EXODUS 16

Manna le Nimte

1Israel mi vialte cu an dihlak khan Elim cun an i thawh i Izipt in an chuah hnu thla hnihnak thla,#16.1 thla hnihnak thla cu April thla canceo in May canceo tiang hrawng hi a si. a ni hleinga ni ah Sin ramcar kha an phan. Sin cu Elim le Sinai kar i a ummi a si. 2Ramcar chungah cun an dihlak in Moses le Aaron cungah khan an zai i, 3“Bawipa nih Izipt ram ah khan rak kan that lawlaw seh law kan duh deuh hnga. Izipt ram ah khan cun sa um hram ah khan kan ṭhu i kan duh zat in rawl kan ei. Sihmanhsehlaw atu cu hi ramcar chungah hin nan kan chuahpi i rawlṭam in kan thi dih cang lai,” an ti.

4 Bawipa nih Moses cu, “Nan dihlak caah van in rawl ka surter lai. Ni fate in nan chuahhnawh lai i cu ni ca i aa za dingin nan char lai. Kan cawnpiakmi hna kha nan zul maw zul lo ti cu hi ning hin kan hneksak khawh hna lai. #Jhn 6.31 5Ni ruk ni ah cun voi dang i nan char tawnmi a let hnih in nan char lai i nan chuan lai,” a ti. 6Cucaah Moses le Aaron nih Israel mi vialte cu, “Zanlei ah Izipt ram in an chuahpitu hna kha Bawipa a si cu nan hngalh lai i 7zinglei ah Bawipa sunparnak kha nan hmuh lai. Amah cung i nan phunhrannak kha a theih. Asi, nan phunhran kha amah cung i nan phunhran a si, zeicahtiah kannih cu phunhranhnawh awk tlak kan si ṭung lo,” an ti hna. 8Cun Moses nih aa thawh i, “Zanlei ah ei awk sa an petu hna le zinglei ah nan duh tawk in ei awk rawl an petu hna cu Bawipa a si lai, zeicahtiah a cung i nan phunnak le nan zainak liangluang kha a theih. Nan kan zaihnawh len ko cu, zaihnawh awk tlak kan si maw? Nan kan zaihnawh cu Bawipa cung i nan zai pei a si cu,” a ti hna.

9Moses nih Aaron cu, “Mi zapi kha, ‘Bawipa nih nan phunzainak kha a theih caah ra u law Bawipa hmaiah cun ra dir u,’ ti hna,” tiah a ti. 10Aaron nih mi zapi cu bia a chimh lio hna ah ramcar lei kha an hoih i cu lioah cun khulrang in Bawipa sunparnak cu vandawm in a rung lang. 11Bawipa nih Moses cu a thawh i, 12“Israel mi hna an phunzainak cu ka theih cang, cucaah, ‘Pa fa hmelpalh ah ei awk sa nan hmuh lai i zinglei ah nan duh zat in rawl nan hmuh lai. Cun Bawipa cu nan Pathian ka si kha nan hngalh lai, a ti,’ tiah chim hna,” a ti.

13Zanlei ah nimte an ra ciammam i an riahnak hmun kha an khat dih, cun zinglei ah an riahnak hmun velchum ah cun dap a um. 14Dap kha a ṭian tikah thetse ram vawlei cungah cun zeilo a pan dirdiar tete khi an um, vawlei i a tlami hawhra pan tete bantuk khi an si. 15Israel mi nih an hmuh tikah zei a si ti awk kha an hngal lo i pakhat le pakhat cu, “Zeidah a si?” tiah an i hal. Annih cu Moses nih khan, “Hihi Bawipa nih nan ei awk i an pekmi hna rawl a si. #1Kor 10.3 16Bawipa nih, nan i zat awk tawk cio in nan char lai, pakhat caah omer pakhat#16.16 omer pakhat cu khiat khat tluk a si. tluk cio in nan char lai. Cun mahle thlam chung i khua a sami dihlak ca cio khan char a si lai, a ti,” tiah a chimh hna.

17A chimhning hna cun Israel mi nih an tuah, a cheu nih tam deuh in an char, a cheu nih tlawm deuh in an char. 18Asinain an tah tikah tam deuh a charmi kha tam tuk an ngei hlei lo i tlawm deuh a charmi kha tlawm tuk an ngei hlei lo. An charmi kha an ca i aa za ciomi a si. #2Kor 8.15 19Moses nih cun, “Ahohmanh nih zinglei tiang nan i chiah lai lo,” a ti hna. 20Asinain a cheu nih cun Moses bia kha an ngai lo i a cheuchum kha a thaizing tiang an i chiah. A thaizing ah cun tholung an khat dih i an rawk dih. Moses cu an cungah khan a thin a hung. 21Zing fate in an char hna i anmahle an i zat awk tawk cio khan an char hna, ni a hung linh tikah cun an ti dih.

22Ni ruk ni ah cun rawl cu, voi dang i an char tawnmi a let hnih in an char, pakhat caah omer pahnih cio ah an char. Israel mi hruaitu vialte hna kha Moses sinah cun an ra i cu kong cu an ra chimh. 23Cun Moses nih a thawh hna i, “Bawipa nawl pekmi cu hihi a si: ‘Thaizing cu dinh ni, dinh ni zarh, Bawipa sin i pekchanhmi ni a si. Cucaah rawh nan duhmi kha atu ah raw u law chuan nan duhmi kha atu ah chuang u; a taangmi kha ngaan u law zinglei tiang ṭha tein chia u,’ a ti,” tiah a chimh hna. #Exo 20.8-11 24Moses nih nawl a pek hna bangin a taangmi cu a thaizing tiang an chiah i a thu lo, a chungah tholung zeihmanh a um lo. 25Moses nih cun a thawh hna i, “Nihin cu hihi ei u, zeicahtiah nihin cu dinh ni, Bawipa sin i pekchanhmi ni a si i lo lakah rawl zeihmanh nan hmu lai lo. 26Ni ruk chung nan char hna lai, sihmanhsehlaw ni sarih ni ah cun dinh ni a si caah, zeihmanh a um lai lo,” tiah a ti hna. 27Ni sarih ni ah cun micheu cu rawl char awkah an va kal i asinain zeihmanh an hmu lo. 28Cu tikah Bawipa nih khan Moses cu a thawh i, “Zei can riamruam dah ka nawlbia le ka phunglam cu zul duh loin nan um lai? 29Dinh ni an petu hna cu Bawipa ka si kha philh hlah u, dinh ni a si ruangah cun pei ni ruk ni ah ni hnih ca za dingin rawl kan pek hna cu. Nan umnak hmun cio ah nan um awk a si, ahohmanh nan inn in nan chuak lai lo,” a ti. 30Cucaah cu ni ah cun mi cu rian an ṭuan lo.

31Israel mi nih cu rawl cu a min ah manna#16.31 manna ti holh fang hi Hebru holh i zeidah ti bia fang he a awchuah aa lo. an sak. Koriander mu bantuk a si, a rang i khuaihliti cawhmi changper bantukin a thlum. #Nam 11.7-8 32Moses nih cun, “Bawipa nih, ‘Bawm pakhat chungah sanh u law nan tefa hna chan tiangin chia hna u, cun annih nih Izipt ram in kan chuahpi hna i ramcar chung i nan vah lioah zei rawl in dah kan cawm hna ti kha an hmuh lai,’ a ti,” tiah a ti. 33Moses nih Aaron kha a thawh i, “Um pakhat in i lak law a chungah manna kha khiat khat in chia, cun na tefa hna hmuh awkah Bawipa hmaiah khan cu um cu na chiah lai,” a ti. #Heb 9.4 34Bawipa nih Moses a fial bang khan, him tein a um khawh nakhnga, biakamnak kuang hmaiah khan a chiah. 35Israel mi nih manna cu kum sawm li an ei, mi umnak ram an phak tiang cu manna cu an ei; Kanaan ramri an phak tiang khan manna cu an ei. #Jos 5.12 36(Omer pakhat cu efah cheu hra cheu khat a si.)

Currently Selected:

EXODUS 16: HCL06

Highlight

Copy