ISAIAH 7

Ahaz Siangpahrang Sinah Cahmi Bia

1Siangpahrang Ahaz nih Judah ram a uk lioah khan raldohnak pakhat a chuak. (Ahaz cu Jotham fapa a si i Jotham cu Uzziah fapa a si.) Siria siangpahrang Rezin le Israel siangpahrang Pekah nih Jerusalem kha an tuk, sihmanhsehlaw an la kho lo. (Pekah cu Remaliah fapa a si.) #2Sia 16.5; 2Cha 28.5-6

2Judah siangpahrang nih Siria ralkap hna cu Israel ram chung kha an phan cang, ti kha a theih tikah, amah le a mi hna cu an thin a phang tuk hringhran i thlitu nih thingkung a hninh bantuk khin an i hnin.

3 Bawipa nih Isaiah cu a thawh i, “Na fapa Shear Jashub#7.3 Shear Jashub sullam cu mi tlawmte lawng an kir ṭhan lai tinak a si. Dal 10.12-22 zong zoh rih. kha i ṭhit law Siangpahrang Ahaz cu hung tong tuah u. Puan taktu pawl rianṭuannak hmun, cunglei tili in ti a rung luannak tidong a donghnak ah khan nan va hmuh lai. 4Amah cu, i ralring peng in lungdai tein um ko, lau hlah, awlokchong in um hlah, nan va ti lai. Rezin Siangpahrang le a mi Siria mi hna thinhunnak le Siangpahrang Pekah thinhunnak cu a mit dengmangmi thingthu bul pahnih khu tluk fang men a si ko. 5Siria ram nih hin Israel ram le a siangpahrang he ṭhurual tlu in Judah ram dohnak khua kha an khan. 6Judah ram cu vung chim i cu ramchung mi hna cu vung lauter i anmah lei i ṭanter i Tabeel fapa kha bawiṭhutdan cung i ṭhutter kha an i tim, nan va ti lai.

7“Sihmanhsehlaw Bawipa keimah hrimhrim nih, hihi cu a si bal lai lo ka ti kha nan va chimh lai. 8Zeicahdah a si bal lai lo? Siria cu Damaskas nakin a ṭhawng deuh lo i Damaskas cu Siangpahrang Rezin nakin a ṭhawng deuh fawn lo. Israel tu cu, kum sawm ruk le kum nga chungah hin a rawk tuk lai caah miphun pakhat ti awk tlak hmanh in a dir kho lai lo. 9Israel cu Samaria khua nakin a ṭhawng deuh lo i Samaria cu Siangpahrang Pekah nakin a ṭhawng deuh fawn lo.

“ ‘Na zumhnak a ṭhawn lo ahcun, na hmun hrimhrim lai lo,’ a ti, tiah hung chim,” a ti.

Immanuel Hmelchunhnak

10 Bawipa nih Ahaz cu bia dang pakhat a cah ṭhan i, 11“Bawipa na Pathian cu hmelchunhnak pakhat in hal tuah, a thuk lei ah mithi khua in a hung chuakmi hmelchunhnak tluk zong thuk ko seh, a sanlei ah vancung in a rung ṭummi tluk zongin sang ko seh, a ti.

12Ahaz nih cun aa thawh i, “Hmelchunhnak cu ka hal lai lo. Bawipa cu hneksak del zong ka duh lo,” tiah a leh.

13Cu tikah Isaiah nih cun aa thawh i, “Siangpahrang David tefa a simipa, ka bia hi ngai tuah. Hi tlukin minung ing na puanter cang pinah hin maw Pathian ing cu na puanter rih lai? 14Atu cu Bawipa hrimhrim nih hmelchunhnak an pek lai. Fa a pawi liomi nu pakhat a um i fapa a hrin lai i a min ah Immanuel#7.14 Immanuel sullam cu Pathian kan sinah a um tinak a si. sak a si lai. #Mat 1.23 15A hung upat i chiaṭha thleidang kho a si tikah a rawl cu cawhnuk le khuai hliti an si lai.#7.15 cawhnuk le khuaihliti hi a vak lengmangmi miphun rawl an si. 16Cu caan a phak hlanah, nangmah an hrocer lengmangmi siangpahrang pahnih hna ram kha chuahtak an si lai.

17“Israel pennak le Judah pennak an i ṭhennak in atu tiangah harnak a tlungmi vialte hna nakin a har deuhmi harnak cu nangmah le na mi hna le siangpahrang innchungkhar dihlak cungah Bawipa nih a tlunter lai — cu a tlunter dingmi cu Assiria siangpahrang kha a si!

18“Cu caan a phak tikah Bawipa nih Izipt mi kha fifik in a kawh hna lai i Nail tiva a vaṭeng a hla bikmi hmun i a ummi tiang khan tho bantukin an ra lai, Assiria mi zong kha a kawh hna lai i khuai bantukin an ra ve lai. 19A thukmi horkuang chung le lungpang chung lungkua vialte kha a khah in an khat lai i hlingbur vialte le saṭil tlonnak ram vialte ram kha a zual in an zual hna lai.

20“Cu caan a phak tikah, Bawipa nih Zufrates tiva ral i a ummi sam mettu pakhat kha a hlan lai i cu sam mettu nih cun nan khahmul le nan lu cung sam le nan takpum cung hmul vialte kha an meh dih hna lai — cu pa cu Assiria siangpahrang kha a si lai!

21“Cu caan a phak tikah lothlopa pakhat nih cawpino pakhat le mehehpi pahnih lawng a ngeih hmanh ah, 22an hnuk kha tam tuk hringhran a chuah lai caah duhdim tein aa za ko lai. Asi, ram chung i a tangmi vialte nih cawhnuk le khuai hliti ei awk an i ngeih dih cio lai.

23“Cu caan a phak tikah, mitsur ruang ruang khat ah a man tangka thong khat a simi ruang, ruang thong khat an umnak lo ṭhaṭha hna kha an bua dih lai i hlingbur le hling le so lawnglawng an khat dih lai. 24Khika ah li le thal aa put lomi cu ahohmanh an kal ngam lai lo. Asi, ram hi a pumpi in hlingbur le hling le so lawnglawng a khat dih lai. 25Rawl an rak cinnak tlang vialte kha hling nih a khuh dih hna lai caah cuka ah cun ahohmanh an kal duh ti lai lo. Caw le tuu tlonnak hmun a si lai,” a ti tiah a ti.

Currently Selected:

ISAIAH 7: HCL06

Highlight

Copy