Thupualaakna 8
8
Tepteena Salina
1Tuuno in tepteena salina sia a hon ciang nai lang sung bang vantung ah thim dide hi. 2Tuaciangin Pathian mai ah a ding vantunglalang sali teng, ka mu a, amate tungah lemle sali kipia hi.
3Vantunglalang dangkhat khamh taw kivawt ngimnamtui halna, a neipa, hong pai in biaknatau mai ah ding hi. Pathian ii mihingte thungetna a belapsak natu in, ama sia ngimnamtui tam mama kipia a, kumpi tokhum mai a, a om khamh biaknatau tungah piak tu ahi hi.#Amo 9:1; Pu 30:1-3 4Ngimnamtui ii a khu sia Pathian ii mihingte thungetna taw kopin, Pathian mai ah a ding vantunglalang khut panin zaamto hi. 5Tua zawkciang, paaknamtui halna sia vantunglalang in la a, biaknatau pan meikuang sia taw a dip zawkciang leitung ah lawnsuk hi. A nging vangam le a puak vazakin, vanto a, khualeng vazalin zinliing hi.#Thiam 16:12; Eze 10:2; Pu 19:16; Tpl 11:19; 16:18
Lemlete
6Tuaciang vantunglalang salite in, lemle salite tum tu in kithoai uh hi.
7Vantunglalang a masabel sia in, a lemle tum hi. Ngialtang le meikuang sia chi taw kihelin leitung ah hong kibuaksuk hi. Leitung ii see thum sua see khat, thingkung see thum sua see khat le lopa hing theampo kaanghtum siat hi.#Pu 9:23-25; Eze 38:22
8Tuaciang vantunglalang a niina sia in, a lemle tum hi. A kuang mualpi taw a kibang khat tuipi sungah lawnsuk hi. Tuipi tui see thum sua see khat sia chisan suak a, 9tuisung nganhing see thum sua see khat thi a, teambawte see thum sua see khat lalcip hi.
10Tuaciang vantunglalang a thumna sia in, a lemle tum hi. Aksi lian khat meisip bangin, a kuang khat sia, van panin taaksuk a, ngunte le ciktuite ii see thum sua see khat tungah tu hi.#Is 42:12 11(Aksi sia ii min in “A Khaa” kici hi.) Tui see thum sua see khat sia tuikhaa suak a, tuaciang mihingte tam mama tua tui a dawnna panin thi uh hi, banghang ziam cile tua tui in tuikhaa suak zo hi.#Jer 9:15
12Vantunglalang a lina sia in, a lemle tum hi. Ni sia see thum sua see khat, tha see thum sua see khat, aksi see thum sua see khat kivaattham a, tuasia ciangin amate ii taanna sia see thum sua see khat bo hi; sun see thum sua see khat le zan see thum sua see khat sung, khuavak a om nawn bua hi.#Is 13:10; Eze 32:7; Jol 2:10,31; 3:15
13Tua zawkciangin ka et le muvanlai khat leang a, hi bangin a pau ka za hi, “Oh launa! launa! A dang vantunglalang thum teng in a lemle uh a tum ciang, leitung ah a teang theampo atu bangza in lauhuai tu ziam!” ci hi.
Currently Selected:
Thupualaakna 8: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
