2 SAMUEL 5
5
David Cu Israel Mi Siangpahrang Ah An Ser
(1Cha 11.1-3)
1Cun Israel phun vialte kha David sinah Hebron ah an ra i, “Zohhmanh, kannih cu na ruh le na sa kan si, 2kan hnulei caan, Saul kan siangpahrang a si lioah khan, Israel mi a chuahpitu le a luhpitu cu nangmah na si; cun Bawipa nih nangmah cu, ‘Nangmah cu ka mi Israel mi hna tuukhal na si lai i Israel mi hna bawi na si lai,’ an timi kha na si,” tiah an ti. 3Cucaah Israel upa vialte cu siangpahrang sinah cun Hebron ah khan an ra i Siangpahrang David nih Bawipa hmaiah Hebron ah khan anmah he biakamnak a ser i annih nih David cu Israel mi cung i siangpahrang ah chiti an thuh. 4David cu pen hram a thawk tikah kum sawm thum a si i kum sawm li chung a pen. #1Sia 2.11; 1Cha 3.4; 29.27 5Hebron ah Judah mi kha kum sarih le thla ruk a pen hna; cun Jerusalem ah Israel mi vialte le Judah mi vialte kha kum sawm thum le kum thum a pen hna.
David Nih Zion A Lak
(1Cha 11.4-9)
6Cun siangpahrang le a mi hna cu Jebus mi doh awkah Jerusalem ah an kal; cu hna cu cuka ram i a ummi an si i David kha, “Hika ah hin na lut lai lo, mitcaw le kebei hmanh nih an in kham khawh lai,” tiah a rak titu kha an si. Annih nih, David cu hika ah a lut kho lai lo, tiah an ruah. #Jos 15.63; Biac 1.21 7Sihmanhsehlaw David nih Zion ralhruang cu a lak ko ai, cucu David khua ti a si. 8Cun David nih khi ni ah khan, “Jebus mi thah a duhmi paoh cu, David lungthin nih a huatmi hna kebei le mitcaw kha hung thah hna awkah, ti kua khan hung kai hna seh,” tiah a ti. Cucaah cun, “Mitcaw le kebei hna cu inn chungah khan an lut lai lo,” tiah ti a si. 9Cun David cu ralhruang chungah khan a um i cucu David khua tiah min a sak. Cun David nih khua cu, Millo in a chunglei tiang khan a velchum in a kulh. 10Cun David cu Bawipa, ralkapbu Pathian kha a sinah a um caah a ngan chin lengmang.
Hiram Nih David A Theih
(1Cha 14.1-2)
11Cun Tair siangpahrang Hiram nih David kha lamkaltu le sidar thing le zungthiammi hna le lungremhthiam hna zong kha a kuat i David kha inn pakhat an sakpiak. 12Cun David nih Bawipa nih Israel mi cungah siangpahrang ah a ka fehter cang ti le, a mi Israel mi hna ruangah a pennak kha a hlorh cang ti kha a hngalh.
Jerusalem Ah A Hrinmi Hna
(1Cha 3.5-9; 14.3-7)
13Cun David nih Hebron in a hun hnuah khan Jerusalem mi nupichun le nupitak tam chinchin aa chap hna i David cu fapa le fanu tam chinchin a ngei. 14Cun Jerusalem ah a hrinmi hna an min cu mah hihi an si: Shammua, Shobab, Nathan, Solomon, 15Ibhar, Elishua, Nefeg, Jafia, 16Elishama, Eliada le Elifelet.
David Nih Filistin Mi A Tei Hna
(1Cha 14.8-17)
17Filistin mi nih David kha Israel siangpahrang ah chiti thuh a si cang tiah an theih tikah, Filistin mi vialte nih David kha kawl awkah an hung kal; sihmanhsehlaw mah cucu David nih a theih i ralhruang ah khan a vung kal. 18Filistin mi cu an ra i Refaim nelrawn ah khan an i zar phut ko. 19Cun David nih Bawipa kha a hal i, “Filistin mi hna doh awkah ka hung kal lai maw? Annih cu ka kut chungah na ka pe hna hnga maw?” tiah a ti. Cun Bawipa nih David cu, “Hung kal ko, zeitintiah Filistin mi cu na kut chungah kan pek hrimhrim hna lai,” tiah a ti. 20Cun David cu Baal-perazim ah a ra i khika ah annih cu a tei hna i amah nih, “Bawipa nih ka ral hna cu, tilian aa sah phut bantukin ka hmaiah a sah hna,” tiah a ti. Cucaah cu ka hmun cu a min ah Baal-perazim ti a si. 21Cun Filistin mi hna nih khika ah an siasal kha an kaltak hna i David le a mi hna nih khan an lak hna.
22Cun Filistin mi cu an ra ṭhan hoi i Refaim nelrawn ah khan an i zar phut ṭhan. 23Cun David nih Bawipa kha a hal tikah, “Na hung kal hnga lo; an hnulei in na va hel hna lai i balsam thing zawn khan na nam hna lai. 24Cun balsam thing par hna i kal thawng na theih tikah, khi tikah na cawlcang ve lai, zeitintiah khi tikah khan, Bawipa cu na hmaiah Filistin mi ralkapbu kha tuk awkah a kal cang a si lai,” tiah a ti. 25Cun Bawipa nih nawl a pek bangin David nih a tuah i Filistin mi hna cu Geba in Gezer tiang a thah hna.
Currently Selected:
2 SAMUEL 5: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006