Lukas 17
17
Reung dengz kawi
(Matthe 18:6-7,21-22, Markus 9:42)
1Yesuhz lao teu paez daehz nahz, “An caang cih aez pleung keui ngaz naeh. Keuiz daz ihz an cih aez ihz pleung ne naeh an nam rak. 2Kaai ihz ceun diz nahz, leh reu aangz mawh hawiz kokz hnhz rae wiurz sapz tuhz paang laai ne baaiz rak lak cih aez kuanz ihz keui pleung.
3Seu tih toz daehz raez.
Beuk kuanz mai pehz cih pleung kaw lao sawnz hnhz, beuk hnhz caanz daehz eunz kaw plawiz lawt aez hnhz. 4Beuk hnhz cih teuk pleung mih seu seu ngihz pan pulz laehz, samz daz ‘Ohz a wa caanz kaw, pehz bawnz plawiz lawt reung dengz kawi hnhz.’”
Reung dengz yum
5Teu maan keui daz Caoh Phraz nahz, “Cih aez reung dengz yum ehz heungz.”
6Caoh Phraz lao keuh nahz, “Beuk pehz maang reung dengz yum seu #17:6 Cakz mustart naeh seu cakz mul.cakz mustart kaw lao teungz laangz wah nahz, ‘Seuk bawkz tang rias daehz, lan peuk ceukz imz tuhz paang laai raez!’ Daz kaw hnhz teuk ngarz pehz.”
Kaanz kuanz leng
7“Khanz daz tuhz pehz ne maang kuanz leng hawkz weng truz thaz thaiz maar nam anz kaw weng truz thaz khaenz soz ne, anz pehz ngaz daz hnhz nahz, ‘Truz suamz luat raez’? 8Nam daz ceun diz keuiz. Pehz daz hnhz nahz, ‘Raenz pheunz kaaiz damz aacz ohz raez, beuk ohz a wa saakz tui mih caang suamz.’ 9Kuanz leng an diz cih tawiz an tahz paz leng daehz lao mok. Anz tahz paz lengz hnhz lo tawpz aez kez cuz hnhz haz? Nam lo keuiz. 10Pehz kaw naeh ceun diz, meuz pehz cih teuk wa kaanz an tahz pehz cao ne pehz te daz, ‘Ehz naeh ihz cih aez kez cuz kaai tahz ehz nam anz, ehz cih tawiz an hnhz cao pan.’”
Ihz tut seu kawlz
11Meuz Yesuhz lan weng Yerusalem ne lan tawiz peur lah prih Samaria boh prih Kalile. 12Meuz Hnhz ngaz kut tuhz pruh seu pruh ne maang ihz tut seu kawlz truz saanyz Hnhz. Keuh ceng raamz yaan, 13raak usz usz daz, “Yesuhz, Tahz, teur yawng ehz!”
14Meuz Hnhz awlz ne daz keuh nahz, “Lan plaez toz pehz tawz saangz longz keui raez.”
Meuz keuh lan tawiz reung dengz ne keuh a wa rak. 15Tuhz keuh ne naeh hawkz, awlz daehz a wa rak rae truz cu mial Yesuhz, raak usz usz lupz phrawz Phraz Pen Caoh. 16Hnhz truz kupz rim cawng Yesuhz daz kez cuz mawh. Ihz an diz naeh ihz Samaria. 17Yesuhz maanyz, “Nam anz ihz seu kawlz haz, an a wa rak meu rae a? Hawz hoh, timz a? 18Naeh taw ihz taang kheuz an ni pan truz cu mial, lupz phrawz Phraz Pen Caoh a?” 19Yesuhz kaw daz hnhz nahz, “Ceng, lan raez, reung dengz yum mih cih aez mih bilz.”
Prih Phraz Pen Caoh ngaz tae
(Matthe 24:23-28,37-41)
20Pharise teur ka maanyz Yesuhz, “Prih Phraz Pen Caoh ngaz tae peuk naeh?” Yesuhz mial daz, “Prih Phraz Pen Caoh nam tae kaai an ngaai ihz caang awlz. 21Pehz nam caang daz, yawt a niz, yawt a tui kawp daz prih Phraz Pen Caoh naeh tuhz pehz.”
22Yesuhz lao teu paez Daehz keui nahz, “Kraao pehz sunz awlz seu ngihz Kuanz Ihz ne ngaz phraeoz, keuiz daz pehz te nam awlz. 23Ihz keui ngaz lao pehz nahz, ‘Yawt a tui, yawt a niz,’ keuiz daz pehz yak lan tawiz. 24Seu ngihz Kuanz Ihz ne naeh ceun laak lawk aasz keum yaamz lang plengz ceng taw ceng. 25Meuz maat naeh ceun diz Kuanz Ihz ne ngaz talz peur teuk heungz rae, ihz co an ni ngaz thiangz thengz hnhz. 26Meuz seu ngihz Kuanz Ihz truz ne naeh ceun co Noah. 27Ihz keui suamz suamz tiangz tiangz, leh tahz leh yah taw phraeoz seu ngihz Noah kut tuhz ceun luang rae omz lumz teuk yam keuh hacz aamz. 28Meuz co Lot kaw naeh ceun diz, ihz keui suamz suamz tiangz tiangz, saz saz yal yal, plihz plihz buiz buiz, teur aacz daehz cih kaang. 29Seu ngihz Lot lae thaz weng Sodom ne cung ngal kaanz klaez truz thaz kaang raaoz rae teuk yam keuh hacz aamz. 30Kaai seu ngihz Kuanz Ihz paw truz tui kaw ngaz naeh ceun diz.
31Kaai seu ngihz an diz ihz naeh lang kusz kaang keui aez tiunz luat rae yak aez hnhz cur leh phrihz phrahz daehz tuhz kaang. Ihz naeh tawiz sraakz maar keui kaw aez tiunz luat rae yak aez hnhz weng kaang daehz. 32Tang tang lawng yah Lot raez. 33Ihz khyawt aez phawmz daehz lawt ne ngaz luh sumz, ihz luh sumz phawmz ne ngaz bawnz khyawt. 34Ohz lao pehz nahz, meuz borz an diz ihz keu aarz yaetz kuz kawmz ne hawkz talz leh lan, hawkz samz kiutz mok. 35Keun nyah keu aarz leui ngohz teur kawmz kaw hawkz talz leh lan, hawkz samz kiutz mok.” 36Ihz keu aarz naeh tuhz na kaw, hawkz talz ihz leh lan, hawkz samz kiutz.
37Teu paez keui maanyz Hnhz daz, “Ngaz penz a naez hoh?”
Yesuhz kaw lao, “Toz yam naeh a naez kaw, klaangz ta waet a diz.”
Currently Selected:
Lukas 17: ril
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
