EZRA 3
3
Biaknak An Tuah Ṭhan
1Thla sarihnak thla a hung chuah i Israel mi hna cu an khua ah an um tikah, mi cu Jerusalem ah mi pakhat bantukin an i pum. 2Khi tikah Jozadak fapa Jeshua cu a tlangbawi hawi hna he, cun Shealtiel fapa Zerubbabel cu a phun hawi hna he, an tho i, Pathian mi Moses cauk chungah aa ṭial bangin, a cung i khangh thawinak pekchanh awkah Israel Pathian i a biakṭheng cu an ser. #Exo 27.1 3Cun an pawngkam ram mi hna ruang ah cun an cungah ṭihnak a um caah, annih nih biakṭheng cu a hmun ah khan an chiah i a cungah cun Bawipa sinah khangh thawinak zinglei he zanlei he an pekchanh. #Nam 28.1-8 4Aa ṭial bangin deu puai cu an tuah i, a ni cio nih a herhning in a phunglam bantuk khan ni fate khangh thawinak cu, cu zat in pekchanh awk a si lai tining khan an pekchanh, #Nam 29.12-38 5cun cu hnuah cun pekchanh camcinmi khangh thawinak, thla thar i pekchanhnak le Bawipa ca i caan ngei in tuahmi puai hna i pekchanhnak le mah lungtho tein Bawipa sinah pekchanhmi thil hna kha an pekchanh hna. #Nam 28.11—29.39 6Thla sarihnak thla, a ni khat ni thawk in Bawipa sin i khangh thawinak pekchanh cu hram an thawk. Sihmanhsehlaw Bawipa biakinn hram cu an bunh rih lo. 7Cucaah lung lei zungthiam hna le lehtama hna kha phaisa an pek hna i, Persia siangpahrang Sairas nih a onh hna ningin, sidar thing kha Lebanon tlang in rili ah, Joppa khua ah, ratpi awkah, Sidon mi le Tair mi hna cu rawl le din awk le chiti kha an pek hna.
Biakinn Hramlung An Bunh
8Jerusalem Pathian inn ah a ummi ah an rat a kum hnihnak, a thla hnihnak thla ah, Shealtiel fapa Zerubbabel le Jozadak fapa Jeshua nih an unau tlangbawi hna le Levi mi hna, sal taannak chungin Jerusalem ah a ra cangmi vialte hna he khan, hramthawknak an tuah. Levi mi cu, kum kul ri in a cunglei kha Bawipa inn rianṭuannak i zohkhenhtu ah an thiah hna. 9Cun Jeshua nih a fapa hna le a rualchan hna he, Kadmiel nih a fapa hna Judah fapa hna he cun, Pathian inn chung i rianṭuantu hna cu, Henadad fapa hna le Levi mi hna le an fapa hna le an rualchan hna he tiah an zohkhenh hna.
10Cun inn satu hna nih Bawipa biaknak inn hram kha an bunh tikah, Israel siangpahrang David lam hmuhsaknak ningin, Bawipa cu thangṭhat awkah, tlangbawi hna kha an thilthuam in an i fam i muko he an hung chuak, cun Levi mi hna, Asaf fapa hna kha an sumsel he an hung chuak; #1Cha 25.1 11cun annih nih Bawipa cu an thangṭhat i an lawmh i,
“Bawipa sin i lunglawmhnak chim hi a ṭha;
Zeitintiah a fekmi a dawtnak cu Israel
leiah zungzal in a hmun,”
tiin an i sak tonh. Bawipa inn hram cu bunh a si caah mi vialte nih Bawipa cu an thangṭhat tikah fak piin an au. #1Cha 16.34; 2Cha 5.13; 7.3; Slm 100.5; 106.1; 107.1; 118.1; 136.1; Jer 33.11 12Sihmanhsehlaw tlangbawi tampi hna le Levi mi tampi hna le pale innchungkhar lu a si ciomi tampi hna, tar pawl hmasa inn a rak hmutu hna kha cu, inn hram bunh an hmuh tikah khan, mi tampi cu lunglawm in fak piin an au nain, annih cu fak piin an ṭap i, 13cucaah lunglawmhnak au thawng le mi an ṭahnak thawng cu mi nih an thleidang kho lo; zeicahtiah mi cu fak piin an au i an au thawng cu lamhlat piin aa thei.
Currently Selected:
EZRA 3: HCL06
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006