Teu Maan Caoh 8

Saul pae suamz cumz caoh

1Meuz ihz piamz Stephen ne, Saul kaw naeh a diz penz phawmz keuh. Meuz ceun diz cumz caoh tuhz weng Yesusalem ne talz ihz pae suamz mawn baaiz. Neuz lak teu maan pan ihz yum yam keui baak beuz lan prih Yio boh prih Samaria. 2Ihz an nap suamz Phraz Pen Caoh keui saangz keo Stephen rae yaam seutz yaam krai. 3Keuiz daz Saul ya cumz caoh. Hnhz kut seu kaang lae seu kaang botz laak ihz yum keur meh boh keun nyah keui mok tuhz thang.

Philip rawz reu oiz rak tuhz prih Samaria

4Ihz yum yam an beuz lan klawhz ti keui rawz reu oiz rak Phraz Pen Caoh. 5Philip kaw lan cu prih Samaria rae rawz reu oiz rak Tahz Khris. 6Meuz wungz ihz keui bawnz ngarz mony Phraz Philip rawz boh bawnz awlz an laak laaiz hnhz cih ne teur aacz daehz teuk ngarz rak baaiz. 7Kawp daz phiz an kut tuhz ihz keui kaw raak keurz lae lan. Ihz yam seu plaakz, ihz cawng yam keui kaw rak lan. 8Kawp ceun diz ihz tuhz weng keu diz seuz baaiz.

Simon ihz mawz a taat

9Tuhz weng an diz maang ihz hawkz mus hnhz daz Simon ne leh a taat daehz cih aez kheuz Samaria keui sangz daehz a wa ceu nawhz baaiz daz daehz naeh ihz myaat. 10Temz ihz maang ihz phaanz keui teuk ngarz mony hnhz, keuh daz, “Ihz an ni naeh taanz khoz mawh Phraz Pen Caoh.” 11Ihz keui teur aacz daehz teuk ngarz mony hnhz kawp daz hnhz leh a taat phiz cih an rak seum sangz a wa ceu nawhz baaiz. 12Keuiz daz ihz keui yum mony Philip rawz lawng prih Phraz Pen Caoh boh lawng Tahz Yesuhz Khris ne temz keur meh, temz keun nyah keui teur aacz daehz leh teuk sruz omz. 13Toz Simon kaw yum rae leh teuk sruz tang daehz. Waaiz an diz hnhz moh kawmz Philip ne awlz rak seum sangz an mawh boh an laak laaiz keui rae sangz baaiz. 14Teu maan an naeh tuhz weng Yerusalem keui ngarz reu oiz ihz prih Samaria keui saanyz rap mony reu ma Phraz Pen Caoh ne keuh cao Petros boh Yohn lan cu Samaria. 15Meuz kaar phraeoz ne suz tawngz aez ihz yum yam keui aez keuh saanyz rap Khuanz Seu Ngamz. 16Kawp daz Khuanz Seu Ngamz maat ti cur cu yaeh kaai keuh seu pawk, keuh taamz leh teuk sruz kaai mus Tahz Yesuhz pan. 17Petros boh Yohn leh tihz daehz taangz lang kol keuh ne keuh bawnz khaam leh Khuanz Seu Ngamz. 18Simon awlz Khuanz Seu Ngamz cur truz kaai ihz an kaar leh tihz taangz ne, hnhz leh truz paekz aez kaar nahz, 19maanyz kaar, “Aez tang ohz nahz taanz khoz aez Khuanz Seu Ngamz cur truz kaai ihz an ohz leh tihz daehz taangz.” 20Petros mial daz hnhz nahz, “Kawp daz mih leh paekz daehz kyaam yal kez cuz Phraz Pen Caoh rae aez mih luh kawmz paekz daehz. 21Mih nam kapz kaai kaai kaanz ehz, kawp daz mih phawmz wot aacz ngaai Phraz Pen Caoh. 22Kawp ceun diz seuk weur phawmz suz tawngz aez Phraz Cen Cen plawiz lawt an mih kyaam meukz seu ni ne. 23Ohz awlz phawmz mih seuk ke baaiz, klaez tuhz reung dengz kawi.” 24Simon kaw tawngz paan keuh, “Yak aez ohz talz meoz an pehz lao ne suz tawngz aez ohz nahz.” 25Waaiz Petros boh Yohn krai saak se mony reu ma Tahz Yesuhz ne kaar weng cu mial weng Yerusalem. Kaai reung dengz tawiz pruh tuhz prih Samaria ne kaar rawz reu oiz rak Phraz Pen Caoh.

Philip boh ihz mawh prih Ethiopia

26Teu maan kaang raaoz Phraz Cen Cen hawkz lao Philip daz, “Mih lan thaz seun daalz, cu kaai reung dengz weng Yerusalem lan weng Kasa raez.” 27Hnhz kaw ceng lan. Tawiz reung dengz ne maang khunz prih Ethiopia, hnhz naeh ihz peun tawngz rae naeh ihz yawt phan ta naang haw khamz Kandac. Hnhz lan koz kwaai tawz weng Yerusalem, 28tumz law meu rang weng truz mial. Hnhz rawz kyaamz lik Isaiah kaai law daehz ne. 29Khuanz Seu Ngamz lao Philip daz, “Lan thatz thatz law ne raez.” 30Philip kaw wang lan cu thatz law meu rang ne ngarz reus rawz kyaamz lik ihz taangz phraz Isaiah rae maanyz ihz an diz daz, “Anz mih loz phawmz?” 31Ihz mawh an diz tawpz daz, “Beuk nam maang ihz sawnz aez ne cih seu naez loz phawmz bawnz?” A wa daz ceun diz kaw raak Philip raw keu dez kawmz daehz. 32Tuhz kyaamz lik an hnhz rawz ne daz, “Hnhz naeh ceun soz an leh lan tawz ihz piamz, naeh ceun soz kyehz ihz raiz hukz nam rawhz ne hnhz kaw moh pras pras. 33Meuz hnhz talz ihz phyaakz sre daehz ne keuh tatz traz nam phrengz hawkz hawkz. Yaeh nam caang lao plaez kheuz hnhz leui? Kawp ihz phreoz thengz phawmz hnhz tuhz prih keu tehz.” 34Ihz mawh maanyz Philip daz, “Ihz taangz phraz daz lawng yaeh? Daz lawng daehz haz, lawng ihz haz? Lao ohz luz.” 35Meuz ceun diz Philip kaw seun teungz leh kaai kyaamz lik an diz lao plaez reu oiz Tahz Yesuhz. 36Meuz kaar lan tawiz reung dengz ne phraeoz ti maang omz. Ihz mawh an diz daz, “A niz maang omz eu. An ohz leh teuk sruz ne maang naehz ngaz kan bawnz ohz?” 37Philip kaw daz, “Beuk mih yum mawn tuhz phawmz daehz kaw leh bawnz boh.” Hnhz kaw daz, “Ohz yum boh Tahz Yesuhz Khris naeh kuanz Phraz Pen Caoh a.” 38Ihz mawh an diz kaw cao peuk deukz law meu rang rae kaar cur cu tuhz omz, Philip kaw teuk sruz aez ihz mawh an diz nahz. 39Waaiz kaar lae truz thaz omz ne Khuanz Phraz Cen Cen leh Philip lan, ihz mawh an diz nam awlz Philip leui. Ihz mawh an diz siupz lan thaengz reung dengz daehz tang seuz phawmz. 40Philip paw truz tuhz weng Asotus rae, lan weng Kaesarea, tawiz reng dengz klawhz weng klawhz pruh ne hnhz rawz reu oiz rak Phraz Pen Caoh.

Currently Selected:

Teu Maan Caoh 8: ril

Highlight

Copy