BIACEIHTU 20
20
Benjamin Mi Kha Israel Mi Nih An Tuk Hna
1Cun Israel mi vialte cu Dan in Beersheba tiang, Gilead zong tel chih in an chuak i, mibu cu Bawipa sinah Mizpah ah minung pakhat bantukin an i pum. 2Cun mi vialte haotu, Israel phun vialte haotu hna cu, Pathian mi aa pummi hna chungah cun an hung chuak i vainam putmi ralkap sing li an si. 3(Benjamin mi nih Israel mi hna cu Mizpah ah an hung kal ti kha an theih.) Cun Israel mi nih, “Zeitindah hi ṭhat lonak hi a chuah ning a si, kan chim tuah,” tiah an ti. 4Cun an nawn minu va Levi mi nih khan a leh hna i, “Benjamin ta a simi Gibeah cu, cuka i riah awkah ka nuchun le keimah cu kan phan. 5Cun Gibeah mi hna nih cun an ka chuahhnawh i zan ah ka riahnak inn cu an kulh. Keimah kha thah an ka timh i ka nuchun kha an sual i a thi. 6Cun ka nuchun cu ka lak i ka can i Israel comi ram chung dihlak ah khan ka kuat; zeitintiah Israel chungah fihnung le hawrnak kha an tuah. 7Nannih Israel mi vialte hna nih, ngaihmanh u, nan ruahnak le a ṭha nan tining kha chuah cio tuah u,” tiah a ti hna.
8Cun mi vialte cu minung pakhat bantukin an tho i, “Ahohmanh kan thlam ah kan kal lai lo i ahohmanh kan inn ah kan tlung lai lo. 9Sihmanhsehlaw Gibeah cungah kan tuah laimi cu mah hihi a si: camcawhfung khiah in kan i thim lai i kan hung doh lai i, 10Israel miphun vialte chungin minung za khat ah pahra, thong khat ah za khat, sang khat ah thong khat in kan lak hna lai i mi ca i rawl pechantu an si lai, zeitintiah an rat tikah Benjamin ta a simi Gibeah cu Israel chung i hawrnak sualnak a tuahmi vialte caah khan teirul an cham lai,” tiah an ti. 11Cucaah Israel mi vialte cu lungthin khat tein cu khua doh awkah an i pum.
12Cun Israel miphun hna nih Benjamin phun chung dihlak ah khan mi an thlah hna i, “Nan lak i a chuakmi hi zei ṭhat lonak dah a si? 13Cucaah atu ah kha mi hna, Gibeah i a ummi mi zei ruaram lo hna kha, kan thah hna i ṭhat lonak cu Israel chungin kan thianh naklai, kan pe hna u,” an ti. Sihmanhsehlaw Benjamin mi hna nih cun an unau Israel mi hna bia kha an ngai duh lo. 14Cun Benjamin mi hna cu Israel mi he i tuknak hmun i kal awkah Gibeah i khua hna cun an chuak. 15Cun khi ni ah Benjamin mi hna nih an khua hna chungin vainam pumi an pumhmi hna cu sang hnih le thong ruk an si, Gibeah i a ummi hna nih an thim cikcekmi za sarih hna hleiah khan. 16Mah hi hna vialte lakah hin thim cikcekmi za sarih kehtlak an um; an dihlak in sam zai hmanh a ngan lomi lungherh cheh thiam an si. 17Cun Israel mi nih, Benjamin chim loin, vainam pumi sing li an pumh hna; hi mi vialte cu raltuk thiammi an si dih.
18Israel mi cu an tho i Bethel ah an hung kal i Pathian kha an hal, “Kannih lakah hin ahodah Benjamin doh awkah a kal hmasa bik lai?” an ti. Cun Bawipa nih, “Judah a hung kal hmasa bik lai,” a ti.
19Cun Israel mi cu zingka in an tho i Gibeah kha an riahhnawh. 20Cun Israel mi cu Benjamin doh awkah khan an chuak i, Israel mi nih cun annih kha Gibeah i doh awkah cun ṭan hmun an i serh. 21Benjamin mi hna nih Gibeah chungin an hung chuak i khi ni ah Israel mi cu sang hnih le thong hnih an hrilh hna. 22Sihmanhsehlaw Israel mi cu an i serh ṭhan i hmasa bik ni i an ṭan hmun khuarnak hmun ah khan ṭan hmun an khuar ṭhan. 23Cun Israel mi nih an hung kal i Bawipa hmaiah zanlei tiang an ṭap; “Kan unau Benjamin mi hna he i doh awkah kan hung kal ṭhan lai maw?” ti in Bawipa kha an hal. Cun Bawipa nih, “Hung doh ṭhan hna u,” a ti.
24Cucaah a ni hnihnak ni ah Israel mi nih Benjamin mi cu an fuh ṭhan hna. 25A ni hnihnak ni ah cun Gibeah in Benjamin cu annih kha doh awkah a chuak i Israel mi chungin sang khat le thong riat a hrilh hna; an dihlak in vainam pumi an si. 26Cun Israel mi vialte, ralkap bu cu an ningpi in, an hung kal i Bethel an phan i an ṭap; Bawipa hmaiah an ṭhu i khi ni cu zanlei tiang rawl an ul i Bawipa hmaiah khangh thawinak le daihnak thawinak kha an pekchanh. 27Cun Israel mi nih Bawipa kha an hal i (khi caan lioah Pathian biakamnak kuang cu khika ah a um i 28Aaron fapa Eleazar i fapa Phinehas nih khi caan lioah a hmaiah rian a ṭuan) annih nih, “Kan unau Benjamin mi hna kha doh awkah kan chuak rih lai maw, asiloah kan ngol lai dah?” tiah an ti. Cun Bawipa nih, “Hung kal u; zeitintiah thaizing ah cun annih cu nan kut chungah kan pek hna lai,” a ti.
29Cucaah Israel nih Gibeah velchum in lamhruang attu mi an chiah hna. 30Cun ni thumnak ni ah Israel mi cu Benjamin mi kha doh awkah an hung kal i voi dang bantuk khan Gibeah pawngah cun ṭan hmun an khuar. 31Cun Benjamin mi hna nih mi cu an chuahhnawh hna i khua lengah an va lan; cun voi dang bantuk khan mi cu thah hram an thawk hna, lam hna le ramlak ah Israel mi sawm thum tluk an thah hna. Lam pakhat cu Bethel ah a hung kalmi a si i a dang cu Gibeah ah a kalmi a si. 32Cun Benjamin mi nih, “Hmasa bantukin kan hmaiah an zam dih,” an ti. Sihmanhsehlaw Israel mi nih, “Zam u si law, khua chungin lam ah lem hna u sih,” an ti. 33Cun Israel mi vialte cu an umnak hmun in an chuak i Baal-tamar ah ṭan hmun an khuar; cun lamhruang attu Israel mi hna nih khan Geba nitlaklei i an umnak hmun khan an hung chuak zutmat. 34Israel mi lakin thim cikcekmi sang khat hna nih khan Gibeah cu an chuahhnawh i an i doh cu a fak. Sihmanhsehlaw Benjamin mi hna nih rawknak nih a kan naih ti kha an hngal lo. 35Cun Bawipa nih Benjamin cu Israel hmaiah a tei; Israel mi nih khi ni ah Benjamin mi cu sang hnih thong nga za khat an thah hna. Hi mi hna cu vainam tlai an si dih. 36Cucaah Benjamin mi nih kan sung cang ti kha an hngalh.
Israel mi hna nih Benjamin mi hna hmaiah an i zamter, zeicahtiah Gibeah kha lamhruang in a attu hna kha an i bochan hna. 37Cun lamhruang attu pawl nih cun khulrang in an tho i Gibeah kha an nam; lamhruang attu hna cu an chuak i khua cu vainam in an sam dih. 38Israel mi le lamhruang attu hna nih an rak thimmi hmelchunhnak cu, khuapi chung khan meikhu nganpi an chuahter tikah, 39Israel mi nih raltuknak leiah kir ṭhan awk a si lai ti a si. Benjamin nih cun Israel mi cu sawm thum tluk thah hram an thawk cang; annih nih, “Hmasa bik kan i tuknak bantuk khan, kan hmaiah an sung hrimhrim ṭhan ko,” an ti. 40Sihmanhsehlaw hmelchunhnak cu khuapi chung i meikhu in kai hram a thawk tikah Benjamin mi hna nih an hnulei kha an hei zoh i zohhmanh, khua cu a ning piin meikhu in van ah a kai. 41Cun Israel mi cu an i let i Benjamin mi hna cu vansang au in an um, zeitintiah rawknak nih a kan naih ti kha an hmuh. 42Cucaah Israel mi hna hmaiah cun ramlak leiah khan an zam; sihmanhsehlaw raltuknak nih a phanh ṭhiamṭhiam hna i khua chungin a hung chuakmi hna kha an lakah an i cawh cang i an thah hna. 43Benjamin mi hna cu an sam hna i Nohah in Gibeah nichuahlei ral tiang an dawi hna i an lamh hna. 44Benjamin mi cu sang khat le thong riat an thi, an dihlak in mi ralṭha an si. 45Cun an i mer i ramlak lei Rimmon lungpi leiah khan an zam; lampi ah mi thong nga an thi i Gidom tiangin fak piin dawi an si i mi thong hnih an thi. 46Cucaah khi ni ah Benjamin mi a thimi hna cu vainam pu, sang hnih thong nga an si, an dihlak in mi ralṭha an si. 47Sihmanhsehlaw mi za ruk cu an i mer i ramlak lei Rimmon lungpi leiah khan an zam i Rimmon lungpi ah khan thla li an um. 48Cun Israel mi nih Benjamin mi cu an kirhnawh ṭhan hna i vainam in an sam hna. Mi siseh, saram siseh, an hmuhmi paohpaoh an sam dih hna. Cun an hmuhmi khua vialte zong mei in an duah hna.
Currently Selected:
BIACEIHTU 20: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006