Lukas 18

Pung taek yah keu maaiz boh ihz tatz traz

1Yesuhz leh tang mony pung taek daz teu paez Daehz nahz, keuh lo suz tawngz se se, nam lo klaez phawmz daz, 2“Tuhz weng hawkz ne maang ihz tatz traz hawkz nam doz suamz Phraz, nam saangz suamz ihz. 3Maang yah keu maaiz hawkz moh tuhz weng an diz kai lan krio ihz tatz traz daz, ‘Cih aez ohz pae kaai ihz maap ohz.’ 4Ihz tatz traz an diz mok thengz yah keu maaiz eunz ceu nawhz taan taan. Keuiz daz laehz thaz puatz ne hnhz daz mial daehz eunz, ‘Ohz nam doz suamz Phraz, nam saangz suamz ihz. 5Ohz ngaz moh thaz keun nyah ne tatz aez traz, beuk nam cih aez kaw hnhz truz krio ohz tikz tikz, hnhz cih aez ohz reu.’”

6Caoh Phraz lao lan thaengz, “Pehz teuk ngarz yawt mony reu ma ihz tatz traz an diz lah. 7Ihz Phraz Pen Caoh ras mok keui beuk keuh raak maanyz seu ngih teuk bimz ne anz Hnhz te hinz kawr haz? 8Hnhz ngaz tatz traz plaakz keuh raamz rip. Keuiz daz meuz Kuanz Ihz mial truz ne anz Hnhz ngaz awlz reung dengz yum tuhz prih keu tehz?”

Pharise boh ihz seutz khawn

9Yesuhz lao mony pung taek ihz thaang daehz rak rae thaang laerz ihz keui nahz daz, 10“Maang ihz keu aarz lan suz tawngz tuhz wat, hawkz naeh Pharise, hawkz samz naeh ihz seutz khawn. 11Pharise ceng daehz ne suz tawngz daz, ‘Kez cuz mawh baaiz Phraz Pen Caoh, kawp ohz nam naeh ceun ihz teur ka, an naeh conz, ihz meukz, ihz pleung kamesuhz, neuz lak an diz ohz nam naeh ceun ihz seutz khawn an ni. 12Teur wong ne ohz kaerz seum suamz aarz laehz, seu ohz bawnz truz ne, ohz aez seu kawlz pun seu pun.’ 13Ihz seutz khawn samz ceng teun yaan, nam yaak ngaw yawt lang kaang raaoz, phak sapz seu ongz daehz, tang phawmz kyehz ne daz, ‘Phraz Pen Caoh aez, teur yawng ohz, ohz naeh ihz maang reung dengz kawi.’ 14Ohz lao pehz nahz, meuz kaar weng kaang daehz ne, ihz seutz khawn ne keu sangz lak ihz Pharise aacz ngaai Phraz Pen Caoh. Ihz lupz daehz keui ngaz klaez daelz, ihz mok daehz daelz keui samz ngaz raw trawng.”

Yesuhz aez reung dengz rak kuanz ihz

(Matthe 19:16-30, Markus 10:17-31)

15Ihz keui leh kuanz ihz truz cu Yesuhz, aez Hnhz leh tihz Daehz taangz lang kol keuh rae aez reung dengz rak. Teu paez Hnhz keui awlz ihz keu diz cih ceun diz rae nal keuh. 16Keuiz daz Yesuhz raak kuanz ihz keu diz truz cu Daehz daz, “Aez kuanz ihz keui truz cu Ohz raez, yak kan keuh. Kawp daz prih Phraz Pen Caoh ne naeh prih ceun keuh. 17Ohz daz mawn pehz nahz, ihz an nam saanyz rap prih Phraz Pen Caoh ceun kuanz ihz ne nam bawnz kut.”

Ihz maang

(Matthe 19:16-30, Markus 10:17-31)

18Ihz mawh Yio hawkz truz cu Yesuhz rae maanyz, “Sra Rak, aez ohz caam phawmz cen cen ne lo cih naehz?”

19Yesuhz mial daz hnhz nahz, “Cih naehz raak Ohz Sra Rak a? Neuz lak Phraz Pen Caoh ne yaeh nam rak. 20Mih mas boh sinz, ‘Yak kawi kamesuhz, yak piamz ihz, yak rah khangz ihz, yak upz an nam anz, nap suamz mah paz daehz.’”

21Hnhz kaw lao Yesuhz, “Sinz keu diz ohz a wa cih tawiz thaz meuz yeung plung.”

22Meuz Yesuhz ngarz ne daz hnhz nahz, “Mih yeung lo thaengz seu meoz. Saz phrihz phrahz mih hacz aamz, teur phraez aez ihz phaanz keui nahz, mih ngaz penz ihz maang lang kaang raaoz. Beuk a wa kaw lan tawiz Ohz.” 23Meuz ihz an diz ngarz ne phawmz kyehz baaiz kawp daz hnhz naeh ihz maang longz.

24Yesuhz awlz phawmz hnhz pleung rae daz, “Ihz maang keui kut kreuk baaiz tuhz prih Phraz Pen Caoh! 25Meu rang maang soz kut tuhz bawngz peun lac ne yoh lak ihz maang kut tuhz prih Phraz Pen Caoh.”

26Ihz an ngarz keui kaw maanyz, “Yaeh ngaz bawnz reung dengz khyawt hoh?”

27Yesuhz mial daz, “An ihz cih nam penz bawnz ne Phraz Pen Caoh cih penz bawnz.”

28Petros lao Hnhz, “Ehz cunz hacz aamz rae lan tawiz Mih.”

29Yesuhz kaw lao keuh, “Ohz daz mawn pehz nahz, ihz cunz kaang nam anz kaw cunz yah, kuanz mai, mah paz boh kuanz ihz kawp prih Phraz Pen Caoh ne 30bawnz mial heungz baaiz kaai caat ni nam kaz caat te truz kaw bawnz phawmz cen cen.”

Yesuhz lao teuk aacz kaai waiz laehz lawng Daehz ngaz yam

(Matthe 20:17-19, Markus 10:32-34)

31Yesuhz raak teu maan Daehz seu kawlz aarz rae daz keuh nahz, “Yawt, seu ni ehz lan weng Yerusalem. Ihz taangz phraz taemz mok lawng Kuanz Ihz hacz aamz ne ngaz penz a diz. 32Hnhz talz ihz aapz Daehz kaai ihz an nam anz kheuz Yio, keuh cih peuk pyaak, pae suamz, teuk chuz sapz Hnhz nahz omz nyaangz. 33Keuh ngaz tiz Hnhz, piamz Hnhz, keuiz daz moh waiz seu ngihz Hnhz te meu rae imz boh.”

34Keuiz daz keuh nam loz phawmz mony reu ma Yesuhz daz naehz. Kawp daz ti loz mony reu ma an diz yeung seun tapz keuh nahz rae nam mas Yesuhz lao naehz.

Yesuhz seuk neum ihz yawn ngaai lapz

(Matthe 20:29-34, Markus 10:46-52)

35Meuz Yesuhz phraeoz thatz weng Yerikho ne maang ihz ngaai lapz hawkz maanyz suamz boh a waar reung dengz. 36Meuz hnhz ngarz ihz keui datz lan ne hnhz maanyz ihz cih naehz.

37Ihz lao hnhz nahz, “Yesuhz ihz weng Nasaret datz lan.”

38Hnhz raak bawrz daz, “Yesuhz, kuanz khunz Dawit, teur yawng ohz raez!”

39Sangz daz ihz lan aacz keui hiutz hnhz aez moh pras pras kaw hnhz baaiz yeung daz usz, “Kuanz khunz Dawit, teur yawng ohz raez.”

40Yesuhz deukz lao aez ihz keui leh truz ihz ngaai lapz cu Daehz. Meuz hnhz a wa naeh thatz ne Yesuhz maanyz hnhz nahz, 41“Sunz aez Ohz cih aez mih nahz naehz?”

Hnhz kaw daz, “Tahz, ohz sunz awlz!”

42Yesuhz kaw mial daz, “Aez awlz! Reung dengz yum mih ne a wa cih aez mih rak.”

43Meuz diz luat ihz an diz kaw a wa awlz, hnhz lan tawiz Yesuhz, lupz phrawz kez cuz Phraz Pen Caoh. Meuz wungz ihz keui awlz ne teur aacz daehz lupz phrawz Phraz Pen Caoh.

Currently Selected:

Lukas 18: ril

Highlight

Copy