Zechariah 5
5
Laizial Leang Mukholna
1Khua ka et kik le vui sungah laizial leang khat ka mu hi. 2Vantunglalang in ka mu sia hong dongh hi. “Laizial khat vui sungah leang hi; tuasia metre kua sau a, metre li le lang zai hi,” ka ci hi.
3Tuaciang ama in kei tungah, “Tuasia tungah ngam bup sungah a tung tu haamsiatna ki at hi. A laizial langkhat ah ngamsung panin nguta a minpiang kinotkeak tu hi; a langkhat ah kiciamna taw leilot thu a son theampo zongh kikaikeak tu hi, ci in ki at hi. 4Vaanglianbelpa Topa in tua haamsiatna ka tungsak tu a, tuasia in nguta pawpo ii inn le, kiciamna taw leilot thuson pawpo ii inn te sungah tum tu hi ci hi. Tua haamsiatna sia amate inn sungah teang tu a, tua innte a lalcipsa in kinusia tu hi,” hong ci hi.
Khum sungah Numei Mukholna
5Vantunglalang kilangh kik a, “En in! Na dang khat hong pai hi!” hong ci hi.
6“Bang ziam?” ci in ka dongh hi.
Ama in, “Tuasia khum khat hi a, ngam bup ii mawna a lakna hi,” ci in hong zo hi.
7Khum sitna sia haak taw kivawt hi. Ka et le, a sitna hong kilaamto a, tua khum sungah numei khat to hi!
8Vantunglalang in, “Hi numei in ngitlona lak hi,” ci hi. Tuaciang ama in tua numei sia khum sungah hensuk in, a sitna taw sin kik hi. 9Ka etto ciang hilniang vacimlian ii thate bangin, a hat thate taw keima sangah hong leang numei nii ka mu hi. Amate in khum hong zamh a, lenpui vingveng hi.
10Vantunglalang tungah, “Amate in tuasia koisungah paipui tu ziam?” ci in ka dongh hi.
11Ama in, “Tuasia atu in biakinn khat a saksak natu mun Babylon ah kipaipui tu hi. Biakinn sak a kiman ciang, a biak tu in a sungah tua khum kikoi tu hi,” hong ci hi.
Currently Selected:
Zechariah 5: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
