JOB 36
36
Elihu Nih Pathian Lianhngannak Kha A Thangṭhat
1Cun Elihu nih khan a peh i:
2“Tlawm tein ka ing rih law
ka hmuhsak lai,
Pathian lei kap in tlawmte chim awk
ka ngei rih.
3A ka Sertu a ding tinak kha ka chim
tikah hin
Ka bia bawmtu hi lamhlat piin
ka va khawmh hna lai.
4Ka chimmi ah hin lih a um lo,
na hmai i a dirmi hi hngalhnak
a ngeimi ka si.
5“Pathian nih a sangmi le a ṭhawngmi
cu a hrawh hna i
Miṭhalo cu thluachuahnak
a pe hna lo.
6Sihmanhsehlaw sifakmi le retheimi
cu an hmuh awk hnga
a simi kha a pek hna i
Harnak a ingmi hna cu an hmuh
awk hnga kha a pek hna, ka ti.
7An bawiṭhutdan cung i a ṭhumi
siangpahrang hna khi
zoh hna hmanh:
Pathian nih lianhngannak
ṭhawnnak a pek hna tikah
an lung a puam.
8Cun na hmuh nolh hna tikah cun
hreng khenh an si i
sal cikcin in khih an si.
9An ziaza a ṭha lomi kha a mawhchiat hna i
An sualnak cu ruamkainak le mi tei
duhnak an si kha a hmuhsak hna.
10An hna chungah ralrinnak bia kha
a pek hna i
An ṭhat lonak lam khan kir ṭhan
awkah a kawh hna.
11A bia an ngaih i a rian an ṭuan ahcun,
An ni hna cu thluachuak in
an hman i an kum hna cu
nuamhnak in an hman.
12Sihmanhsehlaw an ngaih lo ahcun,
vainam in an pam i thihnak tiva
kha an tan.
13Mi lungpuam nih cun an thinhun kha
an chuahhnawh i
Annih kha a ṭem hna tikah bawmhnak
hal an duh lo.
14Tlanval lioah an thi i an nunnak cu
ningzahnak in a dong.
15Hremnak a ingmi hna cu hremnak
an inmi kha hmang in
a chuah hna i,
Vanchiatnak kha hmang in an hna
a awnter hna.
16“Harnak kha nuamhnak in thlen awk
na hmuh tikah, i ralring tuah,
Zeicahtiah na hmaiah thil tampi
hunh na si i,
Cabuai cung i hunmi rawl cu thau in
a khatmi a si;
17Biaceihnak rian na ṭuan lioah
mirumpa rawl kha
khim tein na ei ahcun.
18Zu thawthaw kha a pingah
i hruaiter hna hlah law
Ziknawh kha na biakhiahnak
kawiter hlah.
19Na rumnak cu zeitluk hmanh in
a ngan ah,
cu nih cun zeidah an ṭhathnem lai?
Na dir hmun a sangmi zong nih
zeidah an ṭhathnem lai?
20“Ṭih a nungmi zan ah,
miphun hna cu
an umnak hmun in an loh tikah
na thinphang hlah.
21Ṭhat lonak tuah awkah naa mernak
hnga lo i ralring tuah,
Zeicahtiah cu ruangah cun pei harnak
in hneksak na si cu.
22Pathian cu kan cungah lianhnak in
a um ko,
Amah bantukin ahodah a nganmi
ṭhawnnak a ngei?
23Aho nih dah a lam cu
an ruahchungpiak i
Aho nih dah, na palh, tiah
an ti khawh?
24Mi nih hla in an thangṭhat zungzalmi
a rian cu thangṭhat awkah
va philh hlah.
25Mi vialte nih amah cu an zoh cio,
mi nih lamhla piin an cuanh.
26Zohhmanh, Pathian cu a ngan tuk i
kan hngal kho lo;
A kum zeizat a si kha kan rel khawh
leng a si.
27Tidor tete cu rili in cunglei ah
a hnuh hna i
minmei cu ruah ah a canter;
28Mah cucu van khin ruah in
an rung sur i
minung cungah tam piin an tla.
29Aho tal nih khuadawm an zamning
khi a hngal kho maw?
A khuadawm chung i khuari hna khi
a hngal khotu an um maw?
30Minmei cu ti cungah a zamter hna i
rili hram hna cu a khuh hna.
31Cuticun miphun cu a cawm hna i
rawl tampi a pek hna.
32Ṭek chungah cun mei a khumh i
aa tinhmi kha khen awkah
nawl a pek.
33A thinhun in thlichia kha a thawhter i
Thlichia a ra lio ti hngalhtertu
lamkaltu cu khuari a si.
Currently Selected:
JOB 36: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
