GENESIS 30

1Rachel nih Jakob fa a hrinpiak khawh lo kha a hmuh tikah a u kha a nahchuah i Jakob cu a thawh i, “Fa ka pe, cu ti a si lo ahcun ka thi lai,” a ti. 2Jakob cu Rachel cungah khan a thin a hung i, “Pathian ai cu ka rawlh kho lo. Fa ngei loin an umtertu cu Pathian pei a si cu,” a ti. 3Rachel nih cun, “Ka salnu Bilhah hi ihpi kun, amah tal nih fa ka hrinpiak seh. Cuticun amah thawngin nu ka cang kho ve lai,” a ti. 4Cuticun a salnu cu a va kha a pek i a va nih cun a ihpi. 5Bilhah cu fa a pawi i Jakob cu fapa a hrinpiak. 6Rachel nih khan, “Pathian nih keimah ṭanh in bia a ka ceihpiak cang. Ka thlacamnak kha a theih i fapa a ka pek,” a ti i cucaah a min cu Dan#30.6 DAN min hi Hebru holh i biaceih ti bia he a aw-chuah an i lo. a sak. 7Rachel salnu Bilhah cu fa a pawi ṭhan i Jakob cu a dang fapa a hrinpiak ṭhan. 8Rachel nih cun, “Ka u he kan i cuh i keimah nih ka tei,” a ti i cucaah a min cu, Naftali#30.8 NAFTALI min hi Hebru holh i cuh ti bia he a aw-chuah an i lo. a sak.

9Leah nih fa ka ngei kho ti lo ti kha a hngalh tikah a salnu Zilpah kha Jakob cu nupi ah a pek. 10Cun Zilpah nih cun Jakob cu fapa a hrinpiak. 11Leah nih cun, “Ka van a ṭha ko,” a ti i cucaah a min cu Gad#30.11 GAD min sullam cu vanṭhat ti a si. a sak. 12Leah salnu Zilpah nih cun Jakob cu fapa a hrinpiak ṭhan i 13Leah nih cun, “Ka vaa lawm hringhran dah! Atu cu nu nih, Lunglawm minu an ka ti lai,” a ti i cucaah a min cu Asher#30.13 ASHER min sullam cu lawmh ti a si. a sak.

14Changvut ṭuan caan ah khin Reuben cu lo ah a va kal i mandarek#30.14 MANDAREK hi aidi a ngeimi ai phun khat fa ngeihter khotu le duhnak chuahter khotu i an ruahmi a si. kha a va hmuh hna i a nu sinah a rak put hna. Rachel nih khan Leah cu, “Na fapa nih a rak phorhmi mandarek kha tlawmpal in ka pe ve,” tiah a ti. 15Leah nih cun, “Ka va na ka chuh hi naa za rih lo maw? Ka fapa mandarek zong lak rih na zalh hi?” a ti. Rachel nih cun, “Na fapa mandarek kha na ka pek ahcun Jakob he tu zan ah na it kho lai,” a ti. 16Lo in zanlei ah Jakob cu a hung tlun tikah Leah nih cun a va don i, “Tu zan cu ka sinah na ih a hau, ka fapa mandarek in kan cawk cang,” a ti. Cucaah cu zan cu a ihpi. 17Pathian nih Leah thlacamnak kha a leh i fa a pawi i Jakob cu fapa panganak a hrinpiak. 18Leah nih cun, “Ka salnu kha ka va ka pek caah Pathian nih laksawng a ka pek,” a ti i cucaah a min ah cun Issakhar#30.18 ISSAKHAR cu laksawng tinak a si. a sak. 19Leah cu fa a pawi ṭhan i Jakob cu fapa paruknak a hrinpiak. 20Aa thawh i, “Pathian nih laksawng ṭha ngaingai a ka pek. Atu cu fapa paruk ka hrinpiak cang caah ka vaa nih a ka khinhhramh cang lai,” a ti i cucaah a min ah cun Zebulun#30.20 ZEBULUN cu Hebru holh i khinhhramh ti bia he a aw-chuah an i lo. a sak. 21Cun fanu a run hrin i a min ah Dinah a sak.

22Cun Pathian nih Rachel kha a vun philh ve lo i a thlacamnak kha a leh i fa ngeih khawhnak a pek. 23Fa a pawi i fapa a hrin. Aa thawh i, “Fa ngeih lo ningzahnak kha Pathian nih a ka lakpiak cang. 24Bawipa nih fa dang zong ka pe ko rih seh,” a ti i a min ah Josef#30.24 Josef ti biafang hi Hebru holh i a ka chap ti le a lak cang ti bia he an awchuah aa khat. a sak.

Jakob le Laban An I Hlennak

25Josef chuah hnu khan Jakob nih Laban cu a thawh i, “Atu cu inn ah ka tlunter cang. 26Kan rianh man i na ka pekmi ka nupi hna le ka fale hna hi ka pe hna law kal cang ning. Ṭha tein na rian kan ṭuanpiak cu nangmah nih na hngalh,” tiah a ti. 27Cun Laban nih Jakob cu a thawh i, “Biachimnak nawl ka pe ve tuah: litin in ka hngalhmi cu, Bawipa nih thluachuah a ka pek hi nangmah thawngin a si. 28Na ṭuan man chim law kan pek lai,” a ti. 29Jakob nih cun, “Zeitindah na rian ka ṭuan le keimah nih ka zohkhenh hna thawngin zeitluk in dah na saṭil an karh cu na hngalh. 30Ka rat hlanah cun na saṭil cu tlawmte lawng an rak si, sihmanhsehlaw atu cu tampi ah an i chuah cang; keimah thawngin Bawipa nih thluachuah cu an pek ko. Atu cu keimah ca kaa ṭuan caan a si ve cang,” a ti.

31Laban nih cun, “Zeidah kan pek lai?” tiah a ti ṭhan i Jakob nih cun, “Ka duhmi cu ṭuan man kha a si lo. Ka chimmi hi na tuah ding ahcun na saṭil kha kan zohpiak rih ko lai. 32Nihin ah na saṭil run chungah khan ka vaa chawk dih lai i tuufa a nak paohpaoh le meheh fa a ṭial paohpaoh le a ṭial a deh in aa dehmi paohpaoh kha a dang ah ka va chiah dih hna lai i cucu ka ṭuan man cu an si lai. 33Hihi a zafangmi thil a si tiah ka ruah. Hmailei ah ka din le din lo cu fawi tein na hmuh khawh ko lai. Ka ṭuan man kha na rak zoh hna tikah, ka meheh hna lakah a ṭial lomi le a ṭialning a deh in aa dehmi a si lomi le tuufa a nak lomi na hmuh hna ahcun, cucu a fir in firmi an si ti kha na hngalh lai,” a ti. 34Cun Laban nih khan, “A ṭha na chimning cun kan tuah lai,” tiah a leh. 35Sihmanhsehlaw cu ni ah cun Laban nih khan, mehehtum a ṭialmi vialte le a deh in aa dehmi vialte, mehehpi a ṭialmi vialte le a deh in aa dehmi vialte, an pum cungah rannak a ngeimi vialte kha a dang in a chiah dih hna i tuu a nakmi zong kha a dang in a chiah dih hna i a fapale kha a khalhter hna.

36Cun cu run cu Jakob umnak in a hlat khawh chung ni thum lamkal ah a va chiah hna i a tangmi cu Jakob nih a khalh hna.

37Jakob nih cun aa thawh ve i poplar thing le almond thing le fahia thing a hringmi nge kha aa lak hna i an hawng a hlih hna i cucaah cun a rang in an ṭial. 38Hi thing nge hna hi saṭil tidinnak kuang hmaiah khan a chiah hna. Cuka i a chiah hna cu saṭil cu tidin awk i an rat ah khan an i kaih tawn caah a si. 39Saṭil nih thing nge chiahmi hna hmai i an i kaih caah cun a phei in a ṭialmi le ṭial dip in a ṭialmi le ṭial hrawl in a ṭialmi kha an hrin hna. 40Jakob nih tuu kha a dang tein a chiah hna i Laban saṭil run chung i a ṭialmi le a nakmi hna sinah khan a tlonter hna. Cuticun Jakob nih cun amah saṭil run cu aa ser ve i Laban saṭil run he khan a fonh hna lo. 41Saṭil lak i a ṭhawngṭhawng pawl kha an phol tikah tidinnak kuang ah khan an hmaiah cun fung kha a chiah hna i cuticun fung ṭial lakah khan a kaihter hna. 42Sihmanhsehlaw a derthawm pawl an phol ah cun an hmaiah fung kha a chia hna lo. Cucaah a derthawm pawl cu Laban ta an si i a ṭhawng pawl cu Jakob ta an si. 43Khulrang in a rum ko. Saṭil run tampi le sal le kalauk le laa kha a ngeih hna.

Currently Selected:

GENESIS 30: HCL06

Highlight

Copy