Lukas 6

Tahz seu ngihz sinz

(Matthe 12:1-8, Markus 2:23-28)

1Kaai seu ngihz sinz seu laehz, meuz Yesuhz datz boh maar kaaiz kyung ne teu paez Hnhz keui seur keut seum kawr, keur miat suamz kaai plaakz tihz daehz. 2Pharise teur ka daz, “Cih naehz pehz cih leuz traz kaai seu ngihz sinz a?”

3Yesuhz mial daz, “Lawng an meuz khunz Dawit boh ihz an naeh kawmz hnhz keui coh ne pehz nam ti rawz haz? 4Hnhz kut tuhz kaang Phraz Pen Caoh, leh suamz kaaiz mun taangz, an saangz longz keui pan suamz bawnz ne aez tang bohz raen daehz keui nahz.”

5Yesuhz siupz lao thaengz, “Kuanz Ihz naeh tahz seu ngihz sinz.”

Ihz tihz wiatz seu plaakz

(Matthe 12:9-14, Markus 3:1-6)

6Kaai seu ngihz sinz thaengz hawkz ne Yesuhz kut tuhz crawp rawz traz rae sawnz aez, ihz tihz takz kaaiz wiatz hawkz kaw naeh a diz. 7Ihz mawz kyaamz keui boh Pharise keui pao yawt khahz reung dengz kawi, anz Yesuhz seuk neum ihz kaai seu ngihz sinz. 8Yesuhz mas phawmz keuh rae daz ihz tihz wiatz nahz, “Truz ceng teun khinz ihz raez.” Ihz an diz kaw truz ceng. 9Yesuhz kaw maanyz thaengz, “Traz ehz lao mok daz seu naez kaai seu ngihz sinz? Cih an rak haz? Cih an raai haz? Khyawt ihz haz? Ya ihz haz?” 10Hnhz yawt keuh wit wit, daz ihz tihz wiatz nahz, “Peuk caatz tihz mih raez.” Ihz an diz kaw peuk caatz tihz daehz, tihz hnhz kaw rak mial.

11Keuh ca baaiz rae teur daz daehz nahz ngaz cih seu naez kaai Yesuhz.

Yesuhz ras teu maan seu kawlz aarz

(Matthe 10:1-4, Markus 3:13-19)

12Meuz kraao an diz Yesuhz raw lang rang, suz tawngz tawz Phraz Pen Caoh sawmz raang. 13Meuz prih a wa thaangz ne Hnhz raak teu paez seu kawlz aarz a Daehz rae peuk mus keuh aez naeh teu maan. 14Simon an Hnhz peuk mus Petros boh seum bohz hnhz Andre, Yakop boh Yohn, Philip boh Bartholome, 15Matthe boh Thomas, Yakop kuanz Alphaeus boh Simon ihz plaak prih omz Yio, 16Yudas kuanz Yakop boh Yudas Iskariot an ngaz ya saet ca Hnhz.

Yesuhz sawnz ihz boh seuk neum ihz

(Matthe 10:1-4, Markus 3:13-19)

17Meuz Yesuhz boh teu maan keui cur truz thaz rang ne ceng boh ti peng, tang wungz teu paez an heungz. A diz maang ihz heungz baaiz, truz thaz prih Yio, weng Yerusalem boh weng Sidon boh weng Taia weng an naeh waar paang laai. 18Keuh truz teuk ngarz traz Hnhz boh aez reung penz keui bilz. Ihz phiz kut keui kaw moh rak. 19Ihz keui kyaam teu Hnhz aez daehz moh rak kawp daz taanz khoz lae kaai Hnhz seuk neum aez ihz moh rak klawhz ihz.

An rak boh an nam rak

(Matthe 5:1-12)

20Yesuhz yawt teu paez keui, daz keuh nahz,

Pehz naeh an phaanz keui naeh an rak,

prih Phraz Pen Caoh ne naeh prih pehz.

21Pehz an coh nguat seu ni keui naeh an rak,

pehz ngaz kumz boh rae naeh an rak.

Pehz an yaam seu ni keui pehz

ngaz bawnz ngot rae naeh an rak.

22Meuz ihz ceuh pehz, ihz thiangz thengz pehz, ihz saehz pehz, kheuz pehz kawp Kuanz Ihz ne, pehz naeh an rak. 23Meuz naeh ceun diz pehz seuz phawmz haaiz wang lah. Kawp daz pehz ngaz bawnz a keoz mawh baaiz lang kaang raaoz. Ihz keu daehz keu daepz keuh a wa cih kaai ihz taangz phraz keui nahz ceun diz.

24Keuiz daz pehz an maang seu ni keui ngaz naeh an nam rak,

kawp daz pehz a wa sa seu ni.

25Pehz an suamz saakz paakz neuk seu ni keui

ngaz coh nguat.

Pehz an ngot seu ni keui, naeh an nam rak,

kawp daz pehz ngaz bawnz kraang bawnz yaam.

26Meuz ihz lupz pehz ne, pehz naeh an nam rak, ihz keu daehz keu daepz keuh lupz ihz taangz phraz plawmz ceun diz.

Rak raan su daehz

(Matthe 5:38-48, Matthe 7:12)

27Ohz lao pehz an teuk ngarz Ohz keui nahz, rak raan su keui, cih an rak kaai ihz an ceuh daehz keui raez. 28Aez reung dengz rak ihz an kin daehz raez. Suz tawngz aez tang ihz cih an nam rak kaai daehz raez. 29Beuk seu hawkz hawkz paapz mawk pehz seu plaakz kaw aez thaengz seu plaakz raez. Beuk seu hawkz hawkz leh seu kaeng mah pehz kaw yak kan, aez hnhz leh thaengz tang seu kaeng supz raez. 30Aez tawz ihz maanyz daehz raez. Meuz ihz rimz leh khangz pehz keui kaw yak maanyz mial daehz eunz. 31Sunz aez ihz cih daehz ceun nae kaw, cih kaai ihz ceun diz.

32Beuk rak ihz an rak daehz ne pehz ngaz bawnz a keoz naehz? Ihz raai keui kaw yeung mawz rak ihz rak keuh. 33Beuk cih rak ihz an rak daehz pan ne pehz ngaz bawnz a keoz naehz? Ihz raai keui kaw yeung mawz cih boh ceun diz. 34Beuk pehz aez ihz rawm ihz caang phrawz bawnz pan ne pehz ngaz bawnz a keoz naehz? Ihz raai keui kaw dawhz mial seu daehz rawm aez. 35Rak raan su daehz keui raez. Cih an rak kaai keuh. Aez keuh rawm pehz eunz, yak mang ta bawnz mial. Beuk cih ceun diz pehz ngaz bawnz suz an mawh rae pehz ngaz penz kuanz Phraz Pen Caoh an trawng dutz. Kawp daz Hnhz cih kez cuz kaai ihz nam mas kez cuz boh kaai ihz raai. 36Teur yawng ihz ceun Paz pehz mawz teur yawng.

Yak nae ihz cih kawi

(Matthe 7:1-5)

37Yak daz ihz cih kawi, beuk cih ceun diz Phraz Pen Caoh kaw ngaz nam daz pehz cih kawi. “Yak nae ihz, Phraz Pen Caoh kaw nam nae pehz. Plawiz reung dengz kawi ihz raez. Beuk cih ceun diz Phraz Pen Caoh kaw ngaz plawiz reung dengz kawi pehz. 38Aez ihz nahz lah, pehz ngaz bawnz mial. Pehz ngaz bawnz mial neuk neuk. Tekz sapz, kruhz sapz tuhz seu kiz pehz thanz paw neuk pe. Seu pehz tuang aez ihz nahz ne pehz bawnz mial seu diz.”

39Yesuhz lao keuh nahz mony pung taek daz, “Ihz ngaai lapz teur deuiz nam caang plaez daehz nahz reung dengz, beuk cih ceun diz klaez tuhz lanz tang keu aarz. 40Teu paez nam kyahz taan sra. Keuiz daz beuk a wa sawnz leh thonz thonz kaw naeh ceun sra daehz.

41Nam awlz hikz khaehz tuhz ngaai daehz samz awlz mun tuhz ngaai kuanz mai daehz seu naez? 42Mih lao kuanz mai daehz nahz ceun nae? ‘Aez ohz leh thengz mun tuhz ngaai mih naz.’ Ihz seuk cih aez, leh thengz aacz hikz khaehz tuhz ngaai daehz raez, waaiz an diz mih caang awlz caem caem mun tuhz ngaai kuanz mai daehz eu.”

Teungz khaehz boh plaehz hnhz

(Matthe 7:16-20, 12:33-35)

43“Teungz rak nam caang plaehz an nam rak. Teungz nam rak kaw nam caang plaehz an rak. 44Yawt plaehz kaw mas teungz. Nam tawkz leh plaehz laangz wah kaai teungz seur keutz. Nam tawkz leh plaehz seu pit kaai yum seur keutz. 45Ihz rak ne plaez an rak tuhz kingz keu nuasz daehz, ihz nam rak ne plaez an nam rak tuhz kingz keu nuasz daehz. Kingz keu nuasz neuk ceun nae kaw mony daz ceun diz.”

Ihz cih kaang keu aarz

(Matthe 7:16-20, 12:33-35)

46“Nam teuk ngarz mony Ohz samz raak Ohz, ‘Tahz, Tahz,’ ceun nae? 47Ihz an truz cu Ohz boh teuk ngarz mony Ohz rae cih tawiz ne, 48naeh ceun ihz kawngz lu truh truh rae teungz kaang tam kaai reu aangz. Meuz omz lus lukz laakz sapz kaang an diz kaw nam keusz kawp daz cih mok klakz. 49Keuiz daz ihz an ngarz boh mony Ohz, nam cih tawiz ne naeh ceun ihz cih kaang tam kaai keu tehz. Meuz omz lus lukz laakz sapz kaang an diz ne yaatz luat. Kaang an diz kaw luh krang baaiz.”

Currently Selected:

Lukas 6: ril

Highlight

Copy