GENESIS 31

Laban Sinin Jakob A Zaam

1Laban fapa hna nih, “Kan pa ngeihmi vialte Jakob nih aa lak dih cang. A chawva vialte cu kan pa ta in aa lakmi an si,” tiah an ti thawng kha a theih. 2Cun Laban zong nih hmasa i a rak umtuning bantuk khan um ti loin a umtuning cu aa dang cang ti zong kha a hmuh. 3Cun Bawipa nih khan, “Na pupa hna le na rualchan hna ram ah khan kir cang. Na sinah ka um lai,” a ti.

4Cucaah Jakob nih Rachel le Leah cu bia a hei cah hna i a saṭil run an tlonnak pil ah khan ka tong hna seh a ti. 5Annih cu a thawh hna i, “Nan pa umtuning hi hmasa i ka cung i a umtuning bantuk kha a si ti lo; sihmanhsehlaw ka pa Pathian nih cun a ka umpi ko. 6Ka thazang a dih-umnak in nan pa ca i rian ka ṭuan cu nan pahnih in nan hngalh. 7Asinain a ka hlen i ka hmuh awk hnga kha voi hra a ka hlen. Sihmanhsehlaw ka cung i ṭhat lonak tuah cu Pathian nih a onh lo. 8Laban nih, ‘Meheh lak i a ṭial paoh na rianṭuan man ah si hna seh,’ a ti ah, saṭil run vialte nih a ṭial lawng tein fa an hrin. ‘Ṭial hrawl in a ṭialmi meheh cu na rianṭuan man ah si hna seh,’ a ti ah saṭil run vialte nih ṭial hrawl lawng tein fa an hrin. 9Pathian nih saṭil run tampi kha nan pa sinin a lak hna i keimah a ka pek.

10“Saṭil phol caan ah mang ka manh i ka mang ah cun a kaihtu hna meheh tum kha ṭial hrawl in a ṭialmi le, ṭial dip in a ṭialmi le a deh in aa dehmi an si kha ka hmuh. 11Cu ka mang ah cun vancungmi nih a ka thawh i, ‘Jakob,’ a ka ti i, kei nih, ‘Hawi,’ ka ti. 12Cun, ‘Zohhmanh, a kaihtu hna mehehtum vialte khi a ṭial le ṭial hrawl in a ṭialmi le a deh in aa dehmi an si khih. Hi bantukin thil ka siternak cu Laban nih na cung i a tuahmi vialte kha ka hmuh caah a si. 13Kei cu Bethel khua i na sin i a langmi Pathian kha ka si, Bethel khua cu rolung pakhat chiti na toih i keimah sinah biakamnak na sernak khua kha a si. Cucaah atu cu i tim law na chuahkehnak ram i kal awkah hi ram hin chuak tuah’ a ka ti,” tiah a ti hna. #Gen 28.18-22

14Rachel le Leah nih cun, “Kan pa sinin kan co hnga dingmi thil zeihmanh a um ti lo. 15Kannih cu ramdang mi in pei a kan zoh ko cu. A kan zuar i kan man a hmuhmi vialte cu a hman dih. 16Pathian nih kan pa sinin a lakmi chawva vialte cu kanmah le kan fale ta a si ko cang. Pathian nih an fialning paoh in tuah ko,” tiah an leh.

17-18Cucaah Kanaan ram i a ummi a pa sin kir awkah khan Jakob cu aa tim. A fale hna le a nupi hna kha kalauk cungah a chuan hna i Mesopotamia ram i a ngeihmi chawva vialte he a saṭil run vialte cu a hmaiah a kalter chung hna. 19Laban cu a tuu hmul meh ah khan a kal i a um lo karah a pa ta a simi an chungkhar pathian hna kha Rachel nih a rak fir hna. 20Jakob nih Aramean mi Laban cu a hlen i a kal lai kha a chim lo. 21A ngeihmi thil vialte kha aa lak i a zaam. A chuak i Zufrates tiva kha a tan i Gilead Tlanglei kha a fuh.

Laban Nih Jakob A Dawi

22Ni thum hnuah Jakob a zaam ti kha Laban cu an chimh. 23A mi kha aa kalpi hna i Jakob cu an dawi, ni sarih hnuah Gilead Tlang ah a phanh. 24Cu zan ah cun Aramean mi Laban sinah khan Pathian cu mang in a ra i, “Jakob sinah hronak bia na chim nakhnga lo i ralring,” a ti. 25Jakob cu tlang ah khan a rak riak i Laban nih cun a hun phanh. Laban zong cu Gilead Tlang ah cun a riak ve.

26Laban nih Jakob cu a thawh i, “Zeicahdah na ka hlen i ka fanule cu ral tlaihmi bangin naa kalpi hna? 27Zeicahdah na ka hlen i keimah chimh lo tein na kal? Rak ka chim law cu lunglawmhnak le hla le tingtang le thonglawi he ka rak in thlah hnga lo maw. 28Ka tu tete hna le ka fanule hmanh, dam tein vaa kal cang kun u tiin a hnamh hmanh na ka hnamhter hna lo. Hi na tuahmi ah hin na va hrut hringhran dah! 29Na cungah hin harnak ka duh ahcun ka tlunter khawh ko. Asinain zahan ah na pa Pathian nih, ‘Jakob sinah hronak bia na chim nakhnga lo i ralring,’ tiah a ka ti. 30Inn tlun naa ngaih tuk cang caah na kal ti cu ka hngalh, asinain zeicahdah ka pathian kha naa fir hna?” a ti.

31Jakob nih cun, “Ka thin a phannak cu na fanu hna kha hramhram in na ka chuh sual hna lai ti ka ruah caah a si. 32Cun hika i a ummi aho sin hmanh ah na pathian cu na hmuh hna ahcun, cu pa cu thah a si lai. Kan mi hna hmuh hngan te ah hin, na ta a simi paoh cu kawl law i lak hna,” tiah a leh. Rachel nih a fir hna kha Jakob nih a hngal lo.

33Laban cu Jakob thlam chungah khan a lut i a kawl; cun Leah thlam chungah khan a lut, cun an salnu pahnih hna thlam chungah khan a lut, sihmanhsehlaw a pathian cu a hmu hna lo. Cun Rachel thlam chungah khan a lut. 34Rachel nih khan an innchungkhar pathian kha rak la hna kaw cucaah cun kalauk kengdan chungah a chiah hna i an cungin a ṭhut danh hna. Laban nih cun thlam cu a kawl dih sihmanhsehlaw a hmu hna lo. 35Rachel nih a pa cu a thawh i, “Bawipa, na hmai i ka dir khawh lo caah hin ka cungah na thin hung hlah, nuphung ka hngalh lio a si caah a si,” a ti. Laban nih cun a kawl len hna nain a innchungkhar pathian tete cu a hmu kho hna lo.

36Cun Jakob cu a thin a pok cang i Laban cu, “Zei sualnak ko dah ka tuah i zei phung ko dah ka buar i hiti i na ka kawl le na ka suat? 37Ka ngeihmi thil vialte cu na thlok dih cikcek hna, na innchungkhar thil a simi zeital na hmu hna maw? Na mi hna le ka mi hna hmaiah hin chia law, ahodah a ding, ahodah a ding lo, kan ceih hna seh. 38Na sinah kum kul ka um i na tuu nih si hna seh na meheh nih si hna seh fa an hrulh bal lo, na tuurun chungin na tuukawng zong ka ei bal hna lo. 39Sa nih tuu pakhat khat a seh tikah, keimah palh ruangah a si lo, tiin a ruak cu na hmuh awkah na sinah ka ratpi bal lo, keimah nih ka liam ko. Chun i firmi siseh zan i firmi siseh na liam hna lai na ka ti. 40Chun ah nilin voi tampi ka in i zan ah khuasik voi tampi ka in. Kaa hngilh khawh lo caan voi tampi a um. 41Cuticun na sin i kum kul ka um chung kha a si zungzal ko. Na fanu pahnih hna caah kum hleili kan rianh i na saṭil run hna caah kum ruk kan rianh. Cu na hmanh cun ka hmuh hnga ding ka ṭuan man kha voi hra te na ka thlen. 42Ka pa Pathian Abraham Pathian, Isak nih a biakmi Pathian nih khan rak ka umpi hlah seh law kut ro in na ka kalter ko hnga. Asinain Pathian nih cun harnak ka inmi le ka rianṭuanmi kha a hmuh i zahan ah bia a kan ceih cang,” a ti.

Jakob le Laban Biakamnak

43Laban nih Jakob cu a leh ve i, “Ka fanu hna hi keimah ta an si, ngakchia hna hi keimah ta an si, saṭil run hna hi keimah ta an si. Na hmuhmi vialte hi keimah ta an si dih. Asinain atu cu ka fanu hna le an fale hna caah zeidah ka tuah khawhmi a um? 44Biakamnak tu ser u si law cu bia kan i kammi kan lung a kan pem tawntu ah lungpumh pakhat ser u sih,” a ti.

45Cun Jakob nih philh lonak lung pakhat a bunh i 46a mi kha lung va khawm u a ti hna i an va khawmh i a hram ah cun an pumh hna. Cun lungpumh hramah cun rawl an ei. 47Laban nih khan cu lungpumh cu Jegar-sahadutha#31.47: ARAMAIK holh a si i, hngalh ṭhantertu lungpumh ti a si. tiah min a sak i Jakob nih cun Galeed tiah min a sak. 48Laban nih cun, “Hi lungpumh hi nangmah ca le keimah caah hngalh ṭhantertu si seh,” a ti. Cu ruangah cun cu hmun Galeed#31.48: HEBRU hloh a si i hngalh ṭhantertu lungpumh ti a si. an tinak cu a si. 49Cun Laban ṭhiamṭhiam nih cun, “A dangdang i kan um tikah Pathian nih kan zohkhenh ciocio seh,” a ti fawn. Cucaah cu hmun cu Mizpah #31.49: MIZPAH ti hi Hebru holh i vun zohnak hmun ti biafang he an aw-chuah aa lo. tiah ti a si. 50Laban nih cun aa thawh ṭhan i, “Ka fanule hi ṭhaṭhilo in na tuah hna ah siseh, nu dang na ṭhit hna ah siseh, keimah nih cun ka hngal lai lo nain Pathian nih a run kan zoh ko kha philh hlah,” a ti. 51Cun Laban nih Jakob cu, “Hi hna hi kan karlak i ka pumhmi hna lung cu an si i hihi philh lonak lung cu a si. 52Hi lungpumh le hi philh lonak lung hi hngalhter ṭhantu an si. Nangmah doh awkah hi lungpumh hi ka lonh lai lo i nang zong nih keimah doh awkah hi lungpumh le hi philh lonak lungphun hi na lonh ve lai lo. 53Abraham Pathian le Nahor Pathian cu kan karlak biaceihtu si seh,” a ti. Cun Jakob nih khan a pa Isak nih a biakmi Pathian min in biakamnak a tuah. 54Sa pakhat a thah i tlang cungah cun raithawinak ah a pek i a mi hna kha rawl ei awkah cun a sawm hna. An ei dih hnuah cu zan cu tlang ah cun an riak 55A thaizing cu zingka tein Laban nih khan a tu tete hna le a fanu hna cu dam tein vaa kal cang u tiin a hnamh hna i aa thawh i inn leiah a kir.

Currently Selected:

GENESIS 31: HCL06

Highlight

Copy