Lukas 20

A na Yesuhz

(Matthe 21:23-27, Markus 11:27-33)

1Naeh seu seu ngihz Yesuhz sawnz aez tang rawz aez reu oiz rak tuhz wat, beunz caangz, ihz mawz kyaamz boh ihz peur aacz keui truz maanyz Hnhz daz, 2“Lao aez ehz nahz raez, Mih leh a na yaeh cih keu ni? Yaeh aez Mih nahz a na an ni?”

3Hnhz mial daz keuh nahz, “Ohz kaw ngaz maanyz pehz nahz seu meoz, lao Ohz nahz raez. 4Teuk sruz Yohn ne naeh a na an truz thaz Phraz haz, thaz ihz haz?”

5Keuh teur deuiz teur daz daehz nahz, “Beuk ehz daz thaz Phraz kaw Hnhz ngaz maanyz thaengz cih naehz pehz nam yum Yohn hoh? 6Beuk ehz daz thaz ihz kaw ihz keui leh kawnz reu aangz wiurz sapz ehz kawp daz keuh mok Yohn naeh ihz taangz phraz.” 7Kawp ceun diz keuh daz, “Ehz nam mas penz truz thaz naez.”

8Yesuhz kaw mial daz keuh nahz, “Ohz kaw nam lao pehz, Ohz leh a na yaeh cih keu ni.”

Ihz khaatz sraakz

(Matthe 21:33-46, Markus 12:1-12)

9Yesuhz lao ihz nahz mony pung taek an ni daz, “Maang ihz hawkz peuk seumz sraakz seu pit rae khaatz aez ihz nahz sraakz daehz, hnhz praasz lan prih yaan heungz wit baaiz. 10Meuz kraao plaehz a wa trohz leh ne hnhz cao kuanz leng daehz hawkz truz maanyz langz khaatz sraakz. Keuiz daz ihz khaatz sraakz keui tiz hnhz, plawiz weng toz maat. 11Hnhz kaw plawiz lan thaengz kuanz leng hawkz, ihz khaatz sraakz keui kaw tiz hnhz, cih aez hnhz keu sehz rae plawiz weng thaengz toz maat. 12Plawiz lan thaengz hawkz kaw keuh tiz thanz paw penz puatz rae wah thaengz. 13Tahz sraakz an diz kaw daz mial daehz eunz, ‘Ohz ngaz cih seu naez ez? Ohz ngaz cao kuanz an ohz yaw ne lan. Keuh te caang nap suamz boh kuanz ohz keuiz.’ 14Meuz ihz khaatz sraakz keui awlz kuanz hnhz ne keuh teur daz daehz nahz, ‘Hnhz an ni naeh kuanz tahz sraakz eu, piamz thengz hnhz, beuk ehz cih ceun diz a moi hnhz keui naeh khangz ehz keuiz.’ 15Keuh kaw leh hnhz lae lang nawk sraakz ne piamz thengz hnhz.

Beuk naeh ceun diz pehz thaang tahz sraakz ne ngaz cih seu naez a keuh? 16Hnhz ngaz truz piamz thengz ihz khaatz sraakz keui hacz aamz rae khaatz aez thaengz ihz hawkz nahz boh.”

Meuz ihz keui ngarz an diz ne daz, “Yak aez naeh ceun diz.”

17Yesuhz yiang yawt keuh rae daz keuh nahz, “Beuk naeh ceun diz, tuhz kyaamz lik taemz mok daz seu naez?

Reu aangz ihz cih kaang keui mok thengz ne

penz mial reu aangz seu dukz thaz cawkz boh.

18Ihz klaez sapz kaai reu aangz ne ihz an diz ngaz peukz penz patz, kaai ihz reu aangz klaez sapz samz ihz an diz ngaz nyawi.”

Lawng thaamz khawn

(Matthe 22:15-22, Markus 12:13-17)

19Ihz mawz kyaamz boh beunz caangz keui kyaam mat luat Yesuhz kawp daz keuh mas Hnhz leh mony pung taek an ni upz phaat daehz. Keuiz daz keuh doz ihz. 20Kawp ceun diz keuh pao yawt Hnhz, phuhz ihz ceu dakz keui seuk cih daehz naeh ceun ihz rak rae maanyz Yesuhz, ceu dakz khahz kaai mony reu ma Hnhz pleung rae ngaz aapz tuhz tihz khunz prih Rom an maang a na taanz khoz. 21Ihz cung caamz keui maanyz Yesuhz daz, “Sra, ehz mas Mih naeh ihz lao sawnz an anz, nam wiar ngaai yaeh, sawnz aez traz Phraz Pen Caoh an anz keui. 22Lao ehz luz, ehz thaamz khawn khunz Kaesar ne anz tawiz traz ehz haz, nam haz?”

23Yesuhz mas keuh ceu dakz Daehz rae daz keuh nahz, 24“Plaez Ohz nahz paekz ron seu pyaz luz, naeh raang yaeh, taemz mok mus yaeh?”

Keuh kaw daz, “Naeh khunz longz Kaesar.”

25Yesuhz kaw lao keuh nahz, “Khangz khunz kaw aez khunz raez, khangz Phraz kaw aez Phraz raez.”

26Keuh ceu dakz khahz mony reu ma aacz ngaai ihz heungz kaw nam caang cih seu naez, sangz mony reu ma Hnhz lao rae moh pras pras.

Caat te truz

(Matthe 22:23-33, Markus 12:18-27)

27Cumz Saduse an nam yum meu rae imz keui truz cu Yesuhz rae maanyz, 28“Tahz sra, Moses taemz mok ehz nahz, ihz leh yah nam maang kuanz yam lan ne seum bohz hnhz bawnz leh mial mawm daehz, yak aez ceu kheuz mai daehz dutz da. 29Maang kuanz mai keur meh teu pulz, mai mawh keuh leh yah, maat tan maang kuanz samz yam. 30Seum bohz hnhz leh mial mawm daehz kaw maat tan maang kuanz, yam thaengz. 31Samz seum bohz keuh siupz leh thaengz kaw yam tang daehz, keuh kuanz mai teu pulz ne an nae kaw nam maang kuanz, yam hacz aamz. 32Thaz puatz, keun nyah an diz kaw yam. 33Kawp ceun diz co meu rae imz ne keun nyah an diz ngaz penz yah yaeh? Keuh kuanz mai teu pulz ne a wa leh hacz hnhz.”

34Yesuhz kaw daz, “Ihz tuhz prih keu tehz keui leh tahz leh yah. 35Keuiz daz kaai ihz yam meu rae imz tui nam teur leh daehz, nam kopz ku daehz leui. 36Keuh naeh ceun teu maan kaang raaoz, nam yam leui. Kawp keuh naeh kuanz Phraz Pen Caoh rae keuh a wa naeh kuanz meu rae imz. 37Tuhz kyaamz Moses, kaai raet yum khaehz ne lao loz rak baaiz lawng ihz yam meu rae imz. Hnhz naeh Phraz Abraham, Phraz Isaac boh Phraz Yakop. 38Hnhz nam anz Phraz ihz yam, naeh Phraz ihz imz. Kawp daz keuh keu diz imz tuhz Phraz Pen Caoh.”

39Ihz mawz kyaamz teur ka keui daz Yesuhz nahz, “A wa tawz baaiz, Tahz sra.” 40Kaanz diz lan yaeh nam yaak maanyz Hnhz nahz naehz.

Khris naeh kuanz yaeh?

(Matthe 22:41-46, Markus 12:35-37)

41Yesuhz maanyz keuh, “Ihz keui daz Khris naeh kuanz khunz Dawit ne ngaz penz bawnz ceun nae? 42Khunz Dawit lao tuhz kyaamz Saam ne daz,

‘Phraz Cen Cen daz Tahz ehz nahz,

‘Keu dez plaakz takz kaaiz Ohz raez,

43thonz taw Ohz leh raan su Mih mok ti tam cawng Mih.’

44Toz khunz Dawit raak Khris naeh Tahz daehz kaw Hnhz ngaz cih seu naez penz kuanz khunz Dawit?”

Wiar thengz ihz mawz kyaamz

(Matthe 23:1-36, Markus 12:38-40)

45Meuz ihz keui yeung teuk ngarz ne Yesuhz lao teu paez Daehz nahz, 46“Wiar thengz ihz mawz kyaamz keui raez! Keuh song kap seu kaeng hanz khahz lan tawiz aarz diz, sunz aez ihz nap suamz daehz, tak daehz tawiz teur laas, song tangz keu dez laep tawiz crawp rawz traz boh tawiz pawiz. 47Rimz leh kreung kaang yah keu maaiz, seuk cih daehz naeh ceun ihz rak rae suz tawngz plaez ihz nahz hanz hanz. Keuh ngaz talz taam leuz ihz.”

Currently Selected:

Lukas 20: ril

Highlight

Copy