ISAIAH 8
8
Isaiah Nih Fapa Pakhat A Hrin
1 Bawipa nih a ka thawh i, “Ca ṭialnak tlap a nganmi pakhat in i lak law cafang puam pipi in, ‘Maher-shalal-hash-baz’#8.1 Maher-shalal-hash-baz a sullam cu, thil chuhnak le ramhnak rianrang in a ra lai, tinak a si. tiah ṭial. 2Cun tehte caah zumhawktlakmi pahnih, tlangbawi Uriah le Jeberekhiah fapa Zekhariah kha i lak hna,” a ka ti.
3Cu hnu tlawmpal ah ka nupi sinah khan ka va kal i fa a pawi i fapa a hrin. Bawipa nih cun, “A min ah, ‘Maher-shalal-hash-baz’ na sak lai. 4Ngakchiapa nih, ka nu, ka pa, ti a thiam hlanah Damaskas chawva vialte le Samaria hranchaw vialte cu Assiria siangpahrang nih a kalpi dih hna lai,” a ka ti.
Assiria Siangpahrang A Ra Lai
5 Bawipa nih cun a ka chawnh ṭhan i, 6“Hi mi hna nih hin, dai tein a luangmi Shiloah tiva ti kha an duh lo i Rezin le Remaliah fapa hmaiah a ther in an ther caah, 7Bawipa nih Zufrates Tiva tilian cu an cungah a tlunter lai, cucu Assiria siangpahrang le a sunparnak kha an si; an tiluannak kahcham vialte le an titlang vialte kha a phum dih hna lai i 8Judah ram chungah khan tilian bantukin a vung luang lai; cun a liam in a liam lai i hngawng tiang a phan lai; cun aa samhmi a thla nih khan na ram cu a bitkauhnak in a huh dih lai, maw Immanuel,” a ti.
Pathian cu kan sinah a um ko! Aa samhmi a thla in ram cu a huhphenh.
9Nannih miphun vialte hna, ṭihnak in hmunkhat ah i pum tuah u. Vanhramdeng ram hna, ka bia ngai tuah u. Ral doh awkah timh cu i tim ko u, sihmanhsehlaw thinphang in um ṭhiamṭhiam ko u. 10Khua cu khang lengmang ko u, sihmanhsehlaw nan khuakhanmi cu thlua an chuak bal lai lo. Nan duh zat in chim u, sihmanhsehlaw pakpalawng an si ko lai, zeicahtiah Pathian pei kan sinah a um cu.
Bawipa Nih Profet Kha Ralrinnak A Pek
11Mi nih an zulhmi lam kha zulh lo awkah, Bawipa nih a liannganmi a ṭhawnnak in ralrinnak a ka pek. A ka thawh i, 12“Hi mi hna an khuakhannak ah hin i tel hlah, cun an ṭihmi zong hi ṭih hna hlah. #1Pet 3.14-15 13Ralkapbu Bawipa keimah hi a thiangmi ka si kha philh hlah; na ṭih hrimhrim awk cu keimah hi ka si. 14Ṭih a nungmi ka thiannak ruangah hin, mi nih an i chuih i an rilhnak lung bantuk ka si; Judah ram chung le Israel ram chung i a ummi hna le Jerusalem i a ummi hna a foihtu ding rap bantuk ka si. #1Pet 2.8 15Mi tampi an i chuih lai i an ril lai. An tlu lai i an kuai cikcek lai. An i foih lai,” a ti.
Thitlawn A Ṭha Lo
16Pathian nih a ka pekmi bia kha ka zultu hna nih ṭha tein an zohkhenh awk le an i ken awk a si. 17Bawipa nih a mi cu a thuhtak cang hna, sihmanhsehlaw kei nih cun ka zumh i kaa bochan. #Heb 2.13
18Zohhmanh, keimah le Bawipa nih a ka pekmi ka fale hi Zion Tlang i a ummi Ralkapbu Bawipa sinin a rami Israel mi caah hmelchunhnak le chingchiahnak kan si. #Heb 2.13
19Kutṭial zoh thiammi hna le thitlawn thiam hna, a awn a aumi kha, hal hna u, tiah mi nih an in ti hna lai. An in thawh hna lai i, “A donghnak in ti ahcun, mi nih hin thlarau kha pei bia an hal awk hna a si i mithi kha pei a nungmi can ah an tlawn awk hna a si cu,” an ti lai.
20Sihmanhsehlaw nannih nih cun, “Bawipa nih an cawnpiakmi hna kha ngai ko u! Thitlawng bia kha ngai hna hlah u — an chimmi nih zeihmanh an ṭhathnem hna lai lo, tiah nan leh hna lai,” a ti.
Harnak Caan
21Mi cu ram chungah khan hnabei dong le rawlṭam in an vak lai. An rawlṭam le an thinhun in an siangpahrang le an Pathian kha chiat an serh hna lai. Van an zoh lai, 22Vawlei an bih lai, sihmanhsehlaw harnak le muihnak dah ti lo cu zeihmanh an hmu lai lo; cu muihnak cu muihnak ṭihnung a si i cu chungah cun an lut cuahmah ko. Hi harnak caan chung hin luatnak lam an caah zeihmanh a um lai lo.
Currently Selected:
ISAIAH 8: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
