Teu Maan Caoh 11

Petros lao plaez cumz caoh tuhz weng Yerusalem

1Teu maan boh kuanz mai yum yam an naeh tuhz prih Yio keui ngarz ihz an nam anz kheuz Yio keui saanyz rap mony reu ma Phraz Pen Caoh. 2Meuz Petros weng phraeoz meu rae weng Yerusalem ne ihz yum yam an peun saetz cawkz hurz keui teur aacz daehz nae hnhz daz, 3“Mih lan cih bohz raen ihz an nam anz kheuz Yio an nam saetz cawkz hurz keui rae suamz kawmz keuh.” 4Kawp ceun diz Petros lao plaez keuh nahz seun teungz taw dutz cawkz daz, 5“Meuz ohz yeung suz tawngz tuhz weng Yoppa ne ohz bawnz awlz pyatik naeh ceun pahz wam mok ponz seu dukz, ongz oiz cur truz thaz kaang raaoz, truz naeh rim ohz. 6Meuz ohz yawt caem caem tuhz an diz ne maang toz satz cawng keu ponz keui, toz an mawz klaan keui, simz ploiz lang plengz keui. 7Ohz ngarz reus an diz daz ohz nahz, ‘Petros, rawi piamz suamz raez.’ 8Keuiz daz ohz kaw mial daz, ‘Nam penz bawnz Tahz ehz, ohz nam ti suamz seu pawk an woi boh an nam seu ngamz keui.’ 9Waaiz an diz reus an truz thaz kaang raaoz kaw daz thaengz, ‘An Phraz Pen Caoh daz seu ngamz ne mih nam lo daz naeh an woi.’ 10Naeh ceun diz ta waiz laehz, an naeh ceun pahz ne leh raw mial lang plengz. 11Moh seu co naeh ihz keu waiz an ihz cao keuh truz thaz weng Kaesarea ne truz naeh rim kaang an ohz thangz. 12Khuanz Seu Ngamz lao ohz daz, ‘Yak wonz naehz leui, lan tawiz keuh raez.’ Kuanz mai yum yam tualz an naeh tuhz weng Yoppa kaw lan tawiz ohz tawz weng Kaesarea. Ehz hacz aamz kut tuhz kaang Kornelius. 13Kornelius kaw daz ehz nahz, teu maan kaang raaoz paw truz rim daehz, cao ihz hawkz lan raak truz Simon Petros. 14Hnhz ngaz krai aez traz mih nahz, traz an diz ngaz khyawt mih boh ihz kaang pehz. 15Meuz ohz seun teungz rawz boh ne Khuanz Seu Ngamz cur cu kaai keuh naeh ceun cur cu kaai ehz thaz meuz seun teungz. 16Meuz phangz an diz ohz tang mony reu ma Tahz ehz daz, ‘Yohn aez teuk sruz omz, keuiz daz pehz samz bawnz leh teuk sruz kaai Khuanz Seu Ngamz.’ 17Mas yoh baaiz an Phraz Pen Caoh aez kez cuz kaai ihz yum yam Tahz Yesuhz Khris, ceun ehz ne kaai ihz an nam anz Yio kaw aez boh. Kawp ceun diz ohz naeh ihz naehz longz awh lah, caang kan Phraz Pen Caoh a?” 18Meuz keuh ngarz mony reu ma an diz ne keuh nam nae naehz leui, lupz phrawz Phraz Pen Caoh daz, “Phraz Pen Caoh aez ihz an nam anz kheuz Yio keui nahz traz caanz reung dengz kawi rae aez phawmz teun mehz.”

Cumz Caoh tuhz weng Antioc

19Kuanz mai yum yam teur ka setz an talz ihz pae suamz kaanz ihz piamz Stephen ne nawl lan phraeoz prih Phoenisia, klunz Siprus boh weng Antioc rae rawz plaez mony reu ma Phraz Pen Caoh kaai ihz Yio pan. 20Keuiz daz kuanz mai yum yam an naeh tuhz klunz Siprus boh tuhz prih Siren ne lan phraeoz weng Antioc, rawz aez reu oiz rak Tahz Yesuhz kaai kheuz Krik. 21Taanz khoz Caoh Phraz naeh kawmz keuh rae ihz tang heungz keui yum yam plaak plaai truz thaz Caoh Phraz. 22Cumz Caoh weng Yerusalem ngarz reu oiz ceun diz ne keuh cao Barnabas lan cu weng Antioc. 23Hnhz phraeoz a diz, awlz kez cuz Phraz Pen Caoh naeh kaai keuh ne hnhz seuz baaiz. Hnhz lao sawz keuh nahz pao saet ca rae moh tawz tawz tawiz Caoh Phraz. 24Kawp daz Barnabas naeh ihz rak, neuk tang Khuanz Seu Ngamz boh reung dengz yum rae ihz keui plaak plaai truz thaz Caoh Phraz. 25Waaiz an diz Barnabas lan weng Tarsus ngaz khahz Saul. 26Meuz hnhz awlz Saul ne raak truz weng Antioc. Kaar raen cumz caoh an diz tang wit, sawnz aez traz wungz ihz heungz baaiz. Tuhz weng Antioc ne ihz keui seun teungz peuk mus ihz yum yam keui daz naeh Khrisian. 27Meuz phangz an diz ihz taangz phraz teur ka keui moh weng Yerusalem cur truz weng Antioc. 28Tuhz keuh ne maang hawkz mus hnhz daz Akabus rawi lao kawp Khuanz kawr rae daz, “An coh nguat ne ngaz sirz tuhz prih keu tehz.” An hnhz daz ceun diz ne penz meuz co khunz Klaudius. 29Teu paez keui kaw teum prawm mok phawmz, seu daehz penz bawnz ne ngaz kawr kuanz mai an naeh tuhz prih Yio. 30Ceun keuh aanz mok ne paekz lu an diz cao Barnabas boh Saul lan aez ihz mawh cumz caoh tuhz weng Yerusalem.

Currently Selected:

Teu Maan Caoh 11: ril

Highlight

Copy