Thupualaakna 9

1Tuaciang vantunglalang a ngana sia in, a lemle tum hi. Aksi khat leitung ah a taaksuk ka mu a, tua aksi tungah a hawng thukpui sia ii tawtang kipia hi. 2Aksi in a hawng thukpui sia hong a, thik huanna meimang sung panin, a pusuak bangin meikhu pusuak hi; a hawng thukpui sung pan a pusuak meikhu in nitaang le vuite zingcipsak hi.#Pian 19:28 3Meikhu sung panin khaumaw honte lei ah hong taak uh hi, tuaciang amate tungah aikamte ii nei ngute kipia uh hi.#Pu 10:12-15 4Thingkungte, lopate ahibuale a kung dang khat pawpo a lalsak ngawl natu in, amate tungah thu kipia hi; Pathian ii tepteena a talki tungah a nei ngawl mihingte bek susia thei uh hi.#Eze 9:4 5Khaumawte in mihingte thisak ngawlin, tha nga hun sung teng ngim pia in, a vawtsiat natu bek thu kipia hi. Ngim piakna taw a vawtsiatna in, aikamte ii hong pe ciang, a bot sia taw kibang hi. 6Tua tha nga hun sung teng mihingte in thithei natu lampi a zon uh hang, a mu buatu uh hi; amate in thi nuam tu hikale, thina in amate taisan tu hi.#Job 3:21; Jer 8:3

7Khaumawte sia ngalsim tu in a kinging siphute taw kibang uh hi; a lu tungah khamh taw kivawt kumpi lukhute taw a kibangte nei uh a, a maitangte sia mihingte maitang taw kibang uh hi.#Jol 2:4 8A sam uh sia numeite sam taw kibang a, a ha uh sia tawpi ha taw kibang hi.#Jol 1:6 9A awm uh sia thik awmdalna taw a kibangte taw kituam hi, tuaciang a thaphil nging aw in ngal kidona sungah a tai siphu ngalleang tam mamate ii ngin taw kibang hi.#Jol 2:5 10Amate in mei nei a, aikam mei bangin hong de thei hi. Tua meite taw amate in tha 5 sung teng mihingte a liamsak natu vaang nei uh hi. 11Amate in a uk kumpipa khat nei uh hi, tuasia pa sia a hawng thukpui a uk vantunglalang hi. Ama ii min sia Hebrew kam in Abaddon hi a, Greek kam in Apollyon hi. (“A Susia pa” a cinopna hi)

12Launa a masabel sia bo a, ahihang hisia zawkciangin hong piang tu launa nam nii om lai hi.

13Vantunglalang a lukna sia in, lemle tum hi. Pathian mai ah khamh biaknatau sia ii king li panin, aw khat hong nging ka za hi.#Pu 30:1-3 14A awnging in vantunglalang a lukna sia munah, “Eupharates ngun ah a kiheencip vantunglalang li teng tha vun,” ci hi. 15Vantunglalang li teng kitha hi; tu kum, tu tha, tuni, tu hun lianin mihing theampo ii see thum sua see khat a thalup natu in amate li sia a kingingta sa in kikoi hi. 16Siphu ngalkap awn zanii om hi ci in hong kison hi. 17Ka mukholna sungah siphute le a tung tote ka mu hi; amate in awmdalna sia meikuang bangin a san, sapphire suangmanpha bangin vancii, kaan bangin a eng silh uh hi. A siphute ii lutang sia tawpi lutang taw kibang a, a kam sung pan meikuang, meikhu le kaante hong pusuak hi. 18Mihingte sung pan see thum sua see khat sia siphute kam sung pan hong pusuak ngimna lian nam thum ahi, meikuang, meikhu le kaan in thatlum uh hi. 19Banghang ziam cile siphute vaangneina sia a kam sung le a mei ah om hi. Amate ii meite sia lu nei ngulte taw kibang a, mihingte a liamsak natu in zangh uh hi.

20Hi ngimna liante ii thalup mong a taanglai mihingte in amate khut taw a vawttawm uh nate panin a kikheal kik nuam bua uh hi. Doai biakna tawp ngawlin, khamh, ngunn, taau, suang le thing milim khuamu thei ngawl, khuaza thei ngawl, lampai thei ngawlte a biak uh zongh a kheal bua uh hi.#Ps 115:4-7; 135:15-17; Dan 5:23 21Amate in ngual a thalupna, bum le ai toaina, numei le pa paktatna le nguktaknate uh panin a kisiik kik bua uh hi.

Currently Selected:

Thupualaakna 9: SCB2

Highlight

Copy