2 SIANGPAHRANG 6
6
Hreitlung Fang Ti Cungah A Vuan
1Profet fapa hna nih khan Elisha cu an thawh i, “Zohhmanh, na kan hruinak tang i kan umnak hmun hi kan caah a hme tuk. 2Jordan tiva ah khin vung kal u sih law khika ah khin thing thluan khat cio vung la u sih law khika ah khin umnak hmun vung ser u sih,” tiah an ti. Cun anih nih, “Va kal u,” tiah a leh hna. 3Cun annih lak i pakhat nih, “Na sal hna kan sinah hin kal ve ko,” tiah a ti i, “Ka kal lai,” tiah a leh. 4Cucaah an sinah a kal. Cun Jordan tiva kha an phak tikah thing kha an hau hna. 5Sihmanhsehlaw pakhat pa cu thing a hau lioah khan a hreitlung fang cu ti chungah a tla; cun a au i, “Aize! ka bawipa, hlanmi a si ai ee,” tiah a ti. 6Cun Pathian mi nih cun, “Khuazei ah dah a tlak?” tiah a ti. A hmun kha a hmuhsak tikah fung pakhat a sah i khika ah cun a hei hlonh i thir cu a hung vuan. 7Cun, “Hei la tuah,” tiah a ti. A kut in a hei banh i a lak.
Elisha le Siria Mi Hna
8Voi khat cu Siria siangpahrang nih Israel mi a doh hna ah khan, a sinum hna he cun khua an khang i, “Cu hmun, kha hmun ah khan ka riahhmun cu a si lai,” tiah a ti. 9Sihmanhsehlaw Pathian mi nih Israel siangpahrang cu bia a cah i, “Hi hmun hi pal loin i ralring u, zeitintiah Siria mi cu khika ah khin an vung kal lai,” tiah a ti. 10Cun Israel siangpahrang nih Pathian mi nih a chimhmi hmun ah khan mi a thlah hna. Cu bantukin ralrinnak kha a pek tawn i cucaah khika ah voi khat voi hnih lawng si loin aa khamh tawn.
11Cun hi ruangah hin Siria siangpahrang cu a lungchung in a khuaruah a har ngaingai i a sinum cu a kawh hna i annih cu, “Ahodah kan lak i Israel siangpahrang ta a simi hi nan ka hmuhsak lai lo maw?” tiah a ti. 12Cun a sinum pakhat nih a thawh i, “Ahohmanh kan um lo, ka bawipa, maw siangpahrang; sihmanhsehlaw Israel ram i a ummi profet Elisha nih na ihnak dal chung i na chimmi bia cu Israel siangpahrang kha a chimh,” tiah a ti. 13Cun anih nih, “Va kal law khuazei i a um kha va hngal tuah, mi ka hei thlah hna i ka tlaih khawh nakhnga,” tiah a ti. Amah cu, “Zohhmanh, Dothan ah a um ko,” tiah an chimh.
14Cucaah khika ah rang hna le rangleng hna le ralkapbu nganpi a thlah i zan ah an ra i khua cu an dum.
15Pathian mipa sinum cu zingka in a thawh i a chuah tikah, zohhmanh, ralkapbu cu rang le rangleng he khua velchum cun an rak um. Cun sinum nih cun, “Aize, ka bawipa! Zeidah kan tuah lai?” tiah a ti. 16Anih nih a thawh i, “Ṭih hlah, zeitintiah kan sin i a ummi hna cu an sin i a ummi hna nakin an tam deuh,” tiah a ti. 17Cun Elisha nih thla a cam i, “Maw Bawipa, a hmuh khawh nakhnga, a mit hi hun auter ko,” tiah a ti. Cucaah Bawipa nih tlangvalpa mit cu a auter i a hmuh; cun zohhmanh, Elisha velchum ah cun, tlang cu rang le mei rangleng in a khat. 18Cun Siria mi nih an run fuh tikah Elisha nih Bawipa sinah thla a cam i, “Hi mi hna hi, an mit cawtter ko hna,” tiah a ti. Cucaah Elisha thlacamning khan, an mit a cawtter hna. 19Cun Elisha nih a thawh hna i, “Lam nan tlau, nan kawlmi khua cu mah hi a si lo; ka zul u law nan kawlmipa sin cu kan phakpi hna lai,” tiah a ti. Cun Samaria ah a hruai hna.
20Samaria khua chungah an luh cangka, Elisha nih, “Maw Bawipa, hi mi hna nih hin khua an hmuh khawh nakhnga, an mit auter hna,” tiah a ti. Cucaah Bawipa nih an mit a auter hna i khua an hmu; cun zohhmanh, Samaria khuachungpi ah khan an um ko. 21Israel siangpahrang nih khan a hmuh tik hna ah Elisha sinah cun, “Ka pa, ka thah hna lai maw? Ka thah hna lai maw? tiah a ti. 22Anih nih, “Na that hna lai lo. Na vainam le na likuk in na tlaih mi hna cu na thah hna hnga maw? Annih cu ti le rawl hunh hna law ei in ding hna seh law an bawipa sinah kal hna seh,” tiah a ti. 23Cucaah an caah puai nganpi pakhat a timh i an ei an din dih in a kalter hna i an bawipa sinah khan an kal. Cun Siria mi cu ralhranh awkah Israel ram chungah an lut ti lo.
Elisha le Samaria Kulhnak Kong
24Cu hnuah cun, Siria siangpahrang Benhadad nih a ralkap vialte cu a pumh hna i a hung kal i Samaria kha an dum. 25Cun annih nih an kulh caah khan Samaria khua ah cun mangṭam fak ngaingai a tlung i laa lu pakhat nih ngun shekel sawm riat a man i ṭhuro ek kab#6.25 Heb: kab. Kab khat cu ephah cheu hleiriat cheu khat a si. Kab cheu li cheu khat cu pawng khat tluk a si lai. cheu li cheu khat nih ngun shekel panga a man. 26Cun Israel siangpahrang cu ralhau cung i a kal lioah khan nu pakhat nih a hei auh i, “Maw siangpahrang, ka bawipa, ka bawm tuah,” tiah a ti. 27Cun anih nih, “Bawipa nih an bawmh lo ahcun kei nih khuazei in dah kan bawmh khawh lai? Nangmah caah phuhri in siseh, mitsur nennak hmun in siseh, bawmhnak cu kan hmuhpiak khawh lai maw?” tiah a ti. 28Cun siangpahrang nih cun amah cu, “Na harnak cu zeidah a si?” tiah a hal. Anih nih, “Hi nu nih hin, ‘Na fa kha tho law nihin ah kan ei lai, cun thaizing ah kei ka fa kan ei lai,’ a ka ti. 29Cucaah ka fa cu kan chuan i kan ei. Cun a thaizing ah amah cu, ‘Na fa cu tho law kan ei lai,’ ka ti; sihmanhsehlaw a fa cu a rak thuh diam cang,” tiah a ti. #Deu 28.57 30Siangpahrang nih minu bia kha a theih tikah a puan kha a thleh hna — ralhau cung i a kal lio a si — cun mizapi nih khan an zoh i, zohhmanh a pum cungah buri puan kha aa nawh ko. 31Cun anih nih, “Shafat fapa Elisha kha nihin ah hin a liang cungah a lu kha a taan rih a si ahcun, Pathian nih cu bantukin le cu nak tam deuh zongin ka cungah tuah ko seh,” tiah a ti.
32Elisha cu a inn ah khan a ṭhu ko i upa hna cu amah sinah khan an ṭhu ve. Cun siangpahrang nih amah sinin mi pakhat a thlah i lamkaltu kha a ra phak hlanah khan Elisha nih cun upa hna cu, “Zeitindah lainawngpa nih hin keimah lu kha tan awkah a mi a thlah ti kha nan hngal maw? Zohhmanh u, lamkaltu kha a rat tikah, innka kha khar u law innka kha fek tein hrenhkanh u. A bawipa ke lamh thawng nih amah cu a zulh colh a si lo mei?” tiah a ti. 33Cun an sin i bia a chim lengmang lioah cun, siangpahrang cu a sinah a rung i, “Hi harnak hi Bawipa sinin a si. Zeicahdah Bawipa nih zeidah a tuah lai ti cu ka ngan len ti lai?” tiah a ti.
Currently Selected:
2 SIANGPAHRANG 6: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
