Teu Maan Caoh 10

Petros boh Kornelius

1Maang ihz hawkz an moh tuhz weng Kaesarea, mus hnhz daz Kornelius an naeh po siukz Rom upz seu peur ya tuhz tap Itali. 2Hnhz boh ihz kaang hnhz keui naeh ihz koz kwaai doz suamz Phraz Pen Caoh. Hnhz kawr ihz phaanz Yio keui nahz rae suz tawngz se se tawz Phraz Pen Caoh. 3Meuz seu ngihz waaiz kraao waiz na ri ne hnhz awlz caem teu maan kaang raaoz hawkz truz raak daehz daz, “Kornelius.” 4Meuz hnhz yawt teu maan kaang raaoz ne hnhz doz baaiz rae maanyz, “Naehz lah Tahz?” Teu maan kaang raaoz daz hnhz nahz, “An mih suz tawngz boh an mih kawr ihz phaanz keui nahz ne trohz phawmz Phraz Pen Caoh. 5Seu ni cao ihz lan raak Simon an bawnz mus teun mehz an ihz raak Petros tawz weng Yoppa raez. 6Hnhz thangz boh kaang Simon an ihz mawz cih phrihz phrahz hurz. Kaang keuh naeh rim waar paang laai.” 7Waaiz teu maan kaang raaoz an diz lae lan ne Kornelius raak kuanz leng daehz keu aarz boh siukz an pao rim daehz hawkz, an doz suamz Phraz Pen Caoh rae, 8lao plaez keuh nahz lawng an a wa naeh hacz aamz kaw cao keuh lan weng Yoppa. 9Ceun kap siz ne keuh lae lan reung dengz, phraeoz rim weng Yoppa. Meuz seu ngihz keun cang ne Petros suz tawngz kaai kusz kaang. 10Hnhz a wa coh seum suamz. Meuz ihz raenz aez seum suamz ne hnhz awlz pyatik, 11kaang raaoz seuk lawk rae awlz naeh ceun pahz wam mok ponz seu dukz ne ongz oiz cur cu keu tehz. 12Tuhz diz maang satz cawng keu ponz keui, toz an mawz klaan keui, simz ploiz keui. 13Hnhz ngarz reus daz, “Petros, rawi leh piamz suamz raez.” 14Petros mial daz, “Tahz aez, ohz nam penz bawnz, ohz nam ti suamz seu pawk an woi boh an nam seu ngamz keui.” 15Reus an diz kaw daz, “An Phraz Pen Caoh daz seu ngamz ne mih nam lo daz naeh an woi.” 16Naeh ceun diz ta waiz laehz rae leh raw meu rae an naeh ceun pahz ne lang kaang raaoz. 17Meuz Petros yeung wonz boh an daehz awlz ne ihz an Kornelius cao peun truz keui maanyz khahz kaang Simon ceng aacz ngaai keu lawrz. 18Keuh raak maanyz daz, “Simon Petros anz naeh a niz?” 19Meuz Petros yeung wonz boh an daehz awlz pyatik ne Khuanz Seu Ngamz daz hnhz nahz, “Teuk ngarz raez, ihz keu waiz khahz boh mih. 20Ceng rae cur lan tawiz keuh raez! Ohz cao keuh truz, yak wonz naehz leui.” 21Kawp ceun diz rae Petros kaw cur lan daz keuh nahz, “Ihz an pehz khahz ne naeh ohz luat. Kawp naehz rae pehz phraeoz truz?” 22Keuh daz, “Tahz ehz Kornelius cao ehz raak mih. Hnhz naeh ihz rak, ihz doz suamz Phraz Pen Caoh, samz naeh thaengz tang ihz Yio keui nap suamz hnhz. Teu maan kaang raaoz cao hnhz truz raak mih aez daehz bawnz teuk ngarz mony traz an mih rawz.” 23Petros raak keuh kut tuhz kaang an diz aez keuh yaetz seu borz. Keuh rawi lan ceun kap siz ne Kuanz mai tuhz weng Yoppa teur ka kaw lan tawiz. 24Thaengz seu seu ngihz Petros keuh phraeoz weng Kaesarea rae Kornelius boh kuanz mai, bohz raen an hnhz raak mok keui pao saanyz Petros. 25Meuz Petros phraeoz ne Kornelius kupz waiz rim cawng hnhz. 26Petros yawk leh Kornelius daz hnhz nahz, “Ceng raez, ohz kaw naeh ihz eu.” 27Waaiz kaar teur tak daehz kut tuhz kaang ne awlz ihz heungz baaiz. 28Petros daz keuh nahz, “Pehz mas boh rak rak ihz Yio keui khahz keulz boh cih bohz raen ihz an nam anz Yio ne nam tawiz traz Yio. Keuiz daz Phraz Pen Caoh plaez ohz nahz yak aez ohz daz ihz an ni woi, ihz an tui woi. 29Kawp ceun diz pehz raak ohz kaw ohz nam thiangz hawkz hawkz. Kawp naehz lah pehz raak ohz a?” 30Kornelius mial daz, “Meuz peun truz ponz seu ngihz, maen meuz seu ngihz waaiz, kraao waiz na ri ne ohz suz tawngz kaang daehz. Meuz phangz an diz maang ihz hawkz kap tang kreung aasz lawp liap ne truz ceng aacz ngaai ohz rae daz ohz nahz, 31‘Kornelius aez, an mih suz tawngz ne Phraz Pen Caoh a wa ngarz, an mih kawr ihz phaanz keui kaw Hnhz a wa maaiz mok. 32Kawp ceun diz raak Simon Petros thaz weng Yoppa raez. Hnhz thangz boh kaang keuh Simon ihz mawz hurz, naeh rim waar paang laai ne.’ 33Kawp ceun diz ohz cao ihz daehz lan raak luat tahz ehz. Tahz ehz truz rae kez cuz mawh baaiz. Seu ni aez ehz bawnz teuk ngarz mony reu ma Phraz Cen Cen tawz tahz ehz, ehz a wa truz naeh aacz ngaai Phraz Pen Caoh.”

Reu oiz rak ta klawhz ihz

34Petros daz, “Seu ni ohz a wa mas Phraz Pen Caoh nam daz ngaai kyehz ngaai mawh. 35Ihz kheuz naehz se nam daz ihz an nap suamz rae cih an rak ne bawnz mawk mael aacz ngaai Hnhz. 36Pehz mas boh reu oiz an Phraz Pen Caoh aez kheuz Israel keui nahz, traz phawmz nimz kawp Tahz Yesuhz Khris an naeh Tahz ihz klawhz meoz. 37Pehz mas boh traz an ni seun teungz rawz tuhz prih Kalile taw phraeoz prih Yio, waaiz Yohn rawz traz teuk sruz ne. 38Phraz Pen Caoh aez Yesuhz ihz weng Nasaret nahz taanz khoz boh Khuanz Seu Ngamz. Phraz Pen Caoh naeh kawmz Hnhz ne khahz lan paw sirz rae cih an rak kaai ihz, boh aez moh rak ihz an naeh tuhz keutz phiz pae suamz keui. 39Ehz penz saak se reung naeh kaai weng Yerusalem taw phraeoz prih Yio. Keuh leh Tahz an diz tawkz piamz kaai lakz keun rang klawngz klaengz. 40Keuiz daz moh waiz seu ngihz Phraz Pen Caoh aez Hnhz meu rae imz rae plaez toz Hnhz saang raang. 41Hnhz nam plaez toz Daehz ihz klawhz ihz nahz, keuiz daz plaez ehz, an naeh saak se Hnhz an Phraz Pen Caoh ras mok teuk aacz keui pan, bawnz suamz kawmz tiangz kawmz waaiz Hnhz meu rae imz. 42Phraz Pen Caoh lao mok aez ehz cih saak se boh sawz daz, ‘Tahz an diz naeh Tahz tatz traz kaai ihz yam boh ihz imz.’ 43Ihz taangz phraz keui lao mok lawng Hnhz daz, ‘Ihz an yum Hnhz keui kawp taanz khoz mus Hnhz, bawnz lawt thaz reung dengz kawi.’”

Khuanz Seu Ngamz thawkz kaai ihz an nam anz kheuz Yio

44Meuz phangz Petros rawz boh ne Khuanz Seu Ngamz cur cu kaai ihz teuk ngarz. 45Kaai ihz an nam anz Yio keui kaw Khuanz Seu Ngamz thawkz aez rae ihz Yio keui truz tawiz Petros thaz weng Yoppa keui sangz baaiz. 46Kawp daz keuh bawnz ngarz reus ihz an nam anz kheuz Yio keui upz mony reu ma pleung pleung, lupz phrawz kez cuz Phraz Pen Caoh. Petros daz, 47“Keuh bawnz Khuanz Seu Ngamz ceun ehz bawnz ne. Ta keuh leh teuk sruz omz ne, yaeh te kan bawnz keuh?” 48Petros lao aez keuh leh teuk sruz kaai mus Tahz Yesuhz Khris. Waaiz an diz, keuh cao Petros moh kawmz daehz nam heungz seu ngihz.

Currently Selected:

Teu Maan Caoh 10: ril

Highlight

Copy