Lukas 3

Yohn meu rae reung dengz

(Matthe 3:1-12, Markus 1:1-8, Yohn 1:19-28)

1Meuz Tiberius Kaesar penz khunz longz prih Rom a wa bawnz seu kawlz hanz wit ne Pontius Pilat penz khunz prih Yio, Herot penz caoh waz prih Kalile, seum bohz hnhz Philip samz penz caoh waz prih Iturea boh prih Trachonitis, Lisanias penz caoh waz prih Abilen. 2Annas boh Kaiaphas samz naeh ceu beunz. Meuz phangz an diz mony reu ma Phraz Pen Caoh phraeoz kaai Yohn an naeh kuanz Sekhariah, hnhz moh tuhz ruk plaangz klaacz. 3Kawp ceun diz Yohn lan rawz tawiz pruh tawiz weng waar omz Yordan daz, “Caanz reung dengz kawi rae leh teuk sruz raez. Phraz Pen Caoh ngaz plawiz reung dengz kawi pehz.” 4Ihz taangz phraz Isaiah taemz mok lawng Yohn daz,

“Maang reus raak bawrz tuhz ruk plaangz klaacz daz,

‘Meu rae reung dengz ta Phraz Cen Cen,

aez prawng keu sangz ta Hnhz nuar!

5Klawhz hotz keui thomz aez teuk krengz,

tawiz pukz keui tawiz rang keui kaw kawngz aez peng.

Reung dengz wot keui datz aez keu sangz,

reung dengz kreuk keui kaw meu rae aez yoh.

6Ceun diz ihz keui te awlz reung dengz khyawt Phraz Pen Caoh.”

7Yohn lao wungz ihz an truz leh teuk sruz a daehz keui nahz, “Kheuz heunyz raai keui aez! Yaeh aez seu tih aez pehz tiunz lae thaz phez taam Phraz Pen Caoh an ngaz phraeoz. 8Cih aez kiungz tawiz caanz reung dengz kawi daehz raez. Pehz yak daz maen daehz naeh kheuz Abraham. Phraz Pen Caoh leh kawnz reu aangz keu ni kaw cih bawnz kheuz Abraham eu. 9Tam mok tamz baetz rias khaehz ne teungz nam plaehz plaehz rak keui ngaz teunyz thengz rae leh sapz tuhz ngal.”

10Wungz ihz keui maanyz Yohn, “Ehz ngaz bawnz cih naehz hoh?”

11Yohn daz, “Ihz maang seu kaeng keu aarz keui aez ihz nam maang nahz hawkz, ihz maang seum suamz keui kaw cih ceun diz.”

12Ihz seutz khawn keui truz leh teuk sruz, keuh maanyz hnhz, “Sra, ehz ngaz bawnz cih seu naez?”

13Hnhz daz keuh nahz, “Yak seutz leuz lak ihz mawh keui tam.”

14Siukz teur ka keui kaw maanyz hnhz, “Ehz samz ngaz cih seu naez?”

Hnhz kaw tawpz daz, “Yak lawkz suamz paekz ihz, yak maap ihz, paw seu langz an daehz bawnz raez.”

15Ceun ihz keui mang Khris ngaz truz ne keuh thaang daz, “Yohn anz anz Khris haz?” 16Yohn daz keuh nahz, “Ohz aez pehz nahz teuk sruz tuhz omz, maang thaengz Hawkz an yeung truz ne mawh myaat lak ohz. Ohz nam theukz khawz nuarz cawng khlapz Hnhz. Hnhz ngaz aez pehz nahz teuk sruz tuhz Khuanz Seu Ngamz boh tuhz ngal. 17Hnhz tawnz seum pat ngohz pat tuhz paangz tiz ngohz, cakz kuhz keui sapz tuhz taen, cakz hiapz keui sapz tuhz ngal an nam ngat seu pawk.”

18Yohn lao keuh nahz mony tang meoz keui rae rawz keuh nahz reu oiz rak. 19Keuiz daz Yohn daz khunz Herot leh pleung Herotias, an naeh yah seum bohz daehz, boh an hnhz cih pleung an raai klawhz meoz. 20Khunz Herot kaw cih an pleung thaengz seu meoz ne naeh an hnhz leh Yohn sapz tuhz thang.

Yesuhz leh teuk sruz omz

(Matthe 3:13-17, Markus 1:9-11)

21Meuz ihz keui leh teuk sruz ne Yesuhz kaw leh tang Daehz. Meuz Hnhz suz tawngz ne kaang raaoz lawk, 22Khuanz Seu Ngamz cur cu saang raang kaai Hnhz naeh ceun toz raang ploiz. Maang reus truz thaz kaang raaoz daz, “Mih naeh Kuanz an Ohz yaw, an Ohz trohz phawmz.”

Craangz mus ihz keu daehz keu daepz Yesuhz

(Matthe 1:1-17)

23Meuz Yesuhz seun teungz cih kaanz Daehz, a saak Hnhz naeh kraao waiz kawlz. Ihz keui thaang Hnhz naeh kuanz Yosep, Yosep naeh kuanz Heli, 24Heli naeh kuanz Matthat, Matthat naeh kuanz Lewi, Lewi naeh kuanz Melki, Melki naeh kuanz Yannai, Yannai naeh kuanz Yosep, 25Yosep naeh kuanz Mattathias, Mattathias naeh kuanz Amos, Amos naeh kuanz Nahum, Nahum naeh kuanz Esli, Esli naeh kuanz Nakkai, 26Nakkai naeh kuanz Maath, Maath naeh kuanz Mattathias, Mattathias naeh kuanz Semein, Semein naeh kuanz Yosech, Yosech naeh kuanz Yoda, 27Yoda naeh kuanz Yoanan, Yoanan naeh kuanz Resa, Resa naeh kuanz Serupbabel, Serupbabel naeh kuanz Shealtiel, Shealtiel naeh kuanz Neri, 28Neri naeh kuanz Melki, Melki naeh kuanz Atdi, Atdi naeh kuanz Kosam, Kosam naeh kuanz Elmadam, Elmadam naeh kuanz Er, 29Er naeh kuanz Yoshua, Yoshua naeh kuanz Elieser, Elieser naeh kuanz Yorim, Yorim naeh kuanz Matthat, Matthat naeh kuanz Lewi, 30Lewi naeh kuanz Simeon, Simeon naeh kuanz Yudah, Yudah naeh kuanz Yosep, Yosep naeh kuanz Yonam, Yonam naeh kuanz Eliakim, 31Eliakim naeh kuanz Melea, Melea naeh kuanz Menna, Menna naeh kuanz Mattatha, Mattatha naeh kuanz Nathan, Nathan naeh kuanz Dawit, 32Dawit naeh kuanz Yesse, Yesse naeh kuanz Obet, Obet naeh kuanz Boas, Boas naeh kuanz Salmon, Salmon naeh kuanz Nahshon, 33Nahshon naeh kuanz Amminadap, Amminadap naeh kuanz Atmin, Atmin naeh kuanz Arni, Arni naeh kuanz Hesron, Hesron naeh kuanz Peres, Peres naeh kuanz Yudah, 34Yudah naeh kuanz Yakop, Yakop naeh kuanz Isaac, Isaac naeh kuanz Abraham, Abraham naeh kuanz Terah, Terah naeh kuanz Nahor, 35Nahor naeh kuanz Seruk, Seruk naeh kuanz Reu, Reu naeh kuanz Pelek, Pelek naeh kuanz Eber, Eber naeh kuanz Shelah, 36Shelah naeh kuanz Kainan, Kainan naeh kuanz Arphasat, Arphasat naeh kuanz Shem, Shem naeh kuanz Noah, Noah naeh kuanz Lamech, 37Lamech naeh kuanz Methuselah, Methuselah naeh kuanz Enoch, Enoch naeh kuanz Yaret, Yaret naeh kuanz Mahalalel, Mahalalel naeh kuanz Khenan, 38Khenan naeh kuanz Enosh, Enosh naeh kuanz Set, Set naeh kuanz Adam, Adam naeh kuanz Phraz Pen Caoh.

Currently Selected:

Lukas 3: ril

Highlight

Copy