Teu Maan Caoh 12

Petros klaez thang

1Meuz phangz an diz khunz Herot mat ihz teur ka an kut tuhz cumz caoh rae pae suamz ka penz. 2Hnhz cao ihz leh waac piamz Yakop an naeh mai Yohn. 3Hnhz mas ihz Yio keui trohz phawmz an diz rae meuz phangz pawiz kaaiz mun nam maang cakz ceu ne hnhz mat tang Petros. 4Waaiz hnhz mat ne sapz tuhz thang aapz aez siukz ponz cumz nahz, teur cumz ne naeh teur keu ponz. Waaiz pawiz lawt phez ne hnhz kyaam caetz aez taam Petros aacz ngaai ihz. 5Kawp ceun diz Petros bawnz klaez thang. Meuz hnhz naeh tuhz thang ne ihz an naeh tuhz cumz caoh keui suz tawngz aez hnhz nahz.

Petros lawt lae thaz thang

6Meuz maat phraeoz seu ngihz khunz Herot leh Petros caetz aacz ngaai ihz, ceun teuk bimz ne Petros takz nuarz hirz keu aarz, yaetz reuk ngeut boh peur lah siukz keu aarz ne siukz an pao keui kaw pao boh keur wah thang. 7Meuz diz luat teu maan kaang raaoz Phraz Cen Cen paw truz rim Petros, thaangz aasz boh tuhz thang. Teu maan kaang raaoz wis cawkz pahz hnhz daz, “Rawi liz liz.” Nuarz hirz keui kaw kur klaez thaz tihz hnhz. 8Teu maan kaang raaoz daz, “Mat seum mat, kap cawng khlapz raez.” Hnhz kaw cih tawiz, samz daz thaengz, “Kap cung cui mih lan tawiz ohz.” 9Petros lae tawiz hnhz phraeoz thaz nawk thang kaw thaang nam anz mawn, daz naeh daehz awlz pyatik. 10Kaar peun lae truz ihz pao aarz ti meuz phraeoz rim keur wah hirz, keur wah an diz kaw lawk daehz ne. Kaar nuar lan tawiz reung dengz, teu maan kaang raaoz praasz thengz teuk khranz Petros. 11Petros mas toz, “Caoh Phraz cao teu maan Daehz khyawt leh ohz tuhz tihz khunz Herot boh thaz reung dengz ihz Yio keui mang mok daz ngaz pae suamz ohz.” 12Waaiz hnhz mas caem ne lan cu kaang Mari an naeh mah keuh Yohn an ihz raak Markus. Ihz keui kaw teur aacz daehz suz tawngz boh tuhz kaang an diz. 13Petros khrakz keur wah cao ihz lawk aez daehz nahz, maang kuanz leng keun nyah kyehz hawkz mus hnhz daz Roda an naeh kuanz leng keuh ne ngaz truz lawk aez. 14Hnhz tang reus Petros ne seuz baaiz nam lawk aez keur wah, wang kut mial daz ihz nahz, “Petros ceng boh thaz nawk.” 15Keuh daz hnhz nahz, “Mih a wa reu waet.” Keuiz daz keun nyah kyehz an diz daz mawn baaiz rae keuh teur aacz daehz daz, “Naeh teu maan kaang raaoz an pao Petros keuiz doz.” 16Keuiz daz Petros cao keuh lawk keur wah tikz tikz, meuz keuh lawk aez ne keuh awlz naeh Petros rae sangz baaiz. 17Hnhz leh tihz daehz lao keuh moh pras pras, krai plaez keuh nahz lawng Caoh Phraz cih seu naez leh lae truz daehz thaz thang. Hnhz seumz keuh lao tang Yakop boh kuanz mai yum yam keui kaw hnhz lae lan thaengz aarz diz. 18Meuz prih thaangz ne siukz an pao keui ronyz daz, “Petros naeh a naez?” 19Khunz Herot cao keuh khahz Petros kaw nam awlz, hnhz caetz maanyz siukz an pao keui rae aez keuh nahz taam yam. Waaiz an diz khunz Herot lae thaz prih Yio lan thangz tuhz weng Kaesarea ne ceu nawhz taan taan.

Khunz Herot yam

20Khunz Herot sunz ca ihz weng Taia boh ihz weng Sidon keui nahz, ihz weng keu diz kaw truz cu hnhz. Keuh lan cu aacz ihz upz hawz an mus hnhz daz Blastus ne aez hnhz upz kawr aez tawsahz khunz Herot phre. Kawp daz ihz weng keu diz bawnz ceuk naeng seum suamz kaai prih khunz an diz. 21Meuz kraao lao mok a wa phraeoz ne khunz Herot kap tang kreung khunz, keu dez kaai plaang reu ma taw ihz keu diz nahz. 22Ihz keui teur aacz daehz raak keurz daz, “An ni nam anz reus ihz, naeh reus phraz keuiz.” 23Meuz phangz an diz teu maan kaang raaoz Phraz Cen Cen aez khunz nahz taam, mah klungz keui kak teuk yam kawp daz hnhz nam aez bunz Phraz Pen Caoh. 24Mony reu ma Phraz Pen Caoh kaw sirz lan, ihz yum yam keui kaw heungz truz. 25Barnabas boh Saul cih aez wa wa kaanz kaw raak Yohn Markus weng truz mial weng Yerusalem.

Currently Selected:

Teu Maan Caoh 12: ril

Highlight

Copy