2 SIANGPAHRANG 5
5
Naaman Thinghmui Zawtnak A Damter
1Siria siangpahrang i a ralkapbu haotu Naaman cu, Bawipa nih amah thawng in Siria cu teinak a pek caah, a bawipa mithmuh ah mi ngan le hmaizah ngaingaimi a si. Amah cu a ṭhawng i a ral a ṭhami a si, sihmanhsehlaw mithinghmui a si. #Luk 4.27 2Siria mi hna nih ral hranh i an kal tawnnak ah hin, voi khat cu Israel ram in ngakchianute pakhat hi an i tlaih Naaman nupi tuammuaitu ah a cang. 3Cun a bawinu sinah cun, “Samaria i a ummi profet sinah ka bawipa hi va kal seh law ka hei duh dah! A thinghmui zawtnak hi a hei damh ko hnga,” tiah a ti. 4Cucaah Naaman cu a va lut i a bawipa kha, “Cu bantuk, kha bantukin Israel ram ngakchianute nih khan a chim,” tiah a chimh. 5Cun Siria siangpahrang nih khan, “Va kal law, Israel siangpahrang cu ca ka kuat lai,” tiah a ti.
Cucaah a kal i ngun talen pahra, sui shekel thong ruk he puai puan zun hra aa phorh. 6Cun Israel siangpahrang sinah khan ca cu a rak put i ca chungah cun, “Hi ca nih hin an phak tikah, ka sal Naaman cu, nangmah nih a thinghmui zawtnak khan na rak damter nakhnga, na sinah ka rak thlah ti kha rak hngal tuah,” tiah aa ṭial. 7Cun Israel siangpahrang nih ca cu a rel dih tikah a puan kha a thleh hna i, “Mi kha a that kho i a nunter khotu Pathian maw ka si i hi mipa nih hin mipa pakhat cu a thinghmui zawtnak damter awkah bia a rak ka cah? Ruat hmanh u law, zeitindah keimah he i siknak a kawl kha hngal tuah u,” tiah a ti.
8Sihmanhsehlaw Pathian mi Elisha nih Israel siangpahrang nih a puan a thleh hna ti kha a theih tikah, siangpahrang cu bia a hei cah i, “Zeicahdah na puan cu na thleh hna? Israel ram chungah profet a um ti kha a hngalh naklai, keimah sinah ratter tuah,” tiah a ti. 9Cucaah Naaman cu a rang hna le a rangleng hna he an ra i Elisha inn innka hram ah cun an va dir. 10Cun Elisha nih cun a sinah lamkal pakhat a hei thlah i, “Va kal law Jordan tiva ah voi sarih in vaa kholh, cun na titsa cu a dam lai i na thiang lai,” tiah a ti. 11Sihmanhsehlaw Naaman cu a thin a hung i a kal i, “Zohhmanh, ka sinah a hung chuak lai i pei a dir lai i a Pathian Bawipa min kha a auh lai i ka thinghmui zawtnak zawn ah khan a kut a zao lai i mithinghmui hi a ka damter lai, tiah ka ruah. 12Damaskas tiva Abana le Pharpar cu Israel ram ti vialte nakin an ṭha deuh lo maw? Cu tiva hna chungah cun kaa kholh in kaa thianh kho lo maw?” tiah a ti. Cucaah aa mer i thin hung ngaingai in a kal. 13Sihmanhsehlaw a sinum hna nih khan an va naih i, “Ka pa, profet nih khan thil ngan pakhatkhat tuah in fial seh law tuah loin maw na um hnga? A si kun ahcun, ‘Va kholh law va thiang; an ti tikah hin, zeitluk in dah tuah chinchin awk a si,” tiah an ti. 14Cucaah Pathian mi bia bangkhan a vung kal i Jordan tiva chungah voi sarih a vung i hnim i cun a titsa cu a dam i ngakchia note titsa bantuk a si i amah cu a thiang.
15Khi tikah Pathian mi sinah khan, amah he a mi pawl vialte he an va kir i a hmaika ah khan a va dir cun aa thawh i, “Zohhmanh, Israel ram chungah dah ti lo ah cun, vawlei cung vialte ah Pathian a um lo ti kha ka hngalh; cucaah na sal sin hin laksawng cohlang tuah,” tiah a ti. 16Sihmanhsehlaw anih nih, “A rian ka ṭuanmi Bawipa a nun bangin, zeihmanh ka cohlang lai lo,” tiah a ti. Cun lak awkah a nawl len nain a duh lo. 17Khi tikah Naaman nih, “A si lo ahcun, na sal hi vawlei laa pahnih phor ka pe tuah, tiah kan nawl; zeitintiah hmailei ah cun Bawipa sinah dah ti lo ahcun na sal nih hin zei pathian sin hmanh ah khangh thawinak siseh, raithawinak siseh, ka pechan lai lo. 18Hi kong bel ah hin Bawipa nih na salpa cu ka ngaithiam ko seh! Ka bawipa nih Rimmon inn chungah biak awkah, a luh tikah kei zong Rimmon inn chungah cun ka lu ka khun ve ding a si, cu bantukin Rimmon inn chungah ka lu ka khun tikah, hi kong ah hin Bawipa nih na salpa cu ka ngaithiam ko seh,” tiah a ti. 19Anih nih a thawh i, “Daihnak in va kal ko,” tiah a ti.
Sihmanhsehlaw Naaman cu amah sin khan tlawmpal a kal ah khin, 20Pathian mi Elisha i a sinum Gehazi nih khan, “Zohhmanh, ka bawipa nih Siria mi Naaman cu, a rak i phorhmi laksawng cohlang loin fawi tuk in a luatter cang. Bawipa a nun bangin, a hnu in ka hei dawi lai i amah sinin zeilo tetal ka va lak tuah lai,” tiah a ti. 21Cucaah Gehazi nih Naaman cu a zulh. Cun Naaman nih, mi zeimaw nih a ka dawi ti kha a hmuh tikah, amah ton awkah cun a rangleng in a ṭum i, “Zeizong a ṭha dih maw?” tiah a ti. 22Cun anih nih, “A ṭha dih. Ka bawipa nih keimah cu, ‘Efraim tlangram in ka sinah profet fapa hna chung khan tlangval pahnih, tu naite ah khan an ra; annih cu ngun talen pakhat le puai puan zun hnih rak pe hna, tiah kan nawl,’ ti in chim awkah a ka thlah,” tiah a ti. 23Cun Naaman nih, “Talen pahnih hi cohlang tuah hna,” tiah a ti. Cun hramhram in a lem i ngun talen pahnih cu puai puan pahnih he sawngkhoi pahnih in a rawn hna i a sal pahnih hna kha a phorhter hna; cun annih nih Gehazi hmaiah khan an phorh hna. 24Cun tlang kha a phak tikah, an kut chung khan a lak hna i inn chungah a chiah hna; cun mi kha a kalter hna i annih nih an kal. 25Amah cu a vung lut i a bawipa hmaika ah khan a dir i Elisha nih amah cu, “Khuazei ah dah na si, Gehazi?” tiah a ti. Anih nih, “Na salpa cu khuazei hmanh ah ka kal lo,” tiah a ti. 26Sihmanhsehlaw amah cu a thawh i, “Nangmah ton awkah mipa nih a rangleng in a ṭum ah khan nangmah sinah khan thlarau in ka kal lo mei? Tangka le puan hna le oliv dum hna le mitsur dum hna le tuu hna le cawtum hna le salpa hna le salnu hna i lak caan a si maw? 27Cucaah Naaman thinghmui zawtnak nih khan nangmah le na tefa hna cu zungzal in an kaih hna lai,” a ti. Cucaah a sin cun amah cu mithinghmui in a chuak, hawhra bantukin a rang.
Currently Selected:
2 SIANGPAHRANG 5: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
