1 CHANRELNAK 29
29
1Siangpahrang David nih aa pummi cu a thawh hna i, “Ka fapa Solomon hi Pathian nih a timhmi cu a si. Asinain amah cu a no rih i a hmuhtonmi a tlawm; sihmanhsehlaw ṭuan ding vial cu rian nganpi a si ṭung, zeicahtiah sak ding inn hi minung ca siangpahrang inn a si lo i Bawipa Pathian ca a si. #1Cha 22.5 2Cucaah kan Pathian biakinn ca thilri cu ka ti khawh chungin ka damh hna. Sui thilri ca sui, ngun thilri ca ngun, dar thilri ca dar, thir thilri ca thir, thing thilri ca thing kha ka damh hna. Cuhleiah, ṭamhnak caah oniks lungvar tampi le lung tampi, cun antimoni lungvar, lung a mui a phunphun a simi hna, lung mansung a phunphun le marbal lung kha tampi ka damh hna. 3Hi vialte hleiah hin keimah pumpak ta chungin sui le ngun kha kan Pathian inn ka ṭanh caah Pathian biakinn caah cun ka thawh hna: 4vampang nalhnak caah sui talen thong thum, Ofir sui dakmak, er ciami ngun talen thong sarih, 5cun zungthiam hna tuah awk a simi caah sui thilri caah sui, ngun thilri caah ngun kha ka thawh hna. Cucaah nihin ah hin Bawipa sinah mah le mah i pekchanh in lungtho tein ahodah siannak in a tho vemi nan si lai?” tiah a ti.
6Cun pale hna innchungkhar lu cio nih khan mah lungtho tein an thawhlawm cu an thawh hna i phun hruitu hna le a thongthong pawl haotu hna le a zaza pawl haotu hna le siangpahrang rian i bawi hna zong nih khan mah bantuk cun an tuah ve. 7Pathian inn ca rianṭuannak caah cun sui talen thong nga le darik#29.7 darik — Persia tangka a si. thong hra, ngun talen thong hra, dar talen thong hleiriat, thir talen sing khat an pek. 8Cun lung mansung a ngeimi paoh nih khan Bawipa inn chawhlawn khonnak ah cun an lungvar kha an pek i mah cucu Gershon mi Jehiel nih khan a zohkhenh. 9Cun mi cu an i lawm, zeicahtiah lungtho tein an pek, lung ṭengnge lo tein thawhlawm cu Bawipa sinah an pek i tampi an pek; siangpahrang David zong aa lawm.
David Nih Bawipa A Thangṭhat
10Cucaah David nih Bawipa cu aa pummi vialte hmaiah cun a thangṭhat i David nih cun, “Maw Bawipa, kan pu Israel i Pathian, nangmah cu zungzal thluangthluan in thangṭhat na si ko. 11Maw Bawipa, lianhngannak le ṭhawnnak le sunparnak le teinak le upatnak cu nangmah ta an si ko; zeitintiah vancung le vawlei cung i a ummi thil vialte cu nangmah ta an si dih; maw Bawipa, pennak cu nangmah ta a si i nangmah cu zeizong vialte cungah cungnung bik na si. #Mat 6.13 12Rumnak siseh upatnak siseh nangmah sinin a rami an si i nangmah nih zeizong vialte kha na uk dih. Na kut chungah hin ṭhawnnak le thazang an um i na kut chungah hin mi vialte nganter khawhnak le thazang pek khawhnak a um. 13Cucaah kan Pathian, nangmah cu kan in lawmh i a sunglawimi na min cu kan thangṭhat.
14“Sihmanhsehlaw hi bantukin kannih nih lungtho tein kan in pekchanh khawh nakhnga caah hin keimah cu ahodah ka si i ka mi hna cu zeidah an si? Zeitintiah zeizong vialte cu nangmah sinin a rami an si i kan in pekmi hi nangmah ta lila a si ko. 15Zeitintiah kannih cu, kan pupa vialte hna mipem an rak si bantuk khan, na hmaiah khual kan si; vawleicung i kan nunchung ni hna hi thladem bantuk men an si i ruahchannak zeihmanh a um lo. 16Maw Bawipa, kan Pathian, na min thiang ca i inn pakhat saknak ah thil tampi kan damhmi vialte hna hi, nangmah kut chungin a chuakmi an si i nangmah ta an si dih. 17Ka Pathian, nangmah nih lung kha na hneksak i dinnak kha na duhmi a si ti kha ka hngalh; ka lung dinnak in hi thil vialte hi lungtho tein kan pekchanh i atu cu hika i a ummi na mi hna nih lungthote le lunglawm tein an in pekchanh kha ka hmuh cang. 18Maw Bawipa, kan pu Abraham, Isak le Israel i Pathian, hi bantuk thinlung le ruahnak hi na mi hna chungah hin chia zungzal law annih an lungthin cu nangmah leiah khan hruai ko hna. 19Ka fapa Solomon nih hin lung ṭengnge lo tein na nawlbia hna le na hngalhternak bia hna le na phunglam hna kha a zulh hna i a tuah dih hna i ka timhlamh ciami biakinn hi a sak khawh nakhnga, nangmah nih amah cu bawm ko,” tiah a ti.
Solomon Nih David Kha A Chaan
(2Sia 2.10-12)
20Cun David nih aa pummi vialte hna cu, “Bawipa, nan Pathian cu thangṭhat ko u,” tiah a ti hna. Cun aa pummi vialte nih Bawipa, an pupa hna Pathian cu an thangṭhat i an lu an khun i Bawipa cu an biak i siangpahrang cu hmaizahnak an pek. 21Cun Bawipa sinah khan raithawinak an tuah i, a thaituan ah cawtum thong khat le tuutum thong khat le tuufa thong khat cu, an thlet thawinak hna le an raithawinak hna he khan, Israel mi vialte caah duhdim tein i za in khangh thawinak ah Bawipa sinah cun an pekchanh hna; 22cun cu ni ah cun Bawipa hmaiah lunglawm ngaiin an ei i an ding.
Cun David fapa Solomon cu siangpahrang ah a voi hnihnak an ser ṭhan i amah cu Bawipa ca i bawi ah chiti an thuh i Zadok cu tlangbawi caah chiti an thuh. 23Cun Bawipa siangpahrang ṭhutdan ah cun Solomon cu a pa David can ah khan siangpahrang in a ṭhu i a hungcho i Israel mi vialte nih a bia kha an ngaih. #1Sia 2.12 24Haotu vialte le miṭhawng hna le Siangpahrang David fapa hna zong nih khan Siangpahrang Solomon sinah zumhawktlak in kan um lai tiah bia an i kam. 25Cun Bawipa nih Israel mi vialte hna mithmuh ah Solomon cu upatnak ngan a pek i amah hlanah Israel mi chung i siangpahrang ahohmanh a rak pek hna lomi siangpahrang sunparnak kha amah cu a pek.
26Cuticun Jesse fapa David nih Israel mi vialte cu a pen hna. 27Israel mi a pen hna chung cu kum sawm li a si; Hebron ah kum sarih a bawi i Jerusalem ah kum sawm thum le kum thum a bawi. #2Sam 5.4-5; 1Cha 3.4 28Cun upa ngaingai, tartlung nung in, rumnak le upatnak he a thi; cun Solomon a fapa cu amah hmun ah khan a hung bawi. 29Cun Siangpahrang David tuahsermi hna cu, a hmasa bik in a hmanung bik tiang, hmutu Samuel Chanrelnak ah le profet Nathan Chanrelnak ah le hmutu Gad Chanrelnak ah an i ṭial, 30a ukning kong le a ṭhawnnak le amah cung le Israel mi cung le ram dangdang hna cung i a tlungmi thil vialte hna kong zong kha an i tel ve.
Currently Selected:
1 CHANRELNAK 29: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
