Lukas 4

Tahz Yesuhz talz reung dengz kyaam ya

1Yesuhz weng truz thaz omz Yordan, Khuanz Seu Ngamz neuk kaai Hnhz. Khuanz aacz lan Hnhz tuhz ruk plaangz klaacz. 2A diz Manaat kyaam ya Hnhz ponz kawlz seu ngihz. Meuz phangz seu ngihz an keu diz Hnhz nam suamz naehz, meuz kraao a wa peun ne Hnhz coh.

3Manaat daz Hnhz nahz, “Beuk Mih naeh Kuanz Phraz Pen Caoh kaw, lao kawnz reu aangz an ni aez penz kaaiz mun raez.”

4Yesuhz kaw tawpz daz, “Tuhz kyaamz lik daz, ‘Ihz leh taw seum suamz damz phawmz nam anz.’”

5Manaat kaw nap Hnhz raw kaai rang trawng, plaez Hnhz nahz prih an naeh tuhz lawz kahz hacz aamz seu co kyehz. 6Manaat daz Hnhz nahz, “Ohz ngaz aez Mih nahz bunz boh a na keu ni. An ni naeh khangz ihz aez mok ohz nahz, ohz sunz aez yaeh kaw bawnz. 7Beuk Mih koz kwaai ohz kaw an keu ni ngaz penz khangz Mih.”

8Yesuhz kaw mial daz, “Tuhz kyaamz lik daz, ‘Koz kwaai Phraz Cen Cen daehz an naeh Phraz Pen Caoh, koz kwaai Hnhz pan.’”

9Waaiz an diz Manaat nap Hnhz lan a weng Yerusalem, mok kaai cawkz cacz wat ne daz Hnhz nahz, “Beuk Mih naeh Kuanz Phraz Pen Caoh kaw plawiz teuk klaez toz Mih raez! 10Tuhz kyaamz lik daz, ‘Phraz Pen Caoh cao teu maan Daehz keui yawt Mih. 11Keuh leh tihz daehz pumz Mih, yak aez cawng Mih lawz reu aangz.’”

12Yesuhz kaw tawpz daz, “Tuhz kyaamz lik daz, ‘Yak caam Phraz Cen Cen daehz an naeh Phraz Pen Caoh.’”

13Waaiz Manaat kyaam ya Hnhz a wa keunyz ne praasz Hnhz lan rae ngawm kraao sang trohz.

Yesuhz seun teungz cih kaanz Phraz

(Matthe 4:12-17, Markus 1:14-15)

14Yesuhz truz mial a weng Kalile, neuk tang taanz khoz Khuanz Seu Ngamz. Reu oiz Hnhz keui sirz lan tuhz prih an diz klawhz ti. 15Hnhz sawnz aez tawiz crawp rawz traz, ihz keui lupz phrawz Hnhz.

Ihz weng Nasaret keui thiangz Yesuhz

(Matthe 13:53-58, Markus 6:1-6)

16Yesuhz lan weng Nasaret ti Daehz mawh, ceun Hnhz kai kut tuhz crawp rawz traz kaai seu ngihz sinz ne Hnhz kut. Hnhz ceng ngaz rawz kyaamz lik, 17ihz aez Hnhz nahz kyaamz ihz taangz phraz Isaiah, khawz mar lik ne rawz talz,

18“Khuanz Phraz Cen Cen naeh kaai ohz,

kawp daz Hnhz ras ohz aez lao reu oiz rak tawiz ihz phaanz.

Hnhz cao ohz rawz traz ihz klaez khawk keui lawt,

aez ihz ngaai lapz keui awlz,

aez ihz peur teuk keui lawt.

19Aez lao sawz, ‘Wit an bawnz reung dengz rak Phraz Cen Cen ne a wa phraeoz.’”

20Yesuhz mar mial mar lik, aez mial ihz pao crawp rae keu dez. Ihz tuhz crawp keui teur aacz daehz ngaai ceukz yawt Hnhz. 21Hnhz daz thaengz keuh nahz, “Ceun pehz ngarz tuhz kyaamz lik ne a wa keunyz meu ni.”

22Keuh teur aacz daehz sangz mony reu ma ngaam an Hnhz lao, keuh teur deuiz teur daz daehz nahz, “Hnhz nam anz kuanz Yosep haz?”

23Hnhz daz keuh nahz, “Pehz leh mony neungz an diz ngaz daz phaat Ohz nam kaat, ‘Tahz sra, seuk neum mial toz daehz raez.’ an daz ne, pehz te daz Ohz, ‘Tuhz weng Mih a niz kaw cih ceun ehz ngarz lawng Mih cih klawhz meoz tuhz weng Kapernaum raez.’ 24Ohz daz mawn pehz nahz, ‘Ihz taangz phraz an nae kaw nam maang mawk mael tuhz raap daehz.’ 25Teuk ngarz raez, co ihz taangz phraz Eliyas ne maang yah keu maaiz heungz baaiz tuhz prih Israel ne anz mawn. Keuiz daz meuz cung rat waiz wit plawi tualz kiarz, coh nguat tang prih ne, 26nam plawiz Eliyas lan cu yah keu maaiz keu diz hawkz hawkz, keuiz daz plawiz hnhz lan tawz yah keu maaiz a weng Sarephat tuhz prih Sidon. 27Co ihz taangz phraz Elisha kaw ihz penz tut keui heungz baaiz tuhz prih Israel. Nam maang yaeh bilz, naeh taw Naaman, ihz prih Siria pan bilz a.”

28Ihz naeh tuhz crawp rawz traz keui ngarz mony reu ma an diz ne keuh sunz ca. 29Keuh caac ceng, wah peun lae Hnhz thaz nawk weng, raak lan Hnhz cawkz phlaan ne ngaz reuk euz teuk klaez Hnhz a diz. 30Keuiz daz Yesuhz datz kut peur lah wungz ihz rae lae lan Daehz ne.

Ihz phiz kut hawkz

(Markus 1:21-28)

31Waaiz an diz Yesuhz lan weng Kapernaum tuhz prih Kalile ne sawnz ihz keui nahz kaai seu ngihz sinz. 32A diz kaw ihz keui sangz baaiz an Hnhz sawnz, kawp daz Hnhz upz tang a na. 33Tuhz crawp rawz traz ne maang ihz phiz kut hawkz, hnhz raak keurz, 34“Euz! Yesuhz ihz weng Nasaret. Mih lo naehz tang ehz? Mih ngaz ya ehz haz? Ohz mas boh Mih naeh yaeh! Mih naeh Ihz Seu Ngamz Phraz Pen Caoh.”

35Yesuhz kaw lao phiz an diz, “Moh pras pras, lae lan thaz hnhz raez.” Phiz kaw teuk taz ihz an diz peur lah ihz, nam cih phez naehz kaai hnhz kaw lae lan.

36Keuh sangz klawhz ihz rae teur daz daehz nahz, “Naeh mony naehz awh lah? Tang a na boh taanz khoz Hnhz lao phiz ne phiz keui kaw lae lan.” 37Reu oiz Hnhz keui sirz lan tuhz eungz an diz.

Yesuhz aez ihz keui moh rak

(Matthe 8:14-17, Markus 1:29-34)

38Hnhz lae thaz crawp rawz traz rae lan kaang keuh Simon. Ihz keui maanyz Hnhz kawr keunz keuh Simon reum na baaiz. 39Hnhz kaw ceng rim keun nyah ne wah thengz reum. Reum kaw bilz, hnhz kaw rawi cih damz luat keuh.

40Meuz seu ngihz a wa keutz ne ihz keui leh truz ihz penz klawhz meoz keui cu Yesuhz. Hnhz mok tihz Daehz kaai keuh klawhz ihz rae aez keuh moh rak hacz aamz. 41Phiz keui kaw lae thaz ihz heungz keui rae raak keurz daz, “Tahz ehz naeh kuanz Phraz Pen Caoh.”

Kawp daz keuh mas Hnhz naeh Tahz Khris, Keuiz daz Hnhz kan keuh yak aez keuh lao ihz.

Yesuhz rawz tawiz crawp rawz traz

(Markus 1:35-39)

42Meuz prih a wa thaangz ne Yesuhz lae lan ti ihz pras. Ihz keui teur aacz daehz khahz Hnhz, meuz a wa awlz ne keuh lao yak aez Hnhz praasz daehz. 43Keuiz daz Hnhz lao keuh, “Tawiz weng aarz diz kaw Ohz lo rawz reu oiz rak lawng prih Phraz Pen Caoh rae Phraz Pen Caoh phuhz Ohz truz.”

44Kawp ceun diz Hnhz rawz tawiz crawp rawz traz tuhz prih Yio keui.

Currently Selected:

Lukas 4: ril

Highlight

Copy