Lukas 19

Yesuhz boh Sakkhaeus

1Yesuhz datz kut tuhz weng Yerikho. 2Tuhz weng an diz maang ihz mawh seutz khawn hawkz, mus hnhz daz Sakkhaeus, hnhz naeh ihz maang. 3Hnhz sunz awlz Yesuhz, keuiz daz hnhz naeh ihz pakz, nam awlz bawnz Yesuhz kawp daz wungz ihz heungz. 4Hnhz wang lan aacz ngaai ihz, raw khaehz laangz wah, pao yawt reung dengz an Yesuhz ngaz truz. 5Meuz Yesuhz phraeoz a diz ne ngaw yawt hnhz rae daz, “Sakkhaeus, cur truz luat raez! Meu ni Ohz ngaz cih khaekz kaang pehz.”

6Sakkhaeus kaw cur luat rae seuz phawmz saanyz Yesuhz weng kaang daehz. 7Meuz ihz keui awlz ne teur aacz daehz saehz daz, “Hnhz an ni cih khaekz ihz maang reung dengz kawi.”

8Sakkhaeus ceng lao Caoh Phraz daz, “Ohz ngaz aez ihz phaanz nahz phrihz phrahz daehz seu khinz, beuk ohz upz leh maen khangz ihz kaw aez mial ponz pun.”

9Yesuhz lao Sakkhaeus nahz, “Seu ngihz meu ni reung dengz khyawt a wa phraeoz tuhz kaang an ni, kawp daz hnhz kaw naeh kuanz Abraham. 10Kawp daz Kuanz Ihz ne truz khahz khyawt ihz bilz.”

Pung taek lawng kuanz leng seu kawlz

(Matthe 25:14-30)

11Yesuhz lao ihz teuk ngarz traz keui nahz mony pung taek kawp Hnhz a wa naeh thatz weng Yerusalem, kawp daz ihz keui thaang prih Phraz Pen Caoh ne ngaz tae luat. 12Hnhz daz, “Maang caoh waz hawkz, hnhz ngaz lan cih khunz rae lae nawk prih kaw hnhz weng truz mial. 13Meuz maat lan ne raak kuanz leng daehz seu kawlz, aez keuh nahz khamz ihz teur pyaz, daz keuh nahz, ‘Leh khamz keu ni khahz ka thonz taw ohz phraeoz mial tui raez.’ 14Keuiz daz ihz prih an ceuh hnhz keui cao ihz taangz daehz lao daz, ‘Ehz nam dawhz hnhz cih khunz ehz.’

15Meuz caoh waz an diz penz khunz weng truz mial ne sunz mas kuanz leng daehz an daehz lao mok, an aez mok khamz keui bawnz a myaat seu naeh rae raak truz maanyz keuh. 16Kuanz leng hawkz truz daz, ‘Tahz, ohz leh khamz mih seu pyaz ne bawnz a myaat seu khanz.’ 17Khunz an diz daz, ‘Kyahz baaiz, tawiz an kyehz kaw mih maang saet ca, upz peung mih nahz seu kawlz weng raez.’ 18Thaengz hawkz kaw truz daz, ‘Tahz, ohz leh khamz mih seu pyaz ne a wa bawnz a myaat hanz pyaz.’ 19Khunz an diz kaw daz, ‘Upz peung mih nahz hanz weng raez.’ 20Thaengz hawkz samz truz daz, ‘Tahz, khamz mih naeh a niz, ohz leh pahz cet tawmz mok. 21Ohz mas, kawp daz mih cih kreuk, seutz tawiz ti daehz nam tam rae woc tawiz ti daehz nam plihz.’ 22Khunz an diz daz, ‘Euz, kuanz leng raai, ohz ngaz tatz traz tawiz mony reu ma mih. Beuk mih mas ohz cih kreuk, seutz tawiz ti ohz nam tam, woc tawiz ti ohz nam plihz ne, 23leh khamz ohz nam aez mok tawz ihz plawiz yangz hoh?’ Beuk mih cih ceun diz ohz bawnz tang yangz eu. 24Khunz an diz lao ihz ceng rim daehz keui nahz, ‘Leh khamz a hnhz ne aez ihz maang seu khanz nahz.’ 25Keuh kaw daz, ‘Hnhz paw a wa maang seu khanz hoh!’ 26Khunz kaw daz, ‘Kaai ihz maang ne ohz ngaz aez thaengz, kaai ihz nam maang ne leh thengz tang seu keuh maang. 27Seu ni leh truz tang raan su ohz, an nam sunz aez ohz penz khunz daehz keui, piamz keuh aacz ngaai ohz.’”

Yesuhz kut tuhz weng Yerusalem

(Matthe 21:1-11, Markus 11:1-11, Yohn 12:12-19)

28Meuz Yesuhz a wa lao ceun diz ne lan aacz ngaai ihz, lan weng Yerusalem. 29Meuz ngaz phraeoz pruh Betphake boh pruh Bethani, rim teungz rang an ihz daz rang Olip ne cao teu paez Daehz keu aarz lan aacz ngaai. 30Hnhz seumz kaar nahz, “Kut tuhz pruh an naeh aacz ngaai paarz, paarz te awlz meu rang mahz liz an yaeh maat ti tumz ne tukz mok. Khawz nuarz leh truz a niz raez. 31Beuk ihz maanyz, cih naehz khawz nuarz mahz liz daz kaw, ‘Tahz ehz lo,’ daz ceun ni.”

32Kaar kaw lan awlz ceun Yesuhz lao kaar klawhz meoz. 33Meuz kaar yeung khawz nuarz mahz liz ne tahz mahz liz maanyz, “Cih naehz, khawz nuarz mahz liz a?”

34Kaar kaw mial daz, “Tahz ehz lo.” 35Kaar leh truz cu Yesuhz, kaar leh kreung daehz paelz kaai butz mahz liz rae aez Yesuhz tumz. 36Meuz Hnhz tumz lan boh ne ihz keui leh kreung daehz paelz tawiz reung dengz.

37Meuz Hnhz ngaz phraeoz rim weng Yerusalem, paerz rang Olip ne wungz ihz an naeh teu paez keui seuz phawmz seun teungz ngawk lupz phrawz Phraz Pen Caoh usz usz tawiz an keuh awlz taanz khoz an Hnhz cih plaez hacz aamz. 38Keuh raak daz, “Phraz Pen Caoh aez reung dengz rak kaai khunz an truz kaai mus Phraz Cen Cen. Reung dengz nimz aez naeh lang kaang raaoz, aez bunz naeh tawz Phraz Pen Caoh!”

39Pharise teur ka an naeh tuhz wungz ihz keui lao Yesuhz daz, “Tahz sra, lao teu paez Mih keui moh pras pras!”

40Hnhz kaw mial daz, “Ohz daz pehz nahz, beuk keuh moh pras kaw kawnz reu aangz keui ngaz raak keurz boh.”

Yesuhz yaam ta weng Yerusalem

41Meuz Yesuhz thatz weng Yerusalem ne awlz weng an diz rae yaam daz, 42“Khanz mih mas kraao seu ni naeh lawng an cih aez penz truz reung dengz nimz ne te rak baaiz. Keuiz daz seu ni an keu diz yeung seun tapz mok ngaai mih. 43Kraao raan su mih keui cih peun lawm rae khangz wit wit mih ne ngaz naeh. 44Keuh te ya mih boh ihz an naeh tuhz peun lawm weng mih hacz aamz keui aez teuk krengz keu tehz, kawnz reu aangz an peun baetz teur sawnz keui thanz paw nam kiutz hawkz hawkz, kawp daz mih nam mas kraao Phraz Pen Caoh truz yawt daehz.”

Yesuhz kut tuhz wat

(Matthe 21:12-17, Markus 11:15-19, Yohn 2:13-22)

45Meuz Yesuhz kut tuhz wat ne wah thengz ihz saz toz satz pukz caw keui. 46Hnhz daz keuh nahz, “Tuhz kyaamz lik taemz mok, ‘Kaang Ohz naeh ti suz tawngz’ da, keuiz daz pehz cih aez hnhz naeh tham conz.”

47Yesuhz sawnz aez tuhz wat klawhz seu ngihz. Beunz caangz keui, ihz mawz kyaamz keui, tang ihz peur aacz keui kyaam piamz Hnhz. 48Keuiz daz keuh nam caang, kawp daz maen phangz ihz keui maang phawmz teuk ngarz mawn mawn mony reu ma Hnhz sawnz.

Currently Selected:

Lukas 19: ril

Highlight

Copy