Teu Maan Caoh 7

Mony Stephen

1Ceu beunz maanyz Stephen daz, “An keuh lao ne anz anz?”

2Hnhz kaw tawpz daz, “Kuanz mai keui boh paz keui aez, teuk ngarz an ohz rawz ne raez. Paz ehz Abraham meuz hnhz maat lan weng Haran, yeung naeh boh prih Mesopotamia ne Phraz Pen Caoh bunz mawh paw truz aacz ngaai hnhz.” 3Phraz Pen Caoh lao hnhz nahz, “Mih praasz lae thaz ceu kheuz kuanz mai daehz lan cu prih an Ohz ngaz plaez mih nahz.” 4Meuz ceun diz Abraham kaw lae truz thaz prih ihz Khalde, lan moh weng Haran. Waaiz paz hnhz yam ne Phraz Pen Caoh cao hnhz kraai moh prih an pehz moh seu ni ne. 5Sangz daz Phraz Pen Caoh maat aez Abaraham nahz a moi naehz tawz diz, ta bakz cawng keuiz kaw maat aez. Keuiz daz aez mok keu tih ngaz aez hnhz boh ceu kheuz hnhz keui nahz prih an diz, a wa lao mok thaz meuz Abraham maat maang kuanz. 6Phraz Pen Caoh daz hnhz nahz, “Ceu kheuz mih keui penz ihz seuk laek tuhz prih ihz, bawnz cih kuanz yawn ihz, talz ihz pae suamz ta ponz peur ya wit. 7Ohz ngaz aez taam ihz an cao suamz keuh.” Phraz Pen Caoh daz, “Waaiz an diz keuh ngaz lawt lae thaz prih an diz, ngaz koz kwaai Ohz a niz.” 8Hnhz aez Abraham nahz #7:8 Saetz cawkz hurz khangz keur meh Rias 17:10-11saetz cawkz hurz ne sunz cih plaez saak se an prawm. Meuz hnhz maang kuanz Isaac taamz bawnz tahz seu ngihz ne, hnhz saetz cawkz hurz Isaac. Isaac penz truz paz Yakop, Yakop penz truz paz kuanz mai seu kawlz aarz an naeh ihz keu daehz keu daepz ehz. 9“Ihz keu daehz keu daepz ehz keui ceuh seum bohz daehz Yosep rae, saz hnhz aez lan penz kuanz yawn tuhz prih Ekip. Keuiz daz Phraz Pen Caoh naeh kawmz hnhz, 10khyawt Yosep thaz peur teuk rae aez bawnz mawk mael aacz ngaai khunz Pharaoh. Aez tang hnhz nahz nyaan pinya. Khunz Pharaoh kaw khaanz hnhz upz prih boh upz hawz daehz. 11Meuz phangz an diz kaai prih Ekip boh prih Kanaan ne phraeoz truz reung dengz coh nguat rae ihz keu daehz keu daepz ehz keui nam maang seum suamz naehz. 12Meuz Yakop ngarz reu oiz tuhz prih Ekip maang ngohz kaaiz ne, hnhz seun teungz cao ihz keu daehz keu daepz ehz lan seu laehz. 13Meuz naeh kaai aarz laehz ne Yosep lao plaez mai daehz nahz daehz naeh yaeh, khunz Pharaoh kaw bawnz mas kuanz mai Yosep. 14Meuz diz Yosep raak leh paz daehz Yakop boh kuanz mai daehz keui truz moh prih Ekip, keuh hacz aamz naeh pulz kawlz hanz. 15Yakop kaw bawnz lan moh tuhz prih Ekip, hnhz boh kuanz hnhz keui yam a diz hacz aamz. 16Leh toz yam keuh lan saangz keo tawz peun lu a weng Shekhem, an Abraham leh paekz yal tawz kuanz pliz Hamor. 17An Phraz Pen Caoh lao mok keu tih tawz Abraham ngaz penz ne kheuz Israel tuhz prih Ekip keui prae truz heungz baaiz. 18Meuz ceun diz maang khunz hawkz an nam mas Yosep ne upz peung prih Ekip. 19Upz suamz ihz keu daehz keu daepz ehz, cao ihz daehz pae suamz keuh. Cao keuh mok thengz kuanz ihz thaz nawk kaang, aez keuh yam. 20Meuz phangz an diz, Moses, kuanz ihz an henz henz ne keut truz. Mah paz hnhz bawnz lum la hnhz tawz kaang daehz ne waiz kiarz pan. 21Meuz hnhz talz ihz phuhz thengz thaz nawk kaang ne kuanz keun nyah khunz Pharaoh seutz damz hnhz aez naeh ceun kuanz daehz. 22Hnhz kaw bawnz sawnz pinya Ekip klawhz meoz, penz truz ihz kyahz mawz upz mawz cih hawkz. 23Meuz a saak hnhz bawnz ponz kawlz ne kyaam lan yawt kheuz daehz Israel keui. 24Lan awlz kheuz daehz hawkz talz ihz Ekip pae suamz ne hnhz kawr ihz daehz rae piamz thengz ihz. 25Hnhz thaang kuanz mai daehz keui mas lawng Phraz Pen Caoh leh tihz hnhz khyawt kaw keuh nam mas. 26Ceun kap siz ne hnhz awlz ihz keu aarz, kheuz Israel teur deuiz teur kawi daehz, Moses daz kaar nahz, ‘Paarz naeh kuanz mai, caang daz teur kawi lah?’ 27Keuiz daz ihz an meukz ne reuk euz thengz Moses rae daz, ‘Yaeh khaanz mih aez cih ihz mawh aaiz. 28Ceun mih piamz ihz Ekip prawhz ne sunz piamz ohz haz?’ 29Moses ngarz mony reu ma ceun diz rae tiunz lae thaz prih Ekip lan moh prih Midian. A diz hnhz maang kuanz keur meh keu aarz. 30Moh thaengz ponz kawlz wit, teu maan kaang raaoz Phraz Cen Cen paw truz plaez Moses nahz kaai ngal kat yum khaehz tuhz ruk kaai rang Sinai ne. 31Moses sangz baaiz an daehz awlz ne ngaz lan yawt thatz thatz. Keuiz daz hnhz ngarz reus Phraz Cen Cen daz, 32‘Ohz naeh Phraz ihz keu daehz keu daepz pehz, Abraham, Isaac boh Yakop.’ Moses kaw doz baaiz thanz paw teur ceus rae nam yaak yawt. 33Phraz Cen Cen lao Moses nahz, ‘Pucz cawng khlapz mih raez, ti mih bakz ne naeh ti seu ngamz. 34Ohz a wa awlz kheuz Ohz keui talz peur teuk tuhz prih Ekip. Ohz a wa ngarz reus keuh kraang. Ohz cur truz ngaz khyawt leh keuh. Lan seu ni raez, Ohz cao mih lan mial prih Ekip.’ 35Naeh ihz thiangz thengz Moses ne daz, ‘Yaeh khaanz mih aez cih ihz mawh ehz.’ Phraz Pen Caoh aez hnhz penz ihz peur aacz boh ihz khyawt kawp keum rang teu maan kaang raaoz an plaez toz kaai yum kat ne kawr hnhz. 36Moses aacz lae keuh truz thaz prih Ekip rae, plaez an laak laaiz boh rak seum sangz keui tuhz prih Ekip, tawz Paang Laai Rong boh tuhz ruk ne ta ponz kawlz wit. 37Moses an diz daz kheuz Israel keui nahz, ‘Ceun Phraz Pen Caoh phuhz ohz ne, ngaz aez ihz taangz phraz hawkz paw truz tuhz ceu kheuz pehz.’ 38Moses naeh kawmz kheuz Israel tuhz ruk, tang ihz keu daehz keu daepz ehz, boh teu maan kaang raaoz an upz taw hnhz kaai rang Sinai, hnhz bawnz traz phawmz imz tawz Phraz Pen Caoh ta aez ehz nahz. 39Keuiz daz ihz keu daehz keu daepz ehz keui nam teuk ngarz mony hnhz, thiangz thengz hnhz rae sunz weng meu rae prih Ekip. 40Keuh daz Aaron nahz, ‘Cih phraz an peur aacz ehz raez, ehz nam mas Moses naeh seu naez, an aacz lae ehz truz thaz prih Ekip.’ 41Keuh lawz pung raang saangz thuhz meuk kyehz, raenz kreung lu, cih pawiz pyaw aacz ngaai raang an leh tihz daehz cih. 42Kawp ceun diz Phraz Pen Caoh waaiz ngaai plawiz thengz keuh, aez keuh waiz seuk muny boh an naeh lang kaang raaoz. Tuhz kyaamz ihz taangz phraz daz, ‘Euz kheuz Israel keui aez, meuz pehz piamz satz boh tang kreung lu keui pukz caw Ohz nahz tuhz ruk, ta ponz kawlz wit ne pehz nam saangz suamz Ohz. 43Pehz baekz truz khrengz phraz Molek boh phraz seuk muny Rephan. An keu diz ne naeh pung raang pehz ngaz koz kwaai. Kawp ceun diz Ohz ngaz phuhz pehz ti peur teuk, thanz paw peun lan weng Babilon.’

44Ihz keu daehz keu daepz ehz maang sumz aez penz saak se Phraz Pen Caoh naeh kawmz daehz tuhz ruk. Sumz an diz Moses cih ceun Phraz Pen Caoh lao plaez mok hnhz nahz. 45Waaiz an diz tahz kok ehz keui saanyz rap leh sumz an diz kaai ihz keu daehz keu daepz keuh, meuz keuh lan tawiz Yoshua ne keuh leh prih keu tehz ihz an Phraz Pen Caoh wah thengz aacz ngaai keuh, keuh leh kut pa tang sumz an diz. Sumz an diz naeh phraeoz co khunz Dawit. 46Khunz Dawit naeh ihz bawnz mawk mael aacz ngaai Phraz Pen Caoh, hnhz maanyz cih wat Phraz Yakop ne bawnz moh. 47Keuiz daz naeh kuanz hnhz khunz Solomon tahz bawnz cih wat an diz. 48Phraz Pen Caoh an trawng dutz ne nam moh tawiz wat an leh tihz ihz cih. Ihz taangz phraz lao mok daz,

49‘Kaang raaoz ne naeh tangz Ohz, keu tehz samz naeh ti tam cawng Ohz. Mih ngaz cih aez Ohz nahz wat ceun nae? Ti Ohz moh ne naeh a naez? 50Tihz Ohz cih mok klawhz ceu klawhz meoz nam anz haz?’

51Ihz nokz ihz tiu keui aez! Kingz keu nuasz pehz tanz, keu tiakz pehz lutz. Pehz caang khatz se se Khuanz Seu Ngamz naeh ceun ihz keu daehz keu daepz daehz. 52Ihz taangz phraz an ihz keu daehz keu daepz pehz nam pae suamz ne anz maang haz? Keuh piamz ihz taangz phraz an rawz mok teuk aacz lawng Ihz Keu Sangz Phraz Pen Caoh ngaz truz ne. Seu ni pehz kaw a wa ya saet ca Hnhz rae piamz Hnhz. 53Pehz bawnz sinz traz tawz teu maan kaang raaoz keui aez ne siupz cur truz kaw pehz nam tawiz.”

Stephen yam

54Meuz cumz ihz rumz keui ngarz mony reu ma Stephen ne sunz ca thanz paw teur kak raangz daehz. 55Keuiz daz hnhz neuk tang Khuanz Seu Ngamz, ngaw yawt kaang raaoz ne awlz bunz Phraz Pen Caoh boh Tahz Yesuhz ceng boh plaakz takz kaaiz Phraz Pen Caoh. 56Stephen daz, “Yawt luz, ohz awlz kaang raaoz lawk, Kuanz Ihz ne ceng boh plaakz takz kaaiz Phraz Pen Caoh.” 57Keuh raak keurz reus usz baaiz, bitz tang keu tiakz daehz teum prawm rip wang sapz Stephen, 58botz laak lan nawk weng leh kawnz reu aangz wiurz sapz hnhz. Ihz khaam saak se an nam anz keui pucz kreung daehz aez mok Saul an naeh ihz reum buz nahz. 59Meuz keuh yeung wiurz sapz hnhz nahz kawnz reu aangz ne Stephen suz tawngz daz, “Tahz Yesuhz, truatz leh khuanz phawmz ohz raez.” 60Hnhz seuk deumz rae raak reus usz daz, “Yak peun tang reung dengz kawi keuh,” daz ceun diz kaw a wa yam lan.

Currently Selected:

Teu Maan Caoh 7: ril

Highlight

Copy