Thupualaakna 6
6
Tepteenate
1Tua zawkciang tepteena salite sung pan a masabel sia Tuuno in a hon ka mu a, nganhing nungta lite sung pan khat in, vanto bang ahi aw taw, “Hong pai ta'n!” hong ci hi. 2Ka et le, siphu kaang khat ka mu hi. A tungah a to pa in thal khat toai a, kumpilukhu khat kipia hi. Ama in ngalzopa ii ngalzo tu in a kuan bangin siphu tungah to in kuan hi.#Zec 1:8; 6:3-6
3Tuaciangin tepteena a niina sia Tuuno in hong a, tuasia ciang nganhing a niina sia in, “Hong pai ta'n!” hong ci hi. 4Siphu dang khat hong pusuak a, a san ahi hi. Mihingte khat le khat a kithalup natu in, a tungah a to pa sia leitung ah ngal kidona piansak natu vaang kipia hi. Ama sia namsau lian khat kipia hi.#Zec 1:8; 6:2
5Tuasia zawkciang tepteena a thumna sia Tuuno in hong a, nganhing a thumna sia in, “Hong pai ta'n!” hong ci hi. Ka et le siphu vom khat om hi. A tungah a to pa in a khut sungah khaikhin kop khat toai hi.#Zec 6:2-6 6Nganhing lite sung pan khat ii aw tu bangin ka zaak khat in, “Ni khat thaman sia zungtaang litre khat, ni khat thaman tu mangtaang litre thum hi. Ahihang olive kungte le sapitkungte na lalsak heak vun!” hong ci hi.
7Tua zawkciang tepteena a lina sia Tuuno in hong a, nganhing nungta a lina sia in, “Hong pai ta'n!” hong ci hi. 8Ka et ciang, siphu a daang khat ka mu hi. A tungah a to pa ii min sia Thina hi a, a nung panin mithi khua in zui hi. #6:8 Mithi khua: hades (see 1:18).Leitung ah a teangte see li sua see khat sia amate in ngal, kialpi, natna le ngamsate taw thalup thei natu in thu kipia hi. #Eze 14:21
9Tua zawkciang tepteena a ngana sia Tuuno in hong hi. Biaknatau nuai ah, Pathian kammalte a thansak uh hu le thumaanna taw tetti a panna hu a, a kithatlumte ii thaate ka mu hi. 10Amate in awnging tak taw au uh a, “Vaanglianpipa Topa, a thiangtho thumaan pa awng! Leitung ah kote hong that mihingte tungah thu na khen tu le, daan na piak tu sia bang tanvei khuangei lai tu ziam?” ci uh hi. 11Amate khat sim sia puantual kaang khat tek kipia hi, tuaciangin amate a kithalup bangma in a nasep puite le a suapuite a thalup nopza a cin mateng a ngak zii lai natu in sawl uh hi.
12Tua zawkciang tepteena a lukna sia Tuuno in a hon ka mu hi. Nasia takin zinliing a, ni sia puanvom bangin hong vomcip a, tha sia chi bangin sancip hi.#Tpl 11:13; 16:18; Is 13:10; Jol 2:10,31; 3:15; Mt 24:29; Mk 13:24-25; Lk 21:25 13Vui nasia takin va a, theikungte a thin ngawp ciang, a nga ungte lei ah a pul bangin aksite lei ah taaksuk uh hi.#Is 34:4 14Van sia laidal pheak kizial bangin bomang a, mual theampo le tuikulh theampo amate omna mun pan kikhiin siat hi.#Tpl 16:20 15Tuasia ciang leitung kumpite le ngamukte, ngalkap maangte, sumhaute, a thahatte, a dang mihing theampo, silate, sila ngawlte, leihawng sung le mualtung suangpite nuai ah buu uh hi.#Is 2:19-21 16Amate in mualte le suangpite munah, “Ko tungah hong cimhsuk ka heu vun a, kumpi tokhum tungah a to pa ii muna pan le Tuuno ii thin uukna panin, hong seal tavun.#Hos 10:8; Lk 23:30 17Amate ii thin uukna a kiitakhuai mama ni sia hi sungah hong theng a, akua in thuak zo tu ziam?” ci uh hi.#Jol 2:11; Mal 3:2
Currently Selected:
Thupualaakna 6: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
