an kulh chih ve lai i Jerusalem kha an kulh tikah, 3Vawlei cung miphun vialte nih Jerusalem le Judah kha an kulh hna tikah, cu ni ah cun Jerusalem cu aho ca hmanh i ṭhial awkah a rit tukmi lungtum ah ka ser lai i cawi aa zuammi paoh cu anmah tu kha an i hliam lai. 4Khi ni ah cun rangtum vialte kha ka lauter hna lai i an cung i aa citmi kha ka molhter hna lai, Judah kha cu ka zohkhenh lai, sihmanhsehlaw miphun dang rangtum vialte kha cu an mit ka cawtter hna lai, tiah Bawipa nih a ti. 5Khi tikah Judah phun hna nih khan, “Jerusalem khua chung i a ummi hna nih cun ralkapbu Bawipa an Pathian sin khan thazang an hmu,” an ti lai.
6Khi ni ah cun Judah phun hna cu ramlak i meipung bantuk le facang phal a khang dihtu meizik tom bantuk ah ka ser hna lai. Annih nih an pawngkam i a ummi miphun vialte kha, keh he orh he, an khangh dih hna lai i Jerusalem mi tu cu an khua chungah him tein an um lai. 7David tefa sunparnak le Jerusalem khua chung ummi hna sunparnak nih khan Judah sunparnak cu a lonh nakhnga lo, Bawipa nih Judah chungkhar hna kha a luatter hmasa bik hna lai.
8Khi ni ah cun Bawipa nih Jerusalem khuami hna cu phaw a chonkanh hna lai; khi ni ah cun an lak i a der bik kha David tluk a si lai i David tefa hna kha Pathian bantuk an si lai, an hmai i a kalmi Bawipa vanmi tluk an si lai.
9Khi ni ah cun Jerusalem doh awk i a rami miphun vialte hna hrawh awkah khan kaa thawh lai; 10sihmanhsehlaw David ciruang hna le Jerusalem khua i a ummi hna cungah cun zaangfahnak le zawnruahnak thlarau kha ka thlet lai. Khi tikah
An rak ka chunhmi keimah kha
an ka zoh lai i
Mi nih an fa ngeih chunte
an ṭah bang le
an fater an ṭah bangin an ka ṭah lai. #Jhn 19.37; Biat 1.7 #Mat 24.30; Biat 1.7
11Khi ni ah cun Jerusalem khua chung i ṭahnak cu Megiddo nelrawn i a ummi hmun Hadad-rimmon i an ṭahnak tluk khan a ngan lai. 12Ram cu a ṭap lai i innchungkhar hna cu anmah le an innchungkhar ning cio ah an ṭap lai: David innchungkhar cu amahte in a ṭap lai i an nupi hna cu anmahte in an ṭap cio lai; Nathan innchungkhar cu amahte in a ṭap lai i an nupi hna cu anmahte in an ṭap cio lai. 13Levi innchungkhar cu amahte in a ṭap lai i an nupi hna cu anmahte in an ṭap cio lai; 14Shimei innchungkhar cu amahte in a ṭap lai i a nu hna cu anmahte in an ṭap cio lai; a tangmi innchungkhar vialte cu anmahte in an ṭap cio lai i an nupi hna cu anmahte in an ṭap cio lai.
Currently Selected:
ZEKHARIAH 12: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006