Thupualaakna 5
5
Laizial le Tuuno
1Kumpi tokhum tung a to pa ziatsang khut sungah laizial khat ka mu hi; tuasia in a lang le lang dim lai ki at a, tepteena sali taw kituum hi.#Eze 2:9-10; Is 29:11 2Tuaciangin vantunglalang a hat mama khat ka mu a, ama in awnging tak taw, “Akua in hi tepteenate a baltham tu le laizial a hong tu in kiphu ziam?” ci in au hi. 3Ahihang vantung ah ahizong, leitung ah ahizong, leinuai ah ahizong, tua lai sia hongin a sung a en thei tu a om bua hi. 4Tua laizial a hong thei tu le, a sung a en thei tu a kiphu kuama kimu ngawl ahikom nasia takin ka kap hi. 5Tua zawkciang upate khat in, kei tungah, “Kap heak in, En in! Judah minam sung panin Tawpi ahi, a lian David suan pa in zawna nga zo a, ama in tepteena salite balthamin laizial hong thei tu hi,” hong ci hi.#Pian 49:9; Is 11:1-10
6Tua zawkciangin kumpi tokhumte laizang, nganhing lite le upate ii a kiim uumna sungah Tuuno khat a ding ka mu hi. Tua Tuuno in a kithatlum sa bang keak ahi hi. Ama in kii sali nei a, mittang sali nei hi, tuate sia Pathian ii thaa salite hi a, leitung bup ah a kipaisakte ahi hi.#Is 53:7; Zec 4:10 7Tuuno in pai in kumpi tokhum tungah a to pa ziatsang khut panin, laizial sia la hi. 8Tuabang a vawt ciangin, nganhing li teng le upa kul le li teng sia Tuuno mai ah boksuk uh hi. Tengtongh khat tek le ngimnamtui taw a kidim khamh khawbeamte nei tek uh a, tuate sia Pathian ii mihingte ii thungetna ahi uh hi.#Ps 141:2 9Amate in la thak sa uh a:
“Nangma in laizial la tu le
tepteena hong tu in na kilawm hi.
Banghang ziam cile nangma
hong kithatlum zo a,
na kipumpiak thina taw,
Pathian atu in, bee le phung sim,
kam namcin sim, ngam sim le
minam sim panin, mihingte na lei zo hi.#Ps 33:3; 98:1; Is 42:10
10Nangma in amate sia
eima ii Pathian na a seam tu in
kumpi thiampite ukna na suaksak zo a,
tuaciang amate in leitung uk tu uh hi.”#Pu 19:6; Tpl 1:6
11Tuaciangin ka et kik le, tul tam mama le awn tam mama a pha vantunglalangte aw ka za hi! Amate in kumpi tokhum, nganhing li teng le upate kiimkot ah dingin, #Dan 7:10 12nging takin lasa uh hi:
“Tuuno a kithatlum sia in
vaang letna, hauna, ciimna, le
thahatna upatna, minthanna le
pokna, a saang tu in kiphu hi!” ci uh hi.
13Tuaciangin vantung, leitung, leinuai, tuipi sung — vaannuai ah nuntakna a nei theampo in hi bangin la a sak ka za hi:
“Kumpi tokhum tungah
a to pa le
Tuuno tungah pokna,
upatna, minthanna le
thahatna a tawntung
a tawntungin om tahen!”
14Nganhing nungta li teng in “Amen!” ci in zo uh hi. Tuaciang upate in boksukin, bia uh hi.
Currently Selected:
Thupualaakna 5: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
