Teu Maan Caoh 9

Reung dengz lan weng Damaskas

1Meuz ceun diz, Saul lawkz kyaamz ihz baaiz, ngaz piamz ihz an tawiz puatz Phraz Pen Caoh. Hnhz lan cu ceu beunz, 2maanyz leh lik a khwaangz, beuk awlz keur meh keun nyah ihz tawiz puatz keui tawiz crawp rawz traz tuhz weng Damaskas ne kaw ngaz mat leh keuh truz cu weng Yerusalem. 3Tawiz reung dengz Saul lan weng Damaskas, meuz a wa thatz weng ne an thaangz kaang raaoz lae truz aasz teuk khranz keum yaamz wit hnhz. 4Hnhz kaw taz lan tuhz keu tehz rae ngarz reus upz taw daehz daz, “Saul, Saul, kawp naehz mih pae suamz Ohz?” 5Hnhz kaw mial maanyz, “Tahz, Mih naeh yaeh?” Reus an diz kaw daz, “Ohz naeh Yesuhz an mih pae suamz eu. 6Sangz daz ceun diz kaw rawi kut tuhz weng tui raez. Mih ngaz bawnz cih naehz ne ngaz lao plaez boh mih nahz.” 7Ihz lan tawiz Saul keui kaw cingz ngarz boh reus, samz nam awlz yaeh rae thanz paw nam caang upz, teur aacz daehz ceng boh. 8Saul kaw rawi ceng kaai keu tehz, plaakz ngaai keuiz daz nam awlz naehz rae keuh botz leh tihz hnhz kut tuhz weng Damaskas. 9Ngaai hnhz bimz lan ta waiz seu ngihz ne hnhz nam suamz nam tiangz naehz. 10Tuhz weng Damaskas ne maang teu paez Caoh Phraz hawkz mus hnhz daz Ananias. Hnhz awlz tuhz pyatik Phraz Pen Caoh daz, “Ananias aez!” Hnhz kaw tawpz daz, “Ohz naeh boh.” 11Phraz Pen Caoh daz hnhz nahz, “Mih lan cu prawng an raak Prawng Keu Sangz rae maanyz khahz Saul ihz weng Tarsus, kaang keuh Yudas ne. Hnhz yeung suz tawngz boh a diz. 12Ohz cih aez hnhz awlz tuhz pyatik, Ananias leh tihz daehz taangz lang kol hnhz rae ngaai hnhz a wa awlz mial.” 13Ananias kaw mial daz, “Tahz, ohz a wa ngarz hnhz an ni naeh ihz pae suamz ihz Tahz ehz tuhz weng Yerusalem. 14Ta mat ihz koz kwaai Tahz ehz a niz kaw hnhz bawnz mok a na tawz beunz caangz.” 15Keuiz daz Caoh Phraz daz hnhz nahz, “Lan raez, Ohz ras mok hnhz cih kaanz, aez mus Ohz sirz lan tawiz ihz an nam anz kheuz Yio boh tawiz khunz tang tawiz kheuz Israel. 16Waaiz an diz Ohz ngaz plaez hnhz nahz kawp daz mus Ohz rae hnhz ngaz talz peur teuk teur nae ne.” 17Ananias kaw lan cu kaang an Saul naeh rae leh tihz daehz taangz lang kol hnhz daz, “Saul, seum bohz aez, Tahz Yesuhz an mih awlz tawiz reung dengz ne cao ohz truz cu mih, aez ngaai mih awlz mial boh aez neuk tang Khuanz Seu Ngamz tuhz mih.” 18Meuz diz luat naeh ceun teur klawp kahz kur thaz ngaai Saul rae a wa awlz mial. Hnhz kaw ceng rae leh teuk sruz omz. 19Hnhz kaw suamz seum suamz rae maang keum rang truz. Saul moh kawmz teu paez Caoh Phraz keui tuhz weng Damaskas nam heungz seu ngihz.

Saul rawz lawng Tahz Yesuhz tuhz weng Damaskas

20Hnhz kut luat tawiz crawp rawz traz, rawz lawng Tahz Yesuhz naeh kuanz Phraz Pen Caoh. 21Ihz an bawnz ngarz keui sangz baaiz rae daz, “Hnhz an ni nam anz ihz piamz ihz koz kwaai Tahz Yesuhz tuhz weng Yerusalem haz? Hnhz truz a niz kaw nam anz ngaz truz mat leh ihz koz kwaai keui weng phuhz tawz beunz caangz haz?” 22Keuiz daz Saul rawz traz yeung moh yeung maang taanz khoz tikz tikz, hnhz lao plaez saak se Tahz Yesuhz naeh Tahz Khris naeh an mawn rae ihz Yio an moh tuhz weng Damaskas keui nam caang tawpz thiangz hnhz hawkz hawkz. 23A wa peun truz heungz seu ngihz ne ihz Yio keui kyaam piamz Saul. 24Keuiz daz Saul mas keuh kyaam daehz. Ihz keu diz pao hnhz klawhz seu ngihz klawhz borz tawiz keur wah weng. 25Keuiz daz meuz teuk bimz ne teu paez Saul keui leh hnhz sapz tuhz yol rae plawiz cur tawiz peun lawm weng.

Saul phraeoz tuhz weng Yerusalem

26Meuz Saul phraeoz weng Yerusalem ne ngaz cih bohz teu paez Caoh Phraz keui kaw keuh nam yum hnhz naeh teu paez Phraz Pen Caoh rae doz hnhz. 27Barnabas raak Saul lan cu teu maan keui rae lao plaez keuh nahz lawng an Saul awlz Tahz Yesuhz tawiz reung dengz, samz lao tang Tahz Yesuhz lao hnhz nahz ceun nae, boh hnhz leh mus Tahz Yesuhz rawz yaak yaak tuhz weng Damaskas keu ni. 28Saul moh kawmz keuh, lan lan mial mial tuhz weng Yerusalem rae leh mus Tahz Yesuhz rawz yaak yaak. 29Hnhz upz teur thiangz tang ihz Yio an upz mony Krik. Keuiz daz keuh kyaam piamz hnhz. 30Meuz kuanz mai yum yam keui ngarz lawng an diz ne keuh lan phuhz Saul phraeoz weng Kaesarea, aez hnhz lan weng Tarsus. 31Cumz Caoh an naeh tuhz prih Yio, prih Kalile boh prih Samaria keui bawnz moh katz moh ngang. Keuh doz suamz Phraz Pen Caoh, Khuanz Seu Ngamz kawr keuh rae ihz yum yam keui maang keum rang prae truz heungz.

Aeneas boh Dorkas

32Petros khahz lan yawt sirz sirz, phraeoz lan weng Lida ti an ihz yum keui naeh. 33A diz hnhz awlz Aeneas, naeh ihz yam seu plaakz an yaetz boh tuhz pahz daehz ta tahz wit. 34Petros daz hnhz nahz, “Aeneas aez, Tahz Yesuhz Khris a wa aez mih moh rak, rawi seuk dawmz pahz mih raez.” Aeneas kaw rawi truz luat. 35Ihz weng Lida boh ihz weng Saron hacz aamz keui awlz Aeneas rae plaak plaai cu Phraz Pen Caoh. 36Tuhz weng Yoppa ne maang teu paez keun nyah hawkz mus hnhz daz Tabitha. Mus Krik daz Dorkas an loz daz teu yaakz. Keun nyah an diz cih an rak, kawr ihz phaanz baaiz. 37Meuz phangz an diz hnhz nam kyahz rae a wa yam. Ihz humz aez toz yam hnhz nahz omz, mok toz yam hnhz lukz thaz kol raan trawng. 38Weng Yoppa naeh thatz weng Lida, meuz teu paez Caoh Phraz keui ngarz Petros naeh a diz ne keuh cao ihz keu aarz lan raak Petros aez truz liz liz. 39Hnhz kaw truz tawiz kaar. Meuz Petros phraeoz ne keuh raak hnhz raw kaai raan trawng. Yah keu maaiz keui moh rim Petros rae plaez hnhz nahz kreung an Dorkas harz mok meuz hnhz maat yam. 40Petros cao ihz hacz aamz lae thaz nawk, seuk deumz suz tawngz, waaiz yawt thaz ihz yam rae daz, “Tabitha aez, rawi raez.” Keun nyah an diz kaw plaakz ngaai awlz Petros rae rawi keu dez. 41Petros leh tihz daehz yawk peun ceng hnhz, plaez teu paez Caoh Phraz boh yah keu maaiz keui nahz toz imz Dorkas. 42Reu oiz an diz sirz lan tuhz weng Yoppa, ihz tang heungz keui yum truz Phraz Pen Caoh. 43Petros moh kawmz Simon an naeh ihz mawz cih phrihz phrahz hurz, tuhz weng Yoppa heungz seu ngihz baaiz.

Currently Selected:

Teu Maan Caoh 9: ril

Highlight

Copy