EZRA 4
4
Ral Nih Rian Kha An Ngolter Hna
1Judah mi le Benjamin mi an ral hna nih, saltang kir hna nih Bawipa, Israel Pathian inn kha an sa, ti an theih tikah, 2Zerubbabel le pale innchungkhar lu a si ciomi kha an fuh hna i annih cu an thawh hna i, “Kan in sakpi hna lai; zeicahtiah nan Pathian cu nanmah bantukin kannih zong nih kan biak i Assiria siangpahrang Esarhaddon nih hika ah a kan ratpi thawk in atu tiang Pathian sinah cun rai kan thawi ve ko”, tiah an ti. #2Sia 17.24-41 3Sihmanhsehlaw Zerubbabel, Jeshua le Israel mi lak i pale innchungkhar lu cio hna nih khan, “Kan Pathian ca i inn saknak kongah nan i tel ve nakding lam a um lo; sihmanhsehlaw Persia siangpahrang Sairas nih nawl a kan pek bangin, kanmah lawng nih, Bawipa, Israel Pathian ca inn cu kan sak ko lai,” tiah an ti hna.
4Khi tikah cu ram mi hna nih cun Judah mi cu an tha an dorhter hna i inn sak cu an ṭihter hna, 5cun Persia siangpahrang Sairas nun chung vialte, Persia siangpahrang Darius a bawi tiangin, an i tinhmi cu a pelh khawh nakhnga annih nih fimchimtu kha an i roih hna.
6Cun Ahasuerus pen chung, pen aa domh kum ah khin, Judah le Jerusalem i a ummi hna sual puhnak ah ca an ṭial. #Est 1.1
7Cun Artazaksis chan ah Bishlam le Mithredath le Tabeel le an hawikom hna nih Persia siangpahrang Artazaksis sinah cun ca an ṭial; ca cu Aramaik holh in an ṭial i an leh. 8Ralbawi Rehum le caṭialtu Shimshai nih Artazaksis siangpahrang sinah cun Jerusalem khua kongah a tanglei bang hin ca an ṭial — 9ralbawi Rehum, caṭialtu Shimshai le an hawikom hna, biaceihtu hna, uktu bawi hna, bawi hna, Persia mi hna, Erek mi hna, Babilon mi hna, Susa mi hna, cu hna cu Elam mi an si, 10cun a ngan i a ṭhami Osnappar nih Samaria ram chung khua hna le Tiva Ral ram a tangmi chung i a kalpi hna i a umtermi miphun hna nih khan ca cu an ṭial i 11mah hihi an kuatmi ca a khawpi cu a si — “Artazaksis siangpahrang sinah: Tiva Ral ram i a ummi na sal hna nih na kut kan in tlaih. 12Nangmah sinin kan sinah a rami Judah mi hna kha Jerusalem ah an kal tiah siangpahrang nih rak hngal tuah. Ral thawh hmangmi le khua ṭhalo a simi kha an remh ṭhan i a kulhnak vampang hna cu an lim pah cang i a hram cu an remh lio. 13Hi khua hi an remh ṭhan i a kulhnak vampang cu an lim hna ahcun, ngunkhuai le thil ngeih man le lam hman man kha an pe duh lai lo i siangpahrang tangka hmuhnak kha an donhkhanh lai ti kha siangpahrang nih rak hngal ko seh. 14Kannih cu siangpahrang inn cite a eimi kan si i siangpahrang nih zeirellonak a hmuh ding cu kannih nih hmuh kan duh lo caah, siangpahrang cu ca kan in kuat i kan in thanh, 15na pupa hna cazin khumhnak cauk chung kha rak kawl u law, cazin khumhnak cauk chungah cun hi khua hi hlanlio piin ralthawh hmangmi khua, siangpahrang le ram ca i intuarnak petu, a chung i ral thawhnak tuah tawnnak a si kha na hmuh lai. Cucaah cun pei hi khua cu hrawh a rak si cu. 16Hi khua hi remh ṭhan a si i a kulhnak vampang hna kha lim an si ahcun, Tiva Ral ram chungah hin ram na ngei ti lai lo ti kha siangpahrang cu kan in hngalhter,” an ti.
17Cun siangpahrang nih cun lehnak ca a kuat hna i, “Ralbawi Rehum le caṭialtu Shimshai le an hawikom Samaria le Tiva Ral ram i a ummi hna, nan kut kan tlaih hna. 18Cun ca nan kan kuatmi kha ka hmaika ah fiang tein rel a si. 19Cun nawl ka pek hna i an kawl i, hlanlio piin hi khua hi siangpahrang hna doh awkah ral a tho i a chungah hin dohnak le tuknak khuakhan a si tawn ti kha hmuh a si. 20Cun Tiva Ral ram a ning piin a rak uk i, ngunkhuai, thil ngeih man le lam hman man an rak pekmi hna siangpahrang ṭhawngṭhawng kha Jerusalem uktu hi an rak si tawn. 21Cucaah cun keimah nih nawlbia ka chuah hlantiang, hi mi hna hi ngolter an si i khua cu remh ṭhan a si nakhnga lo, nawlbia chuah tuah u. 22Cun hi thil kongah hin thluarthlap in nan um nakhnga lo i ralring tuah u; zeicahdah siangpahrang cu harnak pek awkah rawhnak cu a ṭhan lai?” tiah a ti.
23Siangpahrang Artazaksis cakuat khawpi cu Rehum le caṭialtu Shimshai le an hawikom hna hmaiah khan rel a si tikah, Jerusalem i a ummi Judah mi sinah khan khulrang in an va kal i zaang-ennak le thazang in an ngolter hna. 24Cucaah Bawipa inn Jerusalem i a ummi i an ṭuannak cu ngol a si; cun Persia siangpahrang Darius a bawi kum hnihnak tiang ngol a si. #Hag 1.1; Zek 1.1
Currently Selected:
EZRA 4: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
